ႁႅင်းၵၢၼ် မိူင်းမၢၼ်ႈ၊ မိူင်းၵမ်ၿူးၶျႃးလႄႈ မိူင်းလၢဝ်း ၵူၼ်းၸိူဝ်းဢၼ်ဢမ်ႇမီးဝတ်းဝႂ်ဢၼုၺၢတ်ႈႁဵတ်းၵၢၼ်ၼႂ်း ၸိုင်ႈ ထႆးၼၼ်ႉ ဢွၼ်ၵၼ်လူင်းသဵၼ်ႈသၢႆမၢႆၸိုဝ်ႈ တႃႇတေႁဵတ်း ပၢတ်ႊသပွတ်ႊ CI တင်း ဝႂ်ဢၼုၺၢတ်ႈႁဵတ်းၵၢၼ်  မီး ႁိမ်း 4 သႅၼ်ၵေႃႉယဝ်ႉ ဝႃႈၼႆ။


တႄႇဢဝ် ဝၼ်းတီႈ 24/07/2017- 02/08/2017 ၶၢဝ်းတၢင်း 10 ဝၼ်းမႃးၼႆႉ ပေႃႈလဵင်ႉ/ၼၢႆးၸၢင်ႈ ဢွၼ်ဢဝ် လုၵ်ႈလဵင်ႉ မႃးလူင်းသဵၼ်ႈသၢႆမၢႆၸိုဝ်ႈဝႆႉ တီႈသုၼ်ႁပ်ႉႁဵတ်းဝတ်းဝႂ်ႁႅင်းၵၢၼ် 100 ဢွင်ႈတီႈ ၼႂ်းၸိုင်ႈထႆး။ တေႃႈလဵဝ် ပေႃႈလဵင်ႉ/ၼၢႆးၸၢင်ႈ မႃးလူင်းသဵၼ်ႈသၢႆမၢႆပၼ်လုၵ်ႈလဵင်ႉ လုၵ်ႈလဵင်ႉသမ်ႉ မီး 390,824 ၵေႃႉ ဝႃႈၼႆ။

သုၼ်ႁပ်ႉၸႅင်ႈႁႅင်းၵၢၼ် ၸိုင်ႈထႆး ပိုၼ်ၽၢဝ်ႇဢွၵ်ႇဝႃႈ “ တေႃႈလဵဝ် ႁႅင်းၵၢၼ် မိူင်းမၢၼ်ႈ၊ ၵမ်ၿူးၶျႃးလႄႈ လၢဝ်း ဢၼ်မႃးလူင်းသဵၼ်ႈသၢႆမၢႆဝႆႉ 390,824 ၵေႃႉ။ ပေႃႈလဵင်ႉ/ၼၢႆးၸၢင်ႈ ဢၼ်မႃးၸႅင်ႈပၼ်လုၵ်ႈလဵင်ႉသမ်ႉ မီးၵႂႃႇ ယဝ်ႉ 112,779 ၵေႃႉ။ ၼႂ်းႁႅင်းၵၢၼ် ႁူဝ်ၼပ်ႉ 390,824 ၵေႃႉၼၼ်ႉ ဢၼ်မႃးလူင်းသဵၼ်ႈသၢႆမၢႆ ၼမ်တီႈသုတ်း ပဵၼ်မိူင်း မၢၼ်ႈ မီးယူႇ  231599 ၵေႃႉ၊ ၼမ်တီႈသွင်သမ်ႉ မိူင်းၵမ်ၿူးၶျႃး 105808 ၵေႃႉ၊ ၼမ်တီႈသၢမ်သမ်ႉ မိူင်းလၢဝ်း 53417 ၵေႃႉ ၸိူဝ်းၼႆႉ။ လိူဝ်ၼၼ်ႉ ပေႃႈလဵင်ႉ/ၼၢႆးၸၢင်ႈ ဢၼ်မႃးလူင်းပၼ်သဵၼ်ႈၸိုဝ်ႈ လုၵ်ႈလဵင်ႉ သမ်ႉ ပေႃႈလဵင်ႉႁပ်ႉၸၢင်ႈသုၼ်ႇတူဝ် မီး 12,927 ၵေႃႉ၊ ပေႃႈလဵင်ႉႁပ်ႉၸၢင်ႈ ၼႂ်းၶွမ်ႊပၼီႊမီး 99,711 ၵေႃႉလႄႈ ပေႃႈလဵင်ႉတၢင်ႇၸၢတ်ႈ(တၢင်ႇမိူင်း) ႁပ်ႉၸၢင်ႈလုၵ်ႈလဵင်ႉသမ်ႉ မီး 141 ၵေႃႉ” ဝႃႈၼႆ။


ၵဵဝ်ႇၵပ်းလွင်ႈၼႆႉသေ ပေႃႈလဵင်ႉၼၢႆးၸၢင်ႈ ဢၼ်ၶဝ်ႈမႃးၸႅင်ႈလူင်းသဵၼ်ႈသၢႆမၢႆပၼ် လုၵ်ႈလဵင်ႉ တီႈသုၼ်ႁပ်ႉႁဵတ်း ဝတ်းဝႂ်ႁႅင်းၵၢၼ် 100 ဢွင်ႈတီႈၼႆႉသမ်ႉ မီး 103,999 ၵေႃႉ။ ဢၼ်ၸႅင်ႈလၢတ်ႈမႃး တၢင်းၼႂ်းဢိၼ်ႊထိူဝ်ႊၼႅတ်ႊ သမ်ႉမီး 8,780 ၵေႃႉ။
ၼႃႈၵၢၼ်သမ်ႉ 5 မဵဝ်း မိူၼ်ၼင်ႇ ၵၢၼ် ၽုၵ်ႇသွမ်ႈလႄႈ လဵင်ႉသတ်း 91,084 ၵေႃႉ၊ ၵၢၼ်ၵေႃႇသၢင်ႈ 77,443 ၵေႃႉ၊ ၵၢၼ်ႁပ်ႉၸႂ်ႉ လၢၼ်ႉတၢင်းၵိၼ် ၶဝ်ႈၽၵ်း36,539 ၵေႃႉ၊ ၵၢၼ်ႁပ်ႉၸႂ်ႉၼႂ်းႁိူၼ်း 31,548 ၵေႃႉလႄႈ ၵၢၼ်ႁပ်ႉၸႂ်ႉၵူႈလွင်ႈလွင်ႈ 28,880 ၵေႃႉ ၸိူဝ်းၼႆႉ ဝႃႈၼႆ။


ၼႂ်းၶၢဝ်းတၢင်း 10 ဝၼ်းမႃးၼႆႉ ဢၼ်ပေႃႈလဵင်/မႄႈလဵင်ႉ ၼၢႆးၸၢင်ႈ မႃးလူင်းသဵၼ်ႈသၢႆမၢႆ တီႈသုၼ်ႁဵတ်းဝတ်း ဝႂ်ႁဵတ်းၵၢၼ် ၼမ်တီႈသုတ်း 5 တီႈ ၼႂ်းၸိုင်ႈထႆး မိူၼ်ၼင်ႇ သုၼ်ၵုင်းထဵပ်ႈ 14,625 ၵေႃႉ၊ သုၼ်ၸႄႈတွၼ်ႈ ၼူၼ်းထပူးရီး 14,371 ၵေႃႉ၊ သုၼ်ၸႄႈတွၼ်ႈၵဵင်းမႆႇ 13,757 ၵေႃႉ၊ သုၼ်ၸႄႈတွၼ်ႈၼၶွၼ်းပထူမ် 13,628 ၵေႃႉ၊ သုၼ်ရယွင်း 12,420 ၵေႃႉ ၼႆယဝ်ႉ။


ၶေႃႈမုၼ်း ศูนย์รับแจ้งการทำงานของคนต่างด้าว กระทรวงแรงงาน