တူဝ်ႁူဝ်ပဝ်ႈၸုမ်းဝႃႉ UWSA ပဝ်းယဵဝ်ႇသျႅင် ဢဝ်တပ်ႉလွႆၵိဝ်ႇသၢႆး ဢၼ်ၸုမ်းသိုၵ်းဝႃႉ UWSA ယိုတ်းဝႆႉတီႈ ၸုမ်းမိူင်းလႃးၼၼ်ႉ မွပ်ႈပၼ်ၶိုၼ်းၸုမ်းမိူင်းလႃး၊ ၵူၺ်းၵႃႈ သိုၵ်းဝႃႉၸိူဝ်းယူႇတီႈလွႆၵိဝ်ႇသၢႆးၼၼ်ႉ ထွၼ်ဢွၵ်ႇၵႂႃႇယူႇတီႈဝၢၼ်ႈၼမ်ႉလမ်းၵူၺ်း၊ ယင်းပႆႇထွၼ်ပွၵ်ႈၶိုၼ်း ၼႃႈလိၼ်ဝႃႉ။

ဝၼ်းတီႈ 08/03/2017 (မိူဝ်ႈဝႃး)ၼႆႉ ယူႇတီႈႁူဝ်ပဝ်ႈၸုမ်းဝႃႉ ငဝ်ႈငုၼ်းပၢင်သၢင်း ပဝ်းယဵဝ်ႇသျႅင် ႁွတ်ႈထိုင်မႃးတီႈမိူင်းလႃး မိူဝ်ႈဝႃးသေ မႃးတူၵ်းလူင်းဢဝ်တပ်ႉလွႆၵိဝ်ႇသၢႆး ဢၼ်ၸုမ်းသိုၵ်းဝႃႉ (UWSA) ႁုပ်ႈယိုတ်းဝႆႉ တီႈၸုမ်းမိူင်းလႃး မိူဝ်ႈၽွင်းႁၢင်လိူၼ်သႅပ်ႊထႅမ်ႊၿိူဝ်ႊ 2016 မွပ်ႈပၼ်ၶိုၼ်း တီႈၸုမ်းမိူင်းလႃး။ ၵူၺ်းၵႃႈ တပ်ႉလွႆသၢမ်သုမ်တႄႉ သိုၵ်းဝႃႉတိုၵ်ႉၵုမ်းၵမ်ဝႆႉယူႇ- ၼႆယဝ်ႉ။


တပ်ႉလွႆၵိဝ်ႇသၢႆးၼႆႉ မီးတီႈၽၵ်းတူၶဝ်ႈဝဵင်းမိူင်းလႃး၊ ၼိူဝ်သဵၼ်ႈတၢင်းလူင်ၵဵင်းတုင်- မိူင်းလႃး၊ ၼႂ်းၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး၊ ၸိုင်ႈတႆးပွတ်းဢွၵ်ႇ။ ပဵၵ်ႉသမ်ႉသိုၵ်းဝႃႉဢဵၼ်ႁႅင်းပၢၵ်ႇပၢႆ ဢၼ်ပၵ်းသဝ်းတီႈတပ်ႉလွႆၵိဝ်ႇသၢႆးၼၼ်ႉ ထွၼ်ဢွၵ်ႇမိူဝ်းသေတႃႉၵေႃႈ ထွၼ်ၵႂႃႇယူႇတီႈတပ်ႉဝႃႉ ဢၼ်မီးတီႈဝၢၼ်ႈၼမ်ႉလမ်း၊ ဢၼ်မီးတၢင်းၸၢၼ်း ဢမ်ႇပေႃးႁၢင်ႇၵႆလွႆၵိဝ်ႇသၢႆးၼၼ်ႉၵူၺ်း၊ ယင်းပႆႇထွၼ်ပွၵ်ႈမိူဝ်းၼႃႈလိၼ်ဝႃႉ- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်းဝႃႉ ဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈဝႃႈ- "ယူႇတီႈႁူဝ်ပဝ်ႈႁဝ်းၶႃႈ ႁွတ်ႈမႃးမိူင်းလႃးမိူဝ်ႈဝႃး၊ မိူဝ်ႈၼႆႉပွၵ်ႈၶိုၼ်းယဝ်ႉ၊ တပ်ႉလွႆၵိဝ်ႇသၢႆးၵေႃႈ ယူႇတီႈမၼ်းၸဝ်ႈသေ ၸီႉသင်ႇမွပ်ႈပၼ်ၸုမ်းမိူင်းလႃးၶိုၼ်း မိူဝ်ႈဝႃးယဝ်ႉ။ ၵူၺ်းၵႃႈႁဝ်းၶႃႈတႄႉ ဢမ်ႇပႆႇလႆႈၶေႃႈၸီႉသင်ႇ ႁႂ်ႈထွၼ်ပွၵ်ႈမိူဝ်းၶိုၼ်းတၢင်းၼိူဝ်လႄႈ ထွၼ်မႃးယူႇတီႈတပ်ႉလူင် ဢၼ်မီးၽူႈၵွၼ်းတပ်ႉၸုမ်းလူင် တီႈၼမ်ႉလမ်းၼႆႉၵူၺ်း"- ဝႃႈၼႆ။


လွင်ႈတပ်ႉသိုၵ်းဝႃႉ ထွၼ်ဢွၵ်ႇလွႆၵိဝ်ႇသၢႆးၼႆႉ ၽူႈၶၢၼ်ပၢၵ်ႇတင်းသွင်ၸုမ်း (ၸုမ်းဝႃႉ၊ ၸုမ်းမိူင်းလႃး)ၵေႃႈ ယိုၼ်ယၼ်၊ ၵူၺ်းၵႃႈ လွင်ႈဢၼ်သိုၵ်းဝႃႉထွၼ်ဢွၵ်ႇလိၼ်မိူင်းလႃး ဢမ်ႇထွၼ်ဢွၵ်ႇၼၼ်ႉတႄႉ တင်းသွင်ၾၢႆႇဢမ်ႇတွပ်ႇ။


တပ်ႉၼမ်ႉလမ်းၼႆႉ မိူဝ်ႈၼႂ်းပီ 2009 ဢိင်ၼိူဝ်ၸုမ်းသိုၵ်းမၢၼ်ႈတဵၵ်းမိပ်ႇ ႁႂ်ႈသွင်ၸုမ်းလႅၵ်ႈလၢႆႈႁဵတ်း တပ်ႉပႂ်ႉလႅၼ်လိၼ် (BGF) သေ ၸုမ်းဝႃႉတင်းၸုမ်းမိူင်းလႃး ဢမ်ႇယွမ်းႁပ်ႉ၊ မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် တင်းၸုမ်းသိုၵ်းမၢၼ်ႈလႄႈ သိုၵ်းဝႃႉမႃးပၵ်းသဝ်းယူႇဢဝ်ႁူမ်ႇလူမ်ႈဝႆႉၸဵမ်မိူဝ်ႈၼၼ်ႉ ႁၢၼ်ႉတေႃႇထိုင်ယၢမ်းလဵဝ်။


မိူၼ်ၼင်ႇတပ်ႉလွႆၵိဝ်ႇသၢႆး၊ လွႆသၢမ်သုမ်၊ တပ်ႉပၢင်မၢၵ်ႇၾႆး၊ ဝၢၼ်ႈၼွင်ႁူၵ်ႈ၊ လၢၼ်ႇၶူဝ်သုင်ၸိူဝ်းၼႆႉ သိုၵ်းဝႃႉၶဝ်ႈမႃးယိုတ်းၵုမ်းၵမ်ဝႆႉ မိူဝ်ႈဝၼ်းတီႈ 28/09/2016 ။ ဢိင်ၼိူဝ်သွင်ၾၢႆႇဢုပ်ႇဢူဝ်းၵၼ်သေ ၾၢႆႇသိုၵ်းဝႃႉထွၼ်ပၼ်ၶိုၼ်း ပၢင်မၢၵ်ႇၾႆး၊ ဝၢၼ်ႈၼွင်ႁူၵ်ႈ၊ လၢၼ်ႇၶူဝ်သုင်ၸိူဝ်းၼႆႉသေတႃႉၵေႃႈ တပ်ႉဢၼ်ၶဝ်ႈပႃးၼႂ်းၽႅၼ်ၵၢၼ်သိုၵ်း ၽႅၼ်ၵၢၼ်လၢႆးတိုၵ်း မိူၼ်ၼင်ႇတပ်ႉလွႆၵိဝ်ႇသၢႆးတင်းလွႆသၢမ်သုမ်ၸိူဝ်းၼႆႉ ယင်းပႆႇထွၼ်ပၼ်။


ၵူၺ်းၵႃႈ ဢိင်ၼိူဝ်ပၢင်ၵုမ်လူင်ၸုမ်းယိပ်းၵွင်ႈၵၢင်ႇ ၵမ်းတီႈ 3 ဢၼ်ၸတ်းႁဵတ်းတီႈငဝ်ႈငုၼ်းၸုမ်းဝႃႉ UWSA ငဝ်ႈငုၼ်းပၢင်သၢင်း ဝၼ်းတီႈ 22-24-02/2017 ၼၼ်ႉသေ ၵေႃႉပဵၼ်ၵႅမ်ႁူဝ်ပဝ်ႈၸုမ်းမိူင်းလႃး သၢၼ်းပိူဝ်ႇ လႆႈၵႂႃႇႁူပ်ႉၽူႈၼမ်းဝႃႉသေ လႆႈဢုပ်ႇဢူဝ်းၵၼ် တႃႇတေၵႄႈလိတ်ႈပၼ်ႁႃလွင်ႈၼႆႉ။


ဝၢႆးသေဢုပ်ႇဢူဝ်းၵၼ်ယဝ်ႉ ဢမ်ႇပေႃးႁိုင်ၵေႃႈ တူဝ်ၽူႈၼမ်းဝႃႉ ပဝ်းယဵဝ်ႇသျႅင် ႁွတ်ႈၽႅဝ်မႃးတီႈမိူင်းလႃးသေ မႃးတူၵ်းလူင်းဝႃႈ တေမွပ်ႈပၼ်တပ်ႉလွႆၵိဝ်ႇသၢႆးၶိုၼ်း၊ ၸီႉသင်ႇထွၼ်သိုၵ်း မွပ်ႈပၼ်မိူဝ်ႈဝႃးၼႆႉ- ၼႆယဝ်ႉ။