ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး/ ပႃႇတီႇႁူဝ်သိူဝ် (SNLD) ၸႄႈဝဵင်းၵဵင်းတုင် သူၼ်းတုမ် ပေႃႈမႄႈၵူၼ်းမိူင်း တႃႇပၢင်လိူၵ်ႈတင်ႈသွမ်ႈ ၼႂ်းႁူဝ်လိူၼ် ဢေႊပရိူဝ်ႊ ပီ 2017။ ပိုတ်ႇလုမ်းၽႄပႃး ၼႂ်းဢိူင်ႇမိူင်းပၵ်ႉ။

ပႃႇတီႇႁူဝ်သိူဝ် ၸႄႈဝဵင်းၵဵင်းတုင် ပိုတ်ႇလုမ်းပူၵ်းပၢႆႉ ၼႂ်းဢိူင်ႇမိူင်းပၵ်ႉ- သူၼ်းတုမ်တႃႇ ပၢင်လိူၵ်ႈ တင်ႈသွမ်ႈ

ဝၼ်းတီႈ 08/03/2017 ယၢမ်းၵၢင်ၼႂ် 08:10 မူင်း ပႃႇတီႇႁူဝ်သိူဝ် ၸႄႈဝဵင်းၵဵင်းတုင် ပိုတ်ႇလုမ်း ၽႄပႃႇတီႇ တီႈဝၢၼ်ႈပုင်ႇသၢႆး ဢိူင်ႇမိူင်းပၵ်ႉ ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇ ၶူင်း။ ႁူပ်ႉထူပ်းၵူၼ်းဝၢၼ်ႈ သပ်းလႅင်းလၢတ်ႈၼႄ ပေႃႇလသီႇပႃႇတီႇႁူဝ်သိူဝ်လႄႈ သူၼ်းတုမ်ပႃး တႃႇပၢင်လိူၵ်ႈတင်ႈသွမ်ႈ ဢၼ်တေထိုင်မႃးၼႆႉ။ ပီႈၼွင်ႉ ၵူၼ်းမိူင်း ၶဝ်ႈႁူမ်ႈ 200 ပၢႆ ဝႃႈၼႆ။


ၼေႃႈၽူႈတႅၼ်းပႃႇတီႇႁူဝ်သိူဝ် ၸႄႈဝဵင်းၵဵင်းတုင် ဢၼ်တေၶဝ်ႈၶႄႉၶႅင်ႇ တီႈယူႇၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈ မၢႆ(2) ၸႄႈဝဵင်းၵဵင်းတုင် ပဵၼ်လုင်းၸၢႆးလူင် ဝႃႈၼႆ။


ပႃႇတီႇႁူဝ်သိူဝ် ၸႄႈဝဵင်းၵဵင်းတုင် တႄႇလူင်းသူၼ်းတုမ် ၸဵမ်မိူဝ်ႈဝၼ်းတီႈ 17/02/2017 မႃး၊  လူင်းသူၼ်းတုမ် ပွတ်းဢိူင်ႇယၢင်းလေႃး၊ ဢိူင်ႇလွႆလူင်၊ ဢိူင်ႇမိူင်းၶွၼ်၊ ဢိူင်ႇမိူင်းပၵ်ႉ၊ ဢိူင်ႇပဵင်း တၢဝ်ႉလႄႈ ဢိူင်ႇ ဝတ်ႉသၢဝ်း ၸဵမ်ၸိူဝ်းၼႆႉ ဝႃႈၼႆ။


ၼႂ်းၸႄႈဝဵင်းၵဵင်းတုင် ပႃႇတီႇဢၼ်တေၶဝ်ႈၶႄႉၶႅင်ႇၼႂ်းပၢင်လိူၵ်ႈတင်ႈသွမ်ႈၼႆႉ မီး ပႃႇတီႇ ႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇၼူၵ်ႉယုင်း၊ ပႃႇတီႇသၢင်ႇသီႈ၊ ပႃႇတီႇဢႃးၶႃႇလႄႈ ပႃႇတီႇလႃးႁူႇ ၸဵမ်ၸိူဝ်းၼႆႉ ဝႃႈၼႆ။


ပၢင်လိူၵ်ႈတင်ႈသွမ်ႈ ၼႂ်းဝၼ်းတီႈ 01/04/2017 ၼႆႉ ႁူင်းတွတ်ႈၶႅပ်းၵၢင်ၸႂ်ၼႂ်းၸႄႈဝဵင်းၵဵင်းတုင် တင်းမူတ်းမီး 57 ႁူင်း။ လိူဝ်ၼၼ်ႉ ပွၵ်ႉ/ ဢိူင်ႇဢၼ်မီးသုၼ်ႇတွတ်ႈၶႅပ်းၵၢင်ၸႂ် တႃႇၶဵတ်ႇလိူၵ်ႈ တင်ႈမၢႆ(2) သမ်ႉ မိူၼ်ၼင်ႇ ဢိူင်ႇယၢင်းလေႃး၊ ဢိူင်ႇလွႆလူင်၊ ဢိူင်ႇၵၢတ်ႇထၢႆႈ၊ ဢိူင်ႇဝတ်ႉသၢဝ်း၊ ဢိူင်ႇပဵင်းတၢဝ်ႉ၊ ဢိူင်ႇပၢင်မတ်း၊ ဢိူင်ႇမိူင်းပၼ်ႇမိူင်းသဵမ်၊ ဢိူင်ႇမိူင်းဢိၼ်း၊ ဢိူင်ႇမိူင်းပၵ်ႉ၊ ဢိူင်ႇမိူင်း ၶွၼ်၊ ဢိူင်ႇမူးၸႄႈ၊ ဢိူင်ႇၼွင်တဝ်း၊ ဢိူင်ႇၼမ်ႉၶၢၵ်ႉ၊ ဢိူင်ႇပၢင်ၵဵဝ် တင်းမူတ်း မီး 14 ဢိူင်ႇ။ ပွၵ်ႉၼႂ်းဝဵင်းသမ်ႉ မီးတီႈ ပွၵ်ႉ 1 တင်း ပွၵ်ႉ 5 ဝႃႈၼႆ။