သိုၵ်းမၢၼ်ႈ လၢႆတပ်ႉၵွင်၊ ပႃးတင်း ႁိူဝ်းဝိၼ် ၶွၼ်ႈႁႅင်းၵၼ် လေႃႇတိုၵ်းသိုၵ်းလွႆ (တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း) TNLA  ၸိူဝ်းတူင်ႉၼိုင် ပၵ်းသဝ်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ လႄႈ သွင်ၾၢႆႇလႆႈပဵၼ်ပၢင်တိုၵ်းၵၼ် တင်းဝၼ်း။

ဝၼ်းတီႈ 28/3/2017  တပ်ႉသိုၵ်းလူင်ပွင်ၸိုင်ႈသိုၵ်းမၢၼ်ႈ ဢဝ်ႁႅင်းသိုၵ်း တပ်ႉၵွင် ၶလရ 503 တင်းၶလရ 506 လေႃႇတိုၵ်း သိုၵ်းလွႆ  TNLA ဢၼ်တူင်ႉၼိူင်ယူႇၼႂ်းၸႄႈဝဵင်းၵျွၵ်ႉမႄး ဢိူင်ႇပၢင်ဝူဝ်းလူင် ဝၢၼ်ႈၼမ်ႉၶုမ်ႇ။ ၾၢႆႇသိုၵ်းလွႆသမ်ႉ ပဵၼ် တပ်ႉၵွင် 717 လႄႈတပ်ႉၵွင် 666  ႁပ်ႉတိုၵ်း။


ၾၢႆႇသိုၵ်းလွႆ ပိုၼ်ၽၢဝ်ႇဝႃႈ ပၢင်တိုၵ်းလႆႈပဵၼ် တင်ႈတႄႇ ၵၢင်ၼႂ် 8 မူင်း ထိုင်ဝၢႆးဝၼ်း 1  မူင်း။  ၾၢႆႇသိုၵ်း လူင်ပွင်ၸိုင်ႈ မၢၼ်ႈ လႆႈၸႂ်ႉႁိူဝ်းဝိၼ်မႅင်းမီႈ 2 လမ်း ၸွႆႈယိုဝ်း - ဝႃႈၼႆ။


“ပၢင်တိုၵ်း ပဵၼ်တင်ႈတႄႇၵၢင်ၼႂ် တေႃႇထိုင်ဝၢႆးဝၼ်းၵေႃႈ ဢမ်ႇယဵၼ်၊ ၵူၼ်းမိူင်းၵေႃႈ ၵူဝ်ႁႄပၢႆႈလၢႆႁူး လၢႆတၢင်း။ မိူဝ်ႈဝၢႆးဝၼ်းၼၼ်ႉ သိုၵ်းမၢၼ်ႈ သူင်ႇႁိူဝ်းဝိၼ်မႃးၸွႆႈယိုဝ်းလႄႈ သိုၵ်းလွႆ လႆႈထွႆဢွၵ်ႇ ထုင်ႉဝၢၼ်ႈၼမ်ႉၶုမ်ႇ သေ ဢဝ်ပၢင်တိုၵ်း ယဵၼ်ၵႂႃႇဢေႃႈ” - ၼႆ ၸၢႆးဢၢႆႈၸွႆး ၼုမ်ႇၼႂ်းပိုၼ်ႉတီႈ လၢတ်ႈ။


ဢိူင်ႇပၢင်ဝူဝ်းလူင်၊ ထုင်ႉမိူင်းလူင် ၊ တူင်ႇဝဵင်းၵျွၵ်ႉမႄး တီႈဢၼ်သိုၵ်းလွႆ တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ်ၼႆႉ  တပ်ႉၸုမ်း 612 တပ်ႉသိုၵ်းၸိုင်ႈတႆး SSPP/SSA ၵေႃႈ ၵုမ်းၵမ် ၵႂႃႇမႃးတူင်ႉၼိုင်။


ႁွင်ႈၵၢၼ်ၶၢဝ်ႇၾၢႆႇသိုၵ်းတဢၢင်းပိုၼ်ၽၢဝ်ႇဝႃႈ ယွၼ်ႉပိူဝ်ႈၾၢႆႇသိုၵ်းမၢၼ်ႈမီးလွင်ႈတၢႆဝၢတ်ႇလူႉသုမ်းၼမ်လႄႈ လႆႈဢဝ်ႁိူဝ်းဝိၼ်တိုၵ်းမႃးၸွႆႈၼႆသေတႃႉ လွင်ႈတၢႆဝၢတ်ႇလူႉသုမ်းတင်းသွင်ၾၢႆႇၼႆႉ ယင်းပႆႇလႆႈႁူႉတႅတ်ႈတေႃး။


ၼႂ်းၸႄႈဝဵင်းၵျွၵ်ႉမႄး ၾၢႆႇႁွင်ႇတၢင်းၵႃး ဝဵင်းလိူဝ်ႇ၊ ၼွင်ၶဵဝ်၊ ၵျွၵ်ႉမႄး ၵႂႃႇလႃႈသဵဝ်ႈ ၼၼ်ႉ မီးၸုမ်းသိုၵ်းမၢၼ်ႈ၊ သိုၵ်း RCSS/SSA ၊ သိုၵ်းSSPP/SSA ၊ သိုၵ်း TNLA ၵႂႃႇမႃးတူင်ႉၼိုင် လႄႈ ၼွၵ်ႈသေ သိုၵ်းလွႆ တင်းသိုၵ်းမၢၼ်ႈ ၵႆႉပဵၼ် ပၢင်တိုၵ်းၵၼ် ၼၼ်ႉ သိုၵ်းလွႆ တင်းသိုၵ်း RCSS/SSA ၵေႃႈ ၵႆႉၵႆႉပဵၼ်ပၢင်တိုၵ်းၵၼ်သေဢမ်ႇၵႃး မိူဝ်ႈႁူဝ်လိူၼ် ၾႅပ်ႊၿိဝ်ႊရီႊ ဝၼ်းတီႈ 5 ၼၼ်ႉၵေႃႈ သိုၵ်းလွႆ ငွႆးယိုဝ်း တပ်ႉသိုၵ်းၸိုင်ႈတႆး SSPP/SSA  လႄႈ သွင်ၾၢႆႇ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။ ႁၢၼ်ႉတေႃႇယၢမ်းလဵဝ် ပၼ်ႁႃယင်းပႆႇယဝ်ႉပႆႇတူဝ်ႈ - ဝႃႈၼႆ။