လူင်ပွင်ၸိုင်ႈမိူင်းထႆး ပိုတ်ႇပၼ်ပေႃႈလဵင်ႉ/မႄႈလဵင်ႉ(ၼၢႆးၸၢင်ႈ)လႄႈ ႁႅင်းၵၢၼ်တၢင်ႇယိုၼ်ႈ ႁဵတ်းဝႂ် ၵပ်းတူဝ် ၶၢဝ်းတၢင်း 15 ဝၼ်းၼၼ်ႉ ၶၢဝ်းယၢမ်းဢမ်ႇပဵင်းပေႃးႁဵတ်းဢမ်ႇတၼ်းယဝ်ႉလႄႈ တုၵ်း ယွၼ်းႁႂ်ႈၶႂၢၵ်ႈပၼ်ၶၢဝ်းယၢမ်းထႅင်ႈ။


ဝၼ်းတီႈ 24/07-07/08/2017 ၼႆႉႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ပိုတ်ႇတိုဝ်ႉတၢင်း ႁႂ်ႈပေႃႈလဵင်ႉမႄႈလဵင်ႉလႄႈ ႁႅင်းၵၢၼ်ဢွၼ်ၵၼ်ၵႂႃႇတၢင်ႇယွၼ်း ႁဵတ်းဝႂ်ၵပ်းတူဝ် တီႈႁွင်ႈၵၢၼ် ၾၢႆႇၸတ်းႁႃၵၢၼ်ငၢၼ်း ၵူႈတီႈတူဝ်ႈၸိုင်ႈထႆးၶၢဝ်းတၢင်း 15 ဝၼ်းၼၼ်ႉ ဢမ်ႇပဵင်းပေႃးယွၼ်းႁႂ်ႈ လူင်ပွင်ၸိုင်ႈ သိုပ်ႇယိုတ်ႈၶၢဝ်းယၢမ်းပၼ်ထႅင်ႈ ။

ပေႃႈလဵင်ႉၼၢႆးၸၢင်ႈတင်းၼမ် လၢတ်ႈတီႈသိုဝ်ႇၶၢဝ်ႇ MGR ဝႃႈ - “ ၶၢဝ်းယၢမ်းဢၼ်လူင်ပွင်ၸိုင်ႈ ပိုတ်ႇတိုဝ်ႉတၢင်းပၼ်ၼႆႉ မၼ်းဢေႇၼႃႇ  ယွၼ်ႉမိူဝ်ႈပိုၼ်ၽၢဝ်ႇၸႂ်ႉပၵ်းပိူင်ႁႅင်းၵၢၼ် 23 ၵျႃၼ်ႊ ပၼ်တူတ်ႈတၢမ်ႇႁၢဝ်ႈႁႅင်းၼၼ်ႉ ႁႅင်းၵၢၼ်ဢွၼ်ၵၼ်ပွၵ်ႈမိူဝ်းၼမ် မၢင်ၸိူဝ်းယင်းပႆႇဢွၼ်ၵၼ်ၶိုၼ်း မႃး ၵွပ်ႈၼၼ်လႄႈ ၶႂ်ႈႁႂ်ႈလူင်ပွင်ၸိုင်ႈ ၶႂၢၵ်ႈၶၢဝ်းယၢမ်းပၼ်ထႅင်ႈ ” ဝႃႈၼႆ။


ၶၢဝ်းတၢင်း 15 ဝၼ်း မီးပေႃႈလဵင်ႉ(ၼၢႆးၸၢင်ႈ) 195,996 ၵေႃႉ ၵူၼ်းႁဵတ်းၵၢၼ်( လုၵ်ႈလဵင်ႉ ) 694,629 ၵေႃႉ ။ ၼႂ်းၼၼ်ႉ ႁႅင်းၵၢၼ်မိူင်းႁူမ်ႈတူမ်(ပႃးတႆး ) မီး402,542ၵေႃႉ၊ ၶႅမ်ႊၿေႃႊတီႊယိူဝ်ႊ 203,732 ၵေႃႉ ၊လၢဝ်း 88,355 ၵေႃႉ။


ဝၢႆးသေပေႃႈလဵင်ႉ/မႄႈလဵင်ႉလႄႈ ၵူၼ်းႁဵတ်းၵၢၼ် ဢွၼ်ၵၼ်ၵႂႃႇတၢင်ႇယိုၼ်ႈယဝ်ႉ ၼႂ်းဝၼ်းတီႈ 08/08-09/09/2017 ၼႂ်းၶၢဝ်းတၢင်းၼိုင်ႈလိူၼ်ၼၼ်ႉ ၾၢႆႇၸတ်းႁႃၵၢၼ်တေထတ်းထွင်ၶိုၼ်း ၸွင်ႇၸႂ်ႈပေႃႈလဵင်ႉ၊ လုၵ်ႈလဵင်ႉၸွမ်းၼင်ႇဢၼ်ယိုၼ်ႈယွၼ်းဝႆႉၼၼ်ႉတႄႉ ၊ ႁႂ်ႈပေႃႈလဵင်ႉတင်း လုၵ်ႈလဵင်ႉ ဢွၼ်ၵၼ်ၵႂႃႇတီႈ ႁွင်ႈၵၢၼ်ၾၢႆႇၸတ်းႁႃၵၢၼ် ၸႄႈဝဵင်းၽႂ်မၼ်းသေ ပိုၼ်ၽၢဝ်ႇလွင်ႈ ဝႃႈပဵၼ်ပေႃႈလဵင်ႉ/လုၵ်ႈလဵင်ႉ ထုၵ်ႇမႅၼ်ႈၸွမ်းပၵ်းပိူင် ဝႃႈၼႆ။


ဝၢႆးၼၼ်ႉပေႃးၸိုဝ်ႈသဵင်ၵူၼ်းႁဵတ်းၵၢၼ်၊ ၸိုဝ်ႈပေႃႈလဵင်ႉ ၵူၼ်းႁဵတ်းၵၢၼ်၊ တီႈယူႇၵူၼ်းႁဵတ်းၵၢၼ် ထုၵ်ႇမႅၼ်ႈၸွမ်းၽိုၼ်လိၵ်ႈၽိုၼ်လၢႆးယဝ်ႉ တေလႆႈထတ်းထွင်ၵူၼ်းၵိုၵ်းမိူင်း Certificate of Iden tity (CI) ဝႃႈ ၵူၼ်းႁဵတ်းၵၢၼ်ပဵၼ်ၵူၼ်းမိူင်းလႂ်  တွၼ်ႈတႃႇမိူင်းႁူမ်ႈတုမ်မၢၼ်ႈလႄႈ မိူင်းၶႅမ်ႊၿေႃႊ တီႊယိူဝ်ႊတႄႉ တေသူင်ႇၸဝ်ႈၼႃႈတီႈ မိူင်းၽႂ်မၼ်း ၶဝ်ႈႁဵတ်းပၼ်ၼႂ်းမိူင်းထႆး (One Stop Servi ce) ႁႂ်ႈယဝ်ႉၵမ်းလဵဝ်တီႈလဵဝ်- ဝႃႈၼႆ။


Photo by CM 108.com