ဝဵင်းမူႇၸေႊယုၵ်းယၵ်းလိူင်ႇ ၵူၼ်းမိူင်းလၢတ်ႈဝႃႈ ၶွမ်ႊပၼီႊၵဵပ်းယုၵ်းယၵ်း ဢွင်ႇၵရုၼႃႇ ဢမ်ႇႁဵတ်း ၸွမ်း ၼင်ႇၵႂၢမ်းလၢတ်ႈ ဢၼ်လႆႈၸႂ်ၵၼ်ဝႆႉသေ တွၵ်ႉတႅၵ်ႉၵၼ်တင်းၵူၼ်းမိူင်း။

Photo: Tong Hwe Li

ဝၼ်းတီႈ 27/05/2017 ၶၢဝ်းယၢမ်းၵၢင်ၶမ်ႈမွၵ်ႈ 8 မူင်းပၢႆ ၵူၼ်းၵဵပ်းယုၵ်းယၵ်း ၶွမ်ႊပၼီႊဢွင်ႇၵရု ၼႃႇ မႃးၵဵပ်းယုၵ်းယၵ်း ၼႂ်းၵႄႈပွၵ်ႉၵၢတ်ႇလႄႈပွၵ်ႉၶရိတ်ႉယၼ်ႇ ၼိူဝ်သဵၼ်ႈတၢင်းၵႂႃႇႁူင်းႁဵၼ်း ၸၼ်ႉသုင်မၢႆ 1။ ၵိုတ်းပႂ်ႉၵဵပ်းယုၵ်းယၵ်းဝႆႉမီးမွၵ်ႈ 15 မိၼိတ်ႉ။


ၽွင်းၼၼ်ႉ ၽူႈၵွၼ်းပွၵ်ႉၶရိတ်ႉယၼ်ႇ ၵႂႃႇလၢတ်ႈႁႂ်ႈၵႂႃႇၵဵပ်းပၼ်တီႈ ၼႃႈၵျွင်းၽြႃးၶရိတ်ႉယၼ်ႇ ၼၼ်ႉဢိတ်းၼိုင်ႈ။ ယွၼ်ႉမီးယုၵ်းယၵ်းၼမ်ၼႃႇယဝ်ႉ။ ၵူၼ်းမိူင်းၵေႃႈပႂ်ႉထွၵ်ႇယုၵ်းယၵ်းယူႇ။ ပေႃးပႆႇၵႂႃႇၼႆၵေႃႈ ႁႂ်ႈယွမ်းပၼ်သဵင်ၵႂၢမ်းဢၼ်ပိုတ်ႇလင်ဝႆႉဢိတ်းၼိုင်ႈ- ဝႃႈၼႆ။


ၵူၺ်းၵႃႈ ၵူၼ်းၵဵပ်းယုၵ်းယၵ်းသမ်ႉၶိုၼ်းလၢတ်ႈဝႃႈ ႁႂ်ႈၵႂႃႇတၢင်ႇလၢတ်ႈတီႈလုမ်းၶွမ်ႊပၼီႊ။ ဢမ်ႇၸၢင်ႈၵႂႃႇလႆႈၼႆသေ လႆႈမီးပၼ်ႁႃၵၼ်။ ႁူဝ်ၼႃႈၾၢႆႇလိူမ်ႈလႆႇ၊  ၽူႈမီးပုၼ်ႈၽွၼ်းတီႈၶွမ်ႊ ပၼီႊ ဢွင်ႇၵရုၼႃႇၸိူဝ်းၼႆႉ လႆႈမႃးၵႄႈလိတ်ႈပၼ်။ ၵူၼ်းႁေႃႈလူတ်ႉလႄႈ ၵူၼ်းၵဵပ်းယုၵ်း ယၵ်းတႄႉ လႅၼ်ႈပၢႆႈၵႂႃႇ။ လႆႈႁွင်ႉၵူၼ်းမႂ်ႇမႃးတႅၼ်းၶဝ်သေ သိုပ်ႇၵဵပ်းယုၵ်းယၵ်းၵႂႃႇ- ဝႃႈၼႆ။


ၾၢႆႇၶွမ်ႊပၼီႊ လၢတ်ႈဝႃႈ - “လွင်ႈဢၼ်ၵူၼ်းၵဵပ်းယုၵ်းယၵ်းႁဵတ်းၸိူင်ႉၼႆၼႆႉ တေဢဝ်တၢင်းၽိတ်း ၶဝ် ၸိူင်ႉႁိုဝ်ဢၼ်ဝႃႈၼၼ်ႉ ႁဝ်းၶႃႈတေဢုပ်ႇ ၵၼ်တီႈလုမ်းႁဝ်းၶႃႈ”။


ၸၢႆးမိၼ်ႉ ၵူၼ်းၼုမ်ႇမူႇၸေႊ လၢတ်ႈဝႃႈ - “ ၶွမ်ႊပၼီႊၼႆႉမိူဝ်ႈဢွၼ်တၢင်းလၢတ်ႈဝႃႈ တေၵဵပ်းယုၵ်း ယၵ်း1 ဝၼ်းလႂ် 2ပွၵ်ႈ။ ၸွမ်းပွၵ်ႉၸွမ်းဝၢၼ်ႈ ဢၼ်ၵႃးၶဝ်ႈဢမ်ႇလႆႈၼၼ်ၵေႃႉ တေဢဝ်ရူတ်ႉသၢမ် လေႃႉၶဝ်ႈၵႂႃႇၵဵပ်း။ တေလၢင်ႉႁွင်ႈၼမ်ႉၼႂ်းဝဵင်း 1 လိူၼ်လႂ်2ပွၵ်ႈ။ ၵူၺ်းၵႃႈၶဝ်ဢမ်ႇႁဵတ်းလႆႈ။ တေၸႂ်ႉၵႃးၵဵပ်းယုၵ်းယၵ်း ဢၼ်ၶိုတ်းၵၢပ်ႈ 30 လမ်းပၢႆသေၵဵပ်းဝႃႈၼႆသေတႃႉ မိူဝ်ႈလဵဝ်မီး 7 လမ်း ၵူၺ်း။  ႁဵတ်းလွင်ႈမူတ်းသႂ်ၼႆၵေႃႈ ဢမ်ႇတဵမ်ထူၼ်ႈ။ ၵႃႈၵဵပ်းယုၵ်းယၵ်းၵေႃႈ တူၺ်းလင်ႁိူၼ်း လဵၵ်ႉယႂ်ႇသေၵဵပ်း။ ယွၼ်ႉၼၼ်ၵူၼ်းမိူင်း မူႇၸေႊ ဢမ်ႇႁၢၼ်ႉၸႂ် ဢမ်ႇလႆႈၸႂ် ” ဝႃႈၼႆ။


မိူဝ်ႈလိူၼ်ၵျုၼ်ႊ 2015 ၼၼ်ႉ ၶွမ်ႊပၼီႊလၢႆလၢႆဢၼ် ၶႅင်ႇၵၼ်မဝ်သိုဝ်ႉ (တိၼ်ႇတႃႇ) ၵၢၼ်ၵဵပ်း ယုၵ်းယၵ်း။ ၶွမ်ႊပၼီႊဢွင်ႇၵရုၼႃႇ လႆႈမၢႆတီႈ 3 သေတႃႉ လႆႈႁပ်ႉမဝ်ဢဝ် ၵၢၼ်ၵဵပ်း ယုၵ်းယၵ်း ဝဵင်းမူႇၸေႊ။