ၸုမ်းၵူၼ်းၼုမ်ႇတႆး TYO ဝဵင်းသီႇသႅင်ႇ ႁူပ်ႉထူပ်းၵူၼ်းဝၢၼ်ႈ တွင်ႈထၢမ်တၢင်းယၢပ်ႇၽိုတ်ႇၵူၼ်းမိူင်း လွင်ႈၵၢၼ်ၽုၵ်ႇသွမ်ႈ၊ လွင်ႈလိူၵ်ႈၸႂ်ႉၸိူဝ်ႉၽၼ်း လၢႆးႁဵတ်းဢွၵ်ႇၶူဝ်းၶွင် ၼႂ်းပိုၼ်ႉတီႈ ပႃးၸဵမ်ၵၢၼ် ႁႃလွၵ်းၵၢတ်ႇၶၢႆ။

Photo by- TYO ၸႄႈဝဵင်းသီႇသႅင်ႇ

ဝၼ်းတီႈ 02/03/2017 ၸၢႆးပိုၼ်းႁၢၼ် ႁူဝ်ပဝ်ႈၸုမ်းၵူၼ်းၼုမ်ႇတႆး TYO ၸႄႈဝဵင်းသီႇသႅင်ႇ တင်း ၸၢႆးသၢႆလႅတ်ႇ ၾၢႆႇၵပ်းသၢၼ်၊ ၸၢႆးလၢဝ်ၶမ်း ၾၢႆႇသဵၼ်ႈမၢႆ၊ ၸၢႆးဢွင်ႇမိၼ်ႉ ၽူႈၼမ်းၼႂ်း ၸိူဝ်းၼႆႉ ဢွၼ်ႁူဝ်ၵူၼ်းၼုမ်ႇ ႁူပ်ႉထူပ်းၵူၼ်းမိူင်း လၢႆဝၢၼ်ႈမိူၼ်ၼင်ႇ ဝၢၼ်ႈၼွင်မွၼ်၊ ဝၢၼ်ႈယဵၼ်ႇ၊ သၢႆလႄး၊ ၵုင်းသုတ်း၊ တၢမ်ၽၢၵ်ႇ ၼႂ်းထုင်ႉပူင်း  ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း။ ဢုပ်ႇဢူဝ်း လႅၵ်ႈလၢႆႈ တွင်ႈထၢမ် လွင်ႈၵၢၼ်ယူႇၵၢၼ်ၵိၼ်၊ ၵၢၼ်ၽုၵ်ႇသွမ်ႈ၊ ၵၢၼ်ႁႃလွၵ်းၵၢတ်ႇ၊ ၵၢၼ်လိူၵ်ႈ ၸိူဝ်ႉၽၼ်း ၸိူဝ်းၼႆႉ။


ယိူင်းဢၢၼ်း ဢၼ်ႁူပ်ႉထူပ်းၵူၼ်းမိူင်းတႄႉၵေႃႈ ၼင်ႇႁိုဝ်ၵူၼ်းမိူင်းတေမေႃဝၢင်းၽႅၼ်ၵၢၼ်ၽုၵ်ႇ သွမ်ႈ၊ လွင်ႈႁႃလွၵ်းၵၢတ်ႇ၊ ၶူဝ်းၶွင်မေႃတိၼ်မေႃမိုဝ်း ၼႂ်းပိုၼ်ႉတီႈ ၸိူင်ႉၼင်ႇမိူင်းထႆး ( One Tambon One Product (OTOP)) ႁႂ်ႈပေႃးၸၢင်ႈ ၶၢႆလႆႈလႄႈ ႁႂ်ႈၵူၼ်းဝၢၼ်ႈဢွၼ်ၵၼ်ၸႂ်ႉၸိူဝ်ႉ ၽၼ်းဢၼ်ဢွၵ်ႇၼႂ်းႁႆႈၼႂ်းသူၼ်တူဝ်ၵဝ်ႇ ဢမ်ႇထုၵ်ႇလီဢဝ် ၸိူဝ်ႉၽၼ်းၶိုတ်းၵၢပ်ႈ ဢၼ်ဝႃႈ GMO ၸိူဝ်းၼႆႉ။


ၸၢႆးပိုၼ်းႁၢၼ် ႁူဝ်ပဝ်ႈTYO သီႇသႅင်ႇ လၢတ်ႈဝႃႈ “ၸိူဝ်ႉၽၼ်းၶူဝ်းၶွင်ၼႂ်းပိုၼ်ႉတီႈႁဝ်းၼၼ်ႉ မၼ်း ၶိုၵ်ႉၶႅမ်ႉယူႇယဝ်ႉ ယႃႇထၢင်ႇယႂ်ႇၸိူဝ်ႉၽၼ်းတၢင်ႇမိူင်း မိူၼ်ၼင်ႇၸိူဝ်ႉၽၼ်း Genetically Modified Organisms (GMO )ၼႆႉမၼ်းႁဵတ်းႁႂ်ႈ မၢၵ်ႇမႆႉလုၵ်ႈယႂ်ႇသေတႃႉၵေႃႈ မၼ်း ဢမ်ႇပၼ် ၽွၼ်းလီတေႃႇ ပၢႆးယူႇလီ၊ လိူဝ်ၼၼ်ႉ မၼ်းဢမ်ႇဢဝ်ၸိူဝ်ႉမၼ်းလႆႈ၊ တီႈလိၼ်ၵေႃႈလူႉ ၊ ပေႃးႁဝ်း လူဝ်ႇၸိူဝ်ႉမၼ်းမႃးၵေႃႈ တေလႆႈၵႂႃႇသိုဝ်ႉ တီႈၶွမ်ႊပၼီႊ၊ ပေႃးပိူၼ်ႈဢမ်ႇၶၢႆပၼ်ႁဝ်းၵေႃႈ ဢမ်ႇ ၸၢင်ႈႁဵတ်းႁိုဝ် ” ဝႃႈၼႆ။


ၸုမ်းၵူၼ်းၼုမ်ႇတႆး TYO ၸႄႈဝဵင်းသီႇသႅင်ႇၼႆႉ ၵေႃႇတင်ႈမႃး မိူဝ်ႈဝၼ်းတီႈ 08/05/2014  ၸုမ်း ပွင်ၵၢၼ်မီး 11ၵေႃႉ ႁူဝ်ပဝ်ႈပဵၼ်ၸၢႆးပိုၼ်းႁၢၼ်။ ယိူင်းဢၢၼ်းႁႂ်ႈၵူၼ်းၼုမ်ႇၶဝ်ႈဢွၵ်ႇၵၼ် ၊ၽွမ်ႉႁူမ်ႈ ၵၼ်၊ ပူၵ်းပွင်ပၢႆးပၺ်ၺႃ၊ ပၢႆးယူႇလီ၊ ပၢႆးမၢၵ်ႈမီး၊ တူင်ႇဝူင်းၵူၼ်းလႄႈ ႁႂ်ႈၵူၼ်းၼုမ်ႇၵႆ ယၢၼ်ယႃႈ မဝ်းၵမ် ၸိူဝ်းၼႆႉ။