ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ၸတ်းႁဵတ်းပၢင်ၵႅဝ်ႈ ဝၼ်းၵိူတ်ႇလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး ၶွပ်ႈၶူပ်ႇ 59 ပီတဵမ် တီႈႁူင်းႁဵၼ်းသိုၵ်း ငဝ်ႈငုၼ်းဝၢၼ်ႈႁႆး၊ ၼႂ်းဝၼ်းတီႈ 21/05/2017 မိူဝ်ႈၼႆႉ။


ၼႂ်းဝၼ်းပၢင်ၵႅဝ်ႈၼႆႉ ၽူႈယႂ်ႇၵူၼ်းလူင်၊ ၽူႈၵွၼ်းတပ်ႉ၊ လုၵ်ႈတပ်ႉလႄႈ ပေႃႈမႄႈၵူၼ်းမိူင်းၶဝ်ႈႁူမ်ႈမီး 640 ၵေႃႉ။ ၸွမ်သိုၵ်းလူင်သိူဝ်ထႅၼ်ႈ ၽူႈၼမ်းၼႃႈ (1) SSPP/SSA မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႅဝ်ႈ၊ ၸဝ်ႈသိုၵ်းၵျေႃႇလႃႉ ၽူႈၼမ်းၼႂ်း (2) လူဢၢၼ်ႇတၢင်းၼႄပိုၼ်းၵႅပ်ႈ လၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး၊ ၸွမ်ႁၢၼ်ၶုၼ်သႅင် ၵႅမ်ႁူဝ်ပဝ်ႈ (2) မွၵ်ႇလၢတ်ႈၶေႃႈၵႂၢမ်းၵိုတ်းလိုဝ်ႈပၢင်ၵႅဝ်ႈ- ၼႆယဝ်ႉ။

ၸွမ်သိုၵ်းလူင်သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်းဝႃႈ- "ၵွပ်ႈပႆၼိူဝ်သဵၼ်ႈတၢင်းထုၵ်ႇမႅၼ်ႈလႄႈ ငဝ်းလၢႆးဢမ်ႇၼိမ်သဝ်း၊ မီးလွင်ႈၶိုၼ်ႈ/လူင်းသေတႃႉ ၸုၵ်းမၼ်ႈၵႅတ်ႇၶႄႁႄႉၵင်ႈပၼ် ပေႃႈမႄႈၵူၼ်းမိူင်းလႆႈ တေႃႇထိုင်ဝၼ်းမိူဝ်ႈၼႆႉ၊ လွင်ႈလီလွင်ႈၸႃႉတိုၼ်းမီးတႃႇသေႇလႄႈ ႁႂ်ႈဢူတ်းယိူၼ်ႉၸႂ်သေ သိုပ်ႇၵႅတ်ႇၶႄႁႄႉၵင်ႈ၊ ႁဵတ်းသၢင်ႈပၼ်ၽွၼ်းလီ တႃႇပေႃႈမႄႈၵူၼ်းမိူင်းထႅင်ႈသေၵမ်း"- ဝႃႈၼႆ။


ၸဝ်ႈသိုၵ်းၵျေႃႇလႃႉ မွၵ်ႇလၢတ်ႈဝႃႈ- "ဝၼ်းၵိူတ်ႇလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆးႁဝ်းၶႃႈၼႆႉ ဢိင်ၼိူဝ်ပိုၼ်းပိူင်ပဵၼ်ၵၢၼ်ပၢႆးမိူင်း ၸိူဝ်ႉၸၢတ်ႈၸိုင်ႈတႆးႁဝ်းၶႃႈ ဢီးသူၼ်းတုၵ်းယွၼ်းမႃးလႄႈ ၸင်ႇလႆႈၽုတ်းပဵၼ်မီးမႃး၊ ပဵၼ်ဝၼ်းဢၼ်ထွတ်ႈမျၢတ်ႈ ယႂ်ႇလူင်တႃႇၸိူဝ်ႉၸၢတ်ႈၸိုင်ႈတႆးႁဝ်း၊ ၸင်ႇဢမ်ႇလူင်လိုမ်းသေၸတ်းႁဵတ်းမႃးယူႇၵူႈပီ"- ဝႃႈၼႆ။


သိုပ်ႇလၢတ်ႈဝႃႈ-"ပီၼႆႉတႄႉ ဢိင်ၼိူဝ်ငဝ်းလၢႆးဢၼ်မီးသေ လႆႈႁုပ်ႈသေႁဵတ်း၊ မီးပၢင်ၵႅဝ်ႈ 2 ပၢင်၊ ပၢင်ၵႅဝ်ႈလူႇတၢၼ်း ႁဵတ်းတၢင်းလီၵုသူလ်ပၼ် ၽူႈႁတ်းႁၢၼ်လုၵ်ႉၽိုၼ်ႉ ဢၼ်လႆႈတူၵ်းသုမ်းမႃး ၼႂ်းၶၢဝ်းတၢင်းလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး လႄႈပၢင်ၵႅဝ်ႈမွၵ်ႇလၢတ်ႈၶေႃႈၵႂၢမ်း လူဢၢၼ်ႇၼႄပိုၼ်းၵႅပ်ႈလၢႆးလုၵ်ႉၽိုၼ်ႉ ယိပ်းၵွင်ႈၵၢင်ႇၸိုင်ႈတႆး။ ၼႂ်းဝၼ်းလုၵ်ႉၽိုၼ်ႉၼႆႉ ဢၼ်ၶႂ်ႈသင်ႇလၢတ်ႈႁႅင်းႁႅင်းတႄႉ ယၢမ်းလဵဝ် ၸၢဝ်းၶိူဝ်းဢွၼ်ႇၶဝ်မေႃလၢတ်ႈၵႂၢမ်း ယွၼ်းသုၼ်ႇလႆႈသုၼ်ႇပဵၼ်မႃးလႄႈ လွင်ႈၽွမ်ႉႁူမ်ႈၼႂ်းၵႄႈၵၢင်တႆးလႄႈ ၸၢဝ်းၶိူဝ်းဢွၼ်ႇၶဝ်ၼႆႉ ပဵၼ်ဢၼ်လီမႆႈၸႂ်ၸွမ်းတႄႉတႄႉ။ ၵွပ်ႈၼၼ် ႁဝ်းလူဝ်ႇႁူမ်ႈၵၼ်ၵေႃႇသၢင်ႈ လွင်ႈၽွမ်ႉႁူမ်ႈတႆးႁဝ်းလႄႈ လွင်ႈၽွမ်ႉႁူမ်ႈၸၢဝ်းၶိူဝ်း လႆႈလီလီငၢမ်းငၢမ်း။ ပေႃးၼၼ်ၵွၼ်ႇ လွင်ႈၽွမ်ႉႁူမ်ႈၸိုင်ႈတႆးႁဝ်း ၸင်ႇမၼ်ႈၵႅၼ်ႇၼႅၼ်ႈၼႃႈ"- ဝႃႈၼႆ။


လၢႆးလုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈတႆးၼႆႉ တႄႇမႃးမိူဝ်ႈပီ 1958 လိူၼ်မေႊ 21 ဝၼ်း။ ၸဝ်ႈၼွႆႉ (သေႃးယၼ်ႇတ) ဢွၼ်ႁူဝ်ၼမ်းၼႃႈၽူႈႁၵ်ႉၸိူဝ်ႉၸၢတ်ႈၸိုင်ႈတႆး ၸိူဝ်းဢၼ်မီးၸႂ်ႁတ်းႁၢၼ်တူင်ႉတိုၼ်ႇ 31 ၵေႃႉသေ ႁဵတ်းပၢင်ၵၢဝ်ႇၵိၼ်ႇ ၵိၼ်ၼမ်ႉသၸ်ႉၸႃႇ ပၼ်ႈၵႅၼ်ႇၼႅၼ်ႈၼႃၵၼ် တီႈႁူၺ်ႈပူႉ ႁိမ်းသူပ်းၼမ်ႉၵျွတ်ႈ ၼႂ်းဢိူင်ႇမိူင်းႁၢင် ၸႄႈဝဵင်းမိူင်းတူၼ် ႁိမ်းလႅၼ်လိၼ်တႆး-ထႆး၊ ၸင်ႇၽွမ်ႉလႆႈၸႂ်ၵၼ်ပူၵ်းတင်ႈမႃး "တပ်ႉသိုၵ်း ၼုမ်ႇသိုၵ်းႁၢၼ် ႁဵတ်းၵၢၼ်ၵွၼ်းၶေႃၸိုင်ႈတႆး" ဢၼ်တႄႇႁႅၵ်ႈဝၢၼ်ႇပၼ်ၸိူဝ်ႉၽၼ်း လၢႆးလုၵ်ႉၽိုၼ်ႉယိပ်းၵွင်ႈၵၢင်ႇ ၸိုင်ႈတႆးမႃး။