ၸဝ်ႈၼႃႈတီႈၾၢႆႇၽွင်းငမ်းၸႄႈဝဵင်းမူႇၸေႊ ၸီႉသင်ႇႁႂ်ႈၵူၼ်းမိူင်း ၵိုတ်းၵၢၼ်ၶုတ်းသၢႆး ၼႂ်းမႄႈ ၼမ်ႉမၢဝ်းလႄႈ ၵူၼ်းမိူင်းပွၵ်ႉတေႃႇယွတ်ႈ ဢၼ်ႁဵတ်းၵၢၼ်ၶုတ်းသၢႆး ႁႃၵိၼ်လဵင်ႉတွင်ႉၼၼ်ႉ ႁူပ်ႉ တၢင်းယၢပ်ႇၽိုတ်ႇ။

Photo: Tong Hwe Li

ၸွမ်းၼင်ႇလူင်ပွင်ၸို်င်ႈၶႄႇ ႁူပ်ႉထူပ်းလူင်ပွင်ၸိုင်ႈမၢၼ်ႈ ၼႂ်းႁူဝ်ပီ 2017 ၼႆႉသေ တုၵ်းယွၼ်းႁႂ်ႈ ၸီႉသင်ႇၵိုတ်းၵၢၼ်ၶုတ်းသၢႆး ၼႂ်းၼမ်ႉမၢဝ်းၼႆလႄႈ မိူဝ်ႈဝၼ်းတီႈ 19/05/2017 ၼၼ်ႉ လူင်ပွင် ၸိုင်ႈမၢၼ်ႈ ၾၢႆႇၽွင်းငမ်းၸႄႈဝဵင်း ဢွၵ်ႇလိၵ်ႈၸီႉသင်ႇၵူၼ်းမိူင်းမူႇၸေႊ ႁႂ်ႈၵိုတ်း ၵၢၼ်ၶုတ်းသၢႆး။


လူင်ပွင်ၸိုင်ႈမၢၼ်ႈၾၢႆႇၽွင်းငမ်းၸႄႈဝဵင်း ၼႄၶေႃႈဢၢင်ႈဝႃႈ တႃႇၵႅတ်ႇၶႄႁႄႉၵင်ႈမႄႈၼမ်ႉ လႅၼ် လိၼ်မိူင်းမၢၼ်ႈ - မိူင်းၶႄႇ ယႃႇႁႂ်ႈမႄႈၼမ်ႉမၢဝ်းပိူင်ႈသၢႆၼမ်ႉလႆလူင်းၼႆသေ ဝၼ်းတီႈ 27/05/ 2017 ၼႆႉႁႂ်ႈဝႆႉပဵၼ်ဝၼ်းလိုၼ်းသုတ်း ႁႂ်ႈၵဵပ်းၶူဝ်းၶွင်ၶိူင်ႈၸၢၵ်ႈတင်းသဵင်ႈဢွၵ်ႇ- ဝႃႈၼႆ။


ၸၢႆးဢွင်ႇ ၵူၼ်းမူႇၸေႊလၢတ်ႈဝႃႈ - “ၵူၼ်းမိူင်း ပွၵ်ႉတေႃႇယွတ်ႈဢၼ်မီးလင်ႁိူၼ်း 100 ပၢႆၼႆႉ ၵမ်ႈၼမ်ၶုတ်းသၢႆးႁႃၵိၼ်လဵင်ႉတွင်ႉလႄႈ ပေႃးလႆႈၵိုတ်းၵၢၼ်ၶုတ်းသၢႆးၸိုင် တေမီးလွင်ႈ ယၢပ်ႇ ၽိုတ်ႇတႃႇၼႃႈႁိူၼ်း လွင်ႈႁႃၵိၼ်လဵင်ႉတွင်ႉ ပႃးၸဵမ်တႃႇပၢႆးပၺ်ၺႃလုၵ်ႈဢွၼ်ႇၸိူဝ်းၼႆႉ ၵမ်ႈၼမ် ဢဝ်သၢႆးၼႂ်းၼမ်ႉၶိုၼ်ႈမႃး တႃႇၵေႃႇသၢင်ႈၼႂ်းဢိူင်ႇ ၼႂ်းဝၢၼ်ႈၶိုၼ်းၵူၺ်းလႄႈ ၸိူဝ်းတိုၵ်ႉႁဵတ်းၵၢၼ် ၵေႃႇသၢင်ႈၵေႃႈတေယၢပ်ႇၽိုတ်ႇ၊ ယၢမ်းလဵဝ်ၵေႃႈၵေႃႇသၢင်ႈႁူင်းႁေႃ ၵေႃလိၵ်ႈလၢႆးၵေႃႈယင်းပႆႇ ယဝ်ႉတူဝ်ႈ- ဝႃႈၼႆ။


ၵူၼ်းမိူင်းပွၵ်ႉတေႃႇယွတ်ႈမူႇၸေႊၼႆႉ မိူဝ်ႈပီ 2012 ၼၼ်ႉ ၽႅၼ်ၵၢၼ်ပူၵ်းပွင်ဝဵင်းၼႆသေ လူင်ပွင် ၸိုင်ႈ တဵၵ်းသိုဝ်ႉတီႈလိၼ်သူၼ်၊ ၼႃး၊ တႃႈႁိူဝ်း လူၺ်ႈၵႃႈၶၼ်ထုၵ်ႇ။ ယၢမ်းလဵဝ်ဢမ်ႇမီးတီႈလိၼ် ၽုၵ်ႇသွမ်ႈယဝ်ႉလႄႈ ၸင်ႇလႆႈၶုတ်းသၢႆး ၼႂ်းၼမ်ႉမၢဝ်း ႁဵတ်းပဵၼ်ၵၢၼ် ႁႃၵိၼ်လဵင်ႉတွင်ႉ မီးမႃး3 ပီယဝ်ႉ။