ၸုမ်းပႃႇတီႇႁူဝ်သိူဝ် ႁူမ်ႈလူၺ်ႈသင်ၶၸဝ်ႈ ဢွၼ်ႁူဝ်ၼမ်းၼႃႈ ၵူၼ်းဝၢၼ်ႈၵူၼ်းမိူင်း မိူင်းၼၢႆး၊ ႁူမ်ႈၵၼ်ၽုၵ်ႇတူၼ်ႈမႆႉ ႁိမ်းႁွမ်းၼမ်ႉႁူးၸၢၵ်ႈတေႃႇ 200 တူၼ်ႈ ပိူဝ်ႈတႃႇထိူၼ်ႇၸမ်ႉၼမ်ႉၸိုမ်း ႁၵ်ႉသႃသိင်ႇဝႅတ်ႉလွမ်ႉ သၽႃႇဝၾိင်ႈတိုၼ်းပဵၼ်။


မိူဝ်ႈဝၼ်းတီႈ 17/05/2017 တင်ႈတႄႇပွတ်းၼႂ်မွၵ်ႈ 10 မူင်းတေႃႇထိုင်ဝၢႆးဝၼ်း ၵေႃႉပဵၼ် ၽွင်းတႅၼ်း ပႃႇတီႇႁူဝ်သိူဝ် (SNLD) ၸၢႆးမွၼ်းလိူၼ်၊ ႁူမ်ႈသင်ၶၸဝ်ႈ ဢွၼ်ႁူဝ်ၼမ်းၼႃႈ ပီႈၼွင်ႉၵူၼ်းၼႂ်းပိုၼ်ႉတီႈ ၸႄႈဝဵင်းမိူင်းၼၢႆး ဢဵၼ်ႁႅင်းၵူၼ်းမွၵ်ႈ 40 ၵေႃႉ၊ ၽုၵ်ႇတူၼ်ႈမႆႉ တီႈပွတ်းၼမ်ႉႁူးၸၢၵ်ႈတေႃႇ ၼႂ်းဢိူင်ႇၼႃးၶၢၼ် ၼႂ်းၸႄႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ၸႄႈတွၼ်ႈလၢင်းၶိူဝ်း။ ဢၼ်ၽုၵ်ႇပွၵ်ႈၼႆႉ ပဵၼ်တူၼ်ႈမၢၵ်ႇၵႅင်းၸဵမ်း ၵမ်ႈၼမ်၊ ၽုၵ်ႇတင်းမူတ်းမွၵ်ႈ 200 တူၼ်ႈ။ လိူဝ်သေၼၼ်ႉ ပဵၼ်မႆႉၼိူဝ်ႉၵႅၼ်ႇ၊ တူၼ်ႈမႆႉၶဝ်ႈတၢင်းတိုဝ်းၾၢႆႇယႃႈယႃ ၸိူဝ်းၼႆႉ-ၼႆယဝ်ႉ။

ၽူႈတူင်ႉၼိုင်ၾၢႆႇသၽႃႇဝၾိင်ႈတိုၼ်းပဵၼ်၊ ပႃးၸဵမ်လွင်ႈတီႈလိၼ်တိူၵ်ႇႁႆႈလွၵ်းၼႃး ၸႄႈဝဵင်းမိူင်းၼၢႆး ၸၢႆးမွင်ႇၵျီး လၢတ်ႈဝႃႈ- "ၽုၵ်ႇတီႈၼမ်ႉႁူးၸၢၵ်ႈတေႃႇ၊ မီးၾၢႆႇႁွင်ႇမိူင်းၼၢႆး မွၵ်ႈ 8 လၵ်း။ တီႈၼၼ်ႈပဵၼ်ၼမ်ႉႁူး၊ မိူဝ်ႈလဵဝ် ၵူၼ်းမိူင်းႁဵတ်းႁႆႈႁဵတ်းသူၼ် ၽုၵ်ႇၶဝ်ႈတိၵ်းတိၵ်းသေ ႁိမ်းႁွမ်းၼၼ်ႉ ပႃႇထိူၼ်ႇႁဝ်းမူၺ်ႉၵွႆမူတ်း။ ပႃႇထိူၼ်ႇၼႆႉ ၵိုတ်းတီႈႁိမ်းၸၢၵ်ႈတေႃႇၼၼ်ႉ မၢင်မၢင်ၵူၺ်းယဝ်ႉ။ ၵွပ်ႈရႃႇသီႇဢုတုလႅၵ်ႈလၢႆႈမႃးသေ မၼ်းမႆႈမႃးတိၵ်းတိၵ်းလႄႈ ၽူႈယႂ်ႇၵူၼ်းလူင်ၶဝ်ဢုပ်ႇဢူဝ်းၵိူဝ်းၵုမ်ၵၼ်သေ လႆႈပဵၼ်ၽုၵ်ႇတူၼ်ႈမႆႉမႃး"-ဝႃႈၼႆ။


တီႈၼမ်ႉႁူးၸၢၵ်ႈတေႃႇၼႆႉ ပူၼ်ႉမႃးမိူဝ်ႈ ဝၼ်းလိူၼ်ႁူၵ်းမူၼ်းၼၼ်ႉ ပီႈၼွင်ႉၵူၼ်းမိူင်းၼၢႆး လႆႈၵႂႃႇၸတ်း ႁဵတ်း ပၢင်ပွႆးယွၼ်းၼမ်ႉယွၼ်းၾူၼ်။ မိူဝ်ႈၼၼ်ႉၵေႃႈ လႆႈၽုၵ်ႇတူၼ်ႈမႆႉ မိူၼ်ၼင်ႇတူၼ်ႈပႅၵ်ႇ တူၼ်ႈမွၵ်ႇ ၸိူဝ်းၼႆႉတင်းမူတ်းမွၵ်ႈ 200-300 တူၼ်ႈၼင်ႇၵဝ်ႇ။ ၼမ်ႉႁူးၸၢၵ်ႈတေႃႇ ဢွင်ႈတီႈဢၼ်ၽုၵ်ႇတူၼ်ႈမႆႉပွၵ်ႈၼႆႉ မီးၼႂ်းၵႄႈၵၢင် ဝၢၼ်ႈပၢင်ႇဢူႈ-ဝၢၼ်ႈဝေး ၼႂ်းဢိူင်ႇၼႃးၶၢၼ်၊ ပဵၼ်တီႈၵိုၵ်းပိုၼ်းမိူင်းၼၢႆး။


"ပေႃးထိုင်မႃးၼႂ်းလိူၼ်ၵျူႊလၢႆႊ-ဢေႃႊၵတ်ႊသ် တၢင်းၼႃႈၼႆႉ တၢင်းၸဝ်ႈၼႃႈတီႈၾၢႆႇပႃႇမႆႉမိူင်းၼၢႆး တေဢွၼ်ႁူဝ်ၽုၵ်ႇတူၼ်ႈမႆႉ ၸွမ်းဝူဝ်ႇႁူၺ်ႈႁၢဝ်းလွႆ ၾၢႆႇၼိူဝ်ႁူဝ်ၼမ်ႉ ၼမ်ႉႁူးၸၢၵ်ႈတေႃႇၼႆႉထႅင်ႈ တၢင်းယၢဝ်းမွၵ်ႈ 1 ၵီႊလူဝ်ႊ၊ ပိူဝ်ႈတႃႇမီးႁႅင်းလုတ်ႇဝႆႉ ႁႄႉၵင်ႈၼမ်ႉႁူၺ်ႈၼမ်ႉလွႆ။ ပႃႈၼိူဝ်ၸၢၵ်ႈတေႃႇၼႆႉ တေၶုတ်းႁွင်ႈၽုၵ်ႇတူၼ်ႈမၢၵ်ႇမူင်ႈမၢၵ်ႇလၢင်း တူၼ်ႈဢၼ်ၸဵဝ်းယႂ်ႇၸဵဝ်းသုင် ၸဵဝ်းလႆႈႁူမ်ႈမၼ်း။ သမ်ႉထႅင်ႈ လုၵ်ႉတီႈႁိမ်းတၢင်းၵႃး ၶဝ်ႈၵႂႃႇၸူးၸၢၵ်ႈတေႃႇၼၼ်ႉၵေႃႈ မီးမွၵ်ႈ 2 လၵ်း၊ ယူႇတီႈႁဝ်းၶႃႈလႆႈၽုၵ်ႇတူၼ်ႈမႆႉသေ မၼ်းဢမ်ႇၸပ်းၼၼ်ႉၵေႃႈ တေၶိုၼ်းၽုၵ်ႇသွမ်ႈတႅၼ်းၵႂႃႇထႅင်ႈ"- ၸၢႆးမွင်ႇၵျီး လၢတ်ႈ။


မိူဝ်ႈပီၵၢႆ 2016 ၼၼ်ႉ ႁူဝ်ႁိုဝ်ႉႁူဝ်ၾူၼ်ၶၢဝ်းၼႆႉၼင်ႇၵဝ်ႇ ပေႃႈမႄႈၵူၼ်းမိူင်း မိူင်းၼၢႆး တင်းလုမ်းၾၢႆႇပႃႇမႆႉၶဝ် လႆႈႁဵတ်းပွႆးၽုၵ်ႇတူၼ်ႈမႆႉတႃႇသွင်ႁဵင် (2,000) တူၼ်ႈ၊ ၵူၺ်းၵႃႈ လူႉတၢႆၵမ်ႈၼမ်သေ ၸပ်းၵမ်ႈၽွင်ႈၵူၺ်း၊ ပီၼႆႉၸင်ႇလႆႈၶိုၼ်းသိုပ်ႇၽုၵ်ႇထႅင်ႈ။ ဢၼ်ၽုၵ်ႇပီၵၢႆၼၼ်ႉ ပႃးၸဵမ်တူၼ်ႈမွၵ်ႇၵွၼ်ၸိူဝ်းၼႆႉ-ၼႆယဝ်ႉ။


ယိူင်းဢၢၼ်း ဢၼ်လႆႈၽုၵ်ႇတူၼ်ႈမႆႉၸိူဝ်းၼႆႉ ပိူဝ်ႈတႃႇႁႂ်ႈထိူၼ်ႇႁဝ်းၶႃႈၸမ်ႉ ၼမ်ႉႁဝ်းၶႃႈၸိုမ်းၶိုၼ်း။ တီႈပွတ်းၼမ်ႉႁူးၸၢၵ်ႈတေႃႇၼႆႉ ၵွပ်ႈဝႃႈမီးၵၢၼ်ႁဵတ်းႁႆႈႁဵတ်းသူၼ်ၼမ်၊ တႅပ်းတူၼ်ႈမႆႉၼမ်လႄႈ ႁဵတ်းႁႂ်ႈၾႃႉၾူၼ်ရႃႇသီႇၵေႃႈလႅၵ်ႈလၢႆႈမႃးၼမ်၊ မၼ်းဢမ်ႇမိူၼ်ၵူႈပွၵ်ႈ။ ၶႂ်ႈႁႂ်ႈသၽႃႇဝၾိင်ႈတိုၼ်းပဵၼ်ႁဝ်းၶႃႈ မိူၼ်ၶိုၼ်းၵဝ်ႇၵဝ်ႇၼႆသေ ႁဝ်းၶႃႈပွင်ပဵၼ်လႆႈၵႃႈႁိုဝ်ၵေႃႈ ႁဝ်းၶိုၼ်းၶွၼ်ႈတုမ်ၵၼ်သေ ၶိုၼ်းလုမ်းလႃး ၶိုၼ်းၽုၵ်ႇသွမ်ႈၶိုၼ်း။ လိူဝ်သေၼၼ်ႉ ပိူဝ်ႈတႃႇမႅတ်ႇပႅင်းဝႆႉ ၶူဝ်းႁႄႈၶူဝ်းတိုၼ်း ၼိူဝ်လိၼ်တႂ်ႈလိၼ်ႁဝ်းၶႃႈ တီႈႁိမ်းႁွမ်းပွတ်းတွၼ်ႈၼမ်ႉႁူးၸၢၵ်ႈတေႃႇၼၼ်ႉ- ၸၢႆးမွင်ႇၵျီး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။