ပၢင်ၵုမ်လူင် လွင်ႈမႄႈၼမ်ႉ ၸၼ်ႉလုမ်ႈၾႃႉ ၸတ်းႁဵတ်း တီႈမိူင်းၵျေႃႊၵျီႊယႃႊ တူၵ်းလူင်းလႆႈၸႂ် တႃႇတေသၢၼ်မိုဝ်းၵၼ် ၵႅတ်ႇၵင်ႈမႄႈၼမ်ႉ မိူင်းၽႂ်မၼ်း။ တွၼ်ႈတႃႇၼမ်ႉၶူင်းတႄႉ 3 ၸိုင်ႈမိူင်း ထႆး ၊ တႆးလႄႈ ၶႄႇ တေႁူမ်ႈမိုဝ်းၵၼ် ၵႅတ်ႇၵင်ႈၵႂႃႇ။

ပၢင်ဢုပ်ႇဢူဝ်း ၸတ်းႁဵတ်းတီႈ ႁူင်းႁေႃးၾိင်ႈငႄႈၾိင်ႈထုင်း International Art Museum in Tbilisi မိူင်း ထပီႊလီႊသီႊ (Tbilisi city) ၸိုင်ႈမိူင်းၵျေႃႊၵျီႊယႃႊ ( Georgia ) ၼႂ်းပၢင်ၼႆႉ ဢုပ်ႇဢူဝ်းၵၼ် ၵဵဝ်ႇလူၺ်ႈလွင်ႈ ၵၢၼ်ၵေႃႇသၢင်ႈ ၾၢႆၼိူဝ်မႄႈၼမ်ႉ၊  တႃႇတေႁူမ်ႈမိုဝ်း ၸွႆႈၵၼ် ၵႅတ်ႇၵင်ႈ ၵၢၼ်သၢင်ႈၾၢႆၼိူဝ်မႄႈၼမ်ႉ ၸိူဝ်းၼႆႉ ။ တွၼ်ႈတႃႇ ၾၢႆဢၼ်တီႈသၢင်ႈၼႂ်းမိူင်းတႆးတႄႉ ယူႇတီႈၸုမ်းတူင်ႉၼိုင်လွင်ႈမႄႈၼမ်ႉ မိူင်းတႆး၊ ထႆးလႄႈၶႄႇ တေႁူမ်ႈၵၼ်သေ ႁႃလၢႆးတၢင်းၵႅတ်ႇ ၵင်ႈၵႂႃႇ - ဝႃႈၼႆ။

ၸၢႆးၶိူဝ်းသႅင် ၸုမ်းတူင်ႉၼိုင်လွင်ႈမႄႈၼမ်ႉ မိူင်းတႆး လၢတ်ႈဝႃႈ - “ ပေႃးမႃးတူၺ်းမိူဝ်ႈလဵဝ် ငဝ်းလၢႆး ၵၢၼ်သၢင်ႈၾၢႆၼႆႉ လႅပ်ႈတေၸၢင်ႈတႄႇၶိုၼ်း၊  လႆႈငိၼ်းဝႃႈ လူင်ပွင်ၸိုင်ႈၶႄႇ ႁွင်ႉထူပ်း ၼၢင်းဢွင်ႇ သၢၼ်းသုၵျီႇ ၵႂႃႇတီႈမိူင်းၶႄႇ ၵွပ်ႈၼၼ်လႅပ်ႈတေဢုပ်ႇပႃးလွင်ႈသၢင်ႈၾၢႆၸိူဝ်းၼႆႉ ။ ၾၢႆႇၼိုင်ႈၵေႃႈ ပူၼ်ႉမႃးဢမ်ႇပေႃးႁိုင်ၼႆႉ ၸဝ်ႈငိုၼ်းသႃးၶဝ် မႃးႁဵတ်းပၢင်ၵုမ် တႃႇႁဵတ်းၾၢႆ ၊ တေလႆႈႁၼ်ဝႃႈ ၶဝ်ႁႃတိုဝ်ႉတၢင်း တႃႇတေသၢင်ႈၾၢႆ ၵွပ်ႈၼၼ်လႄႈ ၼင်ႇႁိုဝ် ပိူၼ်ႈတေဢမ်ႇၸၢင်ႈ မႃးသၢင်ႈၾၢႆၼႂ်း မိူင်းႁဝ်းၼၼ်ႉ ယွၼ်းႁႂ်ႈပီႈၼွင်ႉႁဝ်းၶႃႈ ၵူႈတီႈၵူႈမိူင်းၸွႆႈၵၼ်ၵႅတ်ႇၵင်ႈၵႂႃႇသေၵမ်း ”  -  ဝႃႈၼႆ။

ၾၢႆဢၼ်တေသၢင်ႈၼိူဝ်မႄႈၼမ်ႉၶူင်းၼႆႉ တေမီးမိူၼ်ၼင်ႇၾၢႆမိူင်းတူၼ်၊ တၢင်းႁႅင်းၾႆးၾႃႉ တေ ႁဵတ်းဢွၵ်ႇလႆႈ 7,100 မႄႊၵဝတ်ႉ။ ၾၢႆၵုၼ်လူင် တၢင်းႁႅင်း 1,400 မႄႊၵဝတ်ႉ။ ၼွင်ၽႃ 1,200 မႄႊၵဝတ်ႉ။ ၾၢႆမၢၼ်ႈတူင်ႈ 200 မႄႊၵဝတ်ႉ။ လိူဝ်သေၼၼ်ႉ ၾၢႆဢၼ်တေသၢင်ႈၼိူဝ်မႄႈၼမ်ႉ ၶူင်းထႅင်ႈ တီႈၼႂ်းမိူင်းယၢင်းလႅင် တီႈယႂႃႇတိတ်ႉ တၢင်းႁႅင်း 4,000 မႄႊၵဝတ်ႉ။ ၾၢႆႁတ်ႉၵျီး တီႈၼႂ်း မိူင်း ယၢင်းၽိူၵ်ႇ တၢင်းႁႅင်း 1,360 မႄႊၵဝတ်ႉ။ သင်ဝႃႈသၢင်ႈၾၢႆၸိူဝ်းၼႆႉယဝ်ႉ ႁႅင်းၾႆးၾႃႉ ၵမ်ႈၼမ် တေသူင်ႇၶၢႆပၼ်မိူင်းၶႄႇ တင်းမိူင်းထႆး ။