ပီႈၼွင်ႉၵူၼ်းဝၢၼ်ႈဢိူင်ႇၼွင်ၵေႃႈ ၸႄႈဝဵင်းလၢႆးၶႃႈ ႁူမ်ႈၵၼ်တုၵ်းယွၼ်း ထိုင်တီႈၽူႈတႅၼ်းသၽႃး ပႃႇတီႇႁူဝ်သိူဝ်  SNLD ႁႂ်ႈၸွႆႈႁဵတ်းပၼ် ဝႂ်ၵပ်းတူဝ်တင်း  မုင်ႉႁေႃႁိူၼ်း ႁႂ်ႈၾၢႆႇၸဝ်ႈ ၼႃႈ တီႈၶဝ် လူင်းႁဵတ်းပၼ် ၸွမ်းဢိူင်ႇဝၢၼ်ႈ ဝႃႈၼႆ။

ဝၼ်းတီႈ 11/05/2017 ယၢမ်းၵၢင်ၼႂ် ထိုင် ဝၢႆးဝၼ်း ၽူႈတႅၼ်းသၽႃးပႃႇတီႇႁူဝ်သိူဝ် SNLD ဝဵင်းလၢႆးၶႃႈ၊ မိူၼ်ၼင်ႇ ၽူႈတႅၼ်းသၽႃးၵူၼ်းမိူင်း၊ ၽူႈတႅၼ်းသၽႃးၸိူဝ်ႉၸၢတ်ႈ၊ ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 1 လႄႈ မၢႆ 2 ႁူမ်ႈလူၺ်ႈ ၽူႈပွင်ၵၢၼ်ၸုမ်းပႃႇတီႇႁူဝ်သိူဝ် လူင်းႁူပ်ႉထူပ်း တွင်ႈထၢမ်သဵင် ၵၢင်ၸႂ် ၵူၼ်းမိူင်း တီႈဝတ်ႉၵၢင်းဢုၼ် ဢိူင်ႇၼွင်ၵေႃႈ ၸႄႈဝဵင်း လၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။ ယူႇတီႈၵူၼ်းမိူင်းတုၵ်းယွၼ်းထိုင်တီႈၽူႈတႅၼ်း ၵဵဝ်ႇၵပ်းလွင်ႈဝႂ်ၵပ်းတူဝ်၊ မုင်ႉႁေႃႁိူၼ်းလႄႈ လွင်ႈမုၼ်းလႅင်းၶိုၼ်ႈယႂ်ႇ ၸဵမ်ၸိူဝ်းၼႆႉ။


ၼႂ်းၸႄႈဝဵင်းလၢႆးၶႃႈ ႁူဝ်ၵူၼ်းမီးႁႃႈမိုၼ်ႇပၢႆ ၵူၼ်းဢမ်ႇမီးဝႂ်ၵပ်းတူဝ်ဢမ်ႇယွမ်းမိုၼ်ႇပၢႆ ၸၢႆးၵေႃႇၶမ်း ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းလၢႆးၶႃႈ လၢတ်ႈၼင်ႇၼႆ။


“ ယူႇတီႈၽူႈတႅၼ်း ပႃႇတီႇႁူဝ်သိူဝ်ႁဝ်း ၸႄႈဝဵင်းလၢႆးၶႃႈ လႆႈလူင်းပိုၼ်ႉတီႈသေ တွင်ႈထၢမ် သဵင်ၵၢင် ၸႂ် ၵူၼ်းမိူင်း၊ ၵမ်ႈၼမ်တႄႉ ဢၼ်ၵူၼ်းမိူင်းႁဝ်း လူဝ်ႉတၢင်းၸွႆႈထႅမ် ပဵၼ်လွင်ႈဝႂ်ၵပ်းတူဝ်၊ မုင်ႉႁေႃ ႁိူၼ်းၼၼ်ႉယဝ်ႉ၊ လွင်ႈၼႆႉ မၼ်းယၢပ်ႇၽိုတ်ႇၸိူင်ႉႁိုဝ်ၼႆ မိူဝ်ႈဢွၼ်တၢင်း ၵူၼ်းဝၢၼ်ႈ ၼႂ်းဢိူင်ႇႁဝ်း မၢင်ၵေႃႉ ဢမ်ႇလူဝ်ႇၵႂႃႇလႂ်ၼႆ ဢမ်ႇႁဵတ်းၵၼ်၊ မၢင်ၵေႃႉသမ်ႉ သိမ်းဝႆႉ(ၵဵပ်းဝႆႉ) ၼဵပ်း ၸွမ်းၸႆး ၶႃးသေႁၢႆၵေႃႈမီး၊ မၢင်ၵေႃႉသမ်ႉ ဝႆႉၸွမ်းၶိုဝ်ႇၸွမ်းၵွၼ်ႁိူၼ်းသေ ႁၢႆၵေႃႈမီး၊ မၢင်ၵေႃႉသမ်ႉ ဝႆႉၸွမ်း တႂ်ႈၶဵင်ႇသေ ႁၢႆၵႂႃႇၵေႃႈမီး။ ယွၼ်ႉၼၼ် ၵူၼ်းမိူင်းႁဝ်း ၸိူဝ်းဢၼ်ဝႂ် ႁၢႆၵႂႃႇၼၼ်ႉလႄႈသင်၊ ၸိူဝ်းဢမ်ႇပႆႇမီးၼၼ်ႉလႄႈသင် ၶႂ်ႈဢွၼ်ၵၼ်ႁဵတ်းၶိုၼ်း ၸဵမ်ၸိူဝ်းၼႆႉ။


ၼွၵ်ႈလိူဝ်ၼၼ်ႉ သင်ဝႃႈၵႂႃႇႁဵတ်းတီႈၼႂ်းၶူးၼႂ်းဝဵင်းၸိုင် ပေႃးၺႃးၸဝ်ႈၼႃႈတီႈ ဢၼ်ၵိၼ် ငိုၼ်းၼႆ သမ်ႉတေ လႆႈသဵင်ႈငိုၼ်းၼမ်ၵေႃႈပိုင်ႈၼိုင်ႈ၊ လွင်ႈၵႂႃႇမႃး ယၢပ်ႇၽိုတ်ႇပိုင်ႈၼိုင်ႈ။ ယွၼ်ႉၼၼ် ၵူၼ်း ဝၢၼ်ႈႁဝ်းၶႃႈတႄႉ တုၵ်းယွၼ်းႁႂ်ႈၾၢႆႇၸဝ်ႈၼႃႈတီႈၶဝ် လူင်းမႃးၸွမ်းဢိူင်ႇသေ ႁဵတ်းပၼ် ဝႂ်ၵပ်းတူဝ် လႄႈ မုင်ႉႁေႃႁိူၼ်း၊ သင်ဝႃႈ ၸဝ်ႈၼႃႈတီႈၶဝ်လူင်းမႃး ႁဵတ်းပၼ်ၼႂ်း ဢိူင်ႇၵမ်း သိုဝ်ႈၼႆ တေမီး လွင်ႈၽဵင်ႇပဵင်းၵၼ်မူတ်း” ဝႃႈၼႆ။


ၵဵဝ်ႇၵပ်းဢၼ်ၵူၼ်းမိူင်းတုၵ်းယွၼ်းတီႈၽူႈတႅၼ်းသၽႃး ၸႄႈဝဵင်းလၢႆးၶႃႈသမ်ႉ လွင်ႈၵၢၼ် ပူၵ်း ပွင်မုၼ်းလႅင်းၶိုၼ်ႈယႂ်ႇ သဵၼ်ႈတႃႈသၢႆတၢင်း၊ လွင်ႈၾႆး၊ လွင်ႈၼမ်ႉ ၸဵမ်ၸိူဝ်းၼႆႉ ဝႃႈၼႆ။


ယူႇတီႈၽူႈတႅၼ်းသၽႃးၸႄႈဝဵင်းလၢႆးၶႃႈ ဢၼ်လႆႈလူင်းပိုၼ်ႉတီႈသေ ႁူပ်ႉထူပ်းၵူၼ်းမိူင်း ၸႄႈ ဝဵင်းလၢႆးၶႃႈ တီႈဢိူင်ႇၼွင်ၵေႃႈၼႆႉ တင်းမူတ်းပေႃႈမႄႈပီႈၼွင်ႉၵူၼ်းဝၢၼ်ႈ ဢွၼ်ၵၼ်မႃးၶဝ်ႈႁူမ်ႈ တၢင်ႇလၢတ်ႈ လွင်ႈယၢပ်ႇၽိုတ်ႇဢၼ်ၵူၼ်းမိူင်းလႆႈႁူပ်ႉထူပ်း ၸဵမ်ၸိူဝ်းၼႆႉ ဝႃႈၼႆ။


ၽူႈတႅၼ်းသၽႃးၸႄႈဝဵင်းလၢႆးၶႃႈ တွင်ႈထၢမ်သဵင်ၵၢင်ၸႂ်ၵူၼ်းမိူင်း  မီးၽႅၼ်ၵၢၼ်လူင်းႁူပ်ႉထူပ်း တွင်ႈထၢမ်သဵင်ၵၢင်ၸႂ်ၵူၼ်းမိူင်း တႃႇ5 ဢိူင်ႇ မိူၼ်ၼင်ႇ ဢိူင်ႇပၢင်သၢင်း၊ ဢိူင်ႇၼမ်ႉလိူဝ်ႇ၊ ဢိူင်ႇ တၢတ်ႇမွၵ်ႇ၊ ဢိူင်ႇဝၢၼ်ႈႁႅင်ႈလႄႈ ဢိူင်ႇၼွင်ၵေႃႈ ၸဵမ် ၸိူဝ်းၼႆႉ။