ၼႂ်းလိူၼ် April 19 ဝၼ်းၼႆႉ ယူႇတီႈၸုမ်းပွင်ၵၢၼ် ၾၢႆႇဢုပ်ႇၵုမ်ၵၢၼ်ၵၢၼ်မိူင်း ဢၼ်တၢင်တူဝ်ၸုမ်း UPWC မီးၶၢဝ်ႇပွင်ႇလႅင်းထိုင်တီႈၸုမ်း RCSS လွႆတႆးလႅင်းဝႃႈ ပေႃးထိုင်လိူၼ် April 23 ဝၼ်းၸိုင် တေၸတ်းႁဵတ်းပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၸွမ်းလူၺ်ႈၼႃႈတီႈမိူင်တႆး ဢၼ်မၢၼ်ႈႁွင်ႉဝႃႈ (ဒေသအလိုက်အမျိုးသားဆင့်နိုင်ငံရေး ဆွေးနွေးပွဲ) တေၸတ်းႁဵတ်းၼႂ်းၸႄႈဝဵင်းမိူင်းတႆးၼႆလႄႈ ၵဵဝ်ႇလူၺ်လွင်ႈၼႆႉ ႁဝ်းၶႃႈတေလႆႈထတ်းသၢင် လီဝူၼ်ႉတူၺ်းၸွမ်းဢိတ်းၼိုင်ႈၼႆ ၶႂ်ႈယွၼ်းပွင်ႇထိုင် ပေႃႈမႄႈၵူၼ်းမိူင်တႆးတင်းသဵင်ႈၶႃႈဢေႃႈ။

တႄႇဢဝ်ဝၼ်းတီႈ 19 ၼႂ်းၸႄႈဝဵင်းၵူႈတီႈတီႈ ၸိူဝ်းဢၼ်ႁဝ်းၶႃႈတိုတ်ႉတၢႆးယိုၼ်းထိုင်လႆႈၼၼ်ႉ လႆႈႁူႉၶၢဝ်ႇၸွမ်းဝႃႈ တေၸတ်းႁဵတ်းပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈၼႂ်းမိူင်းတႆးၼႆလႄႈ ယူႇတီႈၾၢႆႇၽွင်းငမ်းၶဝ်၊ ၸဝ်ႈၼႃႈတီႈၼႂ်းၸႄႈတွၼ်ႈ ၸီႉသင်ႇထိုင်ၸူးတီႈ ၸဝ်ႈၼႃႈတီႈၸႄႈဝဵင်း သေယဝ်ႉ လႆႈႁွင်ႉပႃးၽူႈတႅၼ်း/ ၽွင်းတႅၼ်း ဢိၵ်ႇလူၺ်ႈပႃး ၶႃႈႁၢပ်ႇၵၢၼ်ၶုၼ်ႁွင်ႈၵၢၼ်ထႅင်ႈ လၢႆလၢႆဢၼ်သေ လႆႈမႃးဢုပ်ႇဢူဝ်းၵၼ် ပိူဝ်ႈတႃႇတေၸတ်းႁဵတ်းပၢင်ၵုမ်ဢၼ်ၼႆႉ။

ၵူၺ်းၵႃႈပၢင်ၵုမ်ဢၼ်ၼႆႉ ပဵၼ်သင်မႃးၸတ်းႁဵတ်းလိူၼ်ၼႆႉ၊ ႁဝ်းႁၼ်ထိုင်တႄႉၵေႃႈ ပိူဝ်ႈတႃႇတေပဵၼ်မႃး ပၢင်ၵုမ်ပၢင်လူင်ၸူဝ်ႈပၢၵ်ႇပီ 21 ပၢင်လူင်။ ယူႇတီႈလူင်ပွင်ၸိုင်ႈ NLD ၼႆႉ ၶတ်းၸႂ်ႁဵတ်းမႃးတင်းႁိူင်ယဝ်ႉ၊ ဢွၵ်ႇၶၢဝ်ႇမႃးလၢႆလၢႆပွၵ်ႈ။ ဢွၼ်တၢင်းဝႃႈၼႂ်းလိူၼ် February 12 ဝၼ်း တေၸတ်းႁဵတ်းႁႂ်ႈပဵၼ်ၵမ်းထီႉ 2 ။ ဝၢႆးလင်မႃး သမ်ႉဝႃႈတေၸတ်းၵွၼ်ႇလိူၼ် February ပႆႇသဵင်ႈ၊ ႁႂ်ႈပဵၼ်ဝၼ်းတီႈ 28 ။ မိူဝ်ႈဝၼ်းလိူၼ်သဵင်ႈၼၼ်ႉၵေႃႈ သမ်ႉၶိုၼ်းလႆႈငိၼ်းဝႃႈ ဢမ်ႇပဵၼ်လႆႈယဝ်ႉ ၼႂ်းလိူၼ် March 15 ဝၼ်း တေဢၢၼ်းႁဵတ်းႁႂ်ႈမၼ်းပဵၼ်ၼႆၵေႃႈ ဢမ်ႇပဵၼ်မႃး၊ ၵမ်းလိုၼ်းၶိုၼ်းဢွၵ်ႇၶၢဝ်ႇမႃးဝႃႈ ဝၢႆးသွၼ်းၼမ်ႉ တေႁဵတ်းႁႂ်ႈမၼ်းပဵၼ်ၼႆသေ မိူဝ်ႈလဵဝ်သွၼ်းၼမ်ႉယဝ်ႉၵႂုႇလၢႆလၢႆ ပၢင်ၵုမ်ယင်းပႆႇပဵၼ်မႃး။

တႃႇတေပဵၼ်မႃး ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၸွမ်းၼႃႈတီႈၽႂ်မၼ်းၼႆၼၼ်ႉ ပေႃးမႃးတူၺ်း တီႈပွင်ႇမၼ်း တေလႆႈဝႃႈလူင်ပွင်ၸိုင်ႈတိူင်းလႄႈၸႄႈမိူင်း ဢိၵ်ႇလူၺ်ႈၶွမ်ႊမသျိၼ်ႊၼေႇပျီႇတေႃႇၶဝ် ႁွင်ႉမွၵ်ႇၸတ်းႁဵတ်းၸွမ်းၼင်ႇ UPWC တမ်းဝၢင်းဝႆႉပၼ်ၼၼ်ႉယဝ်ႉ။

ပၢင်ၵုမ်ဢၼ်ၼႆႉ လွင်ႈတၢင်မၼ်းမီး 1.ၵၢၼ်မိူင်း။ 2.ၵၢၼ်မၢၵ်ႈမီး။ 3.မူႇပိူင်ဢၼ်ၵဵဝ်ႇလူၺ်ႈ တီႈလိၼ်၊ ၵဵဝ်ႇလူၺ်ႈပႃးတင်းသိင်ႇဝႅတ်ႉလွမ်ႉ သၢမ်ႁူဝ်ၶေႃႈယႂ်ႇၼႆႉ၊၊ ၵူၺ်းၵႃႈ ပေႃးမႃးၸႅၵ်ႇတူၺ်းၶေႃႈမုလ်း ဢၼ်ယွႆႈမၼ်း တေမီးယူႇ 4 တွၼ်ႈ 1.တေပဵၼ်လိူင်ႈပၵ်းပိူင်လၵ်းမိူင်း ၸွမ်းပိူင်ၻီႊမူဝ်ႊၶရေႊသီႊ လႄႈၾႅတ်ႊၻရႄႊ။ 2. တေပဵၼ်သုၼ်ႇလႆႈၸၢဝ်းၶိူဝ်း ဢၼ်ၵူႈၶိူဝ်းၶိူဝ်းတေလႆႈၽဵင်ႇပဵင်းၵၼ်။ 3. လိူင်ႈၵၢၼ်ၶိုၼ်ႈယႂ်ႇမုၼ်းလႅင်းၼႂ်းၼႃႈတီႈၽႂ်မၼ်း။ 4. လိူင်ႈၵၢၼ်ၸတ်းပွင်ၸႅၵ်ႇၽႄတီႈလိၼ် ၽုၵ်ႇသွမ်ႈလႄႈ ၶူဝ်းႁႄႈၶူဝ်းတိုၼ်း ၸိူဝ်းၼႆႉ။

ၵမ်းၼႆႉ ပေႃးဝႃႈတေႁဵတ်းပၢင်ၵုမ်ဢၼ်ၼႆႉ ၽႂ်ၸိူဝ်းလႂ်သမ်ႉတေလႆႈဢွၼ်ႁူဝ်။ ၽႂ်သမ်ႉတေလႆႈၶဝ်ႈပႃး ၵူၺ်းၵူၺ်းၼၼ်ႉ တေပဵၼ်လူင်ပွင်ၸိုင်ႈ တိူင်းလႄႈၸႄႈမိူင်းၶဝ်၊ တႅၼ်းၽွင်းတပ်ႉမတေႃႇၶဝ်၊ ၸုမ်းၸၢဝ်းၶိူဝ်းမႅၵ်ႇၵွင်ႈ။ ပႃႇတီႇၵၢၼ်မိူင်းဢၼ်ၶဝ်ႈတၢင်းၵၢၼ်၊  သမ်ႉတင်းၸုမ်းတူင်ႇဝူင်းၵူၼ်းၶဝ်လႄႈ ၽူႈၵူၼ်းဢၼ်ထုၵ်ႇလီလႆႈႁူႉ၊ ဢၼ်တေမွၵ်ႇႁွင်ႉၶဝ်ႈပႃးတေမီးယူႇ 8-9 ၸုမ်း။

ၸိူဝ်ၶဝ်ၼႆႉ မီးသုၼ်ႇလႆႈထွမ်ႇငိၼ်း ၊ လိူဝ်ၼၼ်ႉတေမီးၸုမ်းဢွၼ်ႁူဝ် ၼႃႈတီႈၽွင်းငမ်းႁင်းၶေႃၶဝ် မိူၼ်ၼင်ႇ ၸၢဝ်းၶိူဝ်းၼႃႈတီႈထၼု၊ ၼႃႈတီႈပလွင်ႈ၊ ၼႃႈတီႈၵဝ်ႈၵၢင်ႉ ၶဝ်ၸိူဝ်းၼႆႉၵေႃႈ မီးသုၼ်ႇၶဝ်ႈႁူမ်ႈ ၸွမ်းယူႇ။ ၵူၺ်းၵႃႈ ၸွမ်းၼင်ႇ UPWC တမ်းဝၢင်းဝႆႉပၼ်ၼၼ်ႉ တေဢမ်ႇလႆႈလူၼ်ႉလႆႈလိူဝ်။ ၵဵဝ်ႇလူၺ်ႈႁူဝ်ၶေႃႈ 4 ဢၼ်လၢတ်ႈမႃးတၢင်းၼိူဝ်ၼၼ်ႉ တေလႆႈၵဵပ်းၶေႃႈမုလ်းမၼ်း ယိုၼ်ႈတၢင်ႇမႃး ထိုင်တီႈၸၼ်ႉ ၸႄႈတွၼ်ႈ၊ ယဝ်ႉၵေႃႈ ယူႇတီႈၸၼ်ႉၸႄႈတွၼ်ႈ သေသိုပ်ႇယိုၼ်ႈထိုင်လူင်ပွင်ၸိုင်ႈတိူင်း။ လိူဝ်ၼၼ်ႉၵေႃႈ တေသိုပ်ႇၵႂုႇၽႅဝ်တီႈUPDJC (ၶွမ်ႊမတီႊႁူမ်ႈဢုပ်ႇဢူဝ်းလွင်ႈငမ်းယဵၼ် မိူင်းႁူမ်ႈတုမ်) ၊ ပေႃးၽႅဝ်မႃးတီႈ UPDJC ၶဝ်သမ်ႉတေထတ်းထွင်သေယဝ်ႉ မိူဝ်းတၢင်ႇလၢတ်ႈထိုင်ပၢင်ၵုမ်လူင် ၸူဝ်ႈပၢၵ်ႇပီ 21 ၵမ်းတီႈ 2 ဢၼ်တေပဵၼ်မႃးၼၼ်ႉ။

ပေႃးႁဝ်းၶႃႈမႃးထတ်းသၢင်တူၺ်း ၵွၼ်ႇပႆႇပဵၼ်ပၢင်ၵုမ် 21 ၵမ်းထီႉ 2 ၼႆႉ ၶၢဝ်ႇငၢဝ်းလႄႈလွင်ႈ လႅၵ်ႈလၢႆႈၼႆႉ မၼ်းၼမ်လူၼ်ႉလိူဝ်၊ မိူၼ်ၸိူင်ႉၼင်ႇၸုမ်း UNFC ဢၼ်ပႆႇလူင်းလၢႆးမိုဝ်း NCA ၼၼ်ႉ မီးၶၢဝ်ႇဝႃႈမွၼ်း NMSP တၢင်းယၢင်းလႅင် KNPP ၼႆႉ တေတႅၵ်ႇဢွၵ်ႇ UNFC သေ တေႁူမ်ႈလူင်းလၢႆးမိုဝ်းယဝ်ႉ၊ တေႁပ်ႉႁဵတ်းၸွမ်းလၢႆးၵၢၼ် NCA ယဝ်ႉၼႆၵေႃႈတင်း ဢွၵ်ႇၶၢဝ်ႇမႃး။ 

ယူႇတီႈၽူႈၶၢၼ်ပၢၵ်ႇ ၶွင်လုမ်းၽွင်းတၢင် ၶုၼ်ၽွင်းလူင် ၾၢႆႇမိူင်းၼွၵ်ႈ လႆႈဢွၵ်ႇၶၢဝ်ႇဝႆႉဝႃႈ 2 ၸုမ်းၼႆႉ တိုၼ်းတေလူင်းလၢႆးမိုဝ်းယဝ်ႉ ဝႃႈၼၼ်သေတႃႉ ဝႆးလင်မႃး ယူႇတီႈ NMSP တင်း KNPP ၶိုၼ်းတွပ်ႇဝႃႈ တေၵႂႃႇၸွမ်းလၢႆးတၢင်းမၼ်းတႄႉ ၸႂ်ႈယူႇ၊ ၵူၺ်းၵႃႈ ဢၼ်တေလူင်လၢႆးမိုဝ်း NCA ၼၼ်ႉတႄႉႁဝ်းၶႃႈ ဢမ်ႇပႆႇလႆႈတႅပ်းတတ်း ၸိူင်ႉၼၼ်ၵေႃႈသမ်ႉမီး။

ၾၢႆႇၼိုင်ႈတၢင်းၼိုင်ႈၵေႃႈ မိူဝ်ႈဝၼ်းတီႈ 19 ၼၼ်ႉၵူၺ်းၼင်ႇၵဝ်ႇ ၸုမ်းၸၢဝ်းၶိူဝ်းမႅၵ်ႇၵွင်ႈ ဢၼ်ပႆႇၽွမ်ႉလူင်းလၢႆးမိုဝ်းၸွမ်း မိူၼ်ၸိူင်ႉၼင်ႇၸုမ်းဝႃႉဢွၼ်ႁူဝ် 7 ၸုမ်း၊ ၸုမ်းၶဝ် ၸိူဝ်းၼၼ်ႉၵေႃႈဢွၵ်ႇၶၢဝ်ႇဝႆႉ မီးဢၼ်တုမ်ႉယွၼ်ႈဢၼ်ၼိုင်ႈ၊ ၼၼ်ႉၵေႃႈလီဝူၼ်ႉၸွမ်းယူႇ၊၊

ၸုမ်းၶဝ်ၸဝ်ႈၼၼ်ႉ မိူၼ်ၼင်ႇရၶႅင်ႇ AA ၊ ၸုမ်းၶၢင် KIA ၊ ၵဝ်ႈၵၢင်ႉ ၊ ပလွင်ႈ၊ တႆး SSPP ၊ ၸုမ်းမိူင်းလႃးတင်း ဝႃႉၸိူဝ်းၼႆႉ မီး 7 ၸုမ်း။ ၸုမ်းၶဝ်ၼႆႉၵေႃႈ ဢုပ်ႇၵၼ် 3 ဝၼ်းသေ ဢွၵ်ႇမႃး ၶေႃႈတႅပ်းတတ်းပၢင်ၵုမ်ဝႃႈ -ၶဝ်ၸဝ်ႈလႆႈႁၢင်ႈႁႅၼ်းဝႆႉ ၶွမ်ႊမတီႊၵပ်းသၢၼ် တႃႇတေဢုပ်ႇၵုမ်ၵၢၼ်မိူင်း မိူင်းႁူမ်ႈတုမ် ဢၼ်ၸုမ်းဝႃႉဢွၼ်ႁူဝ် ၊ ၶွမ်ႊမတီႊဢၼ်ၼႆႉ တေဢွၼ်ႁူဝ်ဢုပ်ႇၵုမ်ၵၢၼ်မိူင်းၵႂႃႇမိူဝ်းၼႃႈ၊ ပိူဝ်ႈတႃႇမိူင်းႁူမ်ႈတုမ် တေၸၢင်ႈၼိမ်သဝ်းၵႂႃႇမိူဝ်းၼႃႈ၊ ၶဝ်ၸဝ်ႈဝႃႈၼၼ်။ 

တီႈၼႆႈၼႆႉ မီးလွင်ႈလၢၵ်ႇလၢႆး။ မီးၶေႃႈတႅပ်းတတ်းဝႃႈ ယူႇတီႈၶွမ်ႊမတီႊဢၼ်ၼႆႉ တေတၢင်တူဝ် ၵူႈၸၢဝ်းၶိူဝ်း တင်း7 ၸုမ်းသေဢုပ်ႇဢူဝ်းၵၢၼ်မိူင်းၵႂႃႇ။ မီးတီႈပွင်ႇဝႃႈ ဢၼ်လူင်ပွင်ၸိုင်ႈ/တပ်ႉမတေႃႇ တေထွတ်ႇဢွၵ်ႇပႅတ်ႈ မိူၼ်ၼင်ႇ ပလွင်ႈ၊ ၵဝ်ႈၵၢင်ႉ၊ ရၶႅင်ႇသေ တေဢုပ်ႇၵုမ်ၵၢၼ်မိူင်းၵႂႃႇၼၼ်ႉ ၶဝ်ၸဵတ်းၸုမ်း တိုၼ်းဢမ်ႇၽွမ်ႉလႃးလႃး။ 

လွင်ႈၸၢင်ႈမႃးပဵၼ်လွင်ႈတုမ်ႉယွၼ်ႈ၊ လွင်ႈၶဵင်ႇတႃႉတေႃႇလူင်ပွင်ၸိုင်ႈ မီးထႅင်ႈၶေႃႈၼိုင်ႈ၊  ပဵၼ်ၼႂ်းဝၼ်းတီႈ 19 ၼႆႉၵူၺ်းၼင်ႇၵဝ်ႇ။ ယူႇတီႈၽူႈၶၢၼ်ပၢၵ်ႇၸုမ်း RCSS လွႆတႆးလႅင်းၵေႃႈ သမ်ႉတူၵ်ႇလၢတ်ႈဝႃႈ- ပၢင်ၵုမ်ၸူဝ်ႈပၢၵ်ႇပီ 21 ၵမ်းထူၼ်ႈ 2 ဢၼ်တေၸတ်းႁဵတ်းမိူဝ်းၼႃႈၼၼ်ႉ ဢမ်ႇၸၢင်ႈၶဝ်ႈႁူမ်ႈ၊ ပေႃးဝႃႈဢၼ် RCSS ယိုၼ်ႈယွၼ်းဝႆႉဢမ်ႇပဵၼ်မႃး။ ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၸၢဝ်းၶိူဝ်းတႆး ဢၼ်ၶဝ်ၸဝ်ႈတေဢွၼ်ႁူဝ်ၸတ်းႁဵတ်း၊ ဢၼ်ၶဝ်တေႁူမ်ႈ CSSU ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး တေၸတ်းႁဵတ်း တီႈတူၼ်ႈတီး ဢမ်ႇၼၼ်ပၢင်လူင်ၼၼ်ႉ သင်ၸိူဝ်ႉဝႃႈ ဢမ်ႇလႆႈၸတ်းႁဵတ်းၸိုင် ယူႇတီႈၶဝ်တေမႃးၶဝ်ႈႁူမ်ႈပၢင်ၵုမ်လူင် ပွၵ်ႈၵမ်းထူၼ်ႈ 2 ၼၼ်ႉ တေႁၢမ်ႉယၢပ်ႇယူႇ၊ တေဢမ်ႇမီးငဝ်းလၢႆးတိုဝ်ႉတၢင်းမၼ်း ဝႃႈၼႆ။

ပွင်ႇဝႃႇႁႅင်းသေႃႇသူၼ်းၼႆႉ မၼ်းမီးဝႆႉလၢႆၾၢႆႇ။ ၸုမ်းဢၼ်လူင်းလၢႆမိုဝ်း NCA ယဝ်ႉၵေႃႈ ဢမ်ႇပဵင်းပေႃးၸႂ်။ ၸုမ်းဢၼ်ပႆႇလူင်းလၢႆးမိုဝ်း NCA ၼၼ်ႉၵေႃႈ သမ်ႉႁၢင်ႈႁႅၼ်းသၢၼ်ၶတ်း လူင်ပွင်ၸိုင်ႈယူႇ။ ယူႇတီႈလူင်ပွင်ၸိုင်ႈၵေႃႈ ပၢင်ၵုမ်လူင်ၸူဝ်ႈပၢၵ်ႇပီ 21 ၼၼ်ႉ ႁႂ်ႈၸၢင်ႈလႆႈႁဵတ်း ႁႂ်ႈပေႃးၵႄႈၼႃႈၵႄႈတႃလႆႈ၊ တီႈဢေႇသုတ်းမၼ်း ႁႂ်ႈပေႃးဢွၵ်ႇမႃးလႆႈ ၶေႃႈၵၢင်ၸႂ်ၵူၼ်မိူင်း ၵဵဝ်ႇလူၺ်ႈ 3-4 ၶေႃႈ ၵၢၼ်မိူင်း၊ ၵၢၼ်မၢၵ်ႈမီး၊ ပႃးတင်းပိူင်ၵၢၼ်တီႈလိၼ်လႄႈသိင်ႇဝႅတ်ႉလွမ်ႉ။

ၸင်ႇဝႃႈပၢင်ၵုမ်လူင် ဢၼ်တေၸတ်းၼႂ်းဝၼ်းတီႈ 23  ဢၼ်တေထိုင်မႃးၼႆႉ ယူႇတီႈပႃႇတီႇပၢႆးမိူင်း လႄႈသင်၊ ယူႇတီႈၸုမ်းယိပ်းၵွင်ႈၵၢင်ႇလႄႈသင် ၶဝ်ႈႁူမ်ႈတူင်ႉၼိုင်ပႃးၸွမ်းႁၢဝ်ႈႁၢဝ်ႈႁႅင်းႁႅင်းၵေႃႈ ႁႂ်ႈပေႃးပဵၼ်ၵၢၼ်ပဵၼ်ငၢၼ်းမႃးၼၼ်ႉတႄႉ ဢမ်ႇႁၼ်၊ တေပဵၼ်ၵၢၼ်ဢဝ်ၼႃႈဢဝ်တႃၵူၺ်း ႁဝ်းၶႃႈထတ်းႁၼ်ၼင်ႇၼႆသေ ယွၼ်းၶွတ်ႇယွတ်ႈပၢႆၵႂၢမ်းၸိူင်ႉၼႆၶႃႈ၊၊