ၸဝ်ႈၼႃႈတီႈပလိၵ်ႈ၊ ၾၢႆႇၸွႆႈထႅမ်ႁႅင်းၵၢၼ် ဢွၼ်ၵၼ်ၶဝ်ႈၸွႆႈထႅမ် ဢွၼ်ႇယိင်းမိူင်းမၢၼ်ႈၵေႃႉ ၼိုင်ႈ ဢၼ်ထုၵ်ႇပေႃႈလဵင်ႉ(ၼၢႆးၸၢင်ႈ)ၵၼ်ႉၸၼ် ထူပ်းႁၼ်ပႃး ၵူၼ်းႁဵတ်းၵၢၼ်ၽိတ်းမၢႆမီႈၸမ် သိပ်း။


ဝၼ်းတီႈ 11/05/2017 သိုဝ်ႇၶၢဝ်ႇထႆး Manager.co.th ပိုၼ်ၽၢဝ်ႇဝႃႈ - “ၸဝ်ႈၼႃႈတီႈပလိၵ်ႈ၊ ၸဝ်ႈၼႃႈတီႈၾၢႆႇႁႅင်းၵၢၼ်ႁူမ်ႈၵၼ်ဢဵၼ်ႁႅင်းမွၵ်ႈ 30 ၵေႃႉ ၵႂႃႇၵူတ်ႇထတ်းတီႈႁူင်းၵၢၼ် ၽႆႊၿုၼ်ႊ ၽႄႊၶျၼ်ႊယိၼ်ႊ ဢိူင်ႇသၢမ်ၶႂၢႆးၽိူၵ်ႇ (သၢမ်ၵႂၢႆးၽိူၵ်ႇ) ၸႄႈဝဵင်းမိူင်း ၸႄႈတွၼ်ႈၼၶွၼ်ႊပထူမ်ႊ ၸိုင်ႈထႆး။

Photo MGR Online

တီႈႁူင်းၵၢၼ်ၼႆႉ မီးၵူၼ်းႁဵတ်းၵၢၼ် ဢၼ်လုၵ်ႉမိူင်းႁူမ်ႈတုမ်မၢၼ်ႈ  မႃးႁဵတ်းၵၢၼ်မီးယူႇ 15ၵေႃႉ ဢၼ်မီးဝတ်း မႅၼ်ႈၸွမ်းၼင်ႇမၢႆမီႈမီး6 ၵေႃႉ ဢမ်ႇမီးဝႂ်ႁဵတ်းၵၢၼ် 9 ၵေႃႉ ။ ၼႂ်းၼၼ်ႉမီး ၼၢင်းယိင်းဢႃယု17 ၵေႃႉၺႃးၵၼ်ႉၸၼ်။


ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 07/05/2017 ၼၼ်ႉ ၵေႃႉပဵၼ်ပေႃႈလဵင်ႉ ၸၢႆးၽႆႊၿုၼ်ႊ ဢႃယု37 ပီ ႁွင်ႉဢဝ်လုၵ်ႈလဵင်ႉ (ၼၢင်းယိင်း) မၼ်းၸၢႆးဢႃယု17 ပီၵူၼ်းမိူင်းႁူမ်ႈတုမ်မၢၼ်ႈ ၵႂႃႇ ၸွႆႈၵၢၼ် တီႈႁူင်းၵၢၼ် ဢၼ်မီးတီႈၸႄႈတွၼ်ႈ ၵၢၼ်ႊၸၼပူႊရီႊ၊ ၽွင်းၼၼ်ႉဢဝ်တိုဝ်ႉတၢင်း ပႃးၵႂႃႇ တီႈႁူင်းႁႅမ်းသေၵၼ်ႉၸၼ် ယဝ်ႉၵေႃႈဢဝ်မၼ်းၼၢင်းၵႂႃႇ ဝႆႉတီႈ ႁူင်းၵၢၼ် ၵၢၼ်ႊၸၼ ၿူႊရီႊ၊ မၼ်းၼၢင်းၵေႃႈ ၶတ်းၸႂ်ၵပ်းသိုပ်ႇႁႃ ပီႈၼွင်ႉမႃးၸွႆႈ။


ၸၢႆးဢွင်ႇ ၵေႃႉပဵၼ်ပီႈၶူၺ်မၼ်းၼၢင်းလၢတ်ႈဝႃႈ - “ ၶႃႈႁဝ်းလႆႈၵႂႃႇၸွႆႈၼွင်ႉယိင်းႁဝ်းမႃး၊ ၽိူဝ်ႇပေႃႈ လဵင်ႉႁူႉဝႃႈ ႁဝ်းၵႂႃႇၸွႆႈမႃးၼႆ ဢဝ်ငိုၼ်းမႃးပၼ် 10,000 သေ ႁႂ်ႈလိူင်ႈမၼ်းယဝ်ႉၵႂႃႇ၊ ႁႂ်ႈမၼ်းၼၢင်း ပွၵ်ႈမိူဝ်းၵႂႃႇမိူင်းမၢၼ်ႈ ။ ၾၢႆႇႁဝ်းၶႃႈၵိူဝ်းၵုမ် (တိူင်ႇပၢင်ႇ)ၵၼ်သေ ယွၼ်းၵႃႈသၢႆႈတႅၼ်းပဵၼ် 100,00 0 ဝၢတ်ႇ၊ မၼ်းၸၢႆး ၵေႃႈတေၸၢႆႇပၼ် ၵမ်းလႂ် 50,000 ဝၢတ်ႇ။ ၵူၺ်းၵႃႈလွၵ်ႇငိုတ်ႈႁဝ်းမႃး ယူႇတႃႇ သေႇလႄႈ ၸင်ႇလႆႈဢွၼ်ၵၼ်ၵႂႃႇ တၢင်ႇယွၼ်း တၢင်းၸွႆႈထႅမ်တီႈ ႁွင်ႈၵၢၼ်ၾၢႆႇၸွႆႈထႅမ်ႁႅင်းၵၢၼ် ၼႆႉၶႃႈယဝ်ႉ” ဝႃႈၼႆ။


ၼၢင်းသႅင်မိူင်းလီ ၽူႈၼမ်းၼႂ်းသမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ယၢမ်ႈလၢတ်ႈဝႃႈ – “ၼၢင်းယိင်းၼႂ်း မိူင်းတႆးၵူႈၵေႃႉ ပေႃးတေဢွၵ်ႇႁဵတ်းၵၢၼ်ၼွၵ်ႈမိူင်းၸိုင် တီႈဢေႇမၼ်းၼႆႉ ႁႂ်ႈယဝ်ႉ ၸၼ်ႉ 10 ဢမ်ႇၼၼ်ၵေႃႈ ဢႃယု 18 ပီၶိုၼ်ႈၼိူဝ်။ ပေႃးမီးတၢင်းႁူႉ၊ ပေႉတူဝ်လီလီယဝ်ႉ ၸင်ႇဢွၵ်ႇ ႁႃႁဵတ်း ၵၢၼ်ၼွၵ်ႈမိူင်း၊ ပေႃးႁဝ်းမီးတၢင်းႁူႉတဵမ်တူဝ် ဢႃယုႁဝ်းၵေႃႈယႂ်ႇယဝ်ႉၼႆတႄႉ ႁဝ်းၵေႃႈ ၸၢင်ႈႁဵတ်းၵၢၼ်လႆႈ ထုၵ်ႇမႅၼ်ႈၸွမ်းၼင်ႇမၢႆမီႈ၊ ပိူၼ်ႈၵေႃႈဢမ်ႇၸၢင်ႈမႃးၵဝ်းလႅၼ်ႁဝ်း” ဝႃႈၼႆ ။


တၢင်းၾၢႆႇၸဝ်ႈၼႃႈတီႈ တီႉၺွပ်းၵူၼ်းဢမ်ႇမီးဝတ်းဝႂ်တဵမ်ထူၼ်ႈၼၼ်ႉ ပၼ်တူတ်ႈတၢမ်ႇ ၸွမ်းၼင်ႇ မၢႆမီႈလႄႈ လွင်ႈဢၼ်ၸၢႆးၽႆႊၿုၼ်ႊ ၵၼ်ႉၸၼ်လုၵ်ႈလဵင်ႉမၼ်းၶိုၼ်းၼၼ်ႉၵေႃႈ တေထတ်းထၢမ် လၢႆးႁူဝ်ယွႆႈမၼ်းသေ ပၼ်တူတ်ႈတၢမ်ႇၸွမ်းၼင်ႇမၢႆမီႈမီးၼၼ်ႉထႅင်ႈ-  ဝႃႈၼႆ။