ၵူၼ်းဢၼ်လုၵ်ႉတၢင်းမိူင်းတႆး မိူင်းမၢၼ်ႈ၊ မိူင်းလၢဝ်းလႄႈ မိူင်းၵမ်ၿူးၶျႃး ၶဝ်ႈႁဵတ်းၵၢၼ် ၼႂ်းမိူင်းထႆး လူင်းသဵၼ်ႈ သၢႆမၢႆ ႁဵတ်းဝတ်းဝႂ် ၵပ်းတူဝ်ၵူၼ်းႁဵတ်းၵၢၼ် ၼႂ်းၶၢဝ်းတၢင်း 9 ဝၼ်း မီးၵႂႃႇ 3 သႅၼ်ပၢႆယဝ်ႉ။


ၼႂ်းဝၼ်းတီႈ 01/08/2017 ယၢမ်းဝၢႆးဝၼ်း 16:30 မူင်းၼၼ်ႉ သုၼ်ႁပ်ႉၸႅင်ႈ ႁွင်ႈၵၢၼ်ႁႅင်းၵၢၼ် ၶၢမ်ႈမိူင်း 100 တီႈ ၼႂ်းၸိုင်ႈထႆး၊ တင်ႈတႄႇဝၼ်းတီႈ 24/07/2017 တေႃႇ ဝၼ်းတီႈ 31/07/2017 ၶၢဝ်းတၢင်း 9 ဝၼ်းၼႆႉ ပေႃႈလဵင်ႉ/မႄႈလဵင်ႉထႆး 97947 ၵေႃႉ လူင်းၸိုဝ်ႈႁပ်ႉဢဝ်ႁႅင်းၵၢၼ် (လုၵ်ႈလဵင်ႉ) မီး 331529 ၵေႃႉယဝ်ႉ ဝႃႈၼႆ။

သုၼ်ႁပ်ႉၸႅင်ႈ ႁွင်ႈၵၢၼ်ႁႅင်းၵၢၼ် ၶၢမ်ႈမိူင်း ၸိုင်ႈထႆး ပိုၼ်ၽၢဝ်ႇဢွၵ်ႇမႃးဝႃႈ “ ဝၼ်းတီႈ 1/8/2017 ဝၼ်း လဵဝ်ၵူၺ်း ပေႃႈလဵင်ႉ/ၼၢႆးၸၢင်ႈ ဢၼ်မႃးလူင်းသဵၼ်ႈသၢႆမၢႆ ပၼ်လုၵ်ႈလဵင်ႉ ၵမ်းသိုဝ်ႈ မီး 11,620 ၵေႃႉ၊ ႁႅင်းၵၢၼ် 39,687 ၵေႃႉ။ ဢၼ်ၸႅင်ႈလၢတ်ႈမႃးတင်း ဢိၼ်ႊထိူဝ်ႊၼႅတ်ႊသမ်ႉ ပေႃႈလဵင်ႉမီး 1,355 ၵေႃႉ၊ ႁႅင်းၵၢၼ် 2,888 ၵေႃႉ” ဝႃႈၼႆ။


ႁႅင်းၵၢၼ် ဢၼ်မႃးလူင်းသဵၼ်ႈသၢႆမၢႆ တႃႇႁဵတ်းဝတ်းဝႂ် ဢၼုၺၢတ်ႈႁဵတ်းၵၢၼ်ၼႆႉ ႁႅင်းၵၢၼ်ဢၼ်ၼမ်တီႈသုတ်း မိူင်းမၢၼ်ႈ၊ တီႈသွင်သမ်ႉ မိူင်းၵမ်ၿူးၶျႃးလႄႈ တီႈသၢမ် ပဵၼ်မိူင်းလၢဝ်း ဝႃႈၼႆ။


လူင်ပွင်ၸိုင်ႈထႆး ဢွၵ်ႇပၵ်းပိူင်မၢႆမီႈ မတ်ႉတႃ 14 ၼႆႉမႃး ပိုတ်ႇပၼ်ပေႃႈလဵင်ႉ(ၼၢႆးၸၢင်ႈ) ဢွၼ်ဢဝ် လုၵ်ႈ လဵင်ႉၽႂ်မၼ်း မႃးပၼ်သဵၼ်ႈသၢႆမၢႆ တီႈသုၼ်ႁဵတ်းဝတ်းဝႂ်ႁႅင်းၵၢၼ် 100 ဢွင်ႈတီႈ ၼႂ်းၸိုင်ႈထႆးၼၼ်ႉ တႄႇဢဝ် ဝၼ်းတီႈ 24/07/2017 ထိုင် 07/08/2017 ၶၢဝ်းတၢင်း 15 ဝၼ်း။


ၶၵ်ႉတွၼ်ႈတႃႇႁႅင်းၵၢၼ် တေလႆႈယိုၼ်ႈႁဵတ်းဝတ်းဝႂ် ဢၼုၺၢတ်ႈႁဵတ်းၵၢၼ်သမ်ႉ 1) ႁႅင်းၵၢၼ် တေလႆႈၵႂႃႇႁဵတ်း ပၢတ်ႊသပွတ်ႊ သီၶဵဝ် CI မိူၼ်ၼင်ႇ တီႈမႄႈသၢႆ၊ မႄႈသွတ်ႇ၊ ရယွင်း၊ သမုတ်ႇပႃးၵၢၼ်းလႄႈ သမုတ်ႇသႃၶွၼ်း တေလႆႈသဵင်ႈငိုၼ်းတၢင်းၾၢႆႇထႆး ၼိုင်ႈၵေႃႉလႂ် 310 ဝၢတ်ႇ။ 2) ယဝ်ႉၵေႃႈ ပေႃးႁဵတ်းပပ်ႉပၢတ်ႊသပွတ်ႊ CI ယဝ်ႉ မႃးတွၵ်ႇဝီႊသႃႊတီႈၾၢႆႇၵူတ်ႇထတ်းၵူၼ်းၶဝ်ႈမိူင်းတေႃးမေႃး(လဝၵထႆး) ၼႆႉၵေႃႈ တေလႆႈသဵင်ႈငိုၼ်း 500 ဝၢတ်ႇ၊ ၾၢႆႇၸဝ်ႈၼႃႈတီႈၶဝ် တေတွၵ်ႇဝီႊသႃႊပၼ် တေၸႂ်ႉ လႆႈထိုင် ဝၼ်းတီႈ 31/03/2018။ 3) တေလႆႈၵႂႃႇ ၵူတ်ႇပၢႆးယူႇလီ 500 ဝၢတ်ႇ၊ ၵႃႈဝႂ်ႁပ်ႉ ႁွင်းပၢႆးယူႇလီ(ဝႂ်ႁူင်းယႃ) 500 ဝၢတ်ႇ။ 4)  တေလႆႈၵႂႃႇတၢင်ႇတီႈ ၸတ်းႁႃ ၵၢၼ်ငၢၼ်း တႃႇတေႁဵတ်းဝႂ် ဢၼုၺၢတ်ႈႁဵတ်းၵၢၼ် တၵ်းလႆႈသဵင်ႈငိုၼ်းထႅင်ႈ 550 ဝၢတ်ႇ။ ဝႂ်ဢၼုၺၢတ်ႈႁဵတ်း ၵၢၼ် သမ်ႉ တေမီးဢႃယုထိုင် 31/03/2018 ၸဵမ်ၸိူဝ်းၼႆႉ ဝႃႈၼႆ။


ၶေႃႈမုၼ်း ศูนย์รับแจ้งการทำงานของคนต่างด้าว กระทรวงแรงงาน