ၵေႃလိၵ်ႈလၢႆးလႄႈၾိင်ႈငႄႈတႆး တူင်ႇဝဵင်းလႃႈသဵဝ်ႈ ဢွၼ်ႁူဝ်ၼမ်းၼႃႈ ပိုတ်ႇပၢင်ၾိုၵ်းၽွၼ်ႉ ပၼ်မေႃသွၼ် လိၵ်ႈတႆး၊ ပိူဝ်ႈတႃႇႁႂ်ႈမေႃသွၼ်လိၵ်ႈလၢႆးတႆး မီးလွင်ႈတၢင်းႁူ့ႁၼ် ယႂ်ႇၵႂၢင်ႈ၊ ၽိူမ်ႉထႅမ်ၼမ်ႉၵတ်မေႃသွၼ်လႄႈ လၢႆးပူင်သွၼ် ႁႂ်ႈတိူဝ်းတွၼ်းမႃး။


ပၢင်သွၼ်ႁိုဝ် ပၢင်ၾိုၵ်းၽွၼ်ႉၼႆႉ တႄႇမိူဝ်ႈဝၼ်းတီႈ 12 လိူၼ်မေႊ၊ ၵေႃလိၵ်ႈလၢႆးလႄႈၾိင်ႈငႄႈတႆး တူင်ႇဝဵင်းလႃႈသဵဝ်ႈ ၊ ၸုမ်းၵဝ်ႉငဝ်ႈပူၵ်းပွင်ပၢႆးပၺ်ၺႃလႄႈ မုၼ်းလႅင်းဝၢၼ်ႈဢိူင်ႇၸိုင်ႈတႆး ၊ ၶမ်းၵူႇ ဢွင်ႈႁဵၼ်းတႃႇၵႅမ်တူဝ်ၶိုၼ်ႈယႂ်ႇ ႁူမ်ႈႁွမ်းၵၼ်သေ ဢွၼ်ႁူဝ်ၸတ်းႁဵတ်း ပိုတ်ႇပၢင်သွၼ်။ ပၢင်သွၼ်ပွၵ်ႈၵမ်းၼႆႉ ပဵၼ်ပွၵ်ႈၵမ်း 5 ၊ ၸတ်းႁဵတ်းတီႈႁူင်းႁေႃ ၵေႃလိၵ်ႈလၢႆး လႄႈၾိင်ႈငႄႈတႆး တူင်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ မီးၽူႈၶိုၼ်ႈႁွတ်ႈၶဝ်ႈႁူမ်ႈတင်းမူတ်း 123 ၵေႃ့။

ယိူင်းဢၢၼ်းပၢင်သွၼ်ၼၼ်ႉ- 1.ႁႂ်ႈမေႃၸႅၵ်ႇၽႄႁူ့ႁၼ်ၸွမ်းၶေႃႈလၢတ်ႈ ၸွမ်းၼင်ႇၼႂ်းလိၵ်ႈလၢႆးလႄႈ ၶေႃႈၵႂၢမ်းဢၼ်မီးၼႂ်းၸိူဝ်ႉၶိူဝ်း၊ ႁႂ်ႈမေႃၸႂ့်တိုဝ်းထွႆႈၵႂၢမ်းတႅတ်ႈၼႅတ်ႈလီငၢမ်း။ 2.ႁႂ်ႈမေႃလူဢၢၼ်ႇ ႁူ့တီႈပွင်ႇ ပပ်ႉလိၵ်ႈၽိုၼ်လၢႆး ဢၼ်ဢဝ်လိၵ်ႈၸိူဝ်ႉၶိူဝ်းတႅမ်ႈဝႆ့ၸိူဝ်းၼၼ်ႉသေ ႁႂ်ႈမေႃသူင်မိုတ်ႈ မူၼ်ႈၸွမ်းလိၵ်ႈလၢႆးၵႂႃႇ။ 3. ဢဝ်ၵႂၢမ်းၸၢဝ်းၶိူဝ်းၸဝ်ႈၵဝ်ႇသေ ႁႂ်ႈမေႃႁၵ်ႉ မေႃပႂ်ႉပႃး/ထိင်းသိမ်းလိၵ်ႈလၢႆး ၊ ၾိင်ႈငႄႈ ၊ ၾိင်ႈထုင်းႁိတ်ႈႁွႆး ၸိူဝ်ႉၶိူဝ်းၵႂႃႇ။ 4. ၼင်ႇႁိုဝ်ပွၵ်ႉ ယွမ်ႇ ၊ ဢိူင်ႇ၊ ဝၢၼ်ႈ ၊ ၵေႃလိၵ်ႈလၢႆးလႄႈၾိင်ႈငႄႈတႆး ပေႃးတေၸမ်ၸႂ်မိုတ်ႈၵိုဝ်း ၶဝ်ႈဢွၵ်ႇၵၼ်ၵႂႃႇမိူဝ်းၼႃႈသေဢမ်ႇၵႃး မေႃသွၼ်ဝၢၼ်ႈၼိုင်ႈလႄႈဝၢၼ်ႈၼိုင်ႈၵေႃႈ ႁႂ်ႈႁူ့ၸၵ်းမိုတ်ႈၵိုဝ်းၵၼ်ၵႂႃႇၶၢဝ်းယၢဝ်း။


ပၢင်ၾိုၵ်းၽွၼ်ႉၼႆႉ ၶူးပူင်သွၼ်ပၼ်ပဵၼ် ၸုမ်းၵဝ်ႉငဝ်ႈပူၵ်းပွင်ပၢႆးပၺ်ၺႃလႄႈမုၼ်းလႅင်းဝၢၼ်ႈဢိူင်ႇ ၸိုင်ႈတႆး ၊ ဢိၵ်ႇပႃး ၸၢႆးသႅင်မိူင်း (ၶမ်းၵူႇ ဢွင်ႈႁဵၼ်းတႃႇၵႅမ်တူဝ်ၶိုၼ်ႈယႂ်ႇ ဝဵင်းလႃႈသဵဝ်ႈ ) လႄႈမေႃသွၼ်လၢႆလၢႆၵေႃ့ ၸွႆႈဢဝ်ပုၼ်ႈၽွၼ်းသေပူင်သွၼ်ပၼ်ၵႂႃႇ-ၼႆယဝ်ႉ။


ၼႂ်းပၢင်ၾိုၵ်းၽွၼ်ႉ ပိူဝ်ႈတႃႇပဵၼ်မေႃသွၼ် ပွၵ်ႈၵမ်းတီႈ 5 ဝဵင်းလႃႈသဵဝ်ႈၼႆႉ ပူင်သွၼ်ပၼ်လွင်ႈ ပၢႆးၸႂ်လုၵ်ႈႁဵၼ်း ၊ ပၢႆးတမ်းဝၢင်းပၢႆးပၺ်ၺႃ၊ လၢႆးၸတ်းၽႄၵၢၼ်သွၼ် ၊ ၼမ်ႉၵတ်ႉမေႃသွၼ် ၊ ၵၢၼ်ႁဵၼ်းမေႃသွၼ် ၊ ၼမ်ႉၵတ်ႉၽူႈၸတ်းပွင် ၊ လၢႆးပွင်ၼမ်ႉၵတ်ႉတူဝ်ၸဝ်ႈၵဝ်ႇ ၊ လၢႆးၸတ်းႁဵတ်းပဵၼ် ၽူႈၼမ်းပၢင် ၸဵမ်ၸိူဝ်းၼႆ့။


မေႃသွၼ်ဢၼ်မႃးလဵပ်ႈႁဵၼ်းၾိုၵ်းၽွၼ်ႉ ၵမ်ႈၼမ်ပဵၼ်ၵူၼ်းၼုမ်ႇၼႂ်း တူင်ႇဝဵင်းလႃႈသဵဝ်ႈ ၊ တူင်ႇဝဵင်းၼမ်ႉတူႈ ဢိၵ်ႇပႃး ထုင်ႉမိူင်းယေႃ လႄႈထုင်ႉၼမ်ႉပွင်ႈၸိူဝ်းၼႆ့။ ၶၢဝ်းတၢင်းပၢင်ၾိုၵ်းၽွၼ်ႉ ၸတ်းတင်ႈတႄႇဝၼ်းတီႈ 12/05/2017 တေႃႇထိုင် 27/05/2017 ႁိုင် သိပ်းႁူၵ်းဝၼ်း -ၼႆယဝ်ႉ။


ပၢင်သွၼ်ပဵၼ်မေႃသွၼ်ၼႆ့ ပိုတ်ႇတႃႇၵူၼ်းၼုမ်ႇ ၸိူဝ်းၶဝ်ႈၸႂ်ၾၢႆႇလိၵ်ႈလၢႆး၊ ၸိူဝ်းယိူင်းဢၢၼ်း ၶႂ်ႈႁဵတ်းမေႃသွၼ် လိၵ်ႈတႆးၵူႈၵေႃ့သေဢမ်ႇၵႃး ၵူၼ်းၼုမ်ႇၸိူဝ်းဢၼ်မီးၸႂ်ၶႂ်ႈပူင်သွၼ်ပၼ် လုၵ်ႈဢွၼ်ႇတႆး၊ ၸိူဝ်းတၢင်းႁူ့ပႆႇၼမ် တၢင်းႁၼ်ပႆႇၵႂၢင်ႈ ၊ ၸိူဝ်းထုၵ်ႇလီႁဵၼ်းဢဝ်လိၵ်ႈ ၸိူဝ်ႉၶိူဝ်းတူဝ်ၵဝ်ႇၼႆလႄႈ ၸင်ႇလႆႈၾိုၵ်းသွၼ်ပၼ် ႁႂ်ႈလၢႆးပူင်သွၼ်မိူၼ်ၵၼ်ၵႂႃႇ - ၼႆယဝ်ႉ။