ငႃးသိုၵ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢၼ်ၵႂႃႇတူင်ႉၼိုင် ၼႂ်း ၸႄႈဝဵင်းၵျွၵ်ႉမႄး ၼၼ်ႉ ၺႃးသိုၵ်းလွႆ (တဢၢင်း) TNLA ၼပ်ႉႁူဝ်ပၢၵ်ႇ ဝႅတ်ႉလွမ်ႉပိုတ်းယိုဝ်း လႄႈသွင်ၾၢႆႇ လႆႈပဵၼ် ပၢင်တိုၵ်း တင်းႁၢင်ႈ ၼႂ်းဝၼ်းမိူဝ်ႈၼႆႉ ။

ဝၼ်းတီႈ 5/2/2017 တင်ႈတႄႇယၢမ်းၵၢင်ၼႂ် 10 မူင်းပၢႆတေႃႇထိုင်ဝၢႆးဝၼ်း 4 မူင်းပၢႆ (သဵင်ၵွင်ႈယင်း ပႆႇယဵၼ်) သိုၵ်းလွႆ TNLA ဢႅၼ်ႁႅင်းမွၵ်ႈ 400 ဝႅတ်ႉလွမ်ႉလေႃႇတိုၵ်း ငႃးသိုၵ်းတႆး SSPP/SSA ဢၼ်ဢဵၼ်ႁႅင်းမီးမွၵ်ႈ 100 ပၢႆ ၼၼ်ႉသေ သွင်ၾၢႆႇပဵၼ်ပၢင်တိုၵ်းၵၼ် ၼႂ်းဢိူင်ႇတေႃႉသၢင်ႇ - မင်းၵုင်း  ဢၼ်မီးၸဵင်ႇႁွင်ႇဝၼ်းတူၵ်းဝဵင်းၵျွၵ်ႉမႄး ။


ၸဝ်ႈသိုၵ်းလူင် ၸၢႆးသု ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - “ၸႂ်ႈၶႃႈဢေႃႈ။ ငႃးသိုၵ်းႁဝ်းၶႃႈ တိုၵ်ႉလိုဝ်ႈၵိၼ်ၶဝ်ႈယူႇ ဝူင်ႈၵၢင်ဝၢၼ်ႈတေႃၵုတ်ႇလႄႈဝၢၼ်ႈၼႃးၶႃး။ ဢၢင်ႈတေ သိုပ်ႇၶၢဝ်းတၢင်းၵႂႃႇတၢင်းထုင်ႉလွႆဝၢႆ။ ၽွင်းၼၼ်ႉ သိုၵ်းလွႆၶဝ် ပႂ်ႉယိုဝ်းႁဝ်းၶႃႈ။ ႁဵတ်းသင် လႄႈ ႁဵတ်းၸိူင်ႉၼႆ ၶဝ်တၵ်းတေလႆႈမႃးၵႄႈလိတ်ႈ။ ၽူႈမီးပုၼ်ႈၽွၼ်းႁဝ်းၶႃႈၵေႃႈ ၵပ်းသိုပ်ႇ ၵူၼ်းလူင် ၶဝ်ဝႆႉယူႇ။  လွင်ႈၼႆႉ ၶဝ်ႈပႆႇတွပ်ႇလၢတ်ႈ ၵႄႈတူဝ်သင်။ ႁဝ်းၶႃႈၼႆႉတိုၼ်းဢမ်ႇၵမ်ႉထႅမ် ၵၢၼ်ဢဝ်လၢႆးၵွင်ႈၵၢင်ႇ ၵႄႈလိတ်ႈပၼ်ႁႃ။ ပဵၼ်ၸၢဝ်းၶိူဝ်းၼင်ႇၵၼ် ယိုဝ်းၵၼ်ၼႆ ယိင်ႈၶႅၼ်းဢမ်ႇၵမ်ႉ ထႅမ် ဢမ်ႇပၼ်ႁႅင်း သေဢိတ်းယဝ်ႉ၊ မၼ်းပဵၼ်ၵၢၼ်တူၵ်းလွၵ်း ၸဝ်ႈဢႃႇၼႃႇသိုၵ်းမၢၼ်ႈ။ ၵူၺ်းၵႃႈ ဢၼ်လႆႈပဵၼ်ၵမ်းၼႆႉ ၶဝ်ပဵၼ်ၾၢႆႇတႄႇဢွၼ်တၢင်းလႄႈ ၵႃႈတေလႆႈ ၸတ်းၵၢၼ်ၵၼ် တေႃႇပေႃးယဝ်ႉတူဝ်ႈယဝ်ႉ ”- ဝႃႈၼႆ။


ၵဵဝ်ႇၵပ်းလွင်ႈၼႆႉ ၶုၼ်သိုၵ်းလူင် မၢႆးဢၢႆႈၵျေႃႇ ႁွင်ႈၵၢၼ်ၾၢႆႇၶၢဝ်ႇ သိုၵ်းလွႆ TNLA - တွပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ လွင်ႈပဵၼ်ပၢင်တိုၵ်းတင်း SSPP/SSA ၼႆႉပႆႇလႆႈႁပ်ႉႁူႉသင်ၸွမ်း၊ ၽူႈမီးပုၼ်ႈၽွၼ်းၼႂ်းပိုၼ်ႉတီႈၵေႃႈ ဢမ်ႇပႆႇႁၼ်ႁၢႆးငၢၼ်းသင်မႃး - ဝႃႈၼႆ ။


ၽူႈၵွၼ်းသိုၵ်း SSPP/SSA ၼႂ်းပိုၼ်ႉတီႈၸဝ်ႈၼိုင်ႈလၢတ်ႈဝႃႈ  “ မိူဝ်ႈၵွၼ်ႇ သိုၵ်းပလွင်ႈလႄႈ ႁဝ်းၶႃႈ ၵႂႃႇမႃးတူင်ႉၼိုင် ႁဵတ်းၼႆယူႇတႃႇသေ။ ပဵၼ်သင်ပွၵ်ႈၼႆႉသမ်ႉ မႃးယိုဝ်းၵၼ်။ ႁဝ်းၶႃႈတေၵႂႃႇ တၢင်းလွႆဝၢႆ ၼႆၵေႃႈ ၶဝ်ႁူႉယူႇ။  ၶဝ်ယူႇဝႆႉတီႈသႃႇ ႁႅင်းၵေႃႈသမ်ႉၼမ်လိူဝ်ႁဝ်းၶႃႈၽွင်ႈ လႄႈ၊ ႁႅင်းဢမ်ႇၵိုင်ႇငၢမ်ႇ ၵၼ်၊ တၢမ်းၶမ်ႈၼႆႉ လေႃႇၵၼ် ပေႃးထိုင်မႃးၶိုၼ်း ႁိမ်းဝၢၼ်ႈ ၼႃးၶႃး ဢေႃႈ ။ ႁႅင်းသိုၵ်းဢၼ်ထႅမ် တၢင်းလင် ၵေႃႈ တိုၵ်ႉမႃးထႅင်ႈယူႇ ဝႃႈၼႆ” - ဝႃႈၼႆ။


ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၼႆႉ ပဵၼ်ဢူၺ်းလီၵၼ် တင်းတပ်ႉသိုၵ်းလွႆ TNLA ။ ဢၼ် သိုၵ်းလွႆ တင်း တပ်ႉသိုၵ်းၸိုင်ႈတႆး RCSS/SSA မီးပၼ်ႁႃၵၼ်ၼၼ်ႉၵေႃႈ ၼင်ႇႁိုဝ်တေၵႄႈလိတ်ႈလႆႈ တူဝ် ၸွမ်သိုၵ်းလူင် သိူဝ်ထႅၼ် ၽူႈၼမ်းၼႃႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၶတ်းၸႂ်ၶဝ်ႈၵႄႈၵၢင်ၸွႆႈ ႁႃလၢႆးၵႄႈလိတ်ႈပၼ် မႃးတႃႇသေႇ။ ပၼ်ႁႃ ဢၼ်သိုၵ်းလွႆ တႄႇငွႆးယိုဝ်း RCSS/SSA မိူဝ်ႈႁၢင်ပီ 2015 မႃးတေႃႇယၢမ်းလဵဝ်ၵေႃႈ ယင်းပႆႇယဝ်ႉပႆႇတူဝ်ႈ၊ ၵူၼ်းမိူင်း တိုၵ်ႉလႆႈ တုၵ်ႉယၢၵ်ႈယွၼ်ႉပၢင်တိုၵ်းယူႇ ႁၢၼ်ႉတေႃႇထိုင်ဝၼ်းမိူဝ်ႈၼႆႉ။