မိူင်းပူးလူင်ၼႆႉ ပဵၼ်မိူင်းဢွၼ်ႇလုၵ်ႈၼိုင်ႈ ဢၼ်မီးၼႂ်းၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင်၊ မိူင်းတႆး ပွတ်းဢွၵ်ႇၶူင်း၊ ယၢၼ်ၵႆဝဵင်းမိူင်းပဵင်းမွၵ်ႇပၢၵ်ႇလၵ်းပၢႆသေ ယူႇၸမ်ႁိမ်းၵႃလီႉ ၵုၼ်ႁဵင်၊ တိတ်းၸပ်းပွတ်း မိူင်းသၢတ်ႇ မိူင်းတူၼ်ၸိူဝ်း ၼႆႉ၊ တွၼ်ႈမိူင်းပူးလူင်ၼႆႉ တိုၵ်ႉပဵၼ်ဝႆႉၼႂ်းထိူၼ်ႇလိုၵ်ႉလူင် တၢင်းလူတ်ႉၵႃး ယင်းပႆႇၸၢင်ႈၵႂႃႇမႃးလႆႈလီ တိုၵ်ႉပဵၼ်ဝႆႉ သဵၼ်ႈတၢင်း ၵူၼ်းၵႃႉမႆႉၶဝ်ၵႂႃႇမႃးၼၼ်ႉၵူၺ်း၊ ၵူၼ်းယူႇသဝ်း ၵိၼ်သၢင်ႈၼႂ်းမိူင်းၼၼ်ႉ ေတမီးတႆး ပလွင်ႈ လႄႈ မူးသိူဝ်းယူႇသဝ်းၸွမ်းၵၼ်မႃး ပၢၼ်သိုပ်ႇပၢၼ်ေတႃႇ ထိုင်ယၢမ်းလဵဝ်ၼႆႉ၊ပေႃးတေလၢတ်ႈသိုဝ်ႈ"ၵေႃႈ မိူင်းပူးလူင်ၼႆႉ တိုၵ်ႉပဵၼ်ဝၢၼ်ႈၼွၵ်ႈ မိူင်းထိူၼ်ႇဝႆႉယူႇ။


တႃႇၽဝၸၢတ်ႈပၢၼ် ပီႈၼွင်ႉၵူၼ်းမိူင်းပူးလူင်ၸမ်ႉ ပေႃးဢဝ်လွင်ႈၵတ်းယဵၼ်ဝႃႈၸိုင် လွင်ႈ ၵတ်းယဵၼ် သၽႃႇဝ လႄႈ ပီႈၼွင်ႉၵူၼ်းမိူင်းလႆႈၵတ်းယဵၼ်ဝႆႉယူႇ ဢမ်ႇလႆႈသုတ်ႇဢၢႆၵႂၼ်း ၼမ်ႉမၼ်း ၶိူင်ႈၸၢၵ်ႈ ႁူင်းၸၢၵ်ႈဢီႈသင်၊ ယူႇၸွမ်းၾိင်ႈတိုၼ်းပဵၼ်ၸႅတ်ႈၸၢင်ႇ ပိူင်ပဵၼ်ၼႂ်းထိူၼ်ႇဝၢၼ်ႈၼွၵ်ႈ ၼၼ်ႉယဝ်ႉ၊ ၵူၺ်းၵႃႈ ပေႃးမႃးဝိၼ်ႇဝၢႆႇၵၢႆႇတူၺ်း လွင်ႈၵတ်းယဵၼ်ဝၢၼ်ႈမိူင်းသမ်ႉ တင်ႈတႄႇပၢၼ်ၵွၼ်ႇမႃး ထိုင်ႁၢၼ်ႉယၢမ်းလဵဝ် ပီႈၼွင်ႉၵူၼ်းမိူင်းၼၼ်ႉ ပႆႇလႆႈ ၸၢမ်ၸေးၸိမ်ႇမၼ်းဢီႈသင် ၶေႃႈၵႂၢမ်း လွင်ႈၵတ်းယဵၼ်ၼၼ်ႉၵေႃႈ ႁၢင်ႈၽႂ်တေ ဢမ်ႇႁူႉဢမ်ႇလၢတ်ႈ တေႃႇၵၼ်လူး ၵွၼ်ႇ။

ၽွင်ႈပၢၼ်ၵျပၢၼ်ႇၶိုၼ်ႈၽႅဝ်မႃးမိူင်းတႆးေၵႃႈ ဢွၼ်ၵၼ်မႃးယႃႉတဝ်ၽႅဝ်ထိုင် မိူင်းပူးလူင် ၵူၼ်းမိူင်းလႆႈသုၵ်ႉယုင်ႈ ဢူၼ်ၵဝ်း ပၢႆႈၶဝ်ႈၼႂ်းထိူၼ်ႇၼႂ်းႁူး၊ လႆႈၶၢမ်ႇတၢင်းဢဝ်ႁိူဝ်းမိၼ်ပွႆႇသႂ်ႇဝတ်ႉၵျွင်း ပဵၼ်လၢႆလင် လႆႈလူႉလႅဝ်ၵႂႃႇပႅတ်ႈ၊ မိူၼ်ၼင်ႇဝတ်ႉၵဵင်းႁိၼ်လႄႈ ဝတ်ႉဝၢၼ်ႈတူင်ႈၼၼ်ႉယဝ်ႉ၊ ထိုင်မႃး ပၢၼ်ၶႄႇၽိူၵ်ႇၶဝ်ႈမႃးေၵႃႈၼင်ႇၼၼ် လႆႈဢဝ် ဢၼ်ၼိုင်ႈယဝ်ႉ ဢၼ်ၼိုင်ႈသၢၵ်ႈပၼ်သႂ်ႇၶွၼ်ႇ၊ ဢမ်ႇသႂ်ႇ ဢမ်ႇလႆႈ၊ ဢထမ်ႇမၶၢႆၶူဝ်းၶွင်ၶဝ်သေ ႁႂ်ႈၵူၼ်းမိူင်းသိုဝ်ႉဢဝ် လႅၵ်ႈဢဝ်၊ ဝၢႆးသေၵျပၢၼ်ႇ ပွၵ်ႈမိူဝ်း၊ ၶႄႇ ၽိူၵ်ႇၵေႃႈပွၵ်ႈမိူဝ်းယဝ်ႉ ၸဝ်ႈၾႃႉၶဝ်လႄႈ ၽူႈႁဵတ်းၵၢၼ်မိူင်းၶဝ် မိူင်းတႆး တင်းမိူင်းမၢၼ်ႈ တူၵ်းလူင်းလႆႈ ၸႂ်ၵၼ် ႁဵတ်းပဵၼ်မိူင်းၵတ်းယဵၼ်၊ ဢၼ်ပဵၼ်ဢွင်ႇသၢၼ်း တင်းၸဝ်ႈၾႃႉ တင်းၼမ် ဢွၼ်ၵၼ်လူင်းလၢႆး ႁဵတ်းလိၵ်ႈမၼ်ႈၵႅၼ်ႇ လွင်ႈၵၢၼ်ၵတ်းယဵၼ်တႄႉဝႃႈ"၊ လိုၼ်းလၢႆးဝၢႆးလင်ႈမႃး ၵူၼ်းလူင် မိူင်းလူင်တႄႉ ၵတ်းယဵၼ်ယူႇ၊ ၵူၼ်းဢွၼ်ႇ မိူင်းဢွၼ်ႇဢမ်ႇမီးလွင်ႈပႅၵ်ႇပိူင်သင်ၵၼ်မႃး၊ ၵျပၢၼ်ႇပေႉၵိၼ် ၶီႇၼဵၵ်း တဵၵ်း တဵင်ယဝ်ႉ ၶႄႇၽိူၵ်ႇၶဝ်မႃးပုတ်ႈ ဝၢႆးမႃးမၢၼ်ႈဢဝ်လွင်ႈတၢင်း လိုပ်ႈၶႄႇၸိူဝ်းၼၼ်ႉ မႃးပဵၼ်လွင်ႈတၢင်း သေၶိုၼ်ႈမႃးပုတ်ႈတီႈယူႇမၼ်းၵူၺ်း၊ တီႈတႄႉၵျပၢၼ်ႇၵေႃႈမိူၼ်ၶႄႇ၊ၶႄႇၵေႃႈမိူၼ်မၢၼ်ႈ မၢၼ်ႈၵေႃႈၶႄႇ လႄႈၵျပၢၼ်ႇၼၼ်ႉယဝ်ႉ၊ ဢၼ်ပိူင်ႈၵၼ်ၼၼ်ႉ ၼႃႈလမ်ၼႃႈလႅင် လႄႈၼႃႈၶၢဝ်ၼၼ်ႉၵူၺ်းယဝ်ႉ။


ထိုင်ပၢၼ်မၢၼ်ႈမႃး ပၢၼ်သိုပ်ႇပၢၼ် ၵေႃႉသိုၵ်းၵေႃႉႁၢၼ် ၾၢႆႇၽႂ်ၸုမ်းမၼ်း ဢမ်ႇၽၢတ်ႇမိူင်းပူး လူင်ထႅင်ႈၼင်ႇၵဝ်ႇ၊ ပၢၼ်ၶုၼ်သႃႇၶိုၼ်ႈမႃး ၽႅဝ်ႁွတ်ႈမိူင်းပူးလူင် ပိုၼ်ၽၢဝ်ႇဢဝ်မိူင်းတႆးၵွၼ်းၶေႃ ၵူၼ်း မိူင်းဢွၼ်ၵၼ်ယိပ်းၵွင်ႈ ႁိုင်မႃး ဢမ်ႇလႆႈလွင်ႈ၊ ဝၢၼ်ႈသူၼ်လႆႈတႅၵ်ႇလႅဝ် ၵူၼ်းမိူင်းပဵၼ်ၼမ်ႉႁူၼမ်ႉတႃ ဢွၵ်ႇ ပၢႆႈၵေႃႉႁူးၵေႃႉတၢင်း၊ မီးၶဝ်ၼႂ်းၼႃး ဢမ်ႇလႆႈၵိၼ် မီးၶူဝ်းလဵင်းဢုၵ်ႉၸႃႇဝူဝ်းၵႂၢႆး ဢမ်ႇၸၢင်ႈဢဝ်ၵႂႃႇ လႆႈ သုမ်းတင်းၸိူဝ်ႉတင်းၸၢတ်ႈ။


ယူႇတီႈၵၢၼ်သိုၵ်းသေ ၵဝ်လမ်းမႂ်း မႂ်းလမ်းၵဝ် ဢွၼ်သွၵ်ႈတဝ်ႁႃၵိၼ်ၵူႈႁူးၵူႈတၢင်း ႁၼ်ဝူဝ်းႁႅမ် ဝူဝ်း ႁၼ်ၵႆႇ မူတီႉ ဢဝ်ၵႆႇမူ၊ ဢမ်ႇမီးၶဝ်ႈယွၼ်းၵူၼ်းဝၢၼ်ႈၵူၼ်းမိူင်း ဢမ်ႇမီးၵူၼ်းေတႃႉၶူဝ်းလဵင်း တဵၵ်း ၸႂ်ႉၵူၼ်းႁၢပ်ႇ မီးယိင်းဢဝ်ယိင်း မီးၸၢႆးဢဝ်ၸၢႆး ၸႂ်ႉၵၼ်မိူၼ်ဝူဝ်းၵၢႆး ၸိူဝ်းၼႆႉမီးမႃးတင်းၼမ်၊ ၵိၼ် ၶဝ်ႈၵူၼ်းဝၢၼ်ႈ ပေႃႉထုပ်ႉၵူၼ်းဝၢၼ်ႈ ၾႆးၽဝ် ႁိူၼ်းၵူၼ်းဝၢၼ်ႈသေ ႁဵတ်းႁႂ်ႈၶဝ်ပေႃးလႆႈ ပဵၼ်ၼမ်ႉတႃ တူၵ်းတင်းဝၼ်းၵေႃႈမီး။


ဝၢႆးသေပၢၼ်ၼၼ်ႉယဝ်ႉ ထိုင်မႃးထႅင်ႈပၢၼ်ၼိုင်ႈ ဢၼ်ပဵၼ်ယူႇယၢမ်းလဵဝ်၊ ၽူႈယႂ်ႇၵူၼ်းလူင် ၸတ်းပၢင်လူင်းလၢႆးမိုဝ်း ၸၼ်ႉၸႄႈမိူင်း ၸၼ်ႉၸိုင်ႈမိူင်း ပဵၼ်လၢႆၸၼ်ႉ ဢွၼ်ၸတ်းႁဵတ်း တႃႈၶီႈလဵၵ်း တူၼ်ႈတီး ၼေႇပျီႇတေႃႇ၊ ထၢင်ႇ ယဝ်ႉဢမ်ႇယဝ်ႉ ဢွၼ်ၵၼ်ႁဵတ်းပၢင်ၵုမ်ပၢင်လူင် ႁူဝ်ပၢၵ်ႇသၢဝ်းဢဵတ်း ထႅင်ႈလူးၵွၼ်ႇ၊ ႁူမ်ႈဝႃႈ ႁဵတ်းပၢင်ၵုမ် လူင်းလၢႆး မိုဝ်းၵေႃႇသၢင်ႈလွင်ႈၵတ်းယဵၼ်သေတႃႉ ပီႈၼွင်ႉဝၢၼ်ႈ ၼွၵ်ႈၼၼ်ႉ ဢမ်ႇႁၼ်လွင်ႈၵတ်းယဵၼ်သင်၊ မၢင်ပွၵ်ႈယိုင်ႈၶႅၼ်း တုၵ်ႉၶ ယၢပ်ႇယၢၵ်ႈၶၢၼ်ၸႂ်လိူဝ်ၵဝ်ႇ ၵေႃႈမီးၼႆယဝ်ႉ။


တီႈတႄႉလွင်ႈၵတ်းယဵၼ်ဢၼ်ဝႃႈၼၼ်ႉ တေဢမ်ႇလႆႈမီးလွင်ႈသုၵ်ႉယုင်ႈဢူၼ်ၵဝ်း လွင်ႈတဵၵ်း တဵင်ပေႉၵိၼ်ၵၼ် လွင်ႈတိုၵ်းတေႃးၵၼ် ၸိူဝ်းၼႆႉ။


ၵရုၼႃႇ လၢၼ်ႉမိူင်း