သိုၵ်းမၢၼ်ႈ ဢၼ်ငဝ်ႈတပ်ႉပၵ်းတီႈမိူင်းယႆ ၸိုင်ႈတႆးပွတ်းႁွင်ႇ၊ ဢွၵ်ႇသွၵ်ႈတဝ်ထိူၼ်ႇ၊ ၺႃးႁွႆးတိၼ်သိုၵ်းတႆး ယဝ်ႉ ပွႆႇမၢၵ်ႇလူင်ၼပ်ႉသၢဝ်းလုၵ်ႈ၊ ယိုဝ်းၵွင်ႈႁၢတ်ႇသႂ်ႇၸွမ်းထိူၼ်ႇၸွမ်းလွႆ၊ သွၵ်ႈတဝ်ၼႂ်းသူၼ်ၼႂ်းႁႆႈ၊ တီႉမတ်ႉၵူၼ်းမိူင်းႁၢပ်ႇၶူဝ်းၵႂႃႇၸွမ်းၶဝ် ထဵတ်ႈထၢမ်ပေႃႉထုပ်ႉၸွမ်း။


မိူဝ်ႈဝၼ်းတီႈ 10/09/2017 ၶၢဝ်းယၢမ်းၵၢင်ၼ်ႂ 8 မူင်း၊ သိုၵ်းမၢၼ်ႈတပ်ႉၶမရ 325 မိူင်းယႆ၊ ဢဵၼ်ႁႅင်း 57 ၵေႃႉ ဢၼ်သွၵ်ႈတဝ်ထိူၼ်ႇယူႇ ယိုဝ်းၵွင်ႈၵၢင်ႇ ပွႆႇမၢၵ်ႇလူင် ၾၢႆႇႁွင်ႇဝၢၼ်ႈလွႆယွႆး ဢိူင်ႇပႃႇၵၢင်း ၸႄႈဝဵင်းမိူင်းယႆ။ ႁဵတ်းႁႂ်ႈၵူၼ်းဝၢၼ်ႈလွႆယွႆး တိုၼ်ႇသၢၼ်ႈၵူဝ်ႁႄဢွၼ်ၵၼ်ပၢႆႈ ၶီႇလူတ်ႉၵႃး 3 လမ်း တင်းထူဝ်ႈ ႁွတ်ႈထိုင်ယင်ႉလိုဝ်ႈယူႇသဝ်းဝႆႉတီႈ ၼႂ်းဝၢၼ်ႈၼမ်ႉပူၵ်ႇ ႁူဝ်ၵူၼ်းမီးမွၵ်ႈ 300 ၵေႃႉပၢႆ-ၼႆယဝ်ႉ။


ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- "ဢွၼ်ၼႃႈၼၼ်ႉ မိူဝ်ႈဝၼ်းတီႈ 9/9/2017 သိုၵ်းမၢၼ်ႈတပ်ႉၶမရ 325 ဢၼ်ငဝ်ႈတပ်ႉပၵ်းဝႆႉတီႈမိူင်းယႆၼၼ်ႉ တင်းၸုမ်းပီႇတုႉၸိတ်ႉၼမ်ႉပွင်ႈ 18 ၵေႃႉ ႁူမ်ႈၵၼ်မီးဢဵၼ်ႁႅင်း မွၵ်ႈ 57 ၵေႃႉ လုၵ်ႉတၢင်းမိူင်းယႆၵႂႃႇတၢင်းဝၢၼ်ႈပႃႇၵၢင်း၊ ၼွၼ်းတီႈႁူင်းႁဵၼ်းဝၢၼ်ႈပႃႇၵၢင်းၼိုင်ႈၶိုၼ်း။ သိုပ်ႇၼၼ်ႉ ၶဝ်ဢွၼ်ၵၼ်ဢွၵ်ႇဝၢၼ်ႈၵႂႃႇတၢ င်းဝၢၼ်ႈလွႆယွႆး၊ ၶဝ်ၵႂႃႇၽႃႇၺႃးမၢၵ်ႇလူင် ၾၢႆႇႁွင်ႇဝၢၼ်ႈလွႆယွႆးၼၼ်ႉသေ ၶဝ်ယိုဝ်းၵွင်ႈၾၢႆႇလဵဝ် ဢမ်ႇမီးၽ်ႂယိုဝ်းၶဝ် သဵင်မၢၵ်ႇလူင်တႅၵ်ႈ 3 လုၵ်ႈ"- ဝႃႈၼႆ။

ဝၢၼ်ႈလွႆယွႆးၼႆႉ လင်ႁိူၼ်းမီး 50 လင်၊ ႁူဝ်ၵူၼ်းမီး 300 ၵေႃႉ၊ ယူႇတၢင်းၸဵင်ႇၸၢၼ်းဝၼ်းတူၵ်းမိူင်းယႆ၊ ယၢၼ်မိူင်းယႆမွၵ်ႈ( 20 လၵ်း။ ဝၢၼ်ႈပႃႇၵၢင်း၊ ဝၢၼ်ႈလွႆယွႆး၊ ဝၢၼ်ႈၼမ်ႉပူၵ်ႇ ၸိူဝ်းၼႆႉ ယူႇၼႂ်းဢိူင်ႇပႃႇၵၢင်း ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။


"သိုၵ်းမၢၼ်ႈသွင်ၸုမ်းၶဝ်ႈသွၵ်ႈတဝ်ၼႂ်းထိူၼ်ႇ။ ၸုမ်းဢၼ်လုၵ်ႉတၢင်းမိူင်းယႆ ၶဝ်ႈမႃးတႄႉ ၶဝ်ႈမႃးၽႃႇၺႃး မၢၵ်ႇၼႂ်းၵႄႈၵၢင်ပႃႇၵၢင်းလႄႈလွႆယွႆး၊ ယိုဝ်းၵွင်ႈယူႇၾၢႆႇလဵဝ်၊ မိူဝ်ႈလဵဝ် သိုၵ်းမၢၼ်ႈၸုမ်းၼႆႉႁၢႆဝႆႉ ၼႂ်းထိူၼ်ႇ။ ထႅင်ႈၸုမ်းၼိုင်ႈသမ်ႉ လုၵ်ႉတၢင်းသွင်ၵႄးၶဝ်ႈၵႂႃႇတၢင်းဝၢၼ်ႈၽႃတုပ်ႇ ၸႄႈဝဵင်းသီႇပေႃႉ၊ ၵႂႃႇမီးဝႆႉတီႈပႃႇႁဵဝ်ႈဝၢၼ်ႈႁူဝ်ၶၢႆးမွၵ်ႈၵူၼ်း 80-100 ၵေႃႉ။ ဝၢၼ်ႈႁူဝ်ၶၢႆးၼႆႉ ယၢၼ်သႅင်ၵႅဝ်ႉမွၵ်ႈၼိုင်ႈလၵ်း"- ၵူၼ်းၼႂ်းပိုၼ်ႉတီႈ သိုပ်ႇလၢတ်ႈ။


ပိူင်ပဵၼ်လွင်ႈသိုၵ်းမၢၼ်ႈယိုဝ်းၵွင်ႈ ပွႆႇမၢၵ်ႇပွၵ်ႈၼႆႉ မိူဝ်ႈဝၼ်းတီႈ 10/09/2017 ၼၼ်ႉ သိုၵ်းမၢၼ်ႈတပ်ႉၶမရ 325 မိူင်းယႆၼႆႉ ဢွၵ်ႇသွၵ်ႈတဝ်ထိူၼ်ႇသေ ၶၢဝ်းယၢမ်းၵၢင်ၼ်ႂ 9 မူင်း ၼၼ်ႉ ၵႂႃႇႁူပ်ႉသႂ်ႇၵူၼ်းဝၢၼ်ႈ ၸိုဝ်ႈသၢင်ႇလႃႉ တီႈၾၢႆႇၸၢၼ်းဝၢၼ်ႈလွႆယွႆး တီႈႁိမ်းႁႆႈ၊ ၽွင်းမၼ်းၸၢႆးၵႂႃႇသူင်ႇၶဝ်ႈၵူၼ်းႁဵတ်းႁႆႈသေ ပွၵ်ႈႁိူၼ်း။ သိုၵ်းမၢၼ်ႈတီႉမတ်ႉ ႁွင်ႉဢဝ်မၼ်းၸၢႆးၵႂႃႇၸွမ်းၶဝ်။ ဢွၵ်ႇၵႂႃႇၼႃႈတၢင်းၸၢၼ်း ႁိုင်မွၵ်ႈ 10 မိၼိတ်ႊၼၼ်ႉ သိုၵ်းမၢၼ်ႈၶဝ်ၵႂႃႇႁၼ် ႁွႆးတိၼ်သိုၵ်းတႆးလႄႈ ၶဝ်ပွႆႇမၢၵ်ႇလူင်မွၵ်ႈ 20 လုၵ်ႈ၊  ၼိုင်ႈၵမ်းပွႆႇမွၵ်ႈ 5 ၊ တင်းမူတ်းပွႆႇမွၵ်ႈ 5 ၵမ်း။ ပွႆႇမၢၵ်ႇလူင်ယဝ်ႉ ဢဝ်ၵွင်ႈယိုဝ်းၸွမ်းထိူၼ်ႇၸွမ်းလွႆၸိူဝ်းၼၼ်ႉသေ ၸႂ်ႉၵူၼ်းသိုၵ်းၶဝ်သွၵ်ႈတဝ်ၸွမ်းသူၼ်ႁႆႈၶဝ်ႈၵၢပ်ႇ ႁိမ်းႁွမ်းၸိူဝ်းၼၼ်ႉ။


ယွၼ်ႉသိုၵ်းမၢၼ်ႈသွၵ်ႈတဝ်သေ ၵႂႃႇႁူပ်ႉၺႃးၸၢႆးသၢင်ႇၵျေႃႇ တီႈၼႂ်းႁႆႈ ဢၼ်ၵႂႃႇၼွၼ်းပႂ်ႉႁႆႈ။ သိုၵ်းမၢၼ်ႈလိုဝ်ႈ ယူႇၸွမ်းႁိမ်းႁွမ်းႁႆႈႁိုင်မွၵ်ႈလၢႆလၢႆၸူဝ်ႈမူင်းသေ ႁွင်ႉၸၢႆးသၢင်ႇၵျေႃႇၸႂ်ႉတဵင်ႇၶူဝ်းၵႂႃႇၸွမ်းၶဝ်။ ထိုင်မႃးဝၢႆးဝၼ်း ၶၢဝ်းယၢမ်း 3 မူင်းၶိုင်ႈ ဢွၵ်ႇႁႆႈၵႂႃႇတင်းၸၢၼ်း မိူဝ်ႈၸမ်ထိုင်တၢင်းတူၵ်းၼမ်ႉယူၼ်းၼၼ်ႉ ၵႂႃႇထူပ်းသႂ်ႇၵူၼ်းဝၢၼ်ႈ ၸိုဝ်ႈသၢင်ႇၵွၼ်း၊ ၽွင်းမၼ်းၸၢႆးတိုၵ်ႉႁေႃႈၵႂၢႆးၵႂႃႇၼႃႈၵၢၼ်သေ တီႉမတ်ႉၵႂႃႇၸွမ်းၶဝ်။ သၢင်ႇၵွၼ်းၼႆႉ ယွၼ်ႉသိုၵ်းမၢၼ်ႈႁၼ်မႅၼ်ႈၸၢၵ်ႈလၢတ်ႈ (ဝေႃး)တီႈတူဝ်မၼ်းလႄႈ တီႉမတ်းမၼ်းၵႂႃႇၸွမ်းၶဝ်-ၼႆယဝ်ႉ။


ၸိူဝ်းၶဝ်သၢမ်ၵေႃႉၼႆႉပဵၼ် 1.ၸၢႆးသၢင်ႇလႃႉ ဢႃယု29 ပီ၊ လုၵ်ႈလုင်းဢေႃး ပႃႈၵျႃႇ၊ ယူႇဝၢၼ်ႈလွႆယွႆး။ 2.သၢင်ႇၵျေႃႇ ဢႃယု 36 ၊ လုၵ်ႈၸၢႆးလုင်းထုၼ်း-ပႃႈၵူမ်း၊ ယူႇဝၢၼ်ႈၼႃးလၢၼ်ႇ ဢိူင်ႇပႃႇၵၢင်း ၸႄႈဝဵင်းမိူင်းယႆ။ 3.သၢင်ႇၵွၼ်း ဢႃယု 32 ပီ၊ လုၵ်ႈၸၢႆး လုင်းၸၼ်ႇတႃႇ-ပႃႈမူၼ်း ဝၢၼ်ႈလွႆယွႆး။ သိုၵ်းမၢၼ်ႈၶဝ်ဢဝ်ၵႂႃႇၶင်ဝႆႉ တီႈဝၢၼ်ႈၼမ်ႉပူၵ်ႇ၊ ၼွၼ်းတီႈဝၢၼ်ႈၼမ်ႉပူၵ်ႇၼိုင်ႈၶိုၼ်း။ ပူႇသူၺ်ႇဝၢၼ်ႈၼမ်ႉပူၵ်ႇ ႁပ်ႉႁွင်း (ထွၵ်ႈၶၢမ်ႇ)ဢဝ်ၶဝ်သၢမ်ၵေႃႉလႄႈ သိုၵ်းမၢၼ်ႈၶဝ်ၸင်ႇပွႆႇပၼ် ပွၵ်ႈၶိုၼ်းႁိူၼ်း-ၼႆယဝ်ႉ။

တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း ဝႃႈၼႆ။


ဝၼ်းတီႈ 22/08/2017 ယၢမ်းဝၢႆးဝၼ်း မွၵ်ႈ 4 မူင်း တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၵွင်ၶမရ 520 ၾၢႆႇတႂ်ႈ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 17 မိူင်းပၼ်ႇ တင်း ပႃႇတီႇမႂ်ႇ သုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA  ပဵၼ်ပၢင်တိုၵ်းၵၼ် ႁိမ်းဝၢၼ်ႈပၢင်ၶၢမ် ၼႂ်းၵႄႈ မိူင်းသူႈတင်း မိူင်းၸၢင် ၸႄႈဝဵင်းမိူင်းသူႈ ၸႄႈ တွၼ်ႈလွႆလႅမ် ၸိုင်ႈတႆး ပွတ်းၸၢၼ်း ဝႃႈၼႆ။

ၸၢႆးၽူင်းႁၢၼ် ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA လၢတ်ႈဝႃႈ “ ၸွမ်းသၼ်လွႆ ၸိူဝ်းၼၼ်ႉ တပ်ႉႁဝ်းၶႃႈပၵ်းသဝ်းဝႆႉ။ တပ်ႉသိုၵ်းလူင်ပွင်ၸိုင်ႈ ၶမရ 520 တင်း 521 ႁူမ်ႈၵၼ် ဢဵၼ် ႁႅင်း မွၵ်ႈ 80 ၵႂႃႇ တူင်ႉၼိုင်သွၵ်ႈတဝ် တၢင်းပွတ်းတွၼ်ႈၼၼ်ႉလႄႈ သွင်ၾၢႆႇလႆႈပဵၼ်ပၢင်တိုၵ်းၵၼ်” ဝႃႈၼႆ။


ပၢင်တိုၵ်းၵမ်းၼႆႉ တင်းသွင်ၾၢႆႇ မီးလွင်ႈတိူဝ်ႉမၢတ်ႇၼင်ႇၵၼ်ဝႃႈၼႆသေ ႁူဝ်ယွႆႈမီးၸိူင်ႉႁိုဝ် ယင်းပႆႇလႆႈ ၶေႃႈမုလ်းယိုၼ်ယၼ်။


ၼၢင်းၸိင်ႇ ၵူၼ်းမိူင်းၸႄႈဝဵင်းမိူင်းသူႈ လၢတ်ႈဝႃႈ “ မိူဝ်ႈၵူႈပွၵ်ႈတႄႉ ပေႃးပဵၼ်ပၢင်တိုၵ်း ႁၼ်သိုၵ်း တူင်ႉ ၼိုင်ၵႂႃႇမႃးၼမ်။ ပွၵ်ႈၼႆႉတႄႉ ဢမ်ႇႁၼ်လၢၵ်ႇလၢႆးသင် မိူၼ်ၵဝ်ႇၵူၺ်း။ ႁဝ်းၶႃႈတႄႉ ဢမ်ႇၶႂ်ႈႁႂ်ႈပဵၼ်ပၢင်တိုၵ်း၊ ပေႃးပဵၼ်ပၢင်တိုၵ်း ၵူၼ်းမိူင်းႁႃၵိၼ်ဝၼ်းလႂ် ဝၼ်းၼၼ်ႉ ၸိူင်ႉႁဝ်းၶႃႈၼႆႉ ယၢပ်ႇၽိုတ်ႇ/တုၵ်ႉၶ ၼႃႇ” ဝႃႈၼႆ။


မိူဝ်ႈႁူဝ်ပီ 2017 ၼႆႉ တၢင်းပွတ်းတွၼ်ႈၼႆႉ သိုၵ်းလူင်ပွင်ၸိုင်ႈမၢၼ်ႈတင်း SSPP/SSA ပဵၼ်ပၢင်တိုၵ်းၵၼ်လၢႆၵမ်း။ ၽွင်းၼၼ်ႉ တင်းသွင်ၾၢႆႇတိူဝ်ႉမၢတ်ႇၸဵပ်းၼမ် လူႉသုမ်းၼင်ႇၵၼ် တင်းၼမ် ဝႃႈၼႆ။


ၽွင်းပဵၼ်ပၢင်တိုၵ်းၵၼ်ၼႆႉ တၢင်းပွတ်းပၢင်သၢင်းငဝ်ႈငုၼ်းဝႃႉUWSA ၼၼ်ႉ ပႃႇတီႇမႂ်ႇသုင်ၸိုင်ႈတႆး/ တပ်ႉ သိုၵ်းၸိုင်ႈတႆး SSPP/SSA ၶဝ်ႈပႃး ၼႂ်းၸုမ်းဢူၺ်းလီပွတ်းႁွင်ႇ 7 ၸုမ်း ဢၼ်ၶွတ်ႇ ၽွတ်ႈၶွမ်ႊမတီႊဢုပ်ႇဢူဝ်း လွင်ႈငမ်းယဵၼ် မိူင်းႁူမ်ႈတုမ်ယူႇၼၼ်ႉ။ ထႅင်ႈၾၢႆႇၼိုင်ႈ ပၢင်တိုၵ်းၵေႃႈသမ်ႉပဵၼ်ယူႇ- ၼႆယဝ်ႉ။

သိုၵ်းလူင်ပွင်ၸိုင်ႈမၢၼ်ႈ တႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ ရမၶ လႃႈသဵဝ်ႈ ဢၼ်ၵႂႃႇမႃးတူင်ႉၼိုင် ဝူင်ႈၵၢင် ၼမ်ႉတူႈ လႃႈသဵဝ်ႈၼၼ်ႉ ယူႇၼႂ်းဝၢၼ်ႈဢီႇၼၢႆး(သၢပ်ႇဝဵင်းလႃႈသဵဝ်ႈ) သေ ယိုဝ်းလူတ်ႉၵႃး 2 လမ်း ႁဵတ်းႁႂ်ႈ ၵူၼ်းဝၢၼ်ႈတူၵ်းၸႂ်ၵူဝ်ႁႄ။


ပူၼ်ႉမႃး မိူဝ်ႈဝၼ်းတီႈ 08/08/2017 ယၢမ်းႁူဝ်ၶမ်ႈ 5 မူင်းပၢႆၼၼ်ႉ သိုၵ်းမၢၼ်ႈဢၼ်တူင်ႉၼိုင်ၵႂႃႇမႃး ယူႇသဝ်း ဝႆႉတီႈၼႂ်းဝၢၼ်ႈဢီႇၼၢႆး ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ယူႇၼႂ်း ဝၢၼ်ႈသေ ယိုဝ်းလူတ်ႉ ၵႃး 2 လမ်း ဢၼ်လုၵ်ႉတၢင်း ၸႄႈဝဵင်းၼမ်ႉတူႈ မုင်ႈၸူးလႃႈသဵဝ်ႈ။ မၢၵ်ႇၵွင်ႈဢၼ်ယိုဝ်းလူတ်ႉၵႃးၼၼ်ႉ တိူဝ်ႉၸပ်းႁိူၼ်းၵူၼ်းဝၢၼ်ႈ။ ႁဵတ်းႁႂ်ႈၵူၼ်းဝၢၼ်ႈၵူၼ်းသူၼ် တူၵ်းၸႂ် ၵူဝ်ႁႄ။ ၵဵဝ်ႇၵပ်း လွင်ႈၼႆႉ ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ တေႁဵတ်းလိၵ်ႈထၢမ်ၸူး ၼႂ်းသၽႃး တႃႇႁႂ်ႈၽူႈမီးပုၼ်ႈၽွၼ်းၶဝ်ၵႄႈလိတ်ႈပၼ်။

ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ လၢတ်ႈဝႃႈ “ ၸွမ်းၼင်ႇႁဝ်းၶႃႈ ပဵၼ်တူဝ်တႅၼ်းၵူၼ်းမိူင်းလႄႈ ၵူၼ်းမိူင်းၵေႃႈမီးတၢင်းယၢပ်ႇ ၶဝ်ၵေႃႈ ဢမ်ႇၶႂ်ႈႁႂ်ႈပဵၼ် ၵမ်းၵမ်းပဵၼ်ၵေႃႈ လႆႈမႆႈၸႂ်။ ယွၼ်ႉယိုဝ်းၵႂႃႇ ၵႃႈဝႃႈ ၵႃႈပဵၼ်လႄႈ  ၾႆးၸၢင်ႈမႆႈႁိူၼ်းၼႄႇ၊ ၸၢင်ႈတိူဝ်ႉၵူၼ်းတၢႆၼႄႇ။ ပေႃးဢမ်ႇတူၵ်ႇဢမ်ႇလၢတ်ႈ  တေပဵၼ် ထႅင်ႈဝၼ်းလႂ်ဢမ်ႇၸၢင်ႈဝႃႈ။ ပေႃးၵူၼ်းမိူင်းမီး တၢင်းယၢပ်ႇၽိုတ်ႇၵေႃႈ ၵႃႈတေလႆႈၵႄႈလိတ်ႈ။ တေႁဵတ်း လိၵ်ႈထၢမ်ၵႂႃႇတီႈ ၽူႈၵဵဝ်ႇၶွင်ႈၶဝ် တီႈၼႂ်းသၽႃး ႁႂ်ႈၶဝ်တွပ်ႇမႃးဝႃႈ တေႁဵတ်း ႁိုဝ်ပၼ် မိူဝ်းၼႃႈ ၼင်ႇႁိုဝ် တေဢမ်ႇႁႂ်ႈမီးလွင်ႈၸိူင်ႉၼႆထႅင်ႈ တေဢဝ်လွင်ႈတၢင်းဢၼ်ပဵၼ်ၼႆႉသေ တၢင်ႇ ၶိုၼ်ႈၵႂႃႇ၊ တေႃႈလဵဝ်ၼႆႉ တိုၵ်ႉႁၢင်ႈ ႁႅၼ်းဝႆႉယူႇ တေတၢင်ႇၶိုၼ်ႈဝၼ်းလႂ်ၼၼ်ႉတႄႉပႆႇႁူႉ” ဝႃႈၼႆ။


ၵဵဝ်ႇၵပ်းလွင်ႈၼႆႉ လူတ်ႉၵႃးသွင်လမ်း လုၵ်ႉတၢင်းၼမ်ႉတူႈ ၶဝ်ႈမႃးတၢင်းလႃႈသဵဝ်ႈ ၽၢၼ်ႇမႃးတၢင်း ဝၢၼ်ႈဢီႇၼၢႆး ၾၢႆႇတပ်ႉသိုၵ်းမၢၼ်ႈ ႁႄႉၵိုတ်း။  လူတ်ႉၵႃးသွင်လမ်းၼႆႉသမ်ႉ ဢမ်ႇၵိုတ်း လႄႈ သိုၵ်းမၢၼ်ႈ ဢၼ်ယူႇၼႂ်း ဝၢၼ်ႈဢီႇၼၢႆးၼၼ်ႉ ပႂ်ႉယိုဝ်း။ တီႈတႄႉယူႇၼွၵ်ႈဝၢၼ်ႈသေ ႁၢမ်ႈႁႄႉၵူတ်ႇထတ်း၊ သိုၵ်းမၢၼ်ႈၼၼ်ႉ သမ်ႉဢမ်ႇ ပႂ်ႉယိုဝ်း သမ်ႉမႃးယိုဝ်းတီႈၼႂ်းၵၢင်ဝၢၼ်ႈလႄႈ ဢမ်ႇထုၵ်ႇလီပဵၼ် ဝႃႈၼႆ။


ယွၼ်ႉၼၼ် မၢၵ်ႇဢၼ်သိုၵ်းမၢၼ်ႈယိုဝ်းသႂ်ႇၵႃးသွင်လမ်းၼၼ်ႉ တိူဝ်ႉၺႃးၵႃးလမ်းၼိုင်ႈ တိူဝ်ႉႁိူၼ်းၵူၼ်းဝၢၼ်ႈ 3 လင် ၽူႈယိင်းဢႃယုၶၢဝ်ႉၵႄႇၵေႃႉၼိုင်ႈ တိုၵ်ႉၶၢႆတၢင်းၶၢႆယူႇၼႂ်းဝၢၼ်ႈၼၼ်ႉ တူၵ်းၸႂ်ၵူဝ်ႁႄ ပဵၼ်လူမ်းပိၼ်ႈ လူမ်ႉ ၵႂႃႇ။ ဢၼ်ယိုဝ်းလူတ်ႉၵႃး၊ လူတ်ႉၶိူင်ႈၼႂ်းဝၢၼ်ႈဢီႇၼၢႆးၼႆႉ မီး 2 ပွၵ်ႈယဝ်ႉ ဝႃႈၼႆ။

ၵူၼ်းမိူင်း ၵူၼ်းပၢႆႈၽေးသိုၵ်း ၸိူဝ်းမႃး ယူႇဝႆႉတီႈဝဵင်းၼမ်ႉတူႈ မိူဝ်ႈႁူဝ်လိူၼ်ၼႆႉ ယၢမ်းလဵဝ် ဢွၼ်ၵၼ်ပွၵ်ႈၶိုၼ်း ႁိူၼ်းၽႂ်မၼ်း ယွၼ်ႉမႆႈၸႂ် ၵၢၼ်ၽုၵ်ႇသွမ်ႈတႃႇႁႃၵိၼ်လဵင်ႉတွင်ႉ။


ဝၼ်းတီႈ 12/08/2017 ယၢမ်းၵၢင်ၼႂ် 9 မူင်း ၶွမ်ႊမတီႊၾၢႆႇလူလွမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ ႁၢင်ႈႁႅၼ်း လူတ်ႉၵႃးသေ သူင်ႇပီႈၼွင်ႉၵူၼ်းပၢႆႈၽေးသိုၵ်း ၸိူဝ်းပၢႆႈမႃးယူႇသွၼ်ႈသဝ်း တီႈဝတ်ႉပုပ်ႉပႃႇရူင်ႇ ပွၵ်ႉ 10 ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ လႆႈသူင်ႇပွၵ်ႈၶိုၼ်းႁိူၼ်းယေး ၽႂ်မၼ်းၶိုၼ်း ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈၶွမ်ႊမတီႊၾၢႆႇလူလွမ်ၵူၼ်းပၢႆႈၽေးသိုၵ်းၸႄႈဝဵင်းၼမ်ႉတူႈ လၢတ်ႈဝႃႈ “- ပွၵ်ႈမိူဝ်း မူတ်းယဝ်ႉ ယူႇတီႈၸုမ်းၶွမ်ႊမတီႊ ႁဝ်းၶႃႈ ၸႄႈဝဵင်းၼမ်ႉတူႈ လႆႈႁၢင်ႈႁႅၼ်းလူတ်ႉၵႃး 3-4 လမ်းသေ သူင်ႇပၼ်။ ယွၼ်ႉ ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ။ ၶူဝ်းၶွင်/ သိူဝ်ႈၽႃႈ ၶူဝ်းလဵင်း ဢၼ်ပိူၼ်ႈမႃးတွၼ်ႈ ၵေႃႈၼမ် ” ဝႃႈၼႆ။


ၵူၼ်းပၢႆႈၽေးသိုၵ်းၼႆႉ လုၵ်ႉတၢင်း ဢိူင်ႇၶိူဝ်းၶိုၼ်ႈ ၸႄႈဝဵင်းၼမ်ႉသၼ်ႇသေ ပၢႆႈၽေးသိုၵ်းမႃးယူႇ တီႈ ဝတ်ႉပုပ်ႉပႃႇရူင်ႇ ပွၵ်ႉ 8 ၸႄႈဝဵင်းၼမ်ႉတူႈ တင်းမူတ်း လင်ႁိူၼ်း 68 လင်ႁိူၼ်း၊ ႁူဝ်ၵူၼ်း 242 ၵေႃႉ ဝႃႈၼႆ။


ၵဵဝ်ႇၵပ်းလွင်ႈၼႆႉ ယွၼ်ႉသိုၵ်းမၢၼ်ႈတင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁိမ်းဝၢၼ်ႈငၢဝ်ႈသေ ၵူၼ်း ဝၢၼ်ႈၵူၼ်းသူၼ် တိုၼ်ႇသၢၼ်ႈၵူဝ်ႁႄလႄႈ ၸင်ႇဢွၼ်ၵၼ်ပၢႆႈမႃးတၢင်း ဝဵင်းၼမ်ႉတူႈ။ ၵူၼ်းၼုမ်ႇၵူၼ်း ၵမ်တႄႉ ယွၼ်ႉလူဝ်ႇတူၺ်းႁႆႈ၊ တူၺ်းသူၼ်လႄႈ  ဢွၼ်ၵၼ်မူၵ်း ယူႇၸွမ်းႁိမ်းႁွမ်းဝၢၼ်ႈၵေႃႈမီး ဝႃႈၼႆ။


ပူၼ်ႉမႃး ဝၼ်းတီႈ 4 လိူၼ်ဢေႃႊၵတ်ႉသ် 2017 ယၢမ်းၵၢင်ၼႂ် ပူၼ်ႉမႃးၼၼ်ႉ သိုၵ်းမၢၼ်ႈ တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် တၢင်းၶဝ်ႈၸႄႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇ။ ဝၢႆးလင် ပဵၼ် ပၢင်တိုၵ်းၵၼ်ယဝ်ႉ သိုၵ်းမၢၼ်ႈ ဢိုတ်းသဵၼ်ႈတၢင်းၶဝ်ႈဝဵင်းဢွၵ်ႇဝဵင်းမၢၼ်ႈတူင်ႈမႃး ထိုင်ယၢမ်းလဵဝ် ႁဵတ်းႁႂ်ႈၵူၼ်း မိူင်း ထူပ်းတၢင်းယၢပ်ႇၽိုတ်ႇ တင်း ၼမ်လၢႆ ဝႃႈၼႆ။

ၵူၼ်းဝၢၼ်ႈၵူၼ်းသူၼ် ၸႄႈဝဵင်းၼမ်ႉသၼ်ႇ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ် တီႈၸႄႈဝဵင်းၼမ်ႉတူႈ ႁူဝ်ၵူၼ်း 242 ၵေႃႉ ယွၼ်ႉ တပ်ႉသိုၵ်းမၢၼ်ႈတင်း တပ်ႉသိုၵ်းတဢၢင်း TNLA  ပဵၼ်ပၢင်တိုၵ်းၵၼ်။


ဝၼ်းတီႈ 08/08/2017 ယၢမ်းၵၢင်ၶမ်ႈ ပီႈၼွင်ႉၵူၼ်းမိူင်း ဝၢၼ်ႈငၢဝ်ႈ ဢိူင်ႇၶိူဝ်းၶိုၼ်ႈ ၸႄႈဝဵင်းၼမ်ႉသၼ်ႇ ဢွၼ် ၵၼ်ပၢႆႈၽေးသိုၵ်း ႁွတ်ႈၽႅဝ်မႃး တီႈဝတ်ႉၵျွင်းပူပ်ႉပႃႇရူင်ႇ ပွၵ်ႉ 8 ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။ တင်းမူတ်းလင်ႁိူၼ်း ဢၼ်ပၢႆႈမႃး မီး 68 လင်ႁိူၼ်း၊ ႁူဝ်ၵူၼ်း 242 ၵေႃႉ ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇလူလွမ်ၸွႆႈထႅမ်ၵူၼ်းပၢႆႈၽေး ဝဵင်းၼမ်ႉတူႈလၢတ်ႈဝႃႈ “ ၵူၼ်းဝၢၼ်ႈ ၵူၼ်းသူၼ် လႆႈငိၼ်းပဵၼ်ပၢင်တိုၵ်းၼႆသေ ဢွၼ်ၵၼ်ငိူင်ႉဝႄႈဢွၵ်ႇမႃး ပၢင်တိုၵ်းတႄႉ ပဵၼ်တီႈႁိမ်းဝၢၼ်ႈၼွၵ်ႈဝၢၼ်ႈ ဢမ်ႇၸႂ်ႈပဵၼ်ၼႂ်းဝၢၼ်ႈ၊ ႁဵတ်းႁႂ်ႈၵူၼ်းဝၢၼ်ႈ ၵူၼ်းသူၼ် ဢွၼ်ၵၼ်ၵူဝ် သေ ပၢႆႈဢွၵ်ႇမႃး တၢင်းၼမ်ႉတူႈ။ ၵမ်ႈၽွင်ႈ ၵေႃႈ တိုၵ်ႉမီးၸွမ်းႁိမ်းဝၢၼ်ႈၸိူဝ်းၼၼ်ႉယူႇ ၶဝ်ပႆႇမႃးထိုင်တီႈၼႆႈမူတ်း၊ ဢၼ်ပၢႆႈမႃးၵမ်ႈၼမ်တႄႉ ပဵၼ်လုၵ်ႈဢွၼ်ႇ တင်း ၵူၼ်းထဝ်ႈ” ဝႃႈၼႆ။


ၶွမ်ႊမတီႊၾၢႆႇလူလွမ်ၸွႆႈထႅမ်ၵူၼ်းပၢႆႈၽေး ဝဵင်းၼမ်ႉတူႈ လႆႈႁၢင်ႈႁႅၼ်းတမ်းဝၢင်းဢွင်ႈတီႈ လႄႈလဵင်ႉလူတူၺ်း ထိုင်ပၼ် လွင်ႈၶဝ်ႈၼမ်ႉတၢင်းၵိၼ်  ၸိူဝ်းၼၼ်ႉ ဝႃႈၼႆ။


လုင်းၸၢႆးပႃႉၺၢၼ်ႇ သိုပ်ႇလၢတ်ႈထႅင်ႈဝႃႈ လွင်ႈၶဝ်ႈၼမ်ႉတၢင်းၵိၼ်တႄႉ ႁဝ်းၶႃႈလႆႈဢဝ်ၶဝ်ႈသၢၼ် ဢၼ်ၵိုတ်းလိူဝ် ဝႆႉ ၶွင်ၵူၼ်းပၢႆႈၽေးပွၵ်ႈဢွၼ်တၢင်းၼၼ်ႉသေ ၶိုၼ်းႁုင်လဵင်ႉၵၼ်ၶိုၼ်း၊ လွင်ႈၽၵ်းယိူဝ်ႈၼၢင်းၶဵဝ်တႄႉ ႁဝ်းၶႃႈ လႆႈၵႂႃႇဢဝ် တီႈၸႄႈဝဵင်းၼမ်ႉတူႈသေ မႃးႁဵတ်းလဵင်ႉၵၼ်။ ထႅင်ႈလွင်ႈၼိုင်ႈၵေႃႈ တုၵ်းယွၼ်းထိုင် သင်ဝႃႈမီး ၽူႈမီး ၼမ်ႉၸႂ်ၶဝ်၊ ၸဝ်ႈတႃႇၼၶဝ် ၸုမ်းတူင်ႉၼိုင်တူင်ႇဝူင်းလႂ် ဢမ်ႇဝႃႈတီႈၸမ်/ၵႆ ႁဝ်းၶႃႈ  ႁူမ်ၸူမ်းႁပ်ႉ တွၼ်ႈလွင်ႈ ၵမ်ႉၸွႆႈယူႇၶႃႈ” ဝႃႈၼႆ။


ၵဵဝ်ႇၵပ်းလွင်ႈၼႆႉ မိူဝ်ႈပူၼ်ႉမႃး ဝၼ်းတီႈ 4 လိူၼ်ဢွၵ်ႊၵတ်ႉသ် 2017 ယၢမ်းၵၢင်ၼႂ် ပူၼ်ႉမႃးၼၼ်ႉ သိုၵ်းမၢၼ်ႈ တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် တၢင်းၶဝ်ႈၸႄႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇ။ ဝၢႆးလင် ပဵၼ် ပၢင်တိုၵ်းၵၼ်ယဝ်ႉ သိုၵ်းမၢၼ်ႈ ဢိုတ်းသဵၼ်ႈတၢင်းၶဝ်ႈဝဵင်းဢွၵ်ႇဝဵင်းမၢၼ်ႈတူင်ႈမႃး ထိုင်ယၢမ်းလဵဝ် ႁဵတ်းႁႂ်ႈၵူၼ်း မိူင်း ထူပ်းတၢင်းယၢပ်ႇၽိုတ်ႇ တင်းၼမ်လၢႆ ဝႃႈၼႆ။

သိုၵ်းဝႃႉ UWSA ယိုတ်းဢဝ်ပိုၼ်ႉတီႈလိၼ်၊ ဝၢၼ်ႈ၊ သူၼ်၊ ႁႆႈ ၊ ၼႃးၵူၼ်းဝၢၼ်ႈတႃႇ သၢင်ႈဝဵင်းမႂ်ႇ ၾၢႆႇဢွၵ်ႇမိူင်းပွၵ်ႉ - ၸႄႈဝဵင်းမိူင်းယၢင်း ၸႄႈတွၼ်ႈၵဵင်းတုင် မိူင်းတႆးပွတ်းဢွၵ်ႇ။


ႁူဝ်လိူၼ်ၵျူႊလၢႆႊ 2017 ၼႆႉ တပ်ႉသိုၵ်းဝႃႉ UWSA တႄႇသၢင်ႈဝဵင်းမႂ်ႇ ထႆလွႆသၢမ်ႁူၺ်ႇ လူင်းထူမ် ႁႆႈၼႃး၊ ယိုတ်းဢဝ်တီႈလိၼ်ဝၢၼ်ႈ၊ သူၼ်၊ႁႆႈ၊ ၼႃးၵူၼ်းဝၢၼ်ႈလႃးႁူ၊ ဢႃးၶႃႇ၊ ၶၢင်၊ လွႆတႆးၸိူဝ်းၼႆႉ မိူၼ်ၼင်ႇဝၢၼ်ႈၵျႃတေႃႇၶႃး၊ဝၢၼ်ႈၸၢဝ်းလႃးႁူႇ လင်ႁိူၼ်း32လင်ႁူဝ်ၵူၼ်း 100 ပၢႆ လႆႈပၢႆႈ ၾၢႆႇၸဝ်ႈၼႃႈတီႈသိုၵ်းဝႃႉဢမ်ႇသၢႆႈတႅၼ်းပၼ်သင်ဝႃႈၼႆ။

ဢူးဢၢႆႈၼပ်း ၵူၼ်းၼႂ်းပိုၼ်ႉတီႈလၢတ်ႈဝႃႈ “ ၶဝ်မီးၶူင်းၵၢၼ်တႃႇၵေႃႇတင်ႈဝဵင်းမႂ်ႇ တေႃႈလဵဝ် ဢၼ်လႆႈၶၢႆႉပၢႆႈတႄႉ ဝၢၼ်ႈၵျႃတေႃႇၶႃး ပဵၼ်ဝၢၼ်ႈလႃးႁူႇ မီးလင်ႁိူၼ်း 32 လင် ၵွၼ်ႇတေပၢႆႈ ၼၼ်ႉၵေႃႈ ၸဝ်ႈၼႃႈတီႈဝႃႉၶဝ်ႁႂ်ႈလူင်းလၢႆးမိုဝ်းဝႃႈ ၽွမ်ႉၸႂ်သေၶၢႆႉပၼ် ပေႃးၵေႃႇတင်ႈဝဵင်းမႂ်ႇယဝ်ႉ တေလႆႈၶိုၼ်းတီႈလိၼ် ၼႆသေတႃႉ တေႃႈလဵဝ်ၵူၼ်းမိူင်းတႄႉ ထူပ်းတၢင်းယၢပ်ႇၽိုတ်ႇ ” ဝႃႈၼႆ။


ဢႃးၽူင်ႇ ၽူႈၵွၼ်းတပ်ႉၵွင်ၼႂ်းသိုၵ်းဝႃႉ UWSA  ဢၼ်ပၵ်းသဝ်းတီႈမိူင်းပွၵ်ႉ လၢတ်ႈဝႃႈ - “ ဢၼ်ႁဝ်းၶႃႈႁဵတ်းၶူင်းၵၢၼ်ၼႆႉ တႃႇႁႂ်ႈၵူၼ်းဝၢၼ်ႈ ၵူၼ်းမိူင်းလႆႈယူႇလီၵိၼ်လီ ၶိုတ်းၵၢပ်ႈၶိုတ်း ပၢၼ်ၼႆလႄႈ ႁဝ်းၶႃႈၵေႃႈ ႁဵတ်းသၢင်ႈမႃး တေႃႈလဵဝ်ၼႆႉလႆႈၽဵဝ်ႈၼႃႈလိၼ်မွၵ်ႈ 3,000 ဢေႊၶိူဝ်ႊယဝ်ႉ  ” ဝႃႈၼႆ။


ဝဵင်းမႂ်ႇၼႆႉယိူင်းဢၢၼ်းတေႁဵတ်းႁႂ်ႈယဝ်ႉၼႂ်းပီ 2018 ႁႂ်ႈၵူၼ်းမိူင်းၸဵဝ်းလႆႈယူႇ။ တေႃႈလဵဝ်တိုၵ်ႉ ၶုတ်းလိၼ်ထူမ်လိၼ် သႂ်ႇၼႂ်းတူင်ႈႁႆႈတူင်ႈၼႃးၵိူင်လိၼ် ႁႂ်ႈပဵင်းသၢင်ႈၵၢၼ်ယူႇ ၵူႈမိုဝ်ႉၵူႈဝၼ်း ယဝ်ႉဝႃႈၼႆ။

တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်ႈၸိုင်ႈတႆး RCSS/SSA  ႁိုၵ်ႉၺႃးၵၼ် ၼႂ်းၸႄႈဝဵင်းႁူဝ်ပူင်း  လႆႈပဵၼ်ပၢင်တိုၵ်းၵၼ် မီးလွင်ႈမၢတ်ႇၸဵပ်းလူႉတၢႆၵမ်ႈၽွင်ႈ ဝႃႈၼႆ။


ပူၼ်ႉမႃး ဝၼ်းတီႈ 14/07/2017 ယၢမ်းဝၢႆးဝၼ်း 3:30 ထိုင်  3:45 မူင်းပၢႆ တပ်ႉသိုၵ်းမၢၼ်ႈ ထႅဝ်သိုၵ်း ၶလရ 249 တင်ႈတပ်ႉၽႃလၢႆး တင်း ထႅဝ်သိုၵ်း RCSS/SSA ပဵၼ်ပၢင်တိုၵ်းၵၼ် တီႈတႅၼ်ႈမႆႉၼိမ် ၼႂ်းၵႄႈၵၢင် ဝၢၼ်ႈၵဝ်ႇပၢင်ႁၵ်ႉ လႄႈ ႁႆႈၶၢႆး ၽၢႆႇႁွင်ႇႁႆႈၶၢႆး ဢိူင်ႇၼမ်ႉပႃၶီး ၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး မိူင်းတႆးပွတ်းၸၢၼ်း။ သွင်ၾၢႆႇ ႁိုၵ်ႉၺႃးၵၼ်ၼႂ်းထိူၼ်ႇသေလႆႈ ပဵၼ်ပၢင်တိုၵ်းၵၼ်ႁိုင် 15 မိၼိတ်ႉ။

ၸဝ်ႈသိုၵ်းလူင်ၸၢႆးငိုၼ်း ၽူႈၶၢၼ်ပၢၵ်ႇ RCSS/SSA လၢတ်ႈဝႃႈ “ ယွၼ်ႉၾၢႆႇတပ်ႉသိုၵ်းမၢၼ်ႈ ထႅဝ်သိုၵ်း ၶမရ 249 ၽႃလၢႆး ဢမ်ႇပွင်ႇၶၢဝ်ႇၸူးလုမ်းၵပ်းသၢၼ်ၶွင်ႇသီႇဢဝ်ၶိုၼ်ႈၸိုင်ႈတႆး/တပ်ႉသိုၵ်းၸိုင်ႈတႆး လူင်ႈၼႃႈဢွၼ်တၢင်းသေ သမ်ႉပူၼ်ႉပႅၼ်ၶဝ်ႈမႃးလႄႈ ႁိုၵ်ႉၺႃးၵၼ် တင်းသွင်ၾၢႆႇၸင်ႇလႆႈပဵၼ်ပၢင်တိုၵ်း။ ၵူၺ်းၵႃႈ  ယၢမ်းလဵဝ်ၼႆႉ ပၢင်တိုၵ်းဢၼ်ဝႃႈၼၼ်ႉ ဢမ်ႇထုၵ်ႇလီမီးယဝ်ႉ။ ၵွပ်ႈသင်လႃႇၼႆႁဝ်းၶႃႈၵေႃႈ  လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA ယဝ်ႉ ။ ၾၢႆႇၼိုင်ႈႁဝ်းၶႃႈၵေႃႈ ၶတ်းၸႂ်ၵၢၼ်ၵေႃႇသၢင်ႈလွင်ႈငမ်းယဵၼ်ယူႇ။ ၼင်ႇႁိုဝ် တေဢမ်ႇပဵၼ် ပၢင်တိုၵ်းၼၼ်ႉ  ၾၢႆႇႁဝ်းၶႃႈတႄႉ တေငိူင်ႉဝႄႈ  ။ ၾၢႆႇတပ်ႉသိုၵ်းၵေႃႈတၵ်းတေလႆႈၸွမ်းၶေႃႈတူၵ်းလူင်း NCA လႄႈ ၶေႃႈတိုဝ်းၵမ်တပ်ႉသိုၵ်း  COC  ။ ပဵၼ်တပ်ႉသိုၵ်းလူင်ပွင်ၸိုင်ႈၼႆသေ ၶႂ်ႈၵႂႃႇတီႈလႂ် ၵေႃႈတေၵႂႃႇၼႆတႄႉ ဢမ်ႇၸႂ်ႈလွင်ႈ။ ၵဵဝ်ႇၵပ်းလွင်ႈၼႆႉ ၾၢႆႇလူင်ပွင်ၸိုင်ႈၵေႃႈ မီးပုၼ်းၽွၼ်းယူႇ  ” ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈႁွင်ႈၵၢၼ်ၾၢႆႇပိုၼ်ၽၢဝ်ႇ RCSS/SSA ပိုၼ်ၽၢဝ်ႇဝႃႈ သိုၵ်းမၢၼ်ႈ တၢႆ 5 ၵေႃႉ၊ မၢတ်ႇၸဵပ်း 3 ၵေႃႉ ပႃးႁူဝ်သိုၵ်းလူင် ၵေႃႉၼိုင်ႈ။ ယူႇတီႈ RCSS/SSA တီႉလႆႈပႃး ၵွင်ႈယၢဝ်း ၵွင်းပွတ်း ၶွင်သိုၵ်းလူင်ပွင်ၸိုင်ႈမၢၼ်ႈ 7 လဝ်း ဝႃႈၼႆ။


ၸဝ်ႈသိုၵ်းၸၢႆးငိုၼ်း သိုပ်ႇလၢတ်ႈထႅင်ႈဝႃႈ - ၵဵဝ်ႇၵပ်းလွင်ႈပဵၼ်ပၢင်တိုၵ်းၼႆႉ လႆႈပွင်ႇၶၢဝ်ႇၸူးထိုင် လုမ်း JMC-S ဢၼ်ပၵ်းတႃပႂ်ႉတူၺ်း လွင်ႈငမ်းယဵၼ်ယဝ်ႉ။ ႁႂ်ႈၵူတ်ႇထတ်းပၼ်လွင်ႈၼႆႉလီလီငၢမ်းငၢမ်း။  ၼင်ႇႁိုဝ် တေဢမ်ႇပဵၼ်ပၢင်တိုၵ်းၵၼ်ထႅင်ႈၼၼ်ႉ တုၵ်းယွၼ်းထိုင် ႁႂ်ႈၵူတ်ႇထတ်းပၼ်သေၵမ်း” ဝႃႈၼႆ။


ဝၢႆးသေသွင်ၾၢႆႇပဵၼ်ပၢင်တိုၵ်းၵၼ်ယဝ်ႉ ယၢမ်းႁူဝ်ၶမ်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈ လုၵ်ႉတူၼ်ႈတီး ထႅမ်ႁႅင်းသိုၵ်းႁိမ်း 100 ၶဝ်ႈၸူး ၼႃႈလိၼ်ပၢင်တိုၵ်းၼၼ်ႉသေ တူင်ႉၼိုင်ဝႆႉယူႇ ဝႃႈၼႆ။

ၵူၼ်းဝၢၼ်ႈ ၼႂ်းၸႄႈဝဵင်းၼမ်ႉတူႈ ၵေႃႉၼိုင်ႈၵႂႃႇတီႇႁႆႈၼႂ်းပိုၼ်ႉတီႈ သိုၵ်း TNLA တင်း RCSS ပဵၼ်ပၢင်တိုၵ်း ၵၼ်ၼၼ်ႉ ၵႂႃႇယဵပ်ႇၺႃးမၢၵ်ႇတိူဝ်ႉမၢတ်ႇၸဵပ်းလိူဝ်ႁႅင်းသေ သူင်ႇယူတ်းယႃတူဝ်ဝႆႉတီႈႁူင်းယႃၵူၼ်းမိူင်း ၸႄႈဝဵင်း ၼမ်ႉတူႈ ၸိုင်ႈတႆးပွတ်းႁွင်ႇ။


ဝၼ်းတီႈ 10/07/2017 ယၢမ်းၵၢင်ၼႂ် 10:30 မူင်း ၸၢႆးပၢၼ်းဢွင်ႇ ၵူၼ်းဝၢၼ်ႈပၢင်မၢၼ်ႈ ၵႂႃႇတီႇႁႆႈ ႁိမ်းဝၢၼ်ႈ ယဵပ်ႇၺႃးမၢၵ်ႇတႅၵ်ႇ တိူဝ်ႉတီႈၶႃမၼ်းၸၢႆးတင်းသွင်ၶွၼ် လႆႈမၢတ်ႇၸဵပ်းႁၢဝ်ႈ ႁႅင်း။ ၵူၺ်းၵႃႈ ဢမ်ႇထိုင်တီႈလႆႈတႅပ်း ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊ ၾၢႆႇလူလွမ်ၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈဝႃႈ “ ႁဝ်းၶႃႈၵေႃႈ ဢွၼ်ၵၼ်ႁၢမ်ႈၵူၼ်းဝၢၼ်ႈၵူၼ်းသူၼ်ႁဝ်း တၢင်းပွတ်းဢိူင်ႇလွႆပႄးၼၼ်ႉ ယႃႇပေၽူမ်ႈဢွၼ်ၵၼ်ၵႂႃႇ ယွၼ်ႉငဝ်းလၢႆး ပႆႇၼိမ်သဝ်း။ ၵူၺ်းၵႃႈ ၸၢႆးပၢၼ်းဢွင်ႇသမ်ႉ ဢမ်ႇထွမ်ႇသေ ၵႂႃႇႁဵတ်းႁႆႈ” ဝႃႈၼႆ။


မိူဝ်ႈၽွင်းမၢၵ်ႇတႅၵ်ႇၼၼ်ႉ ၵူၼ်းၼႂ်းဝၢၼ်ႈပၢင်မၢၼ်ႈ ဢွၼ်ၵၼ်ၵူတ်ႇထတ်းတူၺ်းလႄႈၸင်ႇ လႆႈႁူႉဝႃႈပဵၼ် ၸၢႆးပၢၼ်း ဢွင်ႇ။ ၵူၼ်းဝၢၼ်ႈလႄႈ ၸုမ်းၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼမ်ႉတူႈ  သူင်ႇယူတ်းယႃတူဝ်ဝႆႉ တီႈႁူင်းယႃၵူၼ်းမိူင်း ဝဵင်းၼမ်ႉတူႈ ဝႃႈၼႆ။


တၢင်းပွတ်းတွၼ်ႈ ၼႂ်းဢိူင်ႇလွႆပႄး ၸႄႈဝဵင်းၼမ်ႉတူႈၼၼ်ႉ တပ်ႉသိုၵ်း TNLA တင်း တပ်ႉသိုၵ်း RCSS/SSA ပဵၼ်ပၢင်တိုၵ်းၵၼ်။ တႄႇဢဝ် ႁူဝ်လိူၼ်ၵျူၼ်ႊလၢႆႊမႃး ထိုင်ယၢမ်းလဵဝ် ပၢင်တိုၵ်းပႆႇယဵၼ်  တင်းသွင်ၾၢႆႇ တိုၵ်ႉၶဵင်ႈ ၶႅင်ၵၢၼ်သိုၵ်းယူႇလႄႈ ၵူၼ်းၼႂ်းပိုၼ်ႉတီႈယင်းပႆႇၸၢင်ႈပွၵ်ႈၶိုၼ်း ဝႃႈၼႆ။


ၵူၼ်းပၢႆႈၽေးသိုၵ်း ၼႂ်းဢိူင်ႇလွႆပႄး 400 ပၢႆ ယင်းတိုၵ်ႉယူႇသဝ်းဝႆႉတီႈ ဝတ်ႉပုပ်ႉပႃႇရူင်ႇ ပွၵ်ႉ 8 ၸႄႈဝဵင်းၼမ်ႉတူႈ ယူႇ တေႃႇဝၼ်းမိူဝ်ႈၼႆႉ ဝႃႈၼႆ။

ၵူၼ်းပၢႆႈၽေးသိုၵ်း ၸိူဝ်းလုၵ်ႉတၢင်းထုင်ႉၾၢႆႇဢွၵ်ႇဝဵင်းၼမ်ႉတူႈ ၼႂ်းဢိူင်ႇလွႆပႄး မႃးယူႇ သဝ်းဝႆႉတီႈဝတ်ႉပူၵ်ႉ ပႃႇယူင်ႇ  ႁူဝ်ၵူၼ်း 400 ပၢႆ ပႆႇပဵၼ်ပွၵ်ႈၶိုၼ်းႁိူၼ်း။ ယွၼ်ႉပိူဝ်ႈတပ်ႉသိုၵ်းတဢၢင်း TNLA တင်း RCSS တိုၵ်ႉသိုပ်ႇ ပဵၼ်ပၢင်တိုၵ်းၵၼ်ယူႇ ယင်းပႆႇယဵၼ်။


ၶၢဝ်းတၢင်း 7 ဝၼ်း ၵူၼ်းပၢႆႈၽေးသိုၵ်း ၸိူဝ်းလုၵ်ႉတၢင်းဢိူင်ႇလွႆပႄး ဢွၼ်ၵၼ် ပၢႆႈၽေးထိုင်ၼမ်ႉတူႈယဝ်ႉသေတႃႉ  ယွၼ်ႉတပ်ႉသိုၵ်းတဢၢင်းတင်း TNLA တပ်ႉသိုၵ်းၸိုင်ႈတႆး RCSS/SSA သိုပ်ႇပဵၼ် ပၢင်တိုၵ်းၵၼ်ထႅင်ႈလႄႈ ၶဵင်ႈၶႅင် ၵၢၼ်သိုၵ်းတေႃႇၵၼ်။ ထႅင်ႈလွင်ႈၼိုင်ႈၵေႃႈ တင်းသွင် ၾၢႆႇတိုၵ်ႉၽိူမ်ႉထႅမ်ႁႅင်း သိုၵ်းထႅင်ႈ။ တေႃႈလဵဝ် ၵူၼ်းပၢႆႈ ၽေးသိုၵ်း လင်ႁိူၼ်း 112 လင်၊ ႁူဝ်ၵူၼ်း 400 ပၢႆ ၽူႈၸၢႆး 175 ၵေႃႉ၊ ၽူႈယိင်း 225 ၵေႃႉ ဢွၼ်ၵၼ်ပၢႆႈမႃးယူႇသဝ်းဝႆႉတီႈ ဝတ်ႉပူၵ်ႉပႃႇယူင်ႇ ပွၵ်ႉ 8 ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇဝႆႉ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇလူလွမ်ႉၸွႆႈထႅမ်ၵူၼ်းပၢႆႈၽေး ဝဵင်းၼမ်ႉတူႈလၢတ်ႈဝႃႈ “ တေႃႈလဵဝ်ၼႆႉ သိုၵ်းတင်းသွင်ၾၢႆႇ ယင်းတိုၵ်ႉလေႃႇၵၼ်ယူႇ ပႆႇယဵၼ်။ ပီႈၼွင်ႉၵူၼ်းပၢႆႈၽေးတႄႉ တိုၵ်ႉမီး ယူႇမိူၼ်ၵဝ်ႇၵူၺ်း ပႆႇပဵၼ်ပွၵ်ႈမိူဝ်း တိုၵ်ႉယူႇဝႆႉတီႈဝတ်ႉပူၵ်ႉပႃႇယူင်ႇယူႇ။ ယၢမ်းလဵဝ်သမ်ႉပဵၼ်ၶၢဝ်း ၼႂ်းဝႃႇယဝ်ႉ ၼႆလႄႈ လွင်ႈယူႇသဝ်းၵိၼ်သၢင်ႈၵူၼ်းပၢႆႈၽေးတႄႉ လႆႈဢုပ်ႇဢူဝ်းၸွမ်းၸဝ်ႈတူၼ်ၶူး ၽူႈၵွၼ်းဝတ်ႉသေ ပၼ်ၵၼ်ယူႇ။ ပေႃးထိုင်မႃးဝၼ်းသိလ်ၼႆၵေႃႈ ပူႇသိလ်ၼၢႆးသိလ်ၶဝ်သမ်ႉ ၼွၼ်းၼိူဝ်ဝိႁၢရ် ၵူၼ်းပၢႆႈၽေးၼွၼ်း တႂ်ႈလၢင်ႈဝိႁၢရ်လႄႈသႃလႃးၸလွပ်ႈၽွင်ႈ ၸဵမ်ၸိူဝ်းၼႆႉ” ဝႃႈၼႆ။


ၵဵဝ်ႇၵပ်းလွင်ႈတီႈယူႇၵူၼ်းပၢႆႈၽေးၼႆႉ ယူႇတီႈၶွမ်ႊမတီႊၸွႆႈထႅမ်ၵူၼ်းပၢႆႈၽေးၵေႃႈ ပႆႇႁဵတ်းတီႈ ယူႇတၼ်းသဝ်း ဝႆႉပၼ် ယွၼ်ႉဝႃႈ တိုၵ်ႉဢွၼ်ၵၼ်ပႂ်ႉတူၺ်းထွမ်ႇၶၢဝ်ႇယူႇဝႃႈ ပၢင်တိုၵ်းၼႆႉ တေပဵၼ်ၶၢဝ်းပွတ်း 4-5 ဝၼ်းၵူၺ်းၼႆ သေတႃႉ ထိုင်ယၢမ်းလဵဝ် ယင်းတိုၵ်ႉသိုပ်ႇပဵၼ်ၶိူဝ်းယႂ်းယူႇ။


လုင်းၸၢႆးပႃႉၺၢၼ်ႇ လၢတ်ႈဝႃႈ ႁဝ်းၶႃႈ တိုၵ်ႉထွမ်ႇၶၢဝ်ႇယူႇဝႃႈ ပၢင်တိုၵ်းတေယဵၼ်မိူဝ်ႈလႂ် ၵူၺ်းၵႃႈ ပၢင်တိုၵ်း ယဵၼ်ၵႂႃႇယဝ်ႉသေတႃႉ ႁဝ်းၶႃႈ ဢမ်ႇပႆႇပဵၼ်သူင်ႇၵူၼ်းပၢႆႈၽေးပွၵ်ႈၵမ်းလဵဝ် တေဢုပ်ႇဢူဝ်းထၢမ်တင်းသွင်ၾၢႆႇၵွၼ်ႇ ၸွင်ႇတေသူင်ႇၵူၼ်းပွၵ်ႈလႆႈ ဢမ်ႇပွၵ်ႈလႆႈ ယွၼ်ႉဝႃႈ ၼႃႈတီႈပဵၼ်ပၢင်သိုၵ်းၼၼ်ႉ ၵူဝ်ၵူၼ်းမိူင်း ၵႂႃႇယဵပ်ႇၺႃးမၢၵ်ႇ တႅၵ်ႇ။ ယွၼ်ႉၼၼ်လႄႈ သင်ဝႃႈ တပ်ႉသိုၵ်းတင်းသွင်ၾၢႆႇဝႃႈ ပွၵ်ႈမႃးလႆႈ/ မီးလွင်ႈလွတ်ႈၽေးယဝ်ႉၼႆၸိုင် ႁဝ်းၶႃႈ ၸင်ႇတေသူင်ႇပွၵ်ႈမိူဝ်းၶႃႈ ဝႃႈၼႆ။


ယွၼ်ႉတပ်ႉသိုၵ်းတဢၢင်းတင်း တပ်ႉသိုၵ်းၸိုင်ႈတႆး ပဵၼ်ပၢင်တိုၵ်းၵၼ် ႁိမ်းႁွမ်း ၼႂ်းဢိူင်ႇလွႆပႄး ၾၢႆႇဢွၵ်ႇ ဝဵင်း ၼမ်ႉတူႈ ယၢၼ်ၵႆဝဵင်း မွၵ်ႈ 10 လၵ်း။ မိူဝ်ႈပူၼ်ႉမႃး ဝၼ်းတီႈ 04/07/2017 ၼၼ်ႉ ၵူၼ်းပၢႆႈၽေးဢွၵ်ႇမႃး 290 ၵေႃႉ၊ ဝၼ်းတီႈ 05 သမ်ႉ ၽိူမ်ႉလိူဝ်မႃးထႅင်ႈ 110 ၵေႃႉ ႁူမ်ႈၵၼ်တင်းမူတ်း 400 ၵေႃႉလႄႈ လင်ႁိူၼ်း 112 လင် ဝႃႈၼႆ။

တပ်ႉသိုၵ်း RCSS/SSA တင်းTNLA ပဵၼ်ပၢင်တိုၵ်းၵၼ်လႄႈ ၵူၼ်းဝၢၼ်ႈၵူၼ်းသူၼ် 290 ပၢႆ ထုင်ႉၾၢႆႇဢွၵ်ႇဝဵင်း ၼႂ်းဢိူင်ႇလွႆပႄး ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ်မႃးတီႈဝတ်ႉပူၵ်ႉပႃႇယူင်ႇ ၼႂ်းဝဵင်းၼမ်ႉတူႈ။


ဝၼ်းတီႈ 04/07/2017 ယၢမ်းၵၢင်ဝၼ်း 10:00-03:00 မူင်းဝၢႆးဝၼ်း ၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇလွႆပႄး ဝၢၼ်ႈပၢင်လေႃႉ၊ ဝၢၼ်ႈပၢင်တၢင်ႇ၊ ဝၢၼ်ႈၼွင်ၵွင်းလွႆ  ၸဵမ်ၸိူဝ်းၼႆႉ ဢွၼ်ၵၼ်ပၢႆႈၽေးမႃး ႁွတ်ႈၽႅဝ် တီႈဝတ်ႉ ဝိႁၢရ်ပူၵ်ႉပႃႇယူင်ႇ ပွၵ်ႉ 8 ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉသိုၵ်းတဢၢင်း TNLA တင်း တပ်ႉသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပဵၼ်ပၢင်တိုၵ်းႁိမ်းႁွမ်း မူႇဝၢၼ်ႈ ဝႃႈၼႆ။

လုင်းၸၢႆးပႃႉၺုၼ်ႇ ၵႅမ်ႁူဝ်ပဝ်ႈ ၶွမ်ႊမတီႊလူလွမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၸုမ်းၶၢဝ်ႇၽူႈ တွႆႇႁွၵ်ႈဝႃႈ “  တေႃႈလဵဝ်  ၵူၼ်းပၢႆႈၽေးသိုၵ်းဢၼ်မႃး ႁွတ်ႈၽႅဝ် တီႈၼႂ်းဝဵင်းၼမ်ႉတူႈၼႆႉ ႁဝ်းၶႃႈ လႆႈႁၢင်ႈႁႅၼ်း တမ်းဝၢင်းတီႈပၼ် တီႈဝတ်ႉပူၵ်ႉပႃႇယူင်ႇဝႆႉၶႃႈ။ ဢၼ်ပီႈၼွင်ႉၵူၼ်းပၢႆႈၽေး ဢွၼ်ၵၼ်ပၢႆႈမႃးသမ်ႉ ပဵၼ်မိူဝ်ႈဝႃး ဝၼ်းတီႈ 4 ယၢမ်းၵၢင်ဝၼ်း 10 မူင်းၼၼ်ႉ ဢွၼ်ၵၼ်ပၢႆႈဢွၵ်ႇမႃး ၵမ်းဢိတ်းၵမ်းဢွတ်း ထိုင်ဝၢႆးဝၼ်း 3 မူင်း ၸင်ႇႁွတ်ႈၽႅဝ်မႃးမူတ်း။ ယွၼ်ႉဝႃႈ သဵၼ်ႈတႃႈသၢႆတၢင်းလူတ်ႉၵႃး ဢမ်ႇပွင်ႇ ၵူၼ်းဝၢၼ်ႈၵူၼ်းသူၼ်ပႆပၢႆႈမႃး၊ မၢင်ၵေႃႉၵေႃႈ ၶီႇလူတ်ႉၶိူင်ႈမႃး ႁဵတ်းၼၼ်ၵူၺ်း။ ၵူၺ်းၵႃး ယူႇတီႈၶွမ်ႊမတီႊႁဝ်းၶႃႈတႄႉ ဢဝ်လူတ်ႉၵႃး ၵႂႃႇပႂ်ႉ ႁပ်ႉတီႈဝၢၼ်ႈသၢႆးၶၢဝ်” ဝႃႈၼႆ။


ဝၼ်းတီႈ 4 လိူၼ်ၵျုႊလၢႆႊၼၼ်ႉ ပီႈၼွင်ႉလွႆ ၸိူဝ်းယူႇၼႂ်းဢိူင်ႇလွႆပႄး မိူၼ်ၼင်ႇ ဝၢၼ်ႈပၢင်လေႃႉ၊ ဝၢၼ်ႈပၢင်တၢင်ႇ၊ ဝၢၼ်ႈၼွင်ၵွင်းလွႆ ၸိူဝ်းၼႆႉ ပၢႆႈၽေးသိုၵ်း  ထိုင်တီႈဝဵင်းၼမ်ႉတူႈ  လင်ႁိူၼ်း 78 လင်၊  ႁူဝ်ၵူၼ်းတင်းသဵင်း မီးမွၵ်ႈ 290 ပၢႆ မႃးယူႇဝႆႉတီႈ ဝတ်ႉပူၵ်ႉပႃႇယူင်ႇ။ ဢိူင်ႇလွႆပႄးၼႆႉ မီးၾၢႆႇဢွၵ်ႇဝဵင်းၼမ်ႉတူႈ ယၢၼ်ၵႆမွၵ်ႈ 10 လၵ်း။


တႃႇၶဝ်ႈၼမ်ႉတၢင်းၵိၼ်တႄႉ ၶွမ်ႊမတီႊလူလွမ်ပႂ်ႉတူၺ်းၵူၼ်းပၢႆႈၽေး၊  ၵေႃလိၵ်ႈလၢႆးလႄႈၾိင်ႈငႄႈ တဢၢင်း ၸိူဝ်းၼႆႉၸွႆႈထႅမ်ပၼ်လႄႈ ဢမ်ႇပေႃးမီးလွင်ႈယၢပ်ႇၽိုတ်ႇ။ လိူဝ်ၼၼ်ႉ ၸုမ်း International Recuse Committee (IRC) သမ်ႉမႃးၸွႆႈပၼ်ၸိူဝ်ႉၽၼ်းၶဝ်ႈၶႄႇ(ၶဝ်ႈၵၢပ်ႇ)၊   ၽုၼ်ႇထၢတ်ႈ၊ ငိုၼ်းတွင်းၸိူဝ်းၼႆႉ။


ၵူၼ်းပၢႆႈၽေး ၸိူဝ်းမႃးႁွတ်ႈၽႅဝ်ဝႆႉတီႈဝဵင်းၼမ်ႉတူႈ ၸဵမ်မိူဝ်ႈလိူၼ်ၵျုၼ်ႊ-ၵျုႊလၢႆႊ 2016 ၼၼ်ႉၵေႃႈ ယင်းပႆႇ ပွၵ်ႈမိူဝ်းၶိုၼ်း။ ယူႇသဝ်းဝႆႉတီႈၵျွင်းၽြႃးၶရိတ်ႉယၼ်ႇၸၢဝ်းလီႇသူး၊ ၵျွင်းၽြႃးၶရိတ်ႉယၼ်ႇၸၢဝ်းၶၢင် K.B.C လႄႈ တီႈဝၢၼ်ႈၵိဝ်ႇသေႃႉ တင်းမူတ်းမီးယူႇ 500 ပၢႆ ။

ပီ 2017 လိူၼ်ၵျုၼ်ႊၼႆႉ ၸဝ်ႈၼႃႈတီႈၸုမ်းမိူင်းလႃး တႄႇၾိုၵ်းသွၼ်ၵၢၼ်မိူင်း/သိုၵ်းပၼ် ၼၢင်းႁၢၼ်မႂ်ႇ ႁိမ်း 200 ၵေႃႉ တီႈႁူင်းၾိုၵ်းသွၼ် ငဝ်ႈၸိုင်ႈၼႃႈလိၼ်ၶိုၵ်ႉတွၼ်းမၢႆ - 4 ။


ပၢင်သွၼ်ၼႆႉ ၵေႃႉႁၢၼ်ယိင်းတင်းလၢႆ လႆႈႁဵၼ်းဢဝ် ၵၢၼ်ၸွႆႈထႅမ်ၵူၼ်းမၢတ်ႇၸဵပ်း၊ ပိုၼ်ႉႁူႉၵၢၼ်သိုၵ်း ၶၢဝ်းတၢင်းၾၢၵ်ႇလိူၼ်သေ တေသိုပ်ႇၾိုၵ်းသွၼ်ဢဝ် တၢင်းႁူႉၵဵဝ်ႇၵပ်းၵၢၼ်ၵပ်းသိုပ်ႇ တိတ်းတေႃႇၶဝ်ႈဢွၵ်ႇ ၵူၼ်းမိူင်း၊ ၵၢၼ်မိူင်း၊ ပိုၼ်း ၸဵမ်ၸိူဝ်းၼႆႉ။

“ၼင်ႇႁိုဝ်ၶဝ်ပေႃးတေမီးၸႂ်ႁၵ်ႉၸိူဝ်ႉၸၢတ်ႈ လိူဝ်ၵႂႃႇထႅင်ႈၼၼ်ႉ ၸႂ်ႉၶၢဝ်းတၢင်းၼိုင်ႈလိူၼ် တေႃႇထိုင်သၢမ်လိူၼ်၊ လႆႈၾိုၵ်းပၼ်ၵၢၼ်သိုၵ်းၵၢၼ်မိူင်း ၼင်ႇႁိုဝ်ၶဝ်ပေႃးတေမီးၼမ်ႉၵတ်ႉတၢင်းၶႅၼ်ႇ၊ ၸွႆႈၶိုင်ၸွႆႈသၢင်ႈ ၵၢၼ်ၵႅတ်ႇၶႄႁႄႉၵင်ႈဝၢၼ်ႈမိူင်း၊ ၸိူဝ်ႉၸၢတ်ႈၵႂႃႇ” - ၼႆ ၽူႈမီးၸၼ်ႉ ၼႂ်းပၢင်သွၼ် ၵေႃႉၼိုင်ႈလၢတ်ႈ။


ၼၢင်းႁၢၼ်မႂ်ႇ 171 ၼႆႉ ၵမ်ႈၼမ် လုၵ်ႉမႃးတၢင်း ဢိူင်ႇမိူင်းသိုဝ်လိုဝ်း၊ ၼမ်ႉပၢၼ်း၊ ငဝ်ႈၸိုင်ႈမိူင်းလႃး။ ၼၢင်းႁၢၼ်ၸုပ်ႈၼႆႉ သႅၼ်းပၢၼ် ဢႃႇယု 18 – 25 ပီ ၵမ်ႈပႃႈၼမ်။ ပဵၼ် ၼၢင်းသၢဝ် ဝႆႉၼႃႈၵၢၼ် ႁိူၼ်းယေးသေ ၶဝ်ႈႁၢပ်ႇၵၢၼ်သိုၵ်း လွၼ်ႉလွၼ်ႉ။ ၶူးပူင်သွၼ်ပၼ်တႄႉ ပဵၼ်ၽူႈမီးတူဝ်ထူပ်းတႃႁၼ် ၼႂ်းၸုမ်းမိူင်းလႃး ပူင်သွၼ်ပၼ်ၶိုၼ်း - ဝႃႈၼႆ။


ၼႂ်းပီ 2017 ၼႆႉ ၼၢင်းႁၢၼ် ဢၼ်ၶဝ်ႈၾိုၵ်းသွၼ် ၵၢၼ်မိူင်း ၵၢၼ်သိုၵ်း ဢၼ်တႄႇၼႂ်းလိူၼ်ၵျုၼ်ႊ ၼႆႉ ပဵၼ်ၸုပ်ႈႁႅၵ်ႈ။ ဢၼ်ၾိုၵ်းသွၼ်ယဝ်ႉၵႂႃႇ ၸုပ်ႈၵဝ်ႇၵေႃႈ မီးၵူႈပီ။


ၼႃႈလိၼ်ၶိုၵ်ႉတွၼ်း မၢႆ-4  ဢမ်ႇၼၼ် ၸုမ်းမိူင်းလႃးၼႆႉ တႄႇၵိုတ်းသိုၵ်းၸွမ်းလူင်ပွင်ၸိုင်ႈမၢၼ်ႈမႃး ၸဵမ်မိူဝ်ႈ 20/6/1989 ။ မိူဝ်ႈပီ 2011 ပၢၼ် ၸွမ်ၸိုင်ႈတဵင်းၸဵင်ႇ ယိုၼ်းမိုဝ်း ၵေႃႇသၢင်ႈလွင်ႈ ငမ်းယဵၼ်ၼၼ်ႉ ၵေႃႈ လူင်းလၢႆးဢဝ်ငမ်းယဵၼ် ၸၼ်ႉၸႄႈမိူင်း 7/9/2011၊ ၸၼ်ႉမိူင်းႁူမ်ႈတုမ် 27/12/2011 ။  ၾၢႆႇၼိုင်ႈ ပဵၼ်ဢူၺ်းလီ ၵၼ်တင်း ၸုမ်းသိုၵ်းပွတ်းႁွင်ႇ ဢၼ်ၸုမ်းဝႃႉပဵၼ်ၽူႈၼမ်း ၼၼ်ႉသေ ႁႃလၢႆးဢုပ်ႇဢူဝ်း ၵၢၼ်မိူင်းလူၺ်ႈ ဢမ်ႇၵႂႃႇၸွမ်း ၶၵ်ႉၵၢၼ် NCA ။

ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ၸတ်းႁဵတ်းပၢင်ၵႅဝ်ႈ ဝၼ်းၵိူတ်ႇလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး ၶွပ်ႈၶူပ်ႇ 59 ပီတဵမ် တီႈႁူင်းႁဵၼ်းသိုၵ်း ငဝ်ႈငုၼ်းဝၢၼ်ႈႁႆး၊ ၼႂ်းဝၼ်းတီႈ 21/05/2017 မိူဝ်ႈၼႆႉ။


ၼႂ်းဝၼ်းပၢင်ၵႅဝ်ႈၼႆႉ ၽူႈယႂ်ႇၵူၼ်းလူင်၊ ၽူႈၵွၼ်းတပ်ႉ၊ လုၵ်ႈတပ်ႉလႄႈ ပေႃႈမႄႈၵူၼ်းမိူင်းၶဝ်ႈႁူမ်ႈမီး 640 ၵေႃႉ။ ၸွမ်သိုၵ်းလူင်သိူဝ်ထႅၼ်ႈ ၽူႈၼမ်းၼႃႈ (1) SSPP/SSA မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႅဝ်ႈ၊ ၸဝ်ႈသိုၵ်းၵျေႃႇလႃႉ ၽူႈၼမ်းၼႂ်း (2) လူဢၢၼ်ႇတၢင်းၼႄပိုၼ်းၵႅပ်ႈ လၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး၊ ၸွမ်ႁၢၼ်ၶုၼ်သႅင် ၵႅမ်ႁူဝ်ပဝ်ႈ (2) မွၵ်ႇလၢတ်ႈၶေႃႈၵႂၢမ်းၵိုတ်းလိုဝ်ႈပၢင်ၵႅဝ်ႈ- ၼႆယဝ်ႉ။

ၸွမ်သိုၵ်းလူင်သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်းဝႃႈ- "ၵွပ်ႈပႆၼိူဝ်သဵၼ်ႈတၢင်းထုၵ်ႇမႅၼ်ႈလႄႈ ငဝ်းလၢႆးဢမ်ႇၼိမ်သဝ်း၊ မီးလွင်ႈၶိုၼ်ႈ/လူင်းသေတႃႉ ၸုၵ်းမၼ်ႈၵႅတ်ႇၶႄႁႄႉၵင်ႈပၼ် ပေႃႈမႄႈၵူၼ်းမိူင်းလႆႈ တေႃႇထိုင်ဝၼ်းမိူဝ်ႈၼႆႉ၊ လွင်ႈလီလွင်ႈၸႃႉတိုၼ်းမီးတႃႇသေႇလႄႈ ႁႂ်ႈဢူတ်းယိူၼ်ႉၸႂ်သေ သိုပ်ႇၵႅတ်ႇၶႄႁႄႉၵင်ႈ၊ ႁဵတ်းသၢင်ႈပၼ်ၽွၼ်းလီ တႃႇပေႃႈမႄႈၵူၼ်းမိူင်းထႅင်ႈသေၵမ်း"- ဝႃႈၼႆ။


ၸဝ်ႈသိုၵ်းၵျေႃႇလႃႉ မွၵ်ႇလၢတ်ႈဝႃႈ- "ဝၼ်းၵိူတ်ႇလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆးႁဝ်းၶႃႈၼႆႉ ဢိင်ၼိူဝ်ပိုၼ်းပိူင်ပဵၼ်ၵၢၼ်ပၢႆးမိူင်း ၸိူဝ်ႉၸၢတ်ႈၸိုင်ႈတႆးႁဝ်းၶႃႈ ဢီးသူၼ်းတုၵ်းယွၼ်းမႃးလႄႈ ၸင်ႇလႆႈၽုတ်းပဵၼ်မီးမႃး၊ ပဵၼ်ဝၼ်းဢၼ်ထွတ်ႈမျၢတ်ႈ ယႂ်ႇလူင်တႃႇၸိူဝ်ႉၸၢတ်ႈၸိုင်ႈတႆးႁဝ်း၊ ၸင်ႇဢမ်ႇလူင်လိုမ်းသေၸတ်းႁဵတ်းမႃးယူႇၵူႈပီ"- ဝႃႈၼႆ။


သိုပ်ႇလၢတ်ႈဝႃႈ-"ပီၼႆႉတႄႉ ဢိင်ၼိူဝ်ငဝ်းလၢႆးဢၼ်မီးသေ လႆႈႁုပ်ႈသေႁဵတ်း၊ မီးပၢင်ၵႅဝ်ႈ 2 ပၢင်၊ ပၢင်ၵႅဝ်ႈလူႇတၢၼ်း ႁဵတ်းတၢင်းလီၵုသူလ်ပၼ် ၽူႈႁတ်းႁၢၼ်လုၵ်ႉၽိုၼ်ႉ ဢၼ်လႆႈတူၵ်းသုမ်းမႃး ၼႂ်းၶၢဝ်းတၢင်းလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး လႄႈပၢင်ၵႅဝ်ႈမွၵ်ႇလၢတ်ႈၶေႃႈၵႂၢမ်း လူဢၢၼ်ႇၼႄပိုၼ်းၵႅပ်ႈလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး။ ၼႂ်းဝၼ်းလုၵ်ႉၽိုၼ်ႉၼႆႉ ဢၼ်ၶႂ်ႈသင်ႇလၢတ်ႈႁႅင်းႁႅင်းတႄႉ ယၢမ်းလဵဝ် ၸၢဝ်းၶိူဝ်းဢွၼ်ႇၶဝ်မေႃလၢတ်ႈၵႂၢမ်း ယွၼ်းသုၼ်ႇလႆႈသုၼ်ႇပဵၼ်မႃးလႄႈ လွင်ႈၽွမ်ႉႁူမ်ႈၼႂ်းၵႄႈၵၢင်တႆးလႄႈ ၸၢဝ်းၶိူဝ်းဢွၼ်ႇၶဝ်ၼႆႉ ပဵၼ်ဢၼ်လီမႆႈၸႂ်ၸွမ်းတႄႉတႄႉ။ ၵွပ်ႈၼၼ် ႁဝ်းလူဝ်ႇႁူမ်ႈၵၼ်ၵေႃႇသၢင်ႈ လွင်ႈၽွမ်ႉႁူမ်ႈတႆးႁဝ်းလႄႈ လွင်ႈၽွမ်ႉႁူမ်ႈၸၢဝ်းၶိူဝ်း လႆႈလီလီငၢမ်းငၢမ်း။ ပေႃးၼၼ်ၵွၼ်ႇ လွင်ႈၽွမ်ႉႁူမ်ႈၸိုင်ႈတႆးႁဝ်း ၸင်ႇမၼ်ႈၵႅၼ်ႇၼႅၼ်ႈၼႃႈ"- ဝႃႈၼႆ။


လၢႆးလုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈတႆးၼႆႉ တႄႇမႃးမိူဝ်ႈပီ 1958 လိူၼ်မေႊ 21 ဝၼ်း။ ၸဝ်ႈၼွႆႉ (သေႃးယၼ်ႇတ) ဢွၼ်ႁူဝ်ၼမ်းၼႃႈၽူႈႁၵ်ႉၸိူဝ်ႉၸၢတ်ႈၸိုင်ႈတႆး ၸိူဝ်းဢၼ်မီးၸႂ်ႁတ်းႁၢၼ်တူင်ႉတိုၼ်ႇ 31 ၵေႃႉသေ ႁဵတ်းပၢင်ၵၢဝ်ႇၵိၼ်ႇ ၵိၼ်ၼမ်ႉသၸ်ႉၸႃႇ ပၼ်ႈၵႅၼ်ႇၼႅၼ်ႈၼႃၵၼ် တီႈႁူၺ်ႈပူႉ ႁိမ်းသူပ်းၼမ်ႉၵျွတ်ႈ ၼႂ်းဢိူင်ႇမိူင်းႁၢင် ၸႄႈဝဵင်းမိူင်းတူၼ် ႁိမ်းလႅၼ်လိၼ်တႆး-ထႆး၊ ၸင်ႇၽွမ်ႉလႆႈၸႂ်ၵၼ်ပူၵ်းတင်ႈမႃး "တပ်ႉသိုၵ်း ၼုမ်ႇသိုၵ်းႁၢၼ် ႁဵတ်းၵၢၼ်ၵွၼ်းၶေႃၸိုင်ႈတႆး" ဢၼ်တႄႇႁႅၵ်ႈဝၢၼ်ႇပၼ်ၸိူဝ်ႉၽၼ်း လၢႆးလုၵ်ႉၽိုၼ်ႉယိပ်းၵွင်ႈၵၢင်ႇ ၸိုင်ႈတႆးမႃး။

သိုၵ်းမၢၼ်ႈ လၢႆတပ်ႉၵွင်၊ ပႃးတင်း ႁိူဝ်းဝိၼ် ၶွၼ်ႈႁႅင်းၵၼ် လေႃႇတိုၵ်းသိုၵ်းလွႆ (တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း) TNLA  ၸိူဝ်းတူင်ႉၼိုင် ပၵ်းသဝ်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ လႄႈ သွင်ၾၢႆႇလႆႈပဵၼ်ပၢင်တိုၵ်းၵၼ် တင်းဝၼ်း။

ဝၼ်းတီႈ 28/3/2017  တပ်ႉသိုၵ်းလူင်ပွင်ၸိုင်ႈသိုၵ်းမၢၼ်ႈ ဢဝ်ႁႅင်းသိုၵ်း တပ်ႉၵွင် ၶလရ 503 တင်းၶလရ 506 လေႃႇတိုၵ်း သိုၵ်းလွႆ  TNLA ဢၼ်တူင်ႉၼိူင်ယူႇၼႂ်းၸႄႈဝဵင်းၵျွၵ်ႉမႄး ဢိူင်ႇပၢင်ဝူဝ်းလူင် ဝၢၼ်ႈၼမ်ႉၶုမ်ႇ။ ၾၢႆႇသိုၵ်းလွႆသမ်ႉ ပဵၼ် တပ်ႉၵွင် 717 လႄႈတပ်ႉၵွင် 666  ႁပ်ႉတိုၵ်း။


ၾၢႆႇသိုၵ်းလွႆ ပိုၼ်ၽၢဝ်ႇဝႃႈ ပၢင်တိုၵ်းလႆႈပဵၼ် တင်ႈတႄႇ ၵၢင်ၼႂ် 8 မူင်း ထိုင်ဝၢႆးဝၼ်း 1  မူင်း။  ၾၢႆႇသိုၵ်း လူင်ပွင်ၸိုင်ႈ မၢၼ်ႈ လႆႈၸႂ်ႉႁိူဝ်းဝိၼ်မႅင်းမီႈ 2 လမ်း ၸွႆႈယိုဝ်း - ဝႃႈၼႆ။


“ပၢင်တိုၵ်း ပဵၼ်တင်ႈတႄႇၵၢင်ၼႂ် တေႃႇထိုင်ဝၢႆးဝၼ်းၵေႃႈ ဢမ်ႇယဵၼ်၊ ၵူၼ်းမိူင်းၵေႃႈ ၵူဝ်ႁႄပၢႆႈလၢႆႁူး လၢႆတၢင်း။ မိူဝ်ႈဝၢႆးဝၼ်းၼၼ်ႉ သိုၵ်းမၢၼ်ႈ သူင်ႇႁိူဝ်းဝိၼ်မႃးၸွႆႈယိုဝ်းလႄႈ သိုၵ်းလွႆ လႆႈထွႆဢွၵ်ႇ ထုင်ႉဝၢၼ်ႈၼမ်ႉၶုမ်ႇ သေ ဢဝ်ပၢင်တိုၵ်း ယဵၼ်ၵႂႃႇဢေႃႈ” - ၼႆ ၸၢႆးဢၢႆႈၸွႆး ၼုမ်ႇၼႂ်းပိုၼ်ႉတီႈ လၢတ်ႈ။


ဢိူင်ႇပၢင်ဝူဝ်းလူင်၊ ထုင်ႉမိူင်းလူင် ၊ တူင်ႇဝဵင်းၵျွၵ်ႉမႄး တီႈဢၼ်သိုၵ်းလွႆ တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ်ၼႆႉ  တပ်ႉၸုမ်း 612 တပ်ႉသိုၵ်းၸိုင်ႈတႆး SSPP/SSA ၵေႃႈ ၵုမ်းၵမ် ၵႂႃႇမႃးတူင်ႉၼိုင်။


ႁွင်ႈၵၢၼ်ၶၢဝ်ႇၾၢႆႇသိုၵ်းတဢၢင်းပိုၼ်ၽၢဝ်ႇဝႃႈ ယွၼ်ႉပိူဝ်ႈၾၢႆႇသိုၵ်းမၢၼ်ႈမီးလွင်ႈတၢႆဝၢတ်ႇလူႉသုမ်းၼမ်လႄႈ လႆႈဢဝ်ႁိူဝ်းဝိၼ်တိုၵ်းမႃးၸွႆႈၼႆသေတႃႉ လွင်ႈတၢႆဝၢတ်ႇလူႉသုမ်းတင်းသွင်ၾၢႆႇၼႆႉ ယင်းပႆႇလႆႈႁူႉတႅတ်ႈတေႃး။


ၼႂ်းၸႄႈဝဵင်းၵျွၵ်ႉမႄး ၾၢႆႇႁွင်ႇတၢင်းၵႃး ဝဵင်းလိူဝ်ႇ၊ ၼွင်ၶဵဝ်၊ ၵျွၵ်ႉမႄး ၵႂႃႇလႃႈသဵဝ်ႈ ၼၼ်ႉ မီးၸုမ်းသိုၵ်းမၢၼ်ႈ၊ သိုၵ်း RCSS/SSA ၊ သိုၵ်းSSPP/SSA ၊ သိုၵ်း TNLA ၵႂႃႇမႃးတူင်ႉၼိုင် လႄႈ ၼွၵ်ႈသေ သိုၵ်းလွႆ တင်းသိုၵ်းမၢၼ်ႈ ၵႆႉပဵၼ် ပၢင်တိုၵ်းၵၼ် ၼၼ်ႉ သိုၵ်းလွႆ တင်းသိုၵ်း RCSS/SSA ၵေႃႈ ၵႆႉၵႆႉပဵၼ်ပၢင်တိုၵ်းၵၼ်သေဢမ်ႇၵႃး မိူဝ်ႈႁူဝ်လိူၼ် ၾႅပ်ႊၿိဝ်ႊရီႊ ဝၼ်းတီႈ 5 ၼၼ်ႉၵေႃႈ သိုၵ်းလွႆ ငွႆးယိုဝ်း တပ်ႉသိုၵ်းၸိုင်ႈတႆး SSPP/SSA  လႄႈ သွင်ၾၢႆႇ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။ ႁၢၼ်ႉတေႃႇယၢမ်းလဵဝ် ပၼ်ႁႃယင်းပႆႇယဝ်ႉပႆႇတူဝ်ႈ - ဝႃႈၼႆ။

တူဝ်ႁူဝ်ပဝ်ႈၸုမ်းဝႃႉ UWSA ပဝ်းယဵဝ်ႇသျႅင် ဢဝ်တပ်ႉလွႆၵိဝ်ႇသၢႆး ဢၼ်ၸုမ်းသိုၵ်းဝႃႉ UWSA ယိုတ်းဝႆႉတီႈ ၸုမ်းမိူင်းလႃးၼၼ်ႉ မွပ်ႈပၼ်ၶိုၼ်းၸုမ်းမိူင်းလႃး၊ ၵူၺ်းၵႃႈ သိုၵ်းဝႃႉၸိူဝ်းယူႇတီႈလွႆၵိဝ်ႇသၢႆးၼၼ်ႉ ထွၼ်ဢွၵ်ႇၵႂႃႇယူႇတီႈဝၢၼ်ႈၼမ်ႉလမ်းၵူၺ်း၊ ယင်းပႆႇထွၼ်ပွၵ်ႈၶိုၼ်း ၼႃႈလိၼ်ဝႃႉ။

ဝၼ်းတီႈ 08/03/2017 (မိူဝ်ႈဝႃး)ၼႆႉ ယူႇတီႈႁူဝ်ပဝ်ႈၸုမ်းဝႃႉ ငဝ်ႈငုၼ်းပၢင်သၢင်း ပဝ်းယဵဝ်ႇသျႅင် ႁွတ်ႈထိုင်မႃးတီႈမိူင်းလႃး မိူဝ်ႈဝႃးသေ မႃးတူၵ်းလူင်းဢဝ်တပ်ႉလွႆၵိဝ်ႇသၢႆး ဢၼ်ၸုမ်းသိုၵ်းဝႃႉ (UWSA) ႁုပ်ႈယိုတ်းဝႆႉ တီႈၸုမ်းမိူင်းလႃး မိူဝ်ႈၽွင်းႁၢင်လိူၼ်သႅပ်ႊထႅမ်ႊၿိူဝ်ႊ 2016 မွပ်ႈပၼ်ၶိုၼ်း တီႈၸုမ်းမိူင်းလႃး။ ၵူၺ်းၵႃႈ တပ်ႉလွႆသၢမ်သုမ်တႄႉ သိုၵ်းဝႃႉတိုၵ်ႉၵုမ်းၵမ်ဝႆႉယူႇ- ၼႆယဝ်ႉ။


တပ်ႉလွႆၵိဝ်ႇသၢႆးၼႆႉ မီးတီႈၽၵ်းတူၶဝ်ႈဝဵင်းမိူင်းလႃး၊ ၼိူဝ်သဵၼ်ႈတၢင်းလူင်ၵဵင်းတုင်- မိူင်းလႃး၊ ၼႂ်းၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး၊ ၸိုင်ႈတႆးပွတ်းဢွၵ်ႇ။ ပဵၵ်ႉသမ်ႉသိုၵ်းဝႃႉဢဵၼ်ႁႅင်းပၢၵ်ႇပၢႆ ဢၼ်ပၵ်းသဝ်းတီႈတပ်ႉလွႆၵိဝ်ႇသၢႆးၼၼ်ႉ ထွၼ်ဢွၵ်ႇမိူဝ်းသေတႃႉၵေႃႈ ထွၼ်ၵႂႃႇယူႇတီႈတပ်ႉဝႃႉ ဢၼ်မီးတီႈဝၢၼ်ႈၼမ်ႉလမ်း၊ ဢၼ်မီးတၢင်းၸၢၼ်း ဢမ်ႇပေႃးႁၢင်ႇၵႆလွႆၵိဝ်ႇသၢႆးၼၼ်ႉၵူၺ်း၊ ယင်းပႆႇထွၼ်ပွၵ်ႈမိူဝ်းၼႃႈလိၼ်ဝႃႉ- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်းဝႃႉ ဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈဝႃႈ- "ယူႇတီႈႁူဝ်ပဝ်ႈႁဝ်းၶႃႈ ႁွတ်ႈမႃးမိူင်းလႃးမိူဝ်ႈဝႃး၊ မိူဝ်ႈၼႆႉပွၵ်ႈၶိုၼ်းယဝ်ႉ၊ တပ်ႉလွႆၵိဝ်ႇသၢႆးၵေႃႈ ယူႇတီႈမၼ်းၸဝ်ႈသေ ၸီႉသင်ႇမွပ်ႈပၼ်ၸုမ်းမိူင်းလႃးၶိုၼ်း မိူဝ်ႈဝႃးယဝ်ႉ။ ၵူၺ်းၵႃႈႁဝ်းၶႃႈတႄႉ ဢမ်ႇပႆႇလႆႈၶေႃႈၸီႉသင်ႇ ႁႂ်ႈထွၼ်ပွၵ်ႈမိူဝ်းၶိုၼ်းတၢင်းၼိူဝ်လႄႈ ထွၼ်မႃးယူႇတီႈတပ်ႉလူင် ဢၼ်မီးၽူႈၵွၼ်းတပ်ႉၸုမ်းလူင် တီႈၼမ်ႉလမ်းၼႆႉၵူၺ်း"- ဝႃႈၼႆ။


လွင်ႈတပ်ႉသိုၵ်းဝႃႉ ထွၼ်ဢွၵ်ႇလွႆၵိဝ်ႇသၢႆးၼႆႉ ၽူႈၶၢၼ်ပၢၵ်ႇတင်းသွင်ၸုမ်း (ၸုမ်းဝႃႉ၊ ၸုမ်းမိူင်းလႃး)ၵေႃႈ ယိုၼ်ယၼ်၊ ၵူၺ်းၵႃႈ လွင်ႈဢၼ်သိုၵ်းဝႃႉထွၼ်ဢွၵ်ႇလိၼ်မိူင်းလႃး ဢမ်ႇထွၼ်ဢွၵ်ႇၼၼ်ႉတႄႉ တင်းသွင်ၾၢႆႇဢမ်ႇတွပ်ႇ။


တပ်ႉၼမ်ႉလမ်းၼႆႉ မိူဝ်ႈၼႂ်းပီ 2009 ဢိင်ၼိူဝ်ၸုမ်းသိုၵ်းမၢၼ်ႈတဵၵ်းမိပ်ႇ ႁႂ်ႈသွင်ၸုမ်းလႅၵ်ႈလၢႆႈႁဵတ်း တပ်ႉပႂ်ႉလႅၼ်လိၼ် (BGF) သေ ၸုမ်းဝႃႉတင်းၸုမ်းမိူင်းလႃး ဢမ်ႇယွမ်းႁပ်ႉ၊ မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် တင်းၸုမ်းသိုၵ်းမၢၼ်ႈလႄႈ သိုၵ်းဝႃႉမႃးပၵ်းသဝ်းယူႇဢဝ်ႁူမ်ႇလူမ်ႈဝႆႉၸဵမ်မိူဝ်ႈၼၼ်ႉ ႁၢၼ်ႉတေႃႇထိုင်ယၢမ်းလဵဝ်။


မိူၼ်ၼင်ႇတပ်ႉလွႆၵိဝ်ႇသၢႆး၊ လွႆသၢမ်သုမ်၊ တပ်ႉပၢင်မၢၵ်ႇၾႆး၊ ဝၢၼ်ႈၼွင်ႁူၵ်ႈ၊ လၢၼ်ႇၶူဝ်သုင်ၸိူဝ်းၼႆႉ သိုၵ်းဝႃႉၶဝ်ႈမႃးယိုတ်းၵုမ်းၵမ်ဝႆႉ မိူဝ်ႈဝၼ်းတီႈ 28/09/2016 ။ ဢိင်ၼိူဝ်သွင်ၾၢႆႇဢုပ်ႇဢူဝ်းၵၼ်သေ ၾၢႆႇသိုၵ်းဝႃႉထွၼ်ပၼ်ၶိုၼ်း ပၢင်မၢၵ်ႇၾႆး၊ ဝၢၼ်ႈၼွင်ႁူၵ်ႈ၊ လၢၼ်ႇၶူဝ်သုင်ၸိူဝ်းၼႆႉသေတႃႉၵေႃႈ တပ်ႉဢၼ်ၶဝ်ႈပႃးၼႂ်းၽႅၼ်ၵၢၼ်သိုၵ်း ၽႅၼ်ၵၢၼ်လၢႆးတိုၵ်း မိူၼ်ၼင်ႇတပ်ႉလွႆၵိဝ်ႇသၢႆးတင်းလွႆသၢမ်သုမ်ၸိူဝ်းၼႆႉ ယင်းပႆႇထွၼ်ပၼ်။


ၵူၺ်းၵႃႈ ဢိင်ၼိူဝ်ပၢင်ၵုမ်လူင်ၸုမ်းယိပ်းၵွင်ႈၵၢင်ႇ ၵမ်းတီႈ 3 ဢၼ်ၸတ်းႁဵတ်းတီႈငဝ်ႈငုၼ်းၸုမ်းဝႃႉ UWSA ငဝ်ႈငုၼ်းပၢင်သၢင်း ဝၼ်းတီႈ 22-24-02/2017 ၼၼ်ႉသေ ၵေႃႉပဵၼ်ၵႅမ်ႁူဝ်ပဝ်ႈၸုမ်းမိူင်းလႃး သၢၼ်းပိူဝ်ႇ လႆႈၵႂႃႇႁူပ်ႉၽူႈၼမ်းဝႃႉသေ လႆႈဢုပ်ႇဢူဝ်းၵၼ် တႃႇတေၵႄႈလိတ်ႈပၼ်ႁႃလွင်ႈၼႆႉ။


ဝၢႆးသေဢုပ်ႇဢူဝ်းၵၼ်ယဝ်ႉ ဢမ်ႇပေႃးႁိုင်ၵေႃႈ တူဝ်ၽူႈၼမ်းဝႃႉ ပဝ်းယဵဝ်ႇသျႅင် ႁွတ်ႈၽႅဝ်မႃးတီႈမိူင်းလႃးသေ မႃးတူၵ်းလူင်းဝႃႈ တေမွပ်ႈပၼ်တပ်ႉလွႆၵိဝ်ႇသၢႆးၶိုၼ်း၊ ၸီႉသင်ႇထွၼ်သိုၵ်း မွပ်ႈပၼ်မိူဝ်ႈဝႃးၼႆႉ- ၼႆယဝ်ႉ။

လွင်ႈတပ်ႉသိုၵ်းလူင်ပွင်ၸိုင်ႈမၢၼ်ႈ လေႃႇတိုၵ်းတပ်ႉပၢင်သဝ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႂ်းဢိူင်ႇဢူမ်မူႉ ၸႄႈဝဵင်းသီႇပေႃႉၼၼ်ႉ တၢင်း RCSS/SSA တေဢဝ် NCA ပဵၼ်ပိူင်ၵၢၼ် ၵႄႈလိတ်ႈၵႂႃႇ။

"ၸွမ်းၼင်ႇၶၵ်ႉၵၢၼ် NCA ၼၼ်ႉ ပေႃးပဵၼ်ပၢင်တိုၵ်းၸိူင်ႉၼႆ မၼ်းမီးၸုမ်းၵႄႈၶႆမၼ်း၊ ၸုမ်းလူလွမ်ၵုမ်းတူၺ်း ၵၢၼ်ၵိုတ်းတိုၵ်း JMC ၊ တေလုၵ်ႉတီႈ JMC သေ ႁဝ်းၶႃႈတေတၢင်ႇလၢတ်ႈၵႂႃႇတီႈ လူင်ပွင်ၸိုင်ႈလႄႈၾၢႆႇတပ်ႉသိုၵ်း ၶဝ်ဝႃႈ ၵွပ်ႈသင်လႄႈသူၸဝ်ႈမႃးယိုဝ်းႁဝ်း။ ပေႃးယိုဝ်းၼႆႉပွင်ႇဝႃႈပူၼ်ႉပႅၼ် NCA ၵွပ်ႈပိူဝ်ႈဝႃႈသူၸဝ်ႈႁူႉယူႇဝႃႈ ႁဝ်းမီးတီႈၼၼ်ႈ။ သူၸဝ်ႈဝၢင်းၽႅၼ်သေတင်ႈၸႂ်မႃးၶိုၼ်ႈယိုဝ်းၼႆႉ ပွင်ႇဝႃႈမၼ်းၽိတ်းၼႆ ႁဝ်းၶႃႈတေဢဝ်ၸွမ်းပိူင်ၵၢၼ် NCA သေၵႄႈလိတ်ႈၵႂႃႇ၊ ၼွၵ်ႈသေၼၼ်ႉၵေႃႈ တေလႆႈဢုပ်ႇၵုမ်ၵၼ်လၢႆၾၢႆႇယူႇ"- ၸဝ်ႈသိုၵ်းၸၢႆးငိုၼ်း ၽူႈၶၢၼ်ပၢၵ်ႇ RCSS/SSA လၢတ်ႈ။


ပၢင်တိုၵ်းပွၵ်ႈၼႆႉ တင်ႈတႄႇမွၵ်ႈ 2 မူင်းဝၢႆးဝၼ်း တေႃႇထိုင်ႈမွၵ်ႈ 6 မူင်းႁူဝ်ၶမ်ႈ၊ ပဵၼ်ႁၢဝ်ႈႁႅင်းဝႆႉ။ ၾၢႆႇသိုၵ်းမၢၼ်ႈ ပဵၼ်ပႃႈတႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 1 ၵျွၵ်ႉမႄး၊ ဢၼ်မီးတပ်ႉၶမယ 502 ၊ ၶလယ 242 ၶိုၼ်ႈလေႃႇတိုၵ်း RCSS/SSA - ၼႆယဝ်ႉ။


ၸဝ်ႈသိုၵ်းၸၢႆးငိုၼ်း သိုပ်ႇလၢတ်ႈဝႃႈ- ပေႃးလၢမ်းတူၺ်း ဢဵၼ်ႁႅင်းသိုၵ်းမၢၼ်ႈသွင်တပ်ႉၵွင်ၼႆႉ တေမီးမွၵ်ႈ ၵူၼ်းပၢၵ်ႇပၢႆ။ ၾၢႆႇႁဝ်း RCSS/SSA တႄႉ ဢမ်ႇမီးလွင်ႈဝၢတ်ႇၸဵပ်းလူႉသုမ်းသင်။ ၾၢႆႇလူင်ပွင်ၸိုင်ႈမၢၼ်ႈတႄႉ လႆႈငိၼ်းဝႃႈၶဝ်ဢဝ်ၵူၼ်းဝၢတ်ႇၸဵပ်းၶဝ် တၢင်ႇလူတ်ႉၵႃးလူင်းၵႂႃႇၼမ်ဝႆႉ၊ ၵူၺ်းၵႃႈ ႁူဝ်ယွႆႈယႅမ်းလၢႆၵေႃႉၼၼ်ႉ ဢမ်ႇလႆႈႁူႉတႅတ်ႈတေႃး။ ပၢင်တိုၵ်းပွၵ်ႈၼႆႉ ၾၢႆႇ RCSS/SSA ႁုပ်ႈယိုတ်းလႆႈ ၶိူင်ႈၸႂ်ႉသိူဝ်ႈၶူဝ်းသိုၵ်း၊ မၢၵ်ႇမိုဝ်ႈၸိုၼ်းယၢမ်းၸိူဝ်းၼႆႉၼမ်ဝႆႉ- ဝႃႈၼႆ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ တင်ႈတႄႇလူင်းလၢႆးမိုဝ်း ၵၢၼ်ၵိုတ်းယိုဝ်း တူဝ်ႈမိူင်း (NCA) မႃးၼႆႉ လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းလူင်ပွင်ၸိုင်ႈမၢၼ်ႈ 20 ပွၵ်ႈပၢႆ။


"ၼႂ်းသၢဝ်းပွၵ်ႈပၢႆၼႆႉ ၵႃႈပူၼ်ႉမႃးပဵၼ်ဢၼ် ၾၢႆႇသိုၵ်းမၢၼ်ႈဢမ်ႇပွင်ႇၶၢဝ်ႇလူင်ႈၼႃႈမႃးဢွၼ်တၢင်းသေ ႁဝ်းၵႂႃႇႁိုၵ်ႉၺႃးၵၼ်ၼႂ်းထိူၼ်ႇ၊ ပဵၼ်ပၢင်တိုၵ်းဢွၼ်ႇပၢင်တိုၵ်းဢိတ်းၵူၺ်း။ ၵူၺ်းၵႃႈမိူဝ်ႈဝႃးၼႆႉ လႅပ်ႈၶဝ်မီးၽႅၼ်သေၶိုၼ်ႈၵႂႃႇ။ ႁဝ်းၶႃႈၵေႃႈပႅၵ်ႇၸႂ်ယူႇဝႃႈ မၼ်းပဵၼ်ယွၼ်ႉသင်။ ပေႃးမႃးတူၺ်းထႅင်ႈၾၢႆႇၼိုင်ႈ ဢၼ်ႁဝ်းၶႃႈႁူႉဝႆႉၶၢဝ်ႇတၢ င်းၼွၵ်ႈမၼ်းၼၼ်ႉ လႆႈငိၼ်းဝႃႈၼႂ်းတူင်ႇဝဵင်းၵျွၵ်ႉမႄး၊ သီႇပေႃႉၸိူဝ်းၼၼ်ႉ ၸၼ်ႉတၢင်းၼိူဝ်ၶဝ်ဢမ်ႇၶႂ်ႈႁႂ်ႈ ၸုမ်းယိပ်းၵွင်ႈၵၢင်ႇၸုမ်းလႂ်ယူႇသဝ်းတူင်ႉၼိုင်"- ၸဝ်ႈသိုၵ်းၸၢႆးငိုၼ်း လၢတ်ႈ။


ၾၢႆႇႁဝ်းၶႃႈတႄႉ ၸွမ်းၼင်ႇ NCA မီးၼၼ်ႉ ႁဝ်းၶႃႈၶတ်းၸႂ်ပႂ်ႉပႃးဝႆႉ။ ၵူၺ်းၵႃႈ ပေႃးမႃးတူၺ်းမိူဝ်ႈလဵဝ်ၼႆႉ ၾၢႆႇလူင်ပွင်ၸိုင်ႈၶဝ်သမ်ႉ ၶဝ်ဢမ်ႇပႂ်ႉပႃး NCA ဢမ်ႇၵႃး ၼင်ႇႁိုဝ်မၼ်းပေႃးတေယုင်ႈယၢင်ႈၼၼ်ႉ ၶဝ်လႅပ်ႈမႃးႁႃလၢႆးသေႁဵတ်းၵႂႃႇ။ လွင်ႈၼႆႉ ႁဝ်းၶႃႈမႆႈၸႂ်ဝႃႈ ၶဝ်တိုၼ်းဢမ်ႇၶႂ်ႈႁဵတ်းတႄႉႁႃႉ NCA ၼႆႉ၊ ဢမ်ႇၼၼ်ၵေႃႈ ၶၵ်ႉၵၢၼ်ငမ်းယဵၼ်ဢၼ်ႁဵတ်းယူႇ၊ ဢၼ်တီႈၵိူဝ်းၵုမ်ၸိုင်ႈမိူင်း ဢွၼ်ႁူဝ်ႁဵတ်းသၢင်ႈယူႇ ဝႃႈတေၸတ်းပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်ပွၵ်ႈၵမ်း 2 တေမႃးၼႆႉ ၶဝ်ဢမ်ႇၶႂ်ႈႁဵတ်းႁႃႉ၊ ၶဝ်ၶႂ်ႈႁႂ်ႈမၼ်းယုင်ႈမႃးႁႃႉ၊ တင်ႈၸႂ်သၢင်ႈပၼ်ႁႃႁႃႉ ႁဝ်းၶႃႈယင်းထၢင်ႇထိူမ်ယူႇ- ၸဝ်ႈသိုၵ်းၸၢႆးငိုၼ်း သိုပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

တပ်ႉသိုၵ်းလူင်ပွင်ၸိုင်ႈမၢၼ်ႈ ႁၢင်ႈႁႅၼ်းသိုၵ်းၶဝ်ႈလေႃႇတိုၵ်း တပ်ႉပၢင်သဝ်း တပ်ႉသိုၵ်းၸိုင်ႈတႆး (RCSS/SSA) တီႈၼႂ်းဢိူင်ႇဢုမ်မူႉ ၸႄႈဝဵင်းသီႇပေႃႉ၊ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။

ဝၼ်းတီႈ 07/03/2017 (မိူဝ်ႈဝႃး) တႄႇယၢမ်းဝၢႆးဝၼ်း 2 မူင်း၊ ၾၢႆႇသိုၵ်းမၢၼ်ႈတပ်ႉပႃႈတႂ်ႈၶမယ 504 ၊ ဢၼ်ပဵၼ်တပ်ႉတူင်ႉၼိုင်ၼႂ်းၸႄႈဝဵင်းသီႇပေႃႉ ၶဝ်ႈလေႃႇတိုၵ်းယိုဝ်း တပ်ႉပၢင်သဝ်းတပ်ႉသိုၵ်းၸိုင်ႈတႆး (RCSS/SSA) ဢၼ်မီးတီႈဢိူင်ႇဢုမ်မူႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ ဢၼ်မီးၾၢႆႇႁွင်ႇဝဵင်းသီႇပေႃႉမွၵ်ႈ 7 လၵ်း။


ၽူႈမီးၸၼ်ႉၼႂ်း RCSS/SSA ၸဝ်ႈၼိုင်ႈလၢတ်ႈဝႃႈ- တပ်ႉမၢၼ်ႈ 504 ၼႆႉ ပဵၼ်တပ်ႉဢၼ်တူင်ႉၼိုင် ၼႂ်းပိုၼ်ႉတီႈ ၼႂ်းၸႄႈဝဵင်းသီႇပေႃႉ၊ ၶဝ်ၵေႃႈႁူႉယူႇဝႃႈတီႈၼႆႈပဵၼ်တပ်ႉပၢင်သဝ်းၶွင် RCSS/SSA ႁဝ်းၶႃႈလိုဝ်ႈယူႇသဝ်းဝႆႉ၊ ၵူၺ်းၵႃႈၶဝ်ၵေႃႈ ႁႅၼ်းသိုၵ်းသေတိုၼ်းၶႂ်ႈၶိုၼ်ႈယိုဝ်းႁဝ်းၵမ်းသိုဝ်ႈ၊ ၶဝ်ဢဝ်ၶိူင်ႈၵွင်ႈလူင် ယိုဝ်းၶိုၼ်ႈတၢင်းထၢင်ၸၢင်ႉပၢင်ၶႃး တၢင်းဢၼ်မီးတပ်ႉပၢင်သဝ်း RCSS/SSA ၼၼ်ႉ၊ တင်ႈဢဝ် ယၢမ်းဝၢႆးဝၼ်း 2 မူင်းတေႃႇထိုင်မွၵ်ႈ 5-6 မူင်းႁူဝ်ၶမ်ႈၸိူဝ်းၼႆႉ၊ ၾၢႆႇတၢင်းသိုၵ်းမၢၼ်ႈထႅမ်ႁႅင်းသိုၵ်းသေ ၶိုၼ်ႈမႃးယိုဝ်း၊ ထိုင်မွၵ်ႈႁူဝ်ၶမ်ႈ 6 မူင်းၼႆႉ ၶဝ်ဢဝ်ၵူၼ်းဝၢတ်ႇၸဵပ်းၶဝ်သေ ထွၼ်ဢွၵ်ႇၵႂႃႇၶိုၼ်း၊ တေႃႇထိုင်ၵၢင်ၶမ်ႈၵၢင်ၶိုၼ်းတႄႉ ၶဝ်ဢမ်ႇၶိုၼ်ႈမႃးၶိုၼ်းၼင်ႇၵဝ်ႇ-ဝႃႈၼႆ။


ၵဵဝ်ႇၵပ်းလွင်ႈပၢင်တိုၵ်းပွၵ်ႈၵမ်းၼႆႉ ၽူႈၼမ်းၼႂ်းၵူႈလွင်ႈလွင်ႈ RCSS/SSA ၸဝ်ႈသိုၵ်းလူင်ၸၢႆးလႃႉ ၵေႃႈယိုၼ်ယၼ်ဝႃႈ ပဵၼ်ပၢင်တိုၵ်းတႄႉယူႇ။ ၵူၺ်းၵႃႈ သွင်ၾၢႆႇလႆႈပဵၼ်ပၢင်တိုၵ်းၵၼ်သေ မီးလွင်ႈလူႉသုမ်းဝၢတ်ႇၸဵပ်းလူႉတၢႆတင်းသွင်ၾၢႆႇသေတႃႉ ယင်းပႆႇၸၢင်ႈယိုၼ်ယၼ်။


ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)ၼႆႉ ပႃးၼႂ်းၸုမ်းၸၢဝ်းၶိူဝ်း ဢၼ်လူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ဝႆႉ ၸွမ်းလူင်ပွင်ၸိုင်ႈမၢၼ်ႈ။ ဝၢႆးလင်လူင်းလၢႆးမိုဝ်းမႃးယဝ်ႉ တပ်ႉပၢင်သဝ်း RCSS/SSA မိူၼ်ၼင်ႇၼႂ်းၸႄႈဝဵင်းလွႆလႅမ် မိူင်းၵိုင်ၸိူဝ်းၼႆႉၵေႃႈ ထုၵ်ႇသိုၵ်းလူင်ပွင်ၸိုင်ႈ တပ်ႉမတေႃႇမၢၼ်ႈ ၶဝ်ႈယိုဝ်းၼင်ႇၵဝ်ႇ၊ ၾၢႆႇတပ်ႉသိုၵ်းမၢၼ်ႈဝႃႈပဵၼ် ၶၵ်ႉၵၢၼ်ၵႂၢတ်ႇလၢင်ႉၼႃႈလိၼ်- ၼႆယဝ်ႉ။

သိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းၵဝ်ႈၵၢင်ႉ (ၵူဝ်းၵၢင်ႉ) MNDAA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းဝဵင်းလၢဝ်ႇၵၢႆး၊ တုမ်ႉတိူဝ်ႉၵူၼ်းဝၢၼ်ႈ ၵူၼ်းမိူင်းဝၢတ်ႇၸဵပ်းလူႉတၢႆၼမ်၊ ၶူဝ်းၶွင်ႁိူၼ်းယေး ႁူင်းႁႅမ်းလႄႈ လူတ်ႉၵႃး ထုၵ်ႇၾႆးမႆႈလူႉၵွႆၸွမ်းတင်းၼမ်။

မိူဝ်ႈဝၼ်းတီႈ 06/03/2017 တင်ႈတႄႇယၢမ်းၵၢင်ၼႂ် 2  မူင်းပၢႆတေႃႇထိုင်ၵၢင်ၼႂ်မွၵ်ႈ 8 မူင်း၊ တပ်ႉသိုၵ်းဢူၺ်းလီ တီႇမူဝ်ႇၶရႅတ်ႉတိၵ်ႉၵူႈၸၢဝ်းၶိူဝ်းမိူင်းမၢၼ်ႈ (MNDAA) တင်းသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်တီႈၼႂ်း ဝဵင်းလၢဝ်ႇၵၢႆး။ ယွၼ်ႉၽေးပၢင်တိုၵ်းၼႆႉ မီးၵူၼ်းလူႉတၢႆၸွမ်းၼမ်။ တေႃႇထိုင်ယၢမ်းလဵဝ် ပၢင်တိုၵ်းယင်းပႆႇယဵၼ်။ ၾၢႆႇလူင်ပွင်ၸိုင်ႈသိုၵ်းမၢၼ်ႈ တိုၵ်ႉသိုပ်ႇထႅမ်ႁႅင်းသိုၵ်း ၶိူင်ႈၵွင်ႈလူင် မိူၼ်ၼင်ႇၵႃးတႅင်ႊၸိူဝ်းၼႆႉ။ ၾၢႆႇသိုၵ်းၵဝ်ႈၵၢင်ႉ MNDAA တီႉၺွပ်းဢဝ်ပလိၵ်ႈမၢၼ်ႈ 4 ၵေႃႉလႄႈယိုဝ်းတၢႆ 5 ၵေႃႉ- ဝႃႈၼႆ။


မေႃသွၼ်ႁူင်းႁဵၼ်းၸၼ်ႉငဝ်ႈ ႁူင်းႁဵၼ်းလူင်ပွင်ၸိုင်ႈၵေႃႉၼိုင်ႈ ၸိုဝ်ႈႁွင်ႉပျႃႇမီႇ တိူဝ်ႉၺႃးၸၢၵ်ႇမၢၵ်ႇလူင်သေ လႆႈလူႉတၢႆၵႂႃႇ။ လႆႈႁူႉဝႃႈမၼ်းၼၢင်းၼႆႉ ယွၼ်းလိုဝ်ႈၵၢၼ်ၵိူတ်ႇလုၵ်ႈသေ တိုၵ်ႉပွၵ်ႈမႃးႁဵတ်းၵၢၼ်ၶိုၼ်းလႆႈၵူၺ်း၊ လုၵ်ႈလၢင်းမၼ်းၼၢင်း ဢၼ်ၵိုတ်းဝႆႉၼၼ်ႉ ၾၢႆႇမုၵ်ႉၸုမ်းလူင်မေႃသွၼ်မိူင်းမၢၼ်ႈပတ်းပိုၼ်ႉ တေႁပ်ႉပုၼ်ႈၽွၼ်းလဵင်ႉလူၵႂႃႇ-ဝႃႈၼႆ။


ၵဵဝ်ႇၵပ်းလွင်ႈပၢင်တိုၵ်းၼႆႉ ၾၢႆႇလုမ်းၸွမ်ၸိုင်ႈမၢၼ်ႈ ၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ်ၸိုင်ႈမိူင်း ဢွၵ်ႇၶေႃႈပိုၼ်ၽၢဝ်ႇဝႆႉ ပၼ်ၶေႃႈတိုၵ်းသူၼ်းႁႂ်ႈဢဝ်လွင်ႈငမ်းယဵၼ်သေ ၶဝ်ႈႁူပ်ႉထူပ်းဢုပ်ႇဢူဝ်းငူပ်ႉငီႉၵၼ်၊ ဢမ်ႇၸႂ်ႈတေဢဝ်လွင်ႈၵွင်ႈၵၢင်ႇၵႄႈလိတ်ႈၵၼ်။ လွင်ႈပဵၼ်ပၢင်တိုၵ်းၼႆႉ ႁဵတ်းႁႂ်ႈမီးလွင်ႈတုမ်ႉတိူဝ်ႉၵူၼ်းဝၢၼ်ႈ ၵူၼ်းမိူင်း မီးလွင်ႈဝၢတ်ႇၸဵပ်းလူႉတၢႆၼမ်၊ လူႉသုမ်းၶူဝ်းၶွင်ၸိူဝ်းၼႆႉၵူၺ်း၊ ဢမ်ႇမီးၽွၼ်းလီသင်- ဝႃႈၼႆ။


ၾၢႆႇတပ်ႉသိုၵ်းၵဝ်ႈၵၢင်ႉ ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ- ၵွပ်ႈသိုၵ်းလူင်ပွင်ၸိုင်ႈမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း တပ်ႉသိုၵ်းၵဝ်ႈၵၢင်ႉယူႇၶိူဝ်းၶိူဝ်းယႂ်းယႂ်းလႄႈ ၸင်ႇလႆႈႁၢင်ႈႁႅၼ်းၽႅၼ်ၵၢၼ်သိုၵ်း ၶဝ်ႈတိုၵ်းၼႂ်းဝဵင်းလၢဝ်ႇၵၢႆးလႄႈ ဝၢၼ်ႈႁိမ်းႁွမ်း တီႈဢၼ်တပ်ႉလူင်ပွင်ၸိုင်ႈသိုၵ်းမၢၼ်ႈပၵ်းပႂ်ႉယူႇသဝ်းဝႆႉ ၸိူဝ်းၼၼ်ႉ- ဝႃႈၼႆ။


ယိူင်းဢၢၼ်းဢၼ်လႆႈၶဝ်ႈလေႃႇတိုၵ်းၸိူင်ႉၼႆၼႆႉ ၶႂ်ႈႁႂ်ႈသိုၵ်းလူင်ပွင်ၸိုင်ႈမၢၼ်ႈ လူတ်းယွမ်းလွင်ႈထႅမ်ႁႅင်း သိုၵ်းလေႃႇတိုၵ်း ၼႂ်းၼႃႈလိၼ်ၵဝ်ႈၵၢင်ႉ- ဝႃႈၼႆ။


ပူၼ်ႉမႃးမိူဝ်ႈၼႂ်းပီ 2009 ၼၼ်ႉ ၸုမ်းသိုၵ်းမၢၼ်ႈမိပ်ႇငႅၼ်းတပ်ႉသိုၵ်းၵဝ်ႈၵၢင်ႉ MNDAA လႅၵ်ႈလၢႆႈႁဵတ်းတပ်ႉပႂ်ႉ လႅၼ်လိၼ် BGF ။ တပ်ႉသိုၵ်းၵဝ်ႈၵၢင်ႉဢမ်ႇယွမ်းလႄႈ တပ်ႉသိုၵ်းမၢၼ်ႈထႅမ်ႁႅင်းသိုၵ်း ၶဝ်ႈၼႂ်းၼႃႈလိၼ်ၽွင်းငမ်း တူဝ်ၵဝ်ႇၵူဝ်းၵၢင်ႉ (ၵဝ်ႈၵၢင်ႉ)သေ ထိုင်တီႈသွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း၊ တပ်ႉသိုၵ်းမၢၼ်ႈႁုပ်ႈယိုတ်း ဢဝ်လႆႈ ႁူင်းႁဵတ်းၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်း ၸိူဝ်းၼႆႉ၊ ၽူႈၼမ်းၸုမ်းၵဝ်ႈၵၢင်ႉ ၽိူင်ၵျႃးသိူင်းၵေႃႈ လႆႈငိူင်ႉဢွၵ်ႇၼႃႈလိၼ်ၵဝ်ႈၵၢင်ႉၵႂႃႇ။


ထိုင်မႃးမိူဝ်ႈပီ 2015 ၵေႃႈပဵၼ်ပၢင်တိုၵ်းၵၼ်ထႅင်ႈ၊ ယွၼ်ႉတပ်ႉသိုၵ်းၵဝ်ႈၵၢင်ႉ ၶဝ်ႈမႃးတိုၵ်းယိုဝ်းဢဝ်ၶိုၼ်း ၼႃႈလိၼ်ၽွင်းငမ်းတူဝ်ၵဝ်ႇ။ ပဵၼ်ပၢင်တိုၵ်းၵၼ်ပွတ်းတွၼ်ႈလၢဝ်ႇၵၢႆး/ ၵွင်းၸၢင်ႉၸိူဝ်းၼႆႉႁၢဝ်ႈႁႅင်းသေ ၵူၼ်းမိူင်းလႆႈလူႉယႂ်ႇတၢႆၼမ်၊ မီးၵူၼ်းမိူင်းၶႄႇၸွမ်းလႅၼ်လိၼ် လႆႈတိူဝ်ႉဝၢတ်ႇတၢႆယွၼ်ႉမၢၵ်ႇလူင် သိုၵ်းမၢၼ်ႈသေ ထိုင်တီႈလူင်ပွင်ၸိုင်ႈမၢၼ်ႈ ပေႃးလႆႈသၢႆႈတႅၼ်းၵႃႈႁူဝ်ပၼ် ၸိူဝ်းၼႆႉ။

ဢိင်ၼိူဝ်သိုၵ်းမၢၼ်ႈတင်း တပ်ႉသိုၵ်းၵူဝ်းၵၢင်ႉ ပဵၼ်ပၢင်တိုၵ်းၵၼ် ၼႂ်းဝဵင်းလၢဝ်ႇၵၢႆးသေ တုမ်ႉတိူဝ်ႉၵူၼ်းဝၢၼ်ႈ ၵူၼ်းမိူင်းဝၢတ်ႇၸဵပ်းလူႉတၢႆ၊ ၶူဝ်းၶွင်ႁိူၼ်းယေး လူတ်ႉၵႃးလူႉၵွႆၸွမ်းတင်းၼမ်။

တင်ႈတႄႇၶၢဝ်းယၢမ်းတဵင်ႈၶိုၼ်းၸၢႆႉ ဝၼ်းတီႈ 06/03/2017 မိူဝ်ႈၼႆႉ  (ၵၢင်ၼႂ်) 1 မူင်းပၢႆတေႃႇထိုင်ၵၢင်ၼႂ် 8 မူင်း၊ တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းဢူၺ်းလီ တီႇမူဝ်ႇၶရေႇၸီႇၵူႈၸၢဝ်းၶိူဝ်းမိူင်းမၢၼ်ႈ (MNDAA) ပဵၼ်ပၢင်တိုၵ်းၵၼ်တီႈၼႂ်းဝဵင်းလၢဝ်ႇၵၢႆး။ ၾၢႆႇတပ်ႉသိုၵ်းၵူဝ်းၵၢင်ႉ ယိုတ်းလႆႈၶူဝ်းၶွင်ၶိူင်ႈယိပ်းၸုမ်းသိုၵ်းမၢၼ်ႈ ဢိၵ်ႇတင်းၵူၼ်းသိုၵ်းလူင်ပွင်ၸိုင်ႈမၢၼ်ႈ ၵမ်ႈၽွင်ႈ- ၼႆယဝ်ႉ။


မေႃသွၼ်ၸၼ်ႉငဝ်ႈ ႁူင်းႁဵၼ်းလူင်ပွင်ၸိုင်ႈ ၸိုဝ်ႈပျႃႇမီႇ၊ ၵေႃႉဢၼ်ယွၼ်းလိုဝ်ႈၵိူတ်ႇလုၵ်ႈသေ တိုၵ်ႉမႃးႁဵတ်းၵၢၼ်ၶိုၼ်းလႆႈ သွင်သၢမ်ဝၼ်းၼၼ်ႉၵေႃႈ ၺႃးၸၢၵ်ႇမၢၵ်ႇလူင်သေလူႉတၢႆၵႂႃႇ- ၼႆယဝ်ႉ။


တေႃႇထိုင်ယၢမ်းၵၢင်ဝၼ်းတဵင်ႈမိူဝ်ႈၼႆႉ သိုၵ်းလူင်ပွင်ၸိုင်ႈ တပ်ႉမတေႃႇမၢၼ်ႈ တိုၵ်ႉသိုပ်ႇထႅမ်ႁႅင်းသိုၵ်း ၸဵမ်လူတ်ႉၵႃးတႅင်ႉ ၸိူဝ်းၼႆႉ၊ ပၢင်တိုၵ်းၵေႃႈ တိုၵ်ႉသိုပ်ႇပဵၼ်ဝႆႉယူႇ- ၼႆယဝ်ႉ။


ပူၼ်ႉမႃးမိူဝ်ႈၼႂ်းပီ 2009 ၼၼ်ႉ ၸုမ်းသိုၵ်းမၢၼ်ႈထႅမ်ႁႅင်းသိုၵ်း ၶဝ်ႈၼႂ်းၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ (ၵဝ်ႈၵၢင်ႉ)သေ ပိုတ်ႇၼႃႈသိုၵ်းလေႃႇတိုၵ်း တပ်ႉသိုၵ်းၵူဝ်းၵၢင်ႉ MNDAA ထိုင်တီႈၽူႈၼမ်းၵူဝ်းၵၢင်ႉ ၽိူင်ၵျႃးသိူင်း လႆႈငိူင်ႉဢွၵ်ႇၼႃႈလိၼ်ၵူဝ်းၵၢင်ႉ။ မိူဝ်ႈပီ 2015 ၵေႃႈ သိုၵ်းမၢၼ်ႈ တပ်ႉၸုမ်းလူင် (တပ်ႉမ) မိူင်းၶၢင်၊ တပ်ႉမ 11 တင်း တပ်ႉမ 66 ၸိူဝ်းၼႆႉ ပဵၼ်ပၢင်တိုၵ်းၵၼ်တင်း ၸုမ်းၵူဝ်းၵၢင်ႉ ၼႂ်းၼႃႈလိၼ်ၵူဝ်းၵၢင်ႉ ပွတ်းတွၼ်ႈႁိမ်းႁွမ်းလၢဝ်ႇၵၢႆး/ ၵွင်းၸၢင်ႉ ၸိူဝ်းၼႆႉႁၢဝ်ႈႁႅင်း။

ၶွင်ႇသီႇဢဝ်ၶိုၼ်းၸိုင်ႈတႆး RCSS ၸတ်းႁဵတ်းပၢင်ၵုမ်ႁူဝ်ႁုပ်ႈပီ (2016) တီႈငဝ်ႈၸိုင်ႈ လွႆတႆးလႅင်း၊ ဢွၵ်ႇၶေႃႈပိုၼ်ၽၢဝ်ႇဝႃႈ တေၶတ်းၸႂ် ႁဵတ်းႁႂ်ႈမႅၼ်ႈၸွမ်းၽိုၼ်လိၵ်ႈၵိၼ်ၵႅၼ်ႇ ၶေႃႈတူၵ်းလူင်းၵၢၼ်ၵိုတ်းယိုဝ်း (NCA) ၵႂႃႇ။

"ႁဝ်းၶႃႈမႃးဢုပ်ႇဢူဝ်းၵၼ်၊ မႃးထတ်းသၢင်ၶိုၼ်း လွင်ႈႁဵတ်းသၢင်ႈတူင်ႉၼိုင်ၵၢၼ်ငၢၼ်းမႃး ၶၢဝ်းတၢင်းၼိုင်ႈပီ၊ မႃးထတ်းသၢင်ပႃးၵူၼ်း၊ တမ်းဝၢင်းၽႅၼ် တႃႇႁဵတ်းသၢင်ႈၵၢၼ်ငၢၼ်းၵႂႃႇမိူဝ်းၼႃႈ၊ ၸင်ႇလႆႈပိုၼ်ၽၢဝ်ႇ ႁႂ်ႈၵူၼ်းတင်းၼမ် ႁႂ်ႈၵူၼ်းမိူင်းႁဝ်းလႆႈႁူႉၸွမ်း"- ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈၼႄတၢင်းယိူင်းဢၢၼ်း ဢၼ်လႆႈဢွၵ်ႇၶေႃႈပိုၼ်ၽၢဝ်ႇၼင်ႇၼႆ။


တင်ႈတႄႇဝၼ်းတီႈ 21-23/02/2017 ၶၢဝ်းတၢင်း 3 ဝၼ်း၊ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းႁဵတ်းပၢင်ၵုမ်ႁူဝ်ႁုပ်ႈပီ တႃႇပီ 2016 တီႈငဝ်ႈၸိုင်ႈလွႆတႆးလႅင်း။ တီႈပၢင်ၵုမ်ပွၵ်ႈၼႆႉ မီးၽူႈဢွၼ်ႁူဝ်၊ ၽူႈမီးၸၼ်ႉ၊ ၽူႈၵွၼ်းတပ်ႉၵူႈၼႃႈတီႈလႄႈ ၽူႈမီးပုၼ်ႈၽွၼ်းၶဝ် ၶိုၼ်ႈႁွတ်ႈၶဝ်ႈႁူမ်ႈ။ လႆႈထတ်းသၢင်ၶိုၼ်းၵၢၼ်ငၢၼ်း ဢၼ်လႆႈႁဵတ်းသၢင်ႈမႃး ၶၢဝ်းတၢင်းၼိုင်ႈပီ၊ လႆႈတမ်းဝၢင်းၼႃႈၵၢၼ် တႃႇၶၢဝ်းတၢင်းမိူဝ်းၼႃႈၸိူဝ်းၼႆႉသေ ယူႇတီႈၵေႃၵမ်ၵၢၼ်ဢွၼ်ႁူဝ်ငဝ်ႈၸိုင်ႈ လႆႈဢွၵ်ႇၶေႃႈပိုၼ်ၽၢဝ်ႇၵႂႃႇ ပိူင်လူင်မၼ်းမီး 5 ၶေႃႈ။


1.တေၶတ်းၸႂ်ႁဵတ်းသၢင်ႈၵႂႃႇႁႂ်ႈထုၵ်ႇမႅၼ်ႈၸွမ်း ၽိုၼ်လိၵ်ႈၵိၼ်ၵႅၼ်ႇ ၶေႃႈတူၵ်းလူင်းၵၢၼ်ၵိုတ်းယိုဝ်းတူဝ်ႈမိူင်း (NCA) ၵႂႃႇ။


2.ၸွမ်းၼင်ႇၽႅၼ်တၢင်းၵၢၼ်မိူင်း 7 ၶၵ်ႉ ၼႂ်း NCA တမ်းဝၢင်းဝႆႉၼၼ်ႉ ယူႇတီႈ RCSS တေႁူမ်ႈၸတ်းပၢင်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး)လႄႈ တေၶဝ်ႈႁူမ်ႈဢုပ်ႇဢူဝ်းၸွမ်း ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ပွၵ်ႈထူၼ်ႈ 2 ။


3.ၼင်ႇႁိုဝ်ၶေႃႈယိူင်းဢၢၼ်းၵၢၼ်မိူင်း ၸၢဝ်းၶိူဝ်းၼႂ်းမိူင်းတႆးတင်းသဵင်ႈ ပေႃးၸၢင်ႈမိူၼ်ၵၼ်၊ ပဵၼ်ၶေႃႈလဵဝ် သဵင်လဵဝ်ၵၼ်လႆႈၼၼ်ႉ ယူႇတီႈ RCSS တေဢဝ်လၵ်းၵၢၼ် (မူႇပိူင်) ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) သေ ၶတ်းၸႂ်ၶိုင်ပွင်ႁဵတ်းသၢင်ႈၵႂႃႇ။


4.ယိူင်းဢၢၼ်းတႃႇပႂ်ႉပႃးၶူဝ်းၶွင် သၽႃႇဝၾိင်ႈတိုၼ်း ၼမ်ႉလိၼ်ႁိၼ်ၽႃသေ ၵဵဝ်ႇၵပ်းလွင်ႈတႅပ်းမႆႉ၊ ၵၢၼ်ၶတ်းႁႄႈၵူႈလွင်ႈလွင်ႈ ဢိၵ်ႇလွင်ႈႁဵတ်းသၢင်ႈၾၢႆၸိူဝ်းၼႆႉ ယူႇတီႈ RCSS တေလူင်းထတ်းသၢင်တူၺ်း၊ ပေႃးၽိတ်းပိူင်ၸိုင် တေဢဝ်လိူင်ႈပၼ်တူတ်ႈတၢမ်ႇၼၵ်းၼႃ။


5.ၵၢၼ်ၽဵဝ်ႈမူၺ်ႉယႃႈမဝ်းၵမ်လႄႈ ၵၢၼ်ပူၵ်းပွင်ပိုၼ်ႉတီႈၸိူဝ်းၼၼ်ႉ တေငူပ်ႉငီႉတင်းၽူႈၵဵဝ်ႇၶွင်ႈ ၸဝ်ႈၼႃႈတီႈၶဝ်သေ ၶိုင်ပွင်ႁဵတ်းသၢင်ႈၵႂႃႇ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး။ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ၵမ်းထူၼ်ႈသွင် ဢၼ်တေၸတ်းႁဵတ်းတၢင်းၼႃႈၼႆႉၵေႃႈ မီးလွင်ႈႁၢင်ႈႁႅၼ်းဝႆႉတႃႇတေၵႂႃႇၶဝ်ႈႁူမ်ႈယူႇ။

ငႃးသိုၵ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢၼ်ၵႂႃႇတူင်ႉၼိုင် ၼႂ်း ၸႄႈဝဵင်းၵျွၵ်ႉမႄး ၼၼ်ႉ ၺႃးသိုၵ်းလွႆ (တဢၢင်း) TNLA ၼပ်ႉႁူဝ်ပၢၵ်ႇ ဝႅတ်ႉလွမ်ႉပိုတ်းယိုဝ်း လႄႈသွင်ၾၢႆႇ လႆႈပဵၼ် ပၢင်တိုၵ်း တင်းႁၢင်ႈ ၼႂ်းဝၼ်းမိူဝ်ႈၼႆႉ ။

ဝၼ်းတီႈ 5/2/2017 တင်ႈတႄႇယၢမ်းၵၢင်ၼႂ် 10 မူင်းပၢႆတေႃႇထိုင်ဝၢႆးဝၼ်း 4 မူင်းပၢႆ (သဵင်ၵွင်ႈယင်း ပႆႇယဵၼ်) သိုၵ်းလွႆ TNLA ဢႅၼ်ႁႅင်းမွၵ်ႈ 400 ဝႅတ်ႉလွမ်ႉလေႃႇတိုၵ်း ငႃးသိုၵ်းတႆး SSPP/SSA ဢၼ်ဢဵၼ်ႁႅင်းမီးမွၵ်ႈ 100 ပၢႆ ၼၼ်ႉသေ သွင်ၾၢႆႇပဵၼ်ပၢင်တိုၵ်းၵၼ် ၼႂ်းဢိူင်ႇတေႃႉသၢင်ႇ - မင်းၵုင်း  ဢၼ်မီးၸဵင်ႇႁွင်ႇဝၼ်းတူၵ်းဝဵင်းၵျွၵ်ႉမႄး ။


ၸဝ်ႈသိုၵ်းလူင် ၸၢႆးသု ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - “ၸႂ်ႈၶႃႈဢေႃႈ။ ငႃးသိုၵ်းႁဝ်းၶႃႈ တိုၵ်ႉလိုဝ်ႈၵိၼ်ၶဝ်ႈယူႇ ဝူင်ႈၵၢင်ဝၢၼ်ႈတေႃၵုတ်ႇလႄႈဝၢၼ်ႈၼႃးၶႃး။ ဢၢင်ႈတေ သိုပ်ႇၶၢဝ်းတၢင်းၵႂႃႇတၢင်းထုင်ႉလွႆဝၢႆ။ ၽွင်းၼၼ်ႉ သိုၵ်းလွႆၶဝ် ပႂ်ႉယိုဝ်းႁဝ်းၶႃႈ။ ႁဵတ်းသင် လႄႈ ႁဵတ်းၸိူင်ႉၼႆ ၶဝ်တၵ်းတေလႆႈမႃးၵႄႈလိတ်ႈ။ ၽူႈမီးပုၼ်ႈၽွၼ်းႁဝ်းၶႃႈၵေႃႈ ၵပ်းသိုပ်ႇ ၵူၼ်းလူင် ၶဝ်ဝႆႉယူႇ။  လွင်ႈၼႆႉ ၶဝ်ႈပႆႇတွပ်ႇလၢတ်ႈ ၵႄႈတူဝ်သင်။ ႁဝ်းၶႃႈၼႆႉတိုၼ်းဢမ်ႇၵမ်ႉထႅမ် ၵၢၼ်ဢဝ်လၢႆးၵွင်ႈၵၢင်ႇ ၵႄႈလိတ်ႈပၼ်ႁႃ။ ပဵၼ်ၸၢဝ်းၶိူဝ်းၼင်ႇၵၼ် ယိုဝ်းၵၼ်ၼႆ ယိင်ႈၶႅၼ်းဢမ်ႇၵမ်ႉ ထႅမ် ဢမ်ႇပၼ်ႁႅင်း သေဢိတ်းယဝ်ႉ၊ မၼ်းပဵၼ်ၵၢၼ်တူၵ်းလွၵ်း ၸဝ်ႈဢႃႇၼႃႇသိုၵ်းမၢၼ်ႈ။ ၵူၺ်းၵႃႈ ဢၼ်လႆႈပဵၼ်ၵမ်းၼႆႉ ၶဝ်ပဵၼ်ၾၢႆႇတႄႇဢွၼ်တၢင်းလႄႈ ၵႃႈတေလႆႈ ၸတ်းၵၢၼ်ၵၼ် တေႃႇပေႃးယဝ်ႉတူဝ်ႈယဝ်ႉ ”- ဝႃႈၼႆ။


ၵဵဝ်ႇၵပ်းလွင်ႈၼႆႉ ၶုၼ်သိုၵ်းလူင် မၢႆးဢၢႆႈၵျေႃႇ ႁွင်ႈၵၢၼ်ၾၢႆႇၶၢဝ်ႇ သိုၵ်းလွႆ TNLA - တွပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ လွင်ႈပဵၼ်ပၢင်တိုၵ်းတင်း SSPP/SSA ၼႆႉပႆႇလႆႈႁပ်ႉႁူႉသင်ၸွမ်း၊ ၽူႈမီးပုၼ်ႈၽွၼ်းၼႂ်းပိုၼ်ႉတီႈၵေႃႈ ဢမ်ႇပႆႇႁၼ်ႁၢႆးငၢၼ်းသင်မႃး - ဝႃႈၼႆ ။


ၽူႈၵွၼ်းသိုၵ်း SSPP/SSA ၼႂ်းပိုၼ်ႉတီႈၸဝ်ႈၼိုင်ႈလၢတ်ႈဝႃႈ  “ မိူဝ်ႈၵွၼ်ႇ သိုၵ်းပလွင်ႈလႄႈ ႁဝ်းၶႃႈ ၵႂႃႇမႃးတူင်ႉၼိုင် ႁဵတ်းၼႆယူႇတႃႇသေ။ ပဵၼ်သင်ပွၵ်ႈၼႆႉသမ်ႉ မႃးယိုဝ်းၵၼ်။ ႁဝ်းၶႃႈတေၵႂႃႇ တၢင်းလွႆဝၢႆ ၼႆၵေႃႈ ၶဝ်ႁူႉယူႇ။  ၶဝ်ယူႇဝႆႉတီႈသႃႇ ႁႅင်းၵေႃႈသမ်ႉၼမ်လိူဝ်ႁဝ်းၶႃႈၽွင်ႈ လႄႈ၊ ႁႅင်းဢမ်ႇၵိုင်ႇငၢမ်ႇ ၵၼ်၊ တၢမ်းၶမ်ႈၼႆႉ လေႃႇၵၼ် ပေႃးထိုင်မႃးၶိုၼ်း ႁိမ်းဝၢၼ်ႈ ၼႃးၶႃး ဢေႃႈ ။ ႁႅင်းသိုၵ်းဢၼ်ထႅမ် တၢင်းလင် ၵေႃႈ တိုၵ်ႉမႃးထႅင်ႈယူႇ ဝႃႈၼႆ” - ဝႃႈၼႆ။


ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၼႆႉ ပဵၼ်ဢူၺ်းလီၵၼ် တင်းတပ်ႉသိုၵ်းလွႆ TNLA ။ ဢၼ် သိုၵ်းလွႆ တင်း တပ်ႉသိုၵ်းၸိုင်ႈတႆး RCSS/SSA မီးပၼ်ႁႃၵၼ်ၼၼ်ႉၵေႃႈ ၼင်ႇႁိုဝ်တေၵႄႈလိတ်ႈလႆႈ တူဝ် ၸွမ်သိုၵ်းလူင် သိူဝ်ထႅၼ် ၽူႈၼမ်းၼႃႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၶတ်းၸႂ်ၶဝ်ႈၵႄႈၵၢင်ၸွႆႈ ႁႃလၢႆးၵႄႈလိတ်ႈပၼ် မႃးတႃႇသေႇ။ ပၼ်ႁႃ ဢၼ်သိုၵ်းလွႆ တႄႇငွႆးယိုဝ်း RCSS/SSA မိူဝ်ႈႁၢင်ပီ 2015 မႃးတေႃႇယၢမ်းလဵဝ်ၵေႃႈ ယင်းပႆႇယဝ်ႉပႆႇတူဝ်ႈ၊ ၵူၼ်းမိူင်း တိုၵ်ႉလႆႈ တုၵ်ႉယၢၵ်ႈယွၼ်ႉပၢင်တိုၵ်းယူႇ ႁၢၼ်ႉတေႃႇထိုင်ဝၼ်းမိူဝ်ႈၼႆႉ။