ၵူၼ်းမိူင်း ၸႄႈဝဵင်းၵဵင်းတုင် ဢွၼ်ၵၼ်လိုဝ်ႈၵၢၼ်သေ ၶဝ်ႈၵၢတ်ႇၸဝ်ႈၾႃႉ ဢမ်ႇၼၼ် ၵၢတ်ႇ(ၵဝ်ႇ) ဢၼ်ၼိုင်ႈပီမီး ၼိုင်ႈပွၵ်ႈ။

ဝၼ်းတီႈ 17/03/2017 ပဵၼ်ဝၼ်းၵၢတ်ႇၸဝ်ႈၾႃႉ(ၵၢတ်ႇၵဝ်ႇ) ၵဵင်းတုင်လႄႈ ၵူၼ်းမိူင်း ဢွၼ်ၵၼ် မႃးၶဝ်ႈၵၢတ်ႇ ၸွမ်းၼင်ႇၾိင်ႈႁိတ်ႈႁွႆး ၸဝ်ႈၾႃႉၸဝ်ႈၵွၼ်ႈၵႅဝ်ႈ ဢိၼ်းထလႅင် ဢွၼ်ႁဵတ်းမႃး ဝၼ်းၵၢတ်ႇ/ ၵၢတ်ႇၸဝ်ႈၾႃႉၼႆ ၸတ်းႁဵတ်းတီႈပွၵ်ႉႁူဝ်ၵၢတ်ႇ ၸႄႈဝဵင်းၵဵင်းတုင် ၸိုင်ႈတႆး ပွတ်း ဢွၵ်ႇၶူင်း။


လုင်းၸၢႆးႁွင်ၶမ်း ပေႃႈဝၢၼ်ႈမႄႈမိူင်း ဝဵင်းၵဵင်းတုင် လၢတ်ႈဝႃႈ “ ဝၼ်းၵၢတ်ႇၵဝ်ႇ ဢမ်ႇၼၼ် ဝၼ်းၵၢတ်ႇၸဝ်ႈၾႃႉၼႆႉ ၼိုင်ႈပီလႂ် ၼိုင်ႈပွၵ်ႈ ႁဝ်းၶႃႈဢွၼ်ၵၼ်ၸတ်းႁဵတ်းမႃး ၵူႈပီပီ ပေႃးထိုင်မႃး လိူၼ်ႁႃႈမႂ်ႇ တူၵ်းမႅၼ်ႈဝၼ်းၵၢတ်ႇလီၼႆ ပဵၼ်ဝၼ်းၵၢတ်ႇၵဝ်ႇ ၼႆယဝ်ႉ။ ယွၼ်ႉၸဝ်ႈၾႃႉၶဝ် မၵ်းမၼ်ႈဝႆႉၼင်ႇၼႆ၊ ၸွမ်းၼင်ႇၶဝ်မၵ်းမၼ်ႈဝႆႉၼၼ်ႉ ၸွမ်းၾိင်ႈၵဵင်းတုင်သေ ၸင်ႇလႆႈဢွၼ် ၵၼ်ၸတ်းႁဵတ်းမႃး ၵူႈပီ တေႃႇထိုင်ယၢမ်းလဵဝ်။ ထႅင်ႈၾၢႆႇၼိုင်ႈၵေႃႈ ၵၢတ်ႇၼႂ်း ၵဵင်းတုင် ဢမ်ႇဝႃႈ ၵၢတ်ႇလူင်၊ ၵၢတ်ႇလဵၵ်ႉ တိုၼ်းဢွၼ်ၵၼ်ဢိုတ်းၵူႈတီႈသေ မႃးၶဝ်ႈႁူမ်ႈၵၢတ်ႇ ၸဝ်ႈၾႃႉၼႆႉတီႈလဵဝ် ဝႃႈၼႆ။


သိုပ်ႇလၢတ်ႈထႅင်ႈဝႃႈ “ၵၢတ်ႇၵဝ်ႇၼႆႉ မၼ်းပဵၼ်တီႈဢၼ်ၶႅၵ်ႇၼွၵ်ႈမိူင်းၶဝ် မႃးဢုပ်ႇၵၼ် ပေႃးပီႈၼွင်ႉၶႄႇမႃးၵေႃႈ ဢုပ်ႇၵၼ်တီႈၼၼ်ႈ၊ ပေႃးပီႈၼွင်ႉလၢဝ်းမႃးၵေႃႈ ဢုပ်ႇၵၼ်တီႈၼၼ်ႈ ပေႃးၶႅၵ်ႇမႃးယဝ်ႉ ဢုပ်ႇၵၼ်ယဝ်ႉ ၸင်ႇတေၶဝ်ႈၵႂႃႇၸူးတီႈၸဝ်ႈၾႃႉ၊ ၵမ်းၼႆႉ ဢၼ်ၶဝ်မႃး ဢုပ်ႇၵၼ်တီႈၼၼ်ႈသမ်ႉ ၶဝ်မႃးဢုပ်ႇ ၵၼ်လွင်ႈသင် မႃးလီႁႃႉ၊ မႃးႁၢႆႉႁႃႉ၊ သင်ဝႃႈမႃးႁၢႆႉၼႆ ႁႅမ်တၢႆပႅတ်ႈတီႈၼၼ်ႈၵမ်းလဵဝ်” ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈပီႈၼွင်ႉၵူၼ်းမိူင်းၵဵင်းတုင် ဢွၼ်ၵၼ်ၼပ်ႉယမ်ထိုဝ်ဝႃႈ သင်ဝႃႈ လႆႈၶဝ်ႈ ၵၢတ်ႇၵဝ်ႇယဝ်ႉၼႆၸိုင် ပဵၼ်ဢၼ်လီမီးမင်ႇၵလႃႇ မၢၵ်ႇမီးလီပဵၼ် ဝႃႈၼႆ။


ၸၢႆးသၢမ် ၵူၼ်းမိူင်းၸႄႈဝဵင်းၵဵင်းတုင် လၢတ်ႈဝႃႈ “ ၸွမ်းၼင်ႇႁဝ်းၶႃႈ ၵူၼ်းမိူင်းယုမ်ႇယမ်တႄႉ သင်ဝႃႈ လႆႈမႃးၶဝ်ႈၵၢတ်ႇၸဝ်ႈၾႃႉယဝ်ႉ ပၢႆးယူႇလီတေလီ၊ ၵၢၼ်ပၢႆးမၢၵ်ႈမီးၵေႃႈ တေမၢၵ်ႈမီးလီ၊ တေၵတ်း ယဵၼ် ၸဵမ်ၸိူဝ်းၼႆႉ တေႃႈၼင်ႇပီႈၼွင်ႉၵူၼ်းမိူင်း ၸိူဝ်းၵႂႃႇႁဵတ်းၵၢၼ် တၢင်ႇတီႈ၊ ၼွၵ်ႈ မိူင်းၸိူဝ်းၼႆႉ ယင်းပွၵ်ႈမႃးၶဝ်ႈႁူမ်ႈ ဝၼ်းၵၢတ်ႇၼႆႉယူႇ” ဝႃႈၼႆ။


ထိုင်မႃး မိူဝ်ႈပီ 1930 ၸဝ်ႈၵွၼ်ႈၵႅဝ်ႈ ဢိၼ်းထလႅင် လၢတ်ႈဝႃႈ ၵၢတ်ႇႁဝ်းၼႆႉ မၼ်းၵႅပ်ႈ ၼႃႇလူး ၼႆသေ ၸင်ႇၶၢႆႉၵႂႃႇႁဵတ်းၵၢတ်ႇထႅင်ႈဢၼ်ၼိုင်ႈ ပဵၼ်ၵၢတ်ႇလူင်ဝဵင်းၵဵင်းတုင် ယၢမ်းလဵဝ်ၼႆႉ ဝႃႈၼႆ။