ပီႈၼွင်ႉၵူၼ်းဝၢၼ်ႈၵုင်းယၢင်းပဵင်းသၢႆး ဢိူင်ႇတႃႈတေႈ ဝဵင်းသီႇပေႃႉ ဢွၼ်ၵၼ်ယႃႉၵွၵ်း ႁၼ်ၽႅၼ်ႇ ၶူဝ်းယွၵ်း ၼႂ်းႁုၼ်ႇႁၢင်ႈၽြႃး သႅင်ၶဵဝ် သူႇၼိုင်ႈ လႄႈ ၾၢင်ႉထိုင်ပီႈၼွင်ႉၵူၼ်းမိူင်းတႆး။

ဝၼ်းတီႈ 20/04/2017 ယၢမ်းၵၢင်ၶမ်ႈ 08:30 မူင်း ၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇတႃႈတေႈ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ။ ဢွၼ်ၵၼ်ယႃႉ ၵွၵ်းတူၺ်းတီႈၼင်ႈပလၢင်ႇၽြႃးသႅင်ၶဵဝ် သူႇၼိုင်ႈ ၼႂ်းဝတ်ႉၵုင်းယၢင်း

ပဵင်းသၢႆး ဢၼ်လႆႈမႃးၸွမ်းတူၼ်ႈၶူဝ်းလူႇ ပီၵၢႆၼၼ်ႉလႄႈ လႆႈႁၼ်ၶူဝ်း ၵဝ်ႇၶူဝ်းယွၵ်း ပဵၼ်ဢၼ်လီထၢင်ႇထိူမ်လွင်ႈဢမ်ႇလီ။

ၸၢႆးဝိၼ်းဢွင်ႇ ၵူၼ်းၼႂ်းဢိူင်ႇတႃႈတေႈ လၢတ်ႈဝႃႈ “ လွင်ႈဢၼ်ႁဝ်းၶႃႈ ဢွၼ်ၵၼ်ယႃႉၵွၵ်းတူၺ်း ၼႂ်းၽြႃးၼႆႉ မိူဝ်ႈၵွၼ်ႇႁဝ်းၶႃႈလႆႈႁၼ်ပိူၼ်ႈဢွၼ်ၵၼ်တၢင်ႇၶိုၼ်ႈမႃး ၼႂ်းၾဵတ်ႉပုၵ်ႉလႄႈ ႁဝ်းၶႃႈ 

ၸင်ႇဢွၼ်ၵၼ်မႃးယႃႉၵွၵ်းတူၺ်း။ လႆႈႁၼ်ၽႃႈယွၵ်း ၽႅၼ်ႇသိူဝ်ႈယွၵ်း  ယဵတ်ႈသႂ်ႇတီႈတႂ်ႈ ပလၢင်ႇ ၽြႃးပဵၼ်ၸဝ်ႈၼင်ႈဝႆႉၼၼ်ႉ။ လႆႈဢွၼ်ၵၼ်တွႆႇယႃႉလႅဝ်သေ ဢဝ်ၽႅၼ်ႇယွၵ်းၸိူဝ်းၼၼ်ႉ ဢွၵ်ႇမႃး” ဝႃႈၼႆ။

ၸဝ်ႈတူၼ်ၶူးလႄႈ ၵူၼ်းဝၢၼ်ႈၵုင်းယၢင်းပဵင်းသၢႆးလၢတ်ႈဝႃႈ “ ၽြႃးသႅင်ၶဵဝ်သူႇၼႆႉ မီးတၵ်ႉၵႃႇသတ်ႉထႃးမႃး လူႇတၢၼ်းၸွမ်း တူၼ်ႈသၢင်ႇၵၢၼ်းၵထိၼ်ႇ မိူဝ်ႈၽွင်း ပီ 2015” ဝႃႈၼႆ။

မိူဝ်ႈဝၼ်းတီႈ 20 ၼၼ်ႉၵူၺ်းၼင်ႇၵဝ်ႇ ယၢမ်းၵၢင်ဝၼ်း 10:00 မူင်းပၢႆၼၼ်ႉၵေႃႈ ၵူၼ်းဝၢၼ်ႈ ၵူၼ်းသူၼ်

ၼႃးၵိဝ်ႇ လႆႈဢွၼ်ၵၼ်ယႃႉၵွၵ်းတူၺ်း ၼႂ်းၽြႃးသႅင်ၶဵဝ် ဢၼ်မီးတီႈဝတ်ႉၼႃးၵိဝ်ႇ ဢိူင်ႇ တႃႈတေႈ ၸႄႈဝဵင်းသီႇပေႃႉ လႆႈထူပ်းႁၼ် ၽႅၼ်ႇယွၵ်းယဵတ်ႈသႂ်ႇဝႆႉမိူၼ်ၵၼ်။ 

 

ပီႈၼွင်ႉလၢႆးၶႃႈၶဝ်ၵေႃႈဝႃႈ ၽြႃးသႅင်ၶဵဝ်ၸိူင်ႉၼႆ လႆႈႁၼ်ၾၢႆႇလူင်ပွင်ၸိုင်ႈမႃးလူႇတၢၼ်း ၼႂ်းပွႆး ဢၼ်ၸတ်း တီႈဝဵင်းလၢႆးၶႃႈ မိူဝ်ႈပီ 2014 ၼၼ်ႉ ၼပ်ႉႁူဝ်ပၢၵ်ႇသူႇ ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 21/04/2017