ပႃႇတီႇႁူဝ်သိူဝ် SNLD လူင်းသူၼ်းတုမ်ႁႃသဵင် ၼႂ်းၸႄႈဝဵင်းၵေးသီး၊ မိူင်းသူႈ၊ မိူင်းၼွင် ၼႄဢဵၼ်ႁႅင်း ဝၼ်းလိုၼ်းသုတ်း တႃႇပၢင်လိူၵ်ႈတင်ႈသွမ်ႈၼၼ်ႉ ၵူၼ်းမိူင်း ၼႂ်းပိုၼ်ႉတီႈ ၼပ်ႉႁဵင် ႁူမ်ႈပၼ်ႁႅင်း တူင်ႉၼိူင်ၸွမ်း။

ဝၼ်းတီႈ 30/3/2017 ယၢမ်း 9 မူင်းၼၼ်ႉ ပႃႇတီႇႁူဝ်သိူဝ် ၶွၼ်ႈႁႅင်းၵူၼ်း ၼပ်ႉႁဵင် သေဢဝ် ၵႃး/ထူဝ်ႈမီး 200 လမ်းပၢႆ၊ လူတ်ႉၶိူင်ႈ  400 ပၢႆႁူမ်ႈၵၼ်ၼႄဢဵၼ်ႁႅင်း သူၼ်းတုမ်တႃႇပၢင်လိူင်ႈတင်ႈသွမ်ႈ ဝၼ်းလိုၼ်းသုတ်း။ ဢွၼ်တၢင်းသုတ်း လဵပ်ႈဝဵင်းၼႄဢဵၼ်ႁႅင်း ၼႂ်းၵေးသီး၊ သိုပ်ႇၶၢဝ်းတၢင်း ၵႂႃႇမိူင်းၼွင်၊ တေလဵပ်ႈၵႂႃႇတၢင်းမိူင်းသူႈ။


ၽူႈၶၢၼ်ပၢၵ်ႇ ပႃႇတီႇႁူဝ်သိူဝ် ၸၢႆးလဵၵ်ႉလၢတ်ႈဝႃႈ - “ၵၢၼ်လူင်းႁႃသဵင်ပွၵ်ႈၼႆႉ ယိူင်းဢၢၼ်းဝႃႈ ၵွပ်ႈၵူၼ်းမိူင်းတႆး ႁဝ်းၶႃႈၼႂ်းၸႄႈဝဵင်းမိူင်းသူႈ ၊မိူင်းၼွင်လႄႈၵေးသီး ၸိူဝ်းၼႆႉ မိူဝ်ႈပီ 2015 ၵွပ်ႈၵူၼ်း မိူင်းတွၼ်ႈၼၼ်ႉ ဢမ်လႆႈတွတ်ႈၶႅပ်းၵၢင်ၸႂ်၊ သုမ်းသုၼ်ႇၵၢၼ်ၸိူဝ်ႉၸၢတ်ႈ၊ ၵၢၼ်ပၢႆးမိူင်း မႃးယဝ်ႉပွၵ်ႈၼိုင်ႈလႄႈ ၼင်ႇ ႁိူဝ်ၵူၼ်းမိူင်း တေမီးသုၼ်ႇတွတ်ႈၶႅပ်းၵၢင်ၸႂ် တူင်ႉတိုၼ်ႇ ႁဵတ်းသၢင်ႈၵၢၼ်ပၢႆးမိူင်း ၵႂုႇမိူဝ်းၼႃႈသေ လူင်းႁႃသဵင်ဢေႃႈ” - ဝႃႈၼႆ။


ပႃႇတီႇႁူဝ်သိူဝ် SNLD ႁႃသဵင်ၵူၼ်းမိူင်းပုၼ်ႈတႃႇပၢင်လိူၵ်ႈတင်ႈသွမ်ႈပွၵ်ႈၼႆႉ မီးၸုမ်း ၵေႃပွင်ၵၢၼ်ငဝ်ႈငုၼ်း၊ ၽူႈၶဝ်ႈၵေႃပွင်ၵၢၼ်ၸႄႈဝဵင်း၊ ၽူႈတႅၼ်းသၽႃး ၵူၼ်းမိူင်း၊ ၽူႈတႅၼ်းသၽႃးၸႄႈမိူင်း၊ ၽူႈတႅၼ်းသၽႃးၸိူဝ်ႉၸၢတ်ႈ ဢိၵ်ႇၽူႈယႂ်ႇၵူၼ်းလူင် လၢႆလၢႆဝဵင်း ၸိူဝ်းပဵၼ်လုၵ်ႈၸုမ်းပႃႇတီႇႁူဝ်သိူဝ် မႃးၵမ်ႉထႅမ်ပၼ်ႁႅင်းၸွမ်း - ဝႃႈၼႆ။
ၸၢႆးတဵင်း ၵူၼ်းၼုမ်ႇ ၵေးသီးလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -  “မီးဢဵၼ်ႁႅင်းတႄႉၶႃႈ၊ လူတ်ႉၶိူင်ႈၼိုင်ႈလမ်း ၼႆႉ ၵူၼ်းၶီႇမွၵ်ႈ 2 ၵေႃႉ။ ၵႃးဢွၼ်ႇၵႃးလူင် ၵူၼ်းၶီႇ ၼမ်ဢေႃႈ။ မိူၼ်ထူဝ်ႈလူင် ၼိုင်လမ်းၼႆႉ ၵူၼ်းၶီႇ မွၵ်ႈ 20 ပၢႆ 30 ၸိူဝ်းၼႆႉဢေႃႈ။ ၼပ်ႉႁဵင်ယူႇၶႃႈယူဝ်ႉ ဢၼ်ၸွႆႈထႅမ်ပၼ်ႁႅင်းပႃႇတီႇႁူဝ်သိူဝ် ႁႂ်ႈပေႃးဢွင်ႇပေႉ” - ဝႃႈၼႆ။


ၼႂ်းၸႄႈဝဵင်းၵေးသီး၊ မိူင်းသူႇ၊ ၵိင်ႇၸႄႈဝဵင်းမိူင်းၼွင် ၼႆႉမီးပႃႇတီႇ သၢင်ႇသီႇ ဢၼ်တင်းၼမ် ႁူႉဝႃႈ ပႃႇတီႇသိုၵ်းမၢၼ်ႈ၊ ပႃႇတီႇၼူၵ်ႉယုင်း ဢၼ်လႆႈဢႃႇၼႃႇဝၢၼ်ႈမိူင်းဝႆႉယူႇယၢမ်းလဵဝ်၊ ပႃႇတီႇ ႁူဝ်သိူဝ် ဢၼ်ၸိုဝ်ႈယႂ်ႇၼႂ်းမိူင်းတႆး၊ ပႃႇတီႇသိူဝ်ၽိူၵ်ႇ ဢၼ်ယၢမ်ႈပေႉပၢင်လိူၵ်ႈတင်ႈ ထုင်ႉၼႆႉမႃး မိူဝ်ႈပၢင်လိူၵ်ႈတင်ႈ 2010 ၊ ပႃႇတီႇၸၢဝ်းၶိူဝ်းဝႃႉ ၸိူဝ်းၼႆႉ တေၶႅင်ႇၵၼ်။ ပၢင်လိူၵ်ႈ တင်ႈသွမ်ႈတႄႉ ၶွမ်ႊမသျိၼ်ႊ ပၢင်လိူၵ်ႈတင်ႈ ပိုၼ်ၽၢဝ်ႇဝႃႈ တေၸတ်းႁဵတ်း ၼႂ်းဝၼ်းတီႈ 1 လိူၼ်ဢေႊပရိူဝ်၊ လိူၼ်ႁႃႈမႂ်ႇ 5 ၶမ်ႈ ဝၼ်းသဝ်တေမႃးၼႆႉ။