ပၢင်ၵုမ်ၸဝ်ႈၼႃႈတီႈပလိၵ်ႈ မိူင်းတႆး တႅပ်းတတ်းၵၼ်ဝႃႈ ႁူင်းမူၼ်ႉမႄးတူဝ်ၸႂ်လႄႈ ပူၵ်းပွင်ၶိုၼ်းၽဝၵူၼ်းမိူင်း ဢၼ်မီးၼႂ်းၸႄႈဝဵင်းၵူတ်ႉၶၢႆၼၼ်ႉ ဢိင်ၼိူဝ်လွင်ႈႁူမ်ႇလူမ်ႈ ဢမ်ႇၶႅမ်ႉသေ တေၶၢႆႉၵႂႃႇဝႆႉတီႈ လႃႈသဵဝ်ႈ ဝႃႈၼႆ။


ဝၼ်းတီႈ 04/08/2017 ယၢမ်းဝၢႆးဝၼ်း ယူႇတီႈၸုမ်းၵႅတ်ႇၶႄႁႄႉၵင်ႈၽေးၶဵၼ်ယႃႈမဝ်းၵမ်သေ တႃႇတေပိုတ်ႇ ႁူင်းမူၼ်ႉမႄး တူဝ်ၸႂ်ၼၼ်ႉ ၸင်ႇလႆႈၸတ်းႁဵတ်းပၢင်ၵုမ် တီႈလုမ်းပလိၵ်ႈ(ယႄး) မိူင်းတႆး ၸႄႈဝဵင်းတူၼ်ႈတီး ၸိုင်ႈ တႆးပွတ်းၸၢၼ်း။

ဢူးၶိၼ်ႇဢွင်ႇ ၵႅမ်ၽူႈၵွၼ်းပလိၵ်ႈ လၢတ်ႈဝႃႈ “ ႁူင်းမူၼ်ႉမႄး တူဝ်ၸႂ် တီႈတီးမႃးၼႆႉ မီးၼႂ်းၸႄႈဝဵင်းၵူတ်ႉၶၢႆ ယွၼ်ႉပိူဝ်ႈလွင်ႈႁူမ်ႇလူမ်ႈသေ တေဢမ်ႇဝႆႉတီႈၵူတ်ႉၶၢႆယဝ်ႉ တေၶၢႆႉမႃးဝႆႉတီႈလႃႈသဵဝ်ႈ။ ထႅင်ႈတီႈၼိုင်ႈသမ်ႉ တီႈႁူင်းမူၼ်ႉမႄးတူဝ်ၸႂ် တီႈၾၢႆၶုၼ်တႄႉ လွင်ႈႁူမ်ႇလူမ်ႈလီလႄႈ မၵ်းမၼ်ႈတေပိုတ်ႇၶိုၼ်းတီႈၾၢႆၶုၼ်ၵူၺ်း” ဝႃႈၼႆ။


ၼႂ်းမိူင်းတႆးၼႆႉ ႁူင်းမူၼ်ႉမႄးတူဝ်ၸႂ်လႄႈ ပူၵ်းပွင်ၶိုၼ်းၽဝၵူၼ်းမိူင်း မီးယူႇသွင်တီႈ မိူၼ်ၼင်ႇ တီးမႃး ၼႂ်းၸႄႈဝဵင်း ၵူတ်ႉၶၢႆ ၸိုင်ႈတႆးပွတ်းႁွင်ႇလႄႈ ႁူင်းသူၺ်ႇပီႇယေး ၼႂ်းၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ၸဵမ်ၸိူဝ်းၼႆႉ ဝႃႈၼႆ။


ဢူးၶိၼ်ႇဢွင်ႇ သိုပ်ႇလၢတ်ႈထႅင်ႈဝႃႈ - ႁူင်းမူၼ်ႉမႄးတီႈၾၢႆၶုၼ်တႄႉ ႁဝ်းၶႃႈ တေႁဵတ်းႁႂ်ႈမၼ်းၶိုတ်းၸၼ်ႉမႃးထႅင်ႈ၊ လွင်ႈတႃႇတေၶၢႆႉႁူင်းမူၼ်ႉမႄးတူဝ်ၸႂ် တီႈတီးမႃးၼႆႉ တေၶတ်းၸႂ်ၼႄၼမ်ႉၼႄတူဝ်ဝႆးဝႆး။ ၶေႃႈတႅပ်းတတ်း ထႅင်ႈဢၼ်ၼိုင်ႈၵေႃႈ တႃႇလူင်ပွင်ၸိုင်ႈတေတမ်းပၼ်မႃးငိုၼ်းဝႆးဝႆးၼၼ်ႉ တေႁဵတ်းဢွၵ်ႇၼႄၼမ်ႉၼႄတူဝ်ဝႆးဝႆး၊ ယဝ်ႉၵေႃႈ ယူႇတီႈၸၼ်ႉမိူင်းႁူမ်ႈတုမ်သေ ႁႂ်ႈပၼ်ႁႅင်းဢီးၵေႃႈလီ တေႁဵတ်းသၢင်ႈၵႂႃႇယူႇ ဝႃႈၼႆ။


မိူဝ်ႈလဵဝ်ၼႆႉ ၵူၼ်းၼုမ်ႇၼႂ်းမိူင်းတႆးၵမ်ႈၼမ် ပဵၼ်ၶီႈၶႃႈယႃႈမဝ်းၵမ်ယဝ်ႉလႄႈ တႃႇတေမူၼ်ႉမႄးတူဝ်ၸႂ်လႄႈ ပူၵ်းပွင်ပၼ်ၶိုၼ်းၽဝၶဝ် ႁႂ်ႈၶဝ်ပေႃးၶဝ်ႈၼႂ်းၵႄႈၵၢင်တူင်ႇဝူင်းၵူၼ်းၶိုၼ်းၼၼ်ႉ ၸင်ႇလႆႈၶတ်းၸႂ်ပိုတ်ႇႁူင်းမူၼ်ႉမႄး တူဝ်ၸႂ်ၵႂႃႇ ၼႆယဝ်ႉ။