ႁႅင်းၵၢၼ် မိူင်းမၢၼ်ႈ၊ မိူင်းလၢဝ်းလႄႈ မိူင်းၵမ်ႇပူးၶျႃး ၸိူဝ်းပႆႇမီးဝတ်းဝႂ်သင်ၼၼ်ႉ ဢွၼ်ၵၼ်ၵႂႃႇ လူင်းသဵၼ်ႈ သၢႆမၢႆ  တႃႇတေႁဵတ်းဝတ်းဝႂ် ဢၼုၺၢတ်ႈႁဵတ်းၵၢၼ် ၼႂ်းမိူင်းထႆး တေႃႈလဵဝ် ႁႅင်းၵၢၼ်ၸိူဝ်းၵႂႃႇပၼ် သဵၼ်ႈ သၢႆမၢႆ မီးၵႂႃႇ 288,954 ၵေႃႉ ဝႃႈၼႆ။


တႄႇဢဝ် ဝၼ်းတီႈ 24-31/07/2017 ၶၢဝ်းတၢင်း 8 ဝၼ်းမႃးၼႆႉ လူင်ပွင်ၸိုင်ႈထႆး ဢွၵ်ႇမၢႆမီႈမတ်ႉတႃ 14 တႃႇ ႁဵတ်းဝတ်းဝႂ် ဢၼုၺၢတ်ႈႁဵတ်းၵၢၼ်ပၼ် ၸိူဝ်းဢမ်ႇမီးဝတ်းဝႂ်သင်။ ႁႂ်ႈပေႃႈလဵင်ႉ/ၼၢႆးၸၢင်ႈ ဢွၼ်ဢဝ်ၵႂႃႇတၢင်ႇ လူင်းသဵၼ်ႈသၢႆမၢႆ တီႈသုၼ်ႁပ်ႉႁဵတ်းဝတ်းဝႂ်ႁႅင်းၵၢၼ် ၼႂ်းၵုင်းထဵပ်ႈ 11 ဢွင်ႈတီႈလႄႈ ၸႄႈတွၼ်ႈ 89 ဢွင်ႈတီႈ ႁူမ်ႈၵၼ် မီး 100 တီႈ ၼႂ်းၸိုင်ႈထႆး။ ၶၢဝ်းတၢင်း 8 ဝၼ်း မႃးၼႆႉ ပေႃႈလဵင်ႉ/ ၼၢႆးၸၢင်ႈ 84,972 ၵေႃႉ၊ ဢွၼ်ဢဝ် လုၵ်ႈလဵင်ႉ မႃးလူင်းၸိုဝ်ႈသဵၼ်ႈသၢႆမၢႆ မီးၵႂႃႇယဝ်ႉ 288,954 ၵေႃႉ ဝႃႈၼႆ။

ၼၢႆးဢၼၼ်းၶျၢႆး ဢုထႆးၽတ်ႉထၼႃးသျိၵ်ႉ ၽူႈၶၢၼ်ပၢၵ်ႇႁွင်ႈၵၢၼ် ႁႅင်းၵၢၼ် ၸိုင်ႈထႆး လၢတ်ႈဝႃႈ “ ၼႂ်းမိူင်း ထႆးၼႆႉ သုၼ်ဢၼ်ပိုတ်ႇပၼ် ႁႅင်းၵၢၼ်မႃးလူင်းၸိုဝ်ႈသဵၼ်ႈသၢႆမၢႆၼႆႉ တင်းမူတ်းမီး 100 ဢွင်ႈတီႈ။ တႄႇပိုတ်ႇပၼ် ဝၼ်းတီႈ 24/07-07/08/ 2017 ႁႂ်ႈယဝ်ႉ ၼႂ်းၶၢဝ်းတၢင်း 15 ဝၼ်း။ ဢမ်ႇမီးဝၼ်းဢိုတ်းလုမ်း။ ႁႅင်းၵၢၼ် ဢၼ်မႃး လူင်းသဵၼ်ႈသၢႆမၢႆၼမ်လိူဝ်ပိူၼ်ႈ ပဵၼ်မိူင်းမၢၼ်ႈ၊ မိူင်းၵမ်ႇပူးၶျႃးလႄႈ မိူင်းလၢဝ်း။ ၶၢဝ်းယၢမ်း ပိုတ်ႇ သုၼ်ႁႅင်းၵၢၼ် သမ်ႉ 08:30-16:30 မူင်း။ ၼွၵ်ႈလိူဝ်ၼၼ်ႉ ၸႅင်ႈလၢတ်ႈပၼ်သဵၼ်ႈသၢႆမၢႆ မႃးတၢင်း ဢိၼ်ႊထိူဝ်ႊ ၼႅတ်ႊ လႆႈတီႈ https://wpfast.doe.go.th/fast11/user/ ဢမ်ႇၼၼ် ထူဝ်းၾူၼ်ႊတွင်ႈထၢမ်မႃး လႆႈတီႈ 1694 ဝႃႈၼႆ။


ယၢမ်းလဵဝ် ဢၼ်မႃးလူင်းသၢႆမၢႆဝႆႉ ၼႃႈၵၢၼ်ဢၼ်တေႁဵတ်းသၢင်ႈ  10 ဢၼ်- မိူၼ်ၼင်ႇ 1) ၵၢၼ်ၽုၵ်ႇသွမ်ႈလႄႈ လဵင်ႉသတ်း ႁူဝ်ၵူၼ်းမီး 65,387 ၵေႃႉ၊ 2) ၵၢၼ်ၵေႃႇသၢင်ႈ ႁူဝ်ၵူၼ်းမီး 53,530 ၵေႃႉ၊ 3) ၵၢၼ်ၶၢႆၶဝ်ႈၽၵ်းတင်း ၵိၼ်လႄႈ ၶိူင်ႈၻိူမ်ႇ ႁူဝ်ၵူၼ်းမီး 27,805 ၵေႃႉ၊ 4) ၵၢၼ်ႁပ်ႉၸႂ်ႉၵူႈလွင်ႈလွင်ႈ ႁူဝ်ၵူၼ်း 21,322 ၵေႃႉ၊ 5) ၵၢၼ်သူၼ် ႁူဝ်ၵူၼ်း 17,898 ၵေႃႉ၊ 6) ၵၢၼ်ႁပ်ႉတေႃႉသူင်ႇ၊ ၵႃႉၶၢႆၶူဝ်းယွႆႈယႅမ်း 15,647 ၵေႃႉ၊ 7) ၵၢၼ်ႁဵတ်း သိူဝ်ႈၶူဝ်း/သိူဝ်ႈၽႃႈ ႁူဝ်ၵူၼ်း 9,544 ၵေႃႉ၊ 8) ၵၢၼ်ႁဵတ်းဢွၵ်ႇၶၢႆၶိူင်ႈလဵၵ်း ႁူဝ်ၵူၼ်း 7,204 ၵေႃႉ၊ 9) ၵၢၼ်ဢဝ် ၶူဝ်းၶွင်ၵဝ်ႇ ၶိုၼ်းမႄးႁဵတ်းဢွၵ်ႇဢၼ်မႂ်ႇ ႁူဝ်းၵူၼ်း 6,141 ၵေႃႉလႄႈ 10) ၵၢၼ်ႁဵတ်းဢွၵ်ႇၶၢႆပႃႊ သတိတ်ႊ/ ထူင်ယၢင် ႁူဝ်ၵူၼ်း 5,952 ၵေႃႉ ၼႆယဝ်ႉ။


ၼ်ႂ်းၶၢဝ်းတၢင်း 8 ဝၼ်း ဢၼ်ပေႃႈလဵင်ႉ/ၼၢႆးၸၢင်ႈ မႃးလူင်းသဵၼ်ႈသၢႆမၢႆလုၵ်ႈလဵင်ႉ တီႈသုၼ်ႁဵတ်းဝတ်းဝႂ်ႁႅင်းၵၢၼ် ၼမ်တီႈသုတ်း မိူၼ်ၼင်ႇ ၵုင်းထဵပ်ႈ လုၵ်ႈလဵင်ႉမီး 62,038 ၵေႃႉ၊ သမုတ်ႇပၵၢၼ်း 15,547 ၵေႃႉ၊ ရယွင်း 13,292 ၵေႃႉ၊ ၼူၼ်းထပူးရီး 12,344 ၵေႃႉ၊ ပထုမ်းထႃးၼီး 12,332 ၵေႃႉ၊ ၵဵင်းမႆႇ 11,623 ၵေႃႉ၊ သူႇရၢတ်ႉထႃးၼီး 11,148 ၵေႃႉ၊ ၼၶွၼ်းပထူမ် 10,652 ၵေႃႉ၊ ၶျူၼ်းပူးရီး 10,385 ၵေႃႉလႄႈ သမုတ်ႇသႃၶွၼ်း 8,216 ၵေႃႉ ၸဵမ်ၸိူဝ်းၼႆႉ။


တႄႇဢဝ် ဝၼ်းတီႈ 24-31/07/2017 မႃးၼႆႉ ႁႅင်းၵၢၼ် ဢၼ်မႃးလူင်းသဵၼ်ႈသၢႆမၢႆ ၼမ်တီႈသုတ်း ပဵၼ်ႁႅင်းၵၢၼ် မိူင်းမၢၼ်ႈ မီး 168,428 ၵေႃႉ၊ တီႈသွင် မိူင်းၵမ်ႇပူးၶျႃး 80,851 ၵေႃႉလႄႈ တီႈသၢမ် မိူင်းလၢဝ်း 39,675 ၵေႃႉ ၼႆယဝ်ႉ။