မိူဝ်ႈလိူၼ်မေႊ 12 ဝၼ်းပူၼ်ႉမႃး ၸုမ်းၽူႈၼမ်းၼႂ်း ၵေႃႁူမ်ႈသၢင်ႈလွင်ႈငမ်းယဵၼ်မိူင်းႁူမ်ႈတုမ် (UPDJC) ၶဝ် ဢုပ်ႇဢူဝ်းတူၵ်းလူင်းၵၼ်ဝႃႈ ပေႃးထိုင်ဝၼ်းပၢင်ၵုမ် လွင်ႈငမ်းယဵၼ်မိူင်းႁူမ်ႈတုမ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်၊ ပွၵ်ႈၵမ်းထူၼ်ႈ 2 ၼၼ်ႉမႃးၼႆ တေပွႆႇႁႂ်ႈဢုပ်ႇၵုမ်ၵၼ် လွင်ႈဝႃႈၸႄႈမိူင်းၸၢဝ်းၶိူဝ်းၶဝ် ထုၵ်ႇမီးသုၼ်ႇ ၶဵၼ်ႇတႅမ်ႈပၵ်းပိူင်လၵ်းမိူင်း (ပိူင်ငဝ်ႈပိုင်းမိူင်း) ပိူဝ်ႈတႃႇၽႂ်မၼ်း။

ပၢင်ၵုမ် UPDJC ဢၼ်ၸတ်းမိူဝ်ႈလိူၼ်မေႊ 12 ဝၼ်း

တိုၵ်ႉဝႃႈတေပွႆႇႁႂ်ႈဢုပ်ႇၵုမ်ၵၼ်ၵူၺ်း ႁူဝ်ၼႃႈၸၢဝ်းၶိူဝ်းၵမ်ႈၽွင်ႈ ပေႃးဢွၼ်ၵၼ်ႁူမ်ၸူမ်း ယွင်ႈလၢတ်ႈဝႃႈ- ဢၼ်ၼႆႉပဵၼ်သုၼ်ႇလၢပ်ႈလီလူင် ဢၼ်ဢမ်ႇတွၼ်ႉမီးမႃး၊ ယဝ်ႉၵေႃႈ ၽူႈၶၢၼ်ပၢၵ်ႇၶွင် ႁွင်ႈၵၢၼ်ၶုၼ်
ၾၢႆႇၽွင်းလူင် လုမ်းၸွမ်ၸိုင်ႈၵေႃႈ ယင်းလၢတ်ႈဝႃႈ ၼႂ်းၶၢဝ်းတၢင်း 50-60 ပီ၊ သုၼ်ႇလႆႈၸိူင်ႉၼင်ႇၼႆၼႆႉ
ၽႂ်ပႆႇတွၼ်ႉပၼ်တီႈၸၢဝ်းၶိူဝ်းၶဝ်မႃး၊ ၵွပ်ႈပိူဝ်ႈၼႆလႄႈ ပဵၼ်လွင်ႈၶိုၼ်ႈယႂ်ႇၶိုပ်ႈၼႃႈ ၼႂ်းလၢႆးၵၢၼ် NCA ဢၼ်ၶဝ်ၶိုင်ပွင်ယူႇ ဝႃႈၼႆ။


တီႈၼႆႈႁဝ်းၶႃႈၶိုၼ်းမႃးထတ်းသၢင်တူၺ်း၊ ပေႃးတူၺ်းပိူင်ပဵၼ်တႄႉမီးတႄႉမၼ်း ပိုၼ်းဢၼ်ယၢမ်ႈပဵၼ်မႃးတႄႉ ၼၼ်ႉၸိုင် သုၼ်ႇၶဵၼ်ႇတႅမ်ႈပၵ်းပိူင်လၵ်းမိူင်း တႃႇၸႄႈမိူင်းၽႂ်မၼ်းဢၼ်ဝႃႈၼႆႉ တိုၼ်းပႃးမီးမႃးၼႂ်း ၶေႃႈလႆႈၸႂ်ပၢင်လူင် မိူဝ်ႈပီ 1947 ၼၼ်ႉၵမ်းသိုဝ်ႈ။ ၸႄႈမိူင်းတေႃႇၸႄႈမိူင်းဝႆႉႁူဝ်မႃႇပဵင်းၵၼ်သေ
သိုပ်ႇၶွၼ်ႈၵၼ်ယဝ်ႉ ၸင်ႇၵေႃႇတင်ႈမႃးလႆႈမိူင်းႁူမ်ႈတုမ်ဢၼ်ဝႃႈၼၼ်ႉ ႁဝ်းၶႃႈႁူႉပွင်ႇၸႂ်ၵၼ်ယူႇၵူႈၵေႃႉ။

ႁိုၼ်း ၵႃယၢင်း

ၵွပ်ႈပိူဝ်ႈဝႃႈႁဝ်းၶႃႈမႃးၽေႃႇၼမ်ႉၼႄတူဝ် ႁႂ်ႈပေႃးပဵၼ်မႃးမိူင်းႁူမ်ႈတုမ်ၼၼ်ႉ ယွၼ်ႉပိူဝ်ႈၾၢႆႇၼိုင်ႈ
တၢင်းၼိုင်ႈ ဢမ်ႇၸွမ်းၵတိၵႂၢမ်းမၼ်ႈ ၸွမ်းၼင်ႇလူင်းလၢႆးမိုဝ်းမႃးၼၼ်ႉလႄႈ ၸင်ႇလႆႈပဵၼ်မႃးမိူင်းဢၼ်
ၸိုင်ႈလဵဝ် ၶိူဝ်းလဵဝ်ပဵၼ်ယႂ်ႇ၊ ၵွပ်ႈပိူဝ်ႈမၼ်းပိူင်ႈႁွႆႈတင်းလၢႆးၵၢၼ် Union ဢၼ်ႁွင်ႉဝႃႈမိူင်းႁူမ်ႈတုမ်ၼၼ်ႉလႄႈ ယူႇတီႈမိူင်းၸၢဝ်းၶိူဝ်း ၸိူဝ်းဢၼ်ၵႂႃႇႁူမ်ႈၸွမ်းပီႈၼွင်ႉမၢၼ်ႈ မိူၼ်ၸိူင်ႉၼင်ႇပီႈၼွင်ႉတႆး ယၢင်းလႅင် ဢိၵ်ႇလူၺ်ႈပီႈၼွင်ႉၶျၢင်းၸိူဝ်းၼႆႉ ၶဝ်ၸဝ်ႈၸင်ႇလူႉသုမ်းမႃးသုၼ်ႇလႆႈဢၼ်ဝႃႈ မီးသုၼ်ႇၶဵၼ်ႇတႅမ်ႈပၵ်းပိူင်လၵ်းမိူင်း ႁင်းၽႂ်မၼ်းၼၼ်ႉ။


ၸဵမ်မိူဝ်ႈပီ 1947 ၸွမ်းၼင်ႇၵတိၵႂၢမ်းမၼ်ႈသေ ပေႃးဝႃႈႁဵတ်းမႃးသိုဝ်ႈသိုဝ်ႈၸိုင် ႁဝ်းၶႃႈတိုၵ်ႉမီးဝႆႉ ပၵ်းပိူင်လၵ်းမိူင်းၽႂ်မၼ်း၊ လၢႆးၵၢၼ်ဢုပ်ႉပိူင်ႇၽွင်းငမ်းၽႂ်မၼ်း ၵဵဝ်ႇလူၺ်ႈလၢႆးတတ်းသိၼ်တွၼ်ႇၾိင်ႈ ႁင်းၽႂ်မၼ်း၊ ပွင်ႇဝႃႈတိုၼ်းတေလႆႈမီး လူင်ပွင်ၸိုင်ႈမိူင်းတႆးမႃးႁင်းၵူၺ်းၶေႃၶေႃ ဢၼ်ၸုၵ်းမၼ်ႈလႆႈ ၼိူဝ်ၽႃႇတိၼ်မၼ်း
ႁင်းၵူၺ်း။ မိူဝ်ႈ 1947 တေႃႇထိုင်ပီ 1957-58 ၸိူဝ်းၼၼ်ႉၵေႃႈ လူင်ပွင်ၸိုင်ႈမိူင်းတႆး  ဢၼ်ဝႃႈၼၼ်ႉ ယၢမ်ႈမီးမႃးယူႇၸူဝ်ႈဢွၼ်ႇၵႅပ်ႉၼိုင်ႈ၊ ပဵၵ်ႉသမ်ႉဝႃႈသုၼ်ႇလႆႈၽၢၼ်ႇပွင် သုၼ်ႇလႆႈၽွင်းငမ်းမၼ်း ဢမ်ႇတဵမ်ထူၼ်ႈသေတႃႉၵေႃႈ ၾၢင်ႁၢင်ႈလူင်ပွင်ၸိုင်ႈမိူင်းတႆး ဢၼ်ဝႃႈၼၼ်ႉတႄႉ မၼ်းမီးမႃးယူႇပွတ်းဢွၼ်ႇ တွၼ်ႈၼိုင်ႈ။


ၵွပ်ႈပိူဝ်ႈၸိူင်ႉၼႆလႄႈ သုၼ်ႇလႆႈဢၼ်ဝႃႈ တႃႇတေၶဵၼ်ႇတႅမ်ႈပၵ်းပိူင်လၵ်းမိူင်း ပိူဝ်ႈတႃႇၸႄႈမိူင်းၽႂ်မၼ်း ဢၼ်ဝႃႈၼၼ်ႉ ဢမ်ႇၸႂ်ႈသုၼ်ႇလၢတ်ႈလူင်ဢၼ်မႂ်ႇမႂ်ႇ တိုၵ်ႉပဵၼ်မႃးမိူဝ်ႈလဵဝ်၊ တိုၼ်းမီးမႃးယူႇၸဵမ်ပိုင်းလႄႈ
ႁဝ်းၶႃႈတေလႆႈပွင်ႇၸႂ်ဝႆႉၸိူင်ႉၼၼ်ၼႆ ႁဝ်းၶႃႈထတ်းႁၼ်ၼင်ႇၼႆ။


ၵမ်းၼႆႉတီႈဢၼ်ဝႃႈ တေလႆႈမီးသုၼ်ႇၶဵၼ်ႇတႅမ်ႈပၵ်းပိူင်လၵ်းမိူင်းၽႂ်မၼ်း ဢၼ်ဝႃႈၼၼ်ႉသမ်ႉ မၼ်းပဵၼ်ဢီႈသင်။ ၾၢႆႇတၢင်းမၢၼ်ႈဝႃႈ (ကိုယ်ပိုင်ပြဌာန်းခွင့်)၊ တႃႇတေပဵၼ်မႃး (ကိုယ်ပိုင်ပြဌာန်းခွင့် တန်းတူညီခွင့်) ဢၼ်ဝႃႈသုၼ်ႇလႆႈၽဵင်ႇပဵင်းၵၼ်ၸိူဝ်းၼႆႉ ၸွမ်းၼင်ႇပၢင်ၵုမ် UPDJC လိူၼ်မေႊ 12 ဝၼ်းၼၼ်ႉၸိုင် ႁဝ်းလႆႈႁူႉ
ၸွမ်းဝႃႈ ႁႂ်ႈပေႃးမီး (ကိုယ်ပိုင်ပြဌာန်းခွင့်) သုၼ်ႇၸတ်းသၢင်ႈႁၢင်ႈပွင်ႁင်းၵူၺ်း ၽႂ်မၼ်း၊ ႁႂ်ႈပေႃးမီးသုၼ်ႇ
ၽဵင်ႇပဵင်းၵၼ်တင်း ပီႈၼွင်ႉၸၢဝ်းၶိူဝ်းမၢၼ်ႈ ဢၼ်ဝႃႈၸိူဝ်းၼၼ်ႉ သမ်ႉ လႆႈဢဝ်သုၼ်ႇလႆႈဢၼ်ဝႃႈ ႁဝ်းတိုၼ်းတေဢမ်ႇၽၢတ်ႇဢွၵ်ႇ ၼႂ်းမိူင်းႁူမ်ႈတုမ်ၼႆႉသေပွၵ်ႈ ဢၼ်ဝႃႈၼၼ်ႉလႅၵ်ႈဢဝ်။


ၾၢႆႇတပ်ႉမတေႃႇၼႆႉ တိုၼ်းဢမ်ႇမၼ်ႈၸႂ်ဝႃႈ ၸၢဝ်းၶိူဝ်းၶဝ်တေယူႇၸွမ်းၶဝ်တႃႇသေႇ။ ၼင်ႇႁိုဝ်မိူင်း
ႁူမ်ႈတုမ် တေမၼ်ႈၵႄႇၵႂႃႇမိူဝ်းၼႃႈၼၼ်ႉ ၸၢဝ်းၶိူဝ်းလႂ်ၽႂ်သေဢမ်ႇဝႃႈ တိုၼ်းတေဢမ်ႇၽၢတ်ႇဢွၵ်ႇ
ၼႂ်းမိူင်းႁူမ်ႈတုမ်သေပွၵ်ႈ ဢၼ်ဝႃႈၼၼ်ႉ တေလႆႈပၼ်ၵတိၵႂၢမ်းမၼ်ႈယဝ်ႉ ၸင်ႇတေပွႆႇႁႂ်ႈဢုပ်ႇ လွင်ႈဝႃႈမီးသုၼ်ႇၶဵၼ်ႇတႅမ်ႈပၵ်းပိူင်လၵ်းမိူင်း တႃႇၽႂ်မၼ်းဝႃႈၼႆ။ ဢၼ်ၼႆႉၵေႃႈ မၼ်းပိူင်ႈႁွႆႈတင်းလိၵ်ႈႁူမ်ႈမၢႆပၢင်လူင်၊ ၵႂၢမ်းမၼ်ႈၵႅၼ်ႇပၢင်လူင်။


ၸွမ်းၼင်ႇလိၵ်ႈႁူမ်ႈမၢႆပၢင်လူင် ၵႂၢမ်းမၼ်ႈပၢင်လူင်သေယဝ်ႉ ၼႂ်းပၵ်းပိူင်လၵ်းမိူင်းပီ 1947 ၼၼ်ႉၵေႃႈ တၢ မ်တူဝ်ဢွင်ႇသၢၼ်း လႆႈၸီႉၸမ်ႈသေသႂ်ႇပႃးဝႆႉဝႃႈ မိူင်းယၢင်းလႅင်လႄႈမိူင်းတႆးၼႆႉ ယူႇၸွမ်းမၢၼ်ႈမႃး တဵမ်သိပ်းပီယဝ်ႉ ပေႃးဢမ်ႇႁၢၼ်ႉၸႂ်ပေႃးၸႂ်ၸိုင် တိုၼ်းမီးသုၼ်ႇၽၢတ်ႇဢွၵ်ႇၼႆ တႅမ်ႈၼႄဝႆႉ ၸႅင်ႈၸႅင်ႈလႅင်းလႅင်းယူႇ။ ဢၼ်ၼၼ်ႉ ဢမ်ႇၸႂ်ႈတႃႇၸၢဝ်းၶိူဝ်းၶဝ် ၶႂ်ႈၽၢတ်ႇဢွၵ်ႇယၢမ်းလႂ် ႁႂ်ႈလႆႈၽၢတ်ႇဢွၵ်ႇ၊ ၵူၺ်းပဵၼ်ပိူဝ်ႈတႃႇၵွၼ်းၵိူင်ႈၵၼ် ပိူဝ်ႈတႃႇပိၼ်ႇပႆႇၼပ်ႉယမ်ၵၼ်၊ ၼင်ႇႁိုဝ်မိူင်းႁူမ်ႈတုမ်ၵေႃႇသၢင်ႈလႆႈ လီငၢမ်းတဵမ်တီႈ ႁႂ်ႈပေႃးၽဵင်ႇပဵင်းၵၼ် ၸွမ်းၵၢင်ၸႂ်ၵူႈၸၢဝ်းၶိူဝ်းၼၼ်ႉ ပေႃးဝႃႈယူႇတီႈလူင်ပွင်ၸိုင်ႈမိူင်းႁူမ်ႈတုမ် ႁဵတ်းဢမ်ႇမႅၼ်ႈႁွႆႈ၊ ႁဵတ်းပိူင်ႈတၢင်းၸိုင် ႁဝ်းမီးသုၼ်ႇၽၢတ်ႇဢွၵ်ႇဢိူဝ်ႈၼႃႈ၊ ႁႂ်ႈလႆႈဢဝ်ၶေႃႈၼၼ်ႉ ပဵၼ်ၶေႃႈ
သဵတ်ႈၶေႃႈၸင်ႈၵၼ်ၵူၺ်း၊ မၼ်းဢမ်ႇၸႂ်ႈပိူဝ်ႈတႃႇယႃႉလူႉတႅၵ်ႇယၢႆႈၼႆ ၽႂ်ၵေႃႈႁူႉပွင်ႇယူႇ။


တေႃႈၼင်ႇႁဝ်းၶႃႈမီးဝႆႉသုၼ်ႇၽၢတ်ႇဢွၵ်ႇယူႇ၊ ၵေႃႉဢၼ်ဢွၼ်ႁူဝ်ၵေႃႇတင်ႈမိူင်းႁူမ်ႈတုမ် မိူၼ်ၼင်ႇပီႈၼွင်ႉမၢၼ်ႈၶဝ်ၼႆႉ ပၢၼ်သိုပ်ႇပၢၼ်ၶၢဝ်းတၢင်း 50-60 ပီမိူင်းမႃး ယင်းဢမ်ႇၽေႃႇၼမ်ႉၼႄတူဝ် ႁဵတ်းႁႂ်ႈပဵၼ်မႃးလႆႈမိူင်းႁူမ်ႈတုမ်ၸိုၼ်ႈၸၢင်ႇ။ သင်ၸိူဝ်ႉႁဝ်းၶႃႈသမ်ႉ တေလႆႈဝႆႉဝၢင်းပႅတ်ႈ သုၼ်ႇဢၼ်ဝႃႈ ၽၢတ်ႇဢွၵ်ႇလႆႈယူႇ ဢၼ်ဝႃႈၼၼ်ႉၼႆၸိုင် မိူင်းႁူမ်ႈတုမ်ၼၼ်ႉ ၶေးတေဢမ်ႇၸၢင်ႈပဵၼ်မႃးႁိုဝ် ၼႆၵေႃႈလီလႆႈမႆႈၸႂ်ၸွမ်းယူႇ။


ပေႃးႁဝ်းၶႃႈမႃးထတ်းတူၺ်းလီလီ၊ တီႈဢၼ်ဝႃႈ ပီႈၼွင်ႉတႆးလႄႈပီႈၼွင်ႉယၢင်းလႅင် မီးသုၼ်ႇၽၢတ်ႇဢွၵ်ႇ ယူႇၼၼ်ႉ ဢမ်ႇၸႂ်ႈၽူႈတၢင်တူဝ်တႆး ဢမ်ႇၸႂ်ႈၽူႈတၢင်တူဝ်ယၢင်းလႅင်သေ သမ်ႉၶိုၼ်းဢမ်ႇမီးပုၼ်ႈၽွၼ်း၊ ၽႂ်ဢမ်ႇၸႂ်ႉ၊ ဢမ်ႇၸႂ်ႈၽူႈတၢင်တူဝ်တႃႇၶိူဝ်းလႂ်သေယဝ်ႉ သမ်ႉၶိုၼ်းၵႂႃႇၼွပ်ႈဢၢပ်ႈပၼ်တီႈပီႈၼွင်ႉမၢၼ်ႈ
ၸိူဝ်းပဵၼ်တပ်ႉမတေႃႇၼၼ်ႉ မၼ်းပဵၼ်လွင်ႈၶၢမ်ႈၼႃႈၶၢမ်ႈတႃၵၼ်ၵူၺ်း၊ ႁဝ်းၶႃႈထတ်းႁၼ်ၼင်ႇၼႆ။


သင်ဝႃႈပၢင်ၵုမ်လွင်ႈငမ်းယဵၼ်မိူင်းႁူမ်ႈတုမ် ပၢင်ၵုမ်ႁူဝ်ပၢၵ်ႇပီ 21 ဢၼ်တေႁဵတ်းၵႂႃႇထႅင်ႈမိူဝ်းၼႃႈ
တႄႇဢဝ်လိူၼ်မေႊဝၼ်းတီႈ 24 တေႃႇထိုင် 28 ၼၼ်ႉ သင်ၸိူဝ်ႉဝႃႈပီႈၼွင်ႉၸၢဝ်းၶိူဝ်းတႆးလႄႈသင်၊
ပီႈၼွင်ႉၸၢဝ်းၶိူဝ်းယၢင်းလႅင်လႄႈသင်၊ တေလႆႈၶၢမ်ႇယွမ်းဝႃႈ သုၼ်ႇလႆႈၽၢတ်ႇဢွၵ်ႇႁဝ်းၼၼ်ႉ ပိုၼ်ႉပႅတ်ႈ
ၵမ်းၼႆႉယဝ်ႉ၊ မွတ်ႇႁၢႆပႅတ်ႈၵမ်းၼႆႉယဝ်ႉၼႆၸိုင် ၾၢင်ႁၢင်ႈမိူင်းႁူမ်ႈတုမ် ဢၼ်ႁဝ်းၶႃႈမုင်ႈမွင်းမႃး
တူၵ်းလူင်းၵၼ်မႃးၼၼ်ႉ ယိင်ႈၶႅၼ်းတေၵႆသေၵႆၵႂႃႇ ႁဝ်းၶႃႈထတ်းႁၼ်ၼင်ႇၼႆ။


ထႅင်ႈလွင်ႈၼိုင်ႈၵေႃႈ သုၼ်ႇၶဵၼ်ႇတႅမ်ႈပၵ်းပိူင်လၵ်းမိူင်း ပိူဝ်ႈတႃႇၸႄႈမိူင်းၽႂ်မၼ်း ဢၼ်ဝႃႈၼၼ်ႉ ဢမ်ႇၸႂ်ႈတႃႇ ၸႄႈမိူင်းၵူၺ်း၊ တိူင်းၵေႃႈသမ်ႉတေပႃးၼႆလႄႈ ယူႇတီႈလူင်ပွင်ၸိုင်ႈလႄႈသင်၊ ယူႇတီႈတပ်ႉမတေႃႇလႄႈသင် ဢမ်ႇၶတ်းၸႂ်မူၼ်ႉမႄး ပိူဝ်ႈတႃႇပိၼ်ႇပႅင်လႅၵ်ႈလၢႆႈပၵ်းပိူင်လၵ်းမိူင်း မိူင်းႁူမ်ႈတုမ် ဢၼ်ပဵၼ်ငဝ်ႈငႃႇမၼ်းၼၼ်ႉ သေယဝ်ႉ သမ်ႉတေပွႆႇႁႂ်ႈၸုမ်းၸၢဝ်းၶိူဝ်း ၶဵၼ်ႇတႅမ်ႈပၵ်းပိူင်လၵ်းမိူင်းၵႂႃႇဢၼ်ဝႃႈၼၼ်ႉ တေလႆႈယူႇတႂ်ႈလႂ်သေတႅမ်ႈ၊ တေလႆႈၶဵၼ်ႇတႅမ်ႈၸွမ်းပိူင်ဢၼ်လႂ်၊ တေလႆႈယူႇတႂ်ႈ 2008 သေတႅမ်ႈၵူၺ်းႁႃႉ ၼႆၵေႃႈ တေလႆႈငမ်းငဝ်း၊ တေလႆႈထဵင်ထွင်ၵၼ်ယူႇ။


ပေႃးၵူၺ်းတေလႆႈယူႇတႂ်ႈပၵ်းပိူင်လၵ်းမိူင်း 2008 သေၶဵၼ်ႇတႅမ်ႈၵႂႃႇၸိုင် ယူႇတီႈပီႈၼွင်ႉမၢၼ်ႈဢဝ်ဝႆႉ 7 တိူင်း၊ ၸၢဝ်းၶိူဝ်းသမ်ႉမီး 7 မိူင်းဢၼ်ဝႃႈၼၼ်ႉ မိူဝ်ႈလႂ်သေဢမ်ႇဝႃႈ လွင်ႈၽဵင်ႇပဵင်းၸွမ်းထမ်းဢၼ်ဝႃႈၼၼ်ႉ တိုၼ်းတေဢမ်ႇမီး။ တေပဵၼ်ၾၢႆႇပီႈၼွင်ႉမၢၼ်ႈပဵၼ်ယႂ်ႇယူႇၵူၺ်းလႄႈ ဢၼ်ႁဵတ်းႁႂ်ႈၸၢဝ်းၶိူဝ်းၼင်ႇၵၼ် ယုင်ႈယၢင်ႈထဵင်ထွင်ၵၼ်၊ ၵႄႈလိတ်ႈၵၼ်ဢမ်ႇယဝ်ႉဢမ်ႇဝၢႆးၼၼ်ႉ မိူဝ်ႈလႂ်ၵေႃႈတေဢမ်ႇႁၼ်တီႈသုတ်းတီႈၵွႆ၊
တေႁဵတ်းႁႂ်ႈလွင်ႈပၼ်ႁႃပဵၼ်ယႂ်ႇၵႂႃႇမိူဝ်းၼႃႈတိၵ်းတိၵ်းၵူၺ်း ဢၼ်ဝႃႈၼၼ်ႉ ႁဝ်းၶႃႈတေဢမ်ႇလႆႈလူင်လိုမ်း၊ ႁဝ်းၶႃႈတေလႆႈၾၢင်ႉဝႆႉယူႇ။


ၸင်ႇဝႃႈ ဢမ်ႇဝႃႈတႆး ဢမ်ႇဝႃႈပီႈၼွင်ႉယၢင်းလႅင် ဢိၵ်ႇလူၺ်ႈပႃးပီႈၼွင်ႉၸၢဝ်းၶိူဝ်းသၼ်လွႆတင်းသဵင်ႈ ႁႂ်ႈလႆႈတူၺ်းႁၼ်လွၼ်ႉမွၼ်းလိၵ်ႈႁူမ်ႈမၢႆပၢင်လူင် ဢၼ်ႁဝ်းၶႃႈလႆႈတူၵ်းလူင်းၵၼ်မႃးၼၼ်ႉ လီငၢမ်းသေယဝ်ႉ
ႁႂ်ႈလႆႈမေႃသၢၼ်ၶတ်း၊ ႁႂ်ႈလႆႈမေႃႁၢပ်ႇၵိုတ်ႉပုၼ်ႈၽွၼ်းၵၼ်ၵႂႃႇၵူႈၸၢဝ်းၶိူဝ်းသေၵမ်းၼႆ ႁဝ်းၶႃႈယွၼ်း
ထတ်းႁၼ်ၼင်ႇၼႆသေ ၶွတ်ႇယွတ်ႈပၢႆၵႂၢမ်းတီႈၼႆႈၶႃႈ။

ႁိုၼ်း ၵႃယၢင်း (18/05/2017)