ၵူၼ်းဝၢၼ်ႈၵူၼ်းသူၼ် ၸႄႈဝဵင်းၼမ်ႉသၼ်ႇ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ် တီႈၸႄႈဝဵင်းၼမ်ႉတူႈ ႁူဝ်ၵူၼ်း 242 ၵေႃႉ ယွၼ်ႉ တပ်ႉသိုၵ်းမၢၼ်ႈတင်း တပ်ႉသိုၵ်းတဢၢင်း TNLA  ပဵၼ်ပၢင်တိုၵ်းၵၼ်။


ဝၼ်းတီႈ 08/08/2017 ယၢမ်းၵၢင်ၶမ်ႈ ပီႈၼွင်ႉၵူၼ်းမိူင်း ဝၢၼ်ႈငၢဝ်ႈ ဢိူင်ႇၶိူဝ်းၶိုၼ်ႈ ၸႄႈဝဵင်းၼမ်ႉသၼ်ႇ ဢွၼ် ၵၼ်ပၢႆႈၽေးသိုၵ်း ႁွတ်ႈၽႅဝ်မႃး တီႈဝတ်ႉၵျွင်းပူပ်ႉပႃႇရူင်ႇ ပွၵ်ႉ 8 ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။ တင်းမူတ်းလင်ႁိူၼ်း ဢၼ်ပၢႆႈမႃး မီး 68 လင်ႁိူၼ်း၊ ႁူဝ်ၵူၼ်း 242 ၵေႃႉ ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇလူလွမ်ၸွႆႈထႅမ်ၵူၼ်းပၢႆႈၽေး ဝဵင်းၼမ်ႉတူႈလၢတ်ႈဝႃႈ “ ၵူၼ်းဝၢၼ်ႈ ၵူၼ်းသူၼ် လႆႈငိၼ်းပဵၼ်ပၢင်တိုၵ်းၼႆသေ ဢွၼ်ၵၼ်ငိူင်ႉဝႄႈဢွၵ်ႇမႃး ပၢင်တိုၵ်းတႄႉ ပဵၼ်တီႈႁိမ်းဝၢၼ်ႈၼွၵ်ႈဝၢၼ်ႈ ဢမ်ႇၸႂ်ႈပဵၼ်ၼႂ်းဝၢၼ်ႈ၊ ႁဵတ်းႁႂ်ႈၵူၼ်းဝၢၼ်ႈ ၵူၼ်းသူၼ် ဢွၼ်ၵၼ်ၵူဝ် သေ ပၢႆႈဢွၵ်ႇမႃး တၢင်းၼမ်ႉတူႈ။ ၵမ်ႈၽွင်ႈ ၵေႃႈ တိုၵ်ႉမီးၸွမ်းႁိမ်းဝၢၼ်ႈၸိူဝ်းၼၼ်ႉယူႇ ၶဝ်ပႆႇမႃးထိုင်တီႈၼႆႈမူတ်း၊ ဢၼ်ပၢႆႈမႃးၵမ်ႈၼမ်တႄႉ ပဵၼ်လုၵ်ႈဢွၼ်ႇ တင်း ၵူၼ်းထဝ်ႈ” ဝႃႈၼႆ။


ၶွမ်ႊမတီႊၾၢႆႇလူလွမ်ၸွႆႈထႅမ်ၵူၼ်းပၢႆႈၽေး ဝဵင်းၼမ်ႉတူႈ လႆႈႁၢင်ႈႁႅၼ်းတမ်းဝၢင်းဢွင်ႈတီႈ လႄႈလဵင်ႉလူတူၺ်း ထိုင်ပၼ် လွင်ႈၶဝ်ႈၼမ်ႉတၢင်းၵိၼ်  ၸိူဝ်းၼၼ်ႉ ဝႃႈၼႆ။


လုင်းၸၢႆးပႃႉၺၢၼ်ႇ သိုပ်ႇလၢတ်ႈထႅင်ႈဝႃႈ လွင်ႈၶဝ်ႈၼမ်ႉတၢင်းၵိၼ်တႄႉ ႁဝ်းၶႃႈလႆႈဢဝ်ၶဝ်ႈသၢၼ် ဢၼ်ၵိုတ်းလိူဝ် ဝႆႉ ၶွင်ၵူၼ်းပၢႆႈၽေးပွၵ်ႈဢွၼ်တၢင်းၼၼ်ႉသေ ၶိုၼ်းႁုင်လဵင်ႉၵၼ်ၶိုၼ်း၊ လွင်ႈၽၵ်းယိူဝ်ႈၼၢင်းၶဵဝ်တႄႉ ႁဝ်းၶႃႈ လႆႈၵႂႃႇဢဝ် တီႈၸႄႈဝဵင်းၼမ်ႉတူႈသေ မႃးႁဵတ်းလဵင်ႉၵၼ်။ ထႅင်ႈလွင်ႈၼိုင်ႈၵေႃႈ တုၵ်းယွၼ်းထိုင် သင်ဝႃႈမီး ၽူႈမီး ၼမ်ႉၸႂ်ၶဝ်၊ ၸဝ်ႈတႃႇၼၶဝ် ၸုမ်းတူင်ႉၼိုင်တူင်ႇဝူင်းလႂ် ဢမ်ႇဝႃႈတီႈၸမ်/ၵႆ ႁဝ်းၶႃႈ  ႁူမ်ၸူမ်းႁပ်ႉ တွၼ်ႈလွင်ႈ ၵမ်ႉၸွႆႈယူႇၶႃႈ” ဝႃႈၼႆ။


ၵဵဝ်ႇၵပ်းလွင်ႈၼႆႉ မိူဝ်ႈပူၼ်ႉမႃး ဝၼ်းတီႈ 4 လိူၼ်ဢွၵ်ႊၵတ်ႉသ် 2017 ယၢမ်းၵၢင်ၼႂ် ပူၼ်ႉမႃးၼၼ်ႉ သိုၵ်းမၢၼ်ႈ တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် တၢင်းၶဝ်ႈၸႄႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇ။ ဝၢႆးလင် ပဵၼ် ပၢင်တိုၵ်းၵၼ်ယဝ်ႉ သိုၵ်းမၢၼ်ႈ ဢိုတ်းသဵၼ်ႈတၢင်းၶဝ်ႈဝဵင်းဢွၵ်ႇဝဵင်းမၢၼ်ႈတူင်ႈမႃး ထိုင်ယၢမ်းလဵဝ် ႁဵတ်းႁႂ်ႈၵူၼ်း မိူင်း ထူပ်းတၢင်းယၢပ်ႇၽိုတ်ႇ တင်းၼမ်လၢႆ ဝႃႈၼႆ။