ၶွင်ႇသီႇဢဝ်ၶိုၼ်းၸိုင်ႈတႆး RCSS ၸတ်းႁဵတ်းပၢင်ၵုမ်ႁူဝ်ႁုပ်ႈပီ (2016) တီႈငဝ်ႈၸိုင်ႈ လွႆတႆးလႅင်း၊ ဢွၵ်ႇၶေႃႈပိုၼ်ၽၢဝ်ႇဝႃႈ တေၶတ်းၸႂ် ႁဵတ်းႁႂ်ႈမႅၼ်ႈၸွမ်းၽိုၼ်လိၵ်ႈၵိၼ်ၵႅၼ်ႇ ၶေႃႈတူၵ်းလူင်းၵၢၼ်ၵိုတ်းယိုဝ်း (NCA) ၵႂႃႇ။

"ႁဝ်းၶႃႈမႃးဢုပ်ႇဢူဝ်းၵၼ်၊ မႃးထတ်းသၢင်ၶိုၼ်း လွင်ႈႁဵတ်းသၢင်ႈတူင်ႉၼိုင်ၵၢၼ်ငၢၼ်းမႃး ၶၢဝ်းတၢင်းၼိုင်ႈပီ၊ မႃးထတ်းသၢင်ပႃးၵူၼ်း၊ တမ်းဝၢင်းၽႅၼ် တႃႇႁဵတ်းသၢင်ႈၵၢၼ်ငၢၼ်းၵႂႃႇမိူဝ်းၼႃႈ၊ ၸင်ႇလႆႈပိုၼ်ၽၢဝ်ႇ ႁႂ်ႈၵူၼ်းတင်းၼမ် ႁႂ်ႈၵူၼ်းမိူင်းႁဝ်းလႆႈႁူႉၸွမ်း"- ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈၼႄတၢင်းယိူင်းဢၢၼ်း ဢၼ်လႆႈဢွၵ်ႇၶေႃႈပိုၼ်ၽၢဝ်ႇၼင်ႇၼႆ။


တင်ႈတႄႇဝၼ်းတီႈ 21-23/02/2017 ၶၢဝ်းတၢင်း 3 ဝၼ်း၊ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းႁဵတ်းပၢင်ၵုမ်ႁူဝ်ႁုပ်ႈပီ တႃႇပီ 2016 တီႈငဝ်ႈၸိုင်ႈလွႆတႆးလႅင်း။ တီႈပၢင်ၵုမ်ပွၵ်ႈၼႆႉ မီးၽူႈဢွၼ်ႁူဝ်၊ ၽူႈမီးၸၼ်ႉ၊ ၽူႈၵွၼ်းတပ်ႉၵူႈၼႃႈတီႈလႄႈ ၽူႈမီးပုၼ်ႈၽွၼ်းၶဝ် ၶိုၼ်ႈႁွတ်ႈၶဝ်ႈႁူမ်ႈ။ လႆႈထတ်းသၢင်ၶိုၼ်းၵၢၼ်ငၢၼ်း ဢၼ်လႆႈႁဵတ်းသၢင်ႈမႃး ၶၢဝ်းတၢင်းၼိုင်ႈပီ၊ လႆႈတမ်းဝၢင်းၼႃႈၵၢၼ် တႃႇၶၢဝ်းတၢင်းမိူဝ်းၼႃႈၸိူဝ်းၼႆႉသေ ယူႇတီႈၵေႃၵမ်ၵၢၼ်ဢွၼ်ႁူဝ်ငဝ်ႈၸိုင်ႈ လႆႈဢွၵ်ႇၶေႃႈပိုၼ်ၽၢဝ်ႇၵႂႃႇ ပိူင်လူင်မၼ်းမီး 5 ၶေႃႈ။


1.တေၶတ်းၸႂ်ႁဵတ်းသၢင်ႈၵႂႃႇႁႂ်ႈထုၵ်ႇမႅၼ်ႈၸွမ်း ၽိုၼ်လိၵ်ႈၵိၼ်ၵႅၼ်ႇ ၶေႃႈတူၵ်းလူင်းၵၢၼ်ၵိုတ်းယိုဝ်းတူဝ်ႈမိူင်း (NCA) ၵႂႃႇ။


2.ၸွမ်းၼင်ႇၽႅၼ်တၢင်းၵၢၼ်မိူင်း 7 ၶၵ်ႉ ၼႂ်း NCA တမ်းဝၢင်းဝႆႉၼၼ်ႉ ယူႇတီႈ RCSS တေႁူမ်ႈၸတ်းပၢင်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး)လႄႈ တေၶဝ်ႈႁူမ်ႈဢုပ်ႇဢူဝ်းၸွမ်း ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ပွၵ်ႈထူၼ်ႈ 2 ။


3.ၼင်ႇႁိုဝ်ၶေႃႈယိူင်းဢၢၼ်းၵၢၼ်မိူင်း ၸၢဝ်းၶိူဝ်းၼႂ်းမိူင်းတႆးတင်းသဵင်ႈ ပေႃးၸၢင်ႈမိူၼ်ၵၼ်၊ ပဵၼ်ၶေႃႈလဵဝ် သဵင်လဵဝ်ၵၼ်လႆႈၼၼ်ႉ ယူႇတီႈ RCSS တေဢဝ်လၵ်းၵၢၼ် (မူႇပိူင်) ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) သေ ၶတ်းၸႂ်ၶိုင်ပွင်ႁဵတ်းသၢင်ႈၵႂႃႇ။


4.ယိူင်းဢၢၼ်းတႃႇပႂ်ႉပႃးၶူဝ်းၶွင် သၽႃႇဝၾိင်ႈတိုၼ်း ၼမ်ႉလိၼ်ႁိၼ်ၽႃသေ ၵဵဝ်ႇၵပ်းလွင်ႈတႅပ်းမႆႉ၊ ၵၢၼ်ၶတ်းႁႄႈၵူႈလွင်ႈလွင်ႈ ဢိၵ်ႇလွင်ႈႁဵတ်းသၢင်ႈၾၢႆၸိူဝ်းၼႆႉ ယူႇတီႈ RCSS တေလူင်းထတ်းသၢင်တူၺ်း၊ ပေႃးၽိတ်းပိူင်ၸိုင် တေဢဝ်လိူင်ႈပၼ်တူတ်ႈတၢမ်ႇၼၵ်းၼႃ။


5.ၵၢၼ်ၽဵဝ်ႈမူၺ်ႉယႃႈမဝ်းၵမ်လႄႈ ၵၢၼ်ပူၵ်းပွင်ပိုၼ်ႉတီႈၸိူဝ်းၼၼ်ႉ တေငူပ်ႉငီႉတင်းၽူႈၵဵဝ်ႇၶွင်ႈ ၸဝ်ႈၼႃႈတီႈၶဝ်သေ ၶိုင်ပွင်ႁဵတ်းသၢင်ႈၵႂႃႇ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး။ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ၵမ်းထူၼ်ႈသွင် ဢၼ်တေၸတ်းႁဵတ်းတၢင်းၼႃႈၼႆႉၵေႃႈ မီးလွင်ႈႁၢင်ႈႁႅၼ်းဝႆႉတႃႇတေၵႂႃႇၶဝ်ႈႁူမ်ႈယူႇ။