ၸုမ်းတူင်ႉၼိုင်တူင်ႇဝူင်းတႆး ႁူမ်ႈၵၼ်လၢႆၸုမ်း ဢွၵ်ႇၶေႃႈပိုၼ်ၽၢဝ်ႇ  ႁႂ်ႈသိုၵ်းလွႆTNLA ၵိုတ်းယိုတ်း ၵၢၼ်တီႉၺွပ်းၶႃႈႁႅမ်ၵူၼ်းမိူင်း တုၵ်းယွၼ်းထိုင်ၸုမ်းယိပ်းၵွင်ႈၵၢင်ႇ ၵူႈၸုမ်း ယႃႇႁႂ်ႈဢဝ်ၵၢၼ်မိူင်း၊ ၵၢၼ်သိုၵ်းၼွင်ႇၵဵဝ်ႇၵူၼ်းမိူင်းသေ တီႉၺွပ်းပေႃႉထုပ်ႉၶႃႈႁႅမ် - ဝႃႈၼႆ။

18/03/2017 ၸုမ်းတူင်ႉၼိုင်တူင်ႇဝူင်းတႆး ႁူမ်ႈၵၼ်လၢႆၸုမ်း မိူၼ်ၼင်ႇၸုမ်းၵေႃလိၵ်ႈလၢႆးလႄႈ ၾိင်ႈငႄႈတႆး၊ ၸုမ်းၵူၼ်းၼုမ်ႇတႆး၊ ၸုမ်းၼၢင်းယိင်းတႆး၊ ၸုမ်းလုၵ်ႈႁဵၼ်းၸၼ်ႉၸွမ်တႆး၊ ၸုမ်းၵေႃ တႆး၊ ၸုမ်းလုၵ်ႈႁဵၼ်းႁႅင်းၵၢၼ်ယၢၼ်မိူင်း ၼႂ်းမိူင်းထႆးၸိူဝ်းၼႆႉ ႁူမ်ႈ35 ၸုမ်း ဢွၵ်ႇၶေႃႈပိုၼ်ၽၢဝ် လွင်ႈၸုမ်းယိပ်းၵွင်ႈၵၢင်ႇTNLA တီႉၺွပ်းၶႃႈႁႅမ်ၵူၼ်းမိူင်းလႄႈ တုၵ်းယွၼ်းႁႂ်ႈၸုမ်းယိပ်းၵွင်ႈၵၢင်ႇ ၵူႈၸုမ်းၵိုတ်းယိုတ်းၵၢၼ်ႁဵတ်းႁၢႆႉ တေႃႇၵူၼ်းမိူင်း ႁႂ်ႈတူၺ်းလွမ် ၵႅတ်ႇၵင်ႈပၼ်ၵူၼ်မိူင်း။


ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ - ၸုမ်းယိပ်းၵွင်ႈၵၢင်ႇၸုမ်းလႂ်သေဢမ်ႇဝႃႈ ယႃႇဢဝ်ၵၢၼ်သိုၵ်းမႃး ၼွင်ႇၵၢႆႇတင်းၵူၼ်းမိူင်း၊ ယႃႇႁႂ်ႈလႆႈလူလၢႆၵူၼ်းမိူင်း၊ ႁႂ်ႈမေႃပွင်ႇၸႂ်ၵူၼ်းမိူင်း ယွၼ်ႉဝႃႈၸုမ်းလႂ်ယွၼ်း မႃးၵေႃႈ ၵူၼ်းမိူင်းၵႃႈလႆႈပၼ်၊ ႁႂ်ႈၵိုတ်းပၢင်တိုၵ်း၊ လွင်ႈတၢင်းဢၼ်ပဵၼ်ယူႇၸိူဝ်းၼႆႉ လူင်ပွင်ၸိုင်ႈ ထုၵ်ႇလီၶဝ်ႈပႃးၵႄႈၶႆပၼ်- ၸိူဝ်းၼႆႉ။


ၸၢႆးသႅင်မိူင်း ၽူႈၶပ်ႉၵၢၼ် ၸုမ်းတူင်ႇဝူင်းၵူၼ်းတႆး လၢတ်ႈဝႃႈ -“ ၶႂ်ႈႁႂ်ႈၸၢဝ်းၶိူဝ်း2ဢၼ် တႆး- လွႆ (တဢၢင်း) ယူႇႁူမ်ႈၵၼ်လႆႈၵတ်းၵတ်းယဵၼ်ယဵၼ် လွင်ႈဢၼ်လႆႈၵိူတ်ႇၶိုၼ်ႈပဵၼ်ယူႇၼႆႉ ၶႂ်ႈႁႂ်ႈၶုၼ် မိူင်း လူင်ပွင်ၸိုင်ႈ ၶဝ်ႈမႃးၸွႆႈၵႄႈလိတ်ႈပၼ် ။ ၶႂ်ႈတုၵ်းယွၼ်းႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ႁႂ်ႈ တူၺ်းထိုင်ၵူၼ်းမိူင်း ယႃႇပေႁႃလိူင်ႈႁႃလၢဝ်းသေပေႉၵိၼ်ၵူၼ်းမိူင်း  ယွၼ်ႉဝႃႈၵူၼ်းမိူင်းၼႆႉၽႂ် ၸုမ်းလႂ်ယွၼ်းမႃးၵေႃႈ ၵႃႈလႆႈၸွႆႈၵူၺ်းလႄႈ ယႃႇပေၼႄးၵူၼ်းမိူင်းၸွႆႈၸုမ်းၼၼ်ႉၸုမ်းၼႆႉသေ တီႉၺွပ်ႉႁႅမ်တၢႆယူႇတိၵ်းတိၵ်း ”ဝႃႈၼႆ။


ၸုမ်းသိုၵ်းတဢၢင်း TNLA တီႉၺွပ်းၵူၼ်းမိူင်း ဢၼ်ယူႇသဝ်းၼႂ်းၸႄႈဝဵင်းမၢၼ်ႈတူင်ႈလႄႈ ၼမ်ႉတူႈ တင်ႈဢဝ်ဝၼ်းတီႈ 06-15/03/2017 ၵူၼ်းဝၢၼ်ႈ ဢၼ်ထုၵ်ႇမတ်ႉၵႂႃႇမီး 90ၵေႃႉ။ ၼႂ်းၼၼ်ႉ 3 ၵေႃႉတိုၵ်ႉႁၢႆလၢႆဝႆႉယူႇ ။ လုင်းသၢင်ႇၸၢႆး (ႁွင်ႉ) လုင်းထုၼ်းလူႇတင်း လုင်းမွၵ်ႇသႅင်တႄႉ ၺႃးသိုၵ်း လွႆႁႅမ်တၢႆယဝ်ႉ ။
တင်ႈဢဝ်ႁူဝ်လိူၼ်မၢတ်ႉၶျ်မႃးၼႆႉ သိုၵ်းလွႆTNLA တင်းသိုၵ်းမၢၼ်ႈ ၊ သိုၵ်းTNLA လႄႈ သိုၵ်းတႆး၊ ၸုမ်းသိုၵ်းဢူၺ်းလီပွတ်းႁွင်ႇလႄႈ သိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်ၼႂ်း ၸိုင်ႈတႆးပွတ်း ႁွင်ႇလႄႈ ႁဵတ်းႁႂ်ႈၵူၼ်းမိူင်းဢွၼ်ၵၼ်ဢွၵ်ႇပၢႆႈ ၽၢတ်ႇယၢၼ်ႁိူၼ်းယေးတီႈယူႇ ၼပ်ႉမိုၼ်ႇ - ဝႃႈၼႆ။