ၶွမ်ႊမတီႊလူလွမ်ပၵ်းတႃပႂ်ႉတူၺ်း လွင်ႈၵိုတ်းတိုၵ်း ၸၼ်ႉပိုၼ်ႉတီႈ JMC-L လၢင်းၶိူဝ်း ၸတ်းႁဵတ်းပၢင်ၵုမ် ႁူဝ်လိူၼ် ပွၵ်ႈၵမ်းသွင် တီႈလုမ်း JMC-L ၸႄႈဝဵင်းလၢင်းၶိူဝ်း။


ပူၼ်ႉမႃး မိူဝ်ႈဝၼ်းတီႈ 28/07/2017 ယၢမ်းၵၢင်ဝၼ်း 11:30 မူင်းပၢႆၼၼ်ႉ ၶွမ်ႊမတီႊ JMC-L ၸတ်းႁဵတ်းပၢင်ၵုမ် ဢုပ်ႇဢူဝ်းထတ်းသၢင်ၶိုၼ်းၵၢၼ်ငၢၼ်း ဢၼ်တူင်ႉၼိုင်မႃးၶၢဝ်းတၢင်းၼိုင်ႈလိူၼ် တႃႇၵႄႈလိတ်ႈ လွင်ႈၵူၼ်းပၢႆႈ ၽေးသိုၵ်း တီႈဢိူင်ႇ ၵၢၼ်ႇတူးလူင်လႄႈ လွင်ႈဝၢင်းၽႅၼ်တႃႇလူင်းပိုၼ်ႉတီႈ ႁူပ်ႉထူပ်းၵူၼ်းမိူင်းထႅင်ႈ ၸဵမ်ၸိူဝ်းၼႆႉ။ ပၢင်ၵုမ်ၼႆႉ ၸတ်း ႁဵတ်းတီႈလုမ်း JMC-L ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။


လုင်းၸၢႆးၵျေႃႇလ ၵႅမ်ႁူဝ်ပဝ်ႈ လုမ်း JMC-L လၢတ်ႈဝႃႈ “ ဢၼ်ႁဝ်းၶႃႈ ၸတ်းႁဵတ်းပၢင်ၵုမ်ၼႆႉ ယွၼ်ႉႁဝ်းၶႃႈ ၶွတ်ႇၽွတ်ႈတင်ႈၶိုၼ်ႈမႃး လုမ်းပၵ်းတႃပႂ်ႉတူၺ်း လွင်ႈၵိုတ်းတိုၵ်း ၸၼ်ႉပိုၼ်ႉတီႈ မီးမႃးၼိုင်ႈလိူၼ်ယဝ်ႉ။ ယွၼ်ႉၼၼ် ဢုပ်ႇဢူဝ်းၵၼ် ထတ်းသၢင်ၶိုၼ်းၵၢၼ်ငၢၼ်းဢၼ်တူင်ႉၼိုင်ႁဵတ်းမႃး ၸိူဝ်းၼၼ်သေ လွင်ႈၵူၼ်း ပၢႆႈၽေး တီႈဝၢၼ်ႈၼႃးႁီး ၼႂ်းဢိူင်ႇၵၢၼ်ႇတူးလူင် တေႁဵတ်းႁိုဝ်ပွၵ်ႈၶိုၼ်းႁိူၼ်းယေးလႄႈ လွင်ႈဝၢင်း ၽႅၼ်ၵၢၼ် ငၢၼ်း တႃႇလူင်းပိုၼ်ႉတီႈႁူပ်ႉထူပ်းၵူၼ်းမိူင်း ၵႂႃႇၸဵမ်ၸိူဝ်းၼႆႉ” ဝႃႈၼႆ။

လုမ်း JMC-L ၸၼ်ႉပိုၼ်ႉတီႈ ဝဵင်းလၢင်းၶိူဝ်း မီးၽႅၼ်ၵၢၼ်ဝႆႉ တႃႇလူင်းႁူပ်ႉထူပ်းသပ်းလႅင်း လွင်ႈငမ်းယဵၼ် ပၼ်ၵူၼ်းမိူင်း ၸႄႈဝဵင်းလၢင်းၶိူဝ်း ၼႂ်းႁၢင်လိူၼ်ဢေႃႊၵၢတ်ႉသ်ၼႆႉ  ဝႃႈၼႆ။


ၵူၼ်းပၢႆႈၽေးသိုၵ်း ၼႂ်းဝၢၼ်ႈပုင်းၸုၵ်း၊ ဝၢၼ်ႈမႆႉသႃးၸေး လင် ႁိူၼ်း 40 လင်ႁိူၼ်းပၢႆ၊ ႁူဝ်ၵူၼ်း 200 ပၢႆ  ဢၼ်ဢွၼ်ၵၼ်ပၢႆႈၽေးမႃးသွၼ်ႈယူႇဝႆႉတီႈ ဝၢၼ်ႈၼႃးႁီး ဢိူင်ႇၵၢၼ်ႇတူးလူင် ၸႄႈဝဵင်းမွၵ်ႇမႆႇ မိူဝ်ႈဝၼ်းတီႈ  9/5/2017 ယွၼ်ႉပိူဝ်ႈၸုမ်းယိပ်းၵွင်ႈၵၢင်ႇတူင်ႉၼိုင်ၼႂ်းပိုၼ်ႉတီႈ။ မိူဝ်ႈၼႆႉ ဝၼ်းတီႈ 1/8/2017 ၼႆႉ ၵူၼ်းပၢႆႈ ၽေးသိုၵ်း 200 ပၢႆ ဢွၼ်ၵၼ်ပွၵ်ႈ ၶိုၼ်းႁိူၼ်းယေး ၽႂ်မၼ်းၶိုၼ်း ဝႃႈၼႆ။


မိူဝ်ႈပူၼ်ႉမႃး ဝၼ်းတီႈ 27/7/2017 ၼၼ်ႉ ယူႇတီႈလုမ်း JMC-L လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း ၸႄႈဝဵင်းမွၵ်ႇမႆႇ မီးၵူၼ်းမိူင်းၶဝ်ႈႁူမ်ႈတင်းၼမ်လၢႆ သပ်းလႅင်းၼႄ လွင်ႈၵိုတ်းယိုတ်း၊ လွင်ႈငမ်းယဵၼ် လွင်ႈပိုတ်ႇလုမ်း ၸိူဝ်းၼၼ်ႉ ပၢင်ႁူပ်ႉထူပ်းၼႆႉ ၸတ်းႁဵတ်းတီႈ ႁူင်းႁေႃ ၼမ်ႉယူမ်း ၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ဝႃႈၼႆ။


JMC-L ၼႆႉ ၶွတ်ႇၽွတ်ႈ မိူဝ်ႈဝၼ်းတီႈ 28/06/2017 ႁူဝ်ပဝ်ႈပဵၼ် ပိဝ်ႇႁႃႇမူး ၽူႈၵွၼ်းၸႄႈတွၼ်ႈ လၢင်းၶိူဝ်း၊ ၵႅမ်ႁူဝ်ပဝ်ႈ ပဵၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA၊ ၽူႈၼမ်းၼႂ်းသမ်ႉ ပဵၼ်ၼႂ်းတပ်ႉ သိုၵ်းမၢၼ်ႈ ၼႂ်းၸႄႈ ဝဵင်းလၢင်းၶိူဝ်းလႄႈ တူဝ် တႅၼ်းၵူၼ်းမိူင်းၽွင်ႈ။ ယၢမ်းလဵဝ်ၵူၼ်းမိူင်းဢမ်ႇပႆႇ ပေႃးၶဝ်ႈၸႂ် ၼိူဝ်လွင်ႈၼႆႉလႄႈ ပေႃး လိူၼ်ၼႃႈမႃး တေသိုပ်ႇလူင်းႁူပ်ႉထူပ်း သပ်းလႅင်းၼႄပၼ် ၵူၼ်းမိူင်းတၢင်း ပွတ်းၸႄႈ ဝဵင်းမွၵ်ႇမႆႇ လွင်ႈပိုတ်ႇ လုမ်း JMC တင်း NCA လႆႈဝၢင်းၽႅၼ်ဝႆႉ ၼႆယဝ်ႉ။