ၵူၼ်းၼုမ်ႇ ၼႂ်းဢိူင်ႇၼမ်ႉပွင်ႈ  တင်းၸုမ်းတူင်ႉၼိုင်တူင်ႇဝူင်းတႆး ႁူမ်ႈၵိုၵ်းပီႈၼွင်ႉ ၵူၼ်းမိူင်း ႁူမ်ႈၵၼ်ၽုၵ်ႈ တူၼ်ႈမွၵ်ႇၵွၼ် 200 တူၼ်ႈပၢႆ ၼႂ်းဝၢင်းဝိႁၢရ်ၼမ်ႉပွင်ႈ ၸႄႈဝဵင်းလႃႈသဵဝ်ႈ။


ဝၼ်းတီႈ 2/8/2017 ယၢမ်းၵၢင်ၼႂ် ၸုမ်းၸဵင်ၼုမ်ႇ ဝဵင်းလႃႈသဵဝ်ႈ ဢဝ်မွၵ်ႇၵွၼ် 210 တူၼ်ႈမွပ်ႈပၼ် ၵူၼ်းၼုမ်ႇတႆး ၼႂ်းဢိူင်ႇၼႂ်းၼမ်ႉပွင်ႈသေ ႁူမ်ႈၵၼ်ၽုၵ်ႈမွၵ်ႇၵွၼ် တီႈဝတ်ႉဝိႁၢရ်ဝုၺ်ႇလုဝုၼ် ၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ မီးၵူၼ်းၶဝ်ႈႁူမ်ႈၽုၵ်ႈတူၼ်ႈမွၵ်ႇၵွၼ် တင်းၼမ်လၢႆ။

ၸၢႆးၶမ်းဢွၼ်ႇ ၵူၼ်းၼုမ်ႇၼမ်ႉပွင်ႈ လၢတ်ႈဝႃႈ “ မိူဝ်ႈဝႃး ၸုမ်းႁဝ်းၶႃႈ လႆႈႁၢင်ႈႁႅၼ်းၶုတ်း လုၵ်းၶုမ်မၼ်းဝႆႉသေ သႂ်ႇၾုၼ်မၼ်း။ မႄႈ ၸိူဝ်ႉမွၵ်ႇၵွၼ် ဢၼ်တေၽုၵ်ႇတီႈၼႂ်းဝၢင်းဝတ်ႉၼႆႉ ပဵၼ်မႄႈၸိူဝ်ႉ မွၵ်ႉၵွၼ်မိူင်းတႆး (မၢၵ်ႇမူၼ်ႇထိူၼ်ႇ) ႁႂ်ႈပဵၼ် မိၵ်ႈမၢႆ/ၶိူဝ်းတႆးမိူင်းတႆး” ဝႃႈၼႆ။


မိူဝ်ႈပူၼ်ႉမႃး ဝၼ်းတီႈ 16/07/2017 ၸုမ်းၵေႃႁူမ်ႈသၢင်ႈၵူၼ်းၼုမ်ႇတႆး TYN ဢွၼ်ႁူဝ်ၼမ်းၼႃႈ ၵူၼ်းၼုမ်ႇတႆး ဢဵၼ်ႁႅင်း 300 ပၢႆသေ ႁူမ်ႈၵၼ်ၽုၵ်ႈတူၼ်ႈမွၵ်ႇၵွၼ် 1500 တူၼ်ႈ တီႈ ပၢင်ႇလူင်မူၼ်း၊ ဝတ်ႉဝိႁၢရ်မူၺ်ႇတေႃႇ၊ ၼႂ်း ဝၢင်းႁူင်းႁဵၼ်းတႆးလႄႈ ဝၢင်းႁူင်းယႃ ထုင်ႉမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။