ၸုမ်းပၵ်းတႃပႂ်ႉတူၺ်းမႄႈၼမ်ႉၼႂ်းၸိုင်ႈတႆး (Action for Shan State River- ASSR) တၢင်တူဝ်ၸုမ်းတူင်ႉၼိုင် တႃႇမႄႈၼမ်ႉၼႂ်းၸိုင်ႈတႆးသေၵႂႃႇသၢႆၼႄႁၢင်ႈတူင်ႉ/ ဝီႊၻီႊဢူဝ်ႊလွင်ႈမႄႈၼမ်ႉၶူင်းၼႂ်းၸိုင်ႈတႆး တီႈမိူင်းၵျပၼ်ႊ။ လုၵ်ႈႁဵၼ်းၸၼ်ႉၸွမ်မိူင်းၵျပၼ်ႊသူၼ်ၸႂ်လွင်ႈၵႅတ်ႇၶႄႁႄႉၵင်ႈသိင်ႇဝႅတ်ႉလွမ်ႉတင်းၼမ်။

ၸၢႆးၸၢႆး ၸုမ်းပၵ်းတႃပႂ်ႉတူၺ်းမႄႈၼမ်ႉၼႂ်းၸိုင်ႈတႆး(ASSR) လၢတ်ႈဝႃႈ- လွင်ႈတၢင်းဢၼ်လႆႈမီးတိုဝ်ႉတၢင်းၵႂႃႇ မိူင်းၵျပၼ်ႊပွၵ်ႈၼႆႉ-"ယွၼ်ႉၶဝ်ႁၼ်ဝီႊၻီႊဢူဝ်ႊတၢင်းဢွၼ်ႊလၢႆႊသေၶဝ်သူၼ်ၸႂ်။ ထႅင်ႈလွင်ႈၼိုင်ႈၵေႃႈ ဢၼ်ပဵၼ်တီႈတၢင်းမိူင်းၵျပၼ်ႊၼႆႉ မီးမေႃၸၢဝ်းၶိူဝ်းမၢၼ်ႈၵေႃႉၼိုင်ႈ၊ မၼ်းၵႂႃႇၵေႃႇတင်ႈ Burma Social Study တီႈၸၼ်ႉၸွမ် Nagoya မိူင်းၵျပၼ်ႊ။ မၼ်းတင်ႈၶိုၼ်ႈမႃးသေမၼ်းၶတ်းၸႂ်ႁွင်ႉၵူၼ်းလူင်ႉလႅၼ်ႇ လွင်ႈမိူင်းမၢၼ်ႈၸိူဝ်းၼႆႉၵႂႃႇပၼ်တၢင်းႁူႉတီႈၸၼ်ႉၸွမ်ၶဝ်ပိူဝ်ႈတႃႇလုၵ်ႈႁဵၼ်းၸၼ်ႉၸွမ်ၶဝ်။ၶဝ်ၵေႃႈႁၼ်ဝႃႈႁူဝ်ၶေႃႈလွင်ႈၼႆႉမၼ်းလမ်ႇလွင်ႈ။ လိူဝ်သေၼၼ်ႉတၢင်ႇမူႇတၢင်းၸုမ်း မိူၼ်ၼင်ႇၾၢႆႇၵိူဝ်းၵုမ်ပၢႆးမၢၵ်ႈမီး NLD ၊ၵူၼ်းႁဵတ်းလိူင်ႈၾၢႆမိတ်ႉသူင်ႇၸိူဝ်းၼႆႉၵေႃႈ လႆႈႁပ်ႉမွၵ်ႇၵႂႃႇပၼ်တၢင်းႁူႉၼင်ႇၵဝ်ႇ"- ဝႃႈၼႆ။


မႄႈၼမ်ႉၶူင်းၼႆႉ ပဵၼ်လွင်ႈလွင်ႈၼိုင်ႈ ဢၼ်လုၵ်ႈႁဵၼ်းမိူင်းၵျပၼ်ၶဝ်သူၼ်ၸႂ်၊ ထိုင်တီႈႁွင်ႉမွၵ်ႇ ၸုမ်းတူင်ႉၼိုင်တႃႇမႄႈၼမ်ႉၼႂ်းၸိုင်ႈတႆးၵႂႃႇသၢႆၼႄႁၢင်ႈတူင်ႉလႄႈၵႂႃႇလႅၵ်ႈလၢႆႈတၢင်းႁူႉတၢင်းႁၼ်ၵၼ်တင်းလုၵ်ႈႁဵၼ်းၵျပၼ်ႊၶဝ်။ လွင်ႈၼႆႉပဵၼ်ၶူင်းၵၢၼ်ၵူႈၸိုင်ႈမိူင်း(International Program)၊ ၵူၺ်းၵႃႈၸိူဝ်းဢၼ်မႃး လႅၵ်ႈလၢႆႈတၢင်းႁူႉတၢင်းႁၼ်ပွၵ်ႈၼႆႉ ပဵၼ်လုၵ်ႈႁဵၼ်းၸၼ်ႉၸွမ်ၵျပၼ်ႊၵမ်ႈၼမ်ၸိူဝ်းတိုၵ်ႉႁဵၼ်း Master ၊ၶဝ်- ၼႆယဝ်ႉ။


လွင်ႈတုမ်ႉတွပ်ႇတီႈၽူႈမႃးၶဝ်ႈႁူမ်ႈတႄႉယူႇတီႈမိူင်းၵျပၼ်ႊၼႆႉ မီးလွင်ႈႁႄႉၵင်ႈလွင်ႈသိင်ႇဝႅတ်ႉလွမ်ႉ ၼမ်လိူဝ်ပိူၼ်ႈ၊ ၶႅမ်ႉလီသေပိူၼ်ႈသေၶဝ်ဝႃႈလွင်ႈၼႆႉ ၶဝ်တေၸၢင်ႈၸွႆႈလႆႈသင်၊ တေယူႇတီႈတၼ်းႁဵင်းၸႂ်သေၸွႆႈထႅမ်ၸိူဝ်းၼႆႉ ဝႃႈၼႆ။


လွင်ႈဢၼ်လႆႈၵႂႃႇသၢႆၼႄႁၢင်ႈတူင်ႉၼႄၶဝ်ၼႆႉ ၸၢႆးၸၢႆးလၢတ်ႈဝႃႈလႆႈလွင်ႈတုမ်ႉတွပ်ႇFeedback ဢၼ်လီ။ မိူဝ်ႈလဵဝ်ၼႆႉလူင်ပွင်ၸိုင်ႈၵျပၼ်ႊၶဝ်ၵေႃႈတေပၼ်ငိုၼ်းၸွႆႈထႅမ် (Budget) တႃႇၸွႆႈမိူင်းမၢၼ်ႈၵဵဝ်ႇၵပ်းလွင်ႈ ၶၵ်ႉၵၢၼ်ငမ်းယဵၼ်၊ လွင်ႈပိုၼ်ႉထၢၼ်ၵူႈလွင်ႈလွင်ႈဢၼ်လူဝ်ႇလႆႈၸႂ်ႉၼႂ်းမိူင်းမၢၼ်ႈ၊ ၶဝ်ၵေႃႈဢမ်ႇႁူႉဝႃႈ လူင်ပွင်ၸိုင်ႈၶဝ်ၼႆႉၵႂႃႇႁဵတ်းဢီႈသင်တႄႉတႄႉ။ ၵွပ်ႈၼၼ်လႄႈၶဝ်ၵေႃႈသူၼ်ၸႂ်ၼၵ်းၼႃသေတုမ်ႉတွပ်ႇဝႃႈ ႁဝ်းသမ်ႉတေလႆႈၸွႆႈၸိူင်ႉႁိုဝ်၊ ယူႇတီႈၵူၼ်းမိူင်းၵျပၼ်ႊသမ်ႉတေလႆႈယူႇၼႂ်းတၼ်းႁဵင်းၸိူင်ႉႁိုဝ်ၸိူဝ်းၼႆႉ။ ႁဝ်းၵေႃႈလၢတ်ႈဝႃႈႁဝ်းလႆႈငိၼ်းၸိူင်ႉၼႆယိၼ်းၸူမ်းတႄႉတႄႉ။ ၶႂ်ႈတိုၼ်းသူၼ်းထိုင်ၵူၼ်းမိူင်းၵျပၼ်ႊ ႁႂ်ႈၸွႆႈၵႅတ်ႇၶႄႁႄႉၵင်ႈပၼ်မႄႈၼမ်ႉၶူင်းပိူဝ်ႈတႃႇၵူၼ်းၸိူဝ်းယူႇႁိမ်းသၢပ်ႇထုင်ႉမႄႈၼမ်ႉၶူင်း- ဝႃႈၼႆ။


ပွၵ်ႈၼႆႉမၼ်းပဵၼ်တိုဝ်ႉတၢင်းဢၼ်ၼိုင်ႈလႄႈ ပဵၼ်လွင်ႈတိုၵ်းသူၼ်းလွင်ႈၼိုင်ႈ။ ဝီႊၻီႊဢူဝ်ႊလွင်ႈၼႆႉ ပေႃးမီးတိုဝ်ႉတၢင်းတႄႉၶႂ်ႈၵႂႃႇသၢႆၼႄတီႈမိူင်းၶႄႇၸွမ်း၊ ၵူၺ်းၵႃႈႁဝ်းၵေႃႈဢမ်ႇႁူႉဝႃႈငဝ်းလၢႆးတေပဵၼ်ၸိူင်ႉႁိုဝ်။ ၼႂ်းလိူၼ်ၼႆႉတေမီးဝၼ်းမႄႈၼမ်ၵူႈၸိုင်ႈမိူင်း (International river day) ၊ ၵွပ်ႈၼၼ်ၵဵဝ်ႇၵပ်းလွင်ႈ မႄႈၼမ်ႉၶူင်းၼႆႉ ႁဝ်းဝူၼ်ႉဝႃႈလီသၢႆၼႄသေတီႈတီႈယူႇ၊ ထုၵ်ႇလီၵႆႉတူၵ်ႇလၢတ်ႈလွင်ႈမၼ်းတႃႇသေႇ၊ ၵူၺ်းၵႃႈမိူဝ်ႈလဵဝ်တႄႉတေသၢႆၼႄထႅင်ႈတီႈလႂ်ၼၼ်ႉယင်းပႆႇမီးၽႅၼ်ၵၢၼ်ၼင်ႇၵဝ်ႇ- ဝႃႈၼႆ။


ပၢင်ပွႆးသၢႆၼႄငဝ်းတူင်ႉပွၵ်ႈၼႆႉမီးလၢႆမူႇလၢႆၸုမ်းၵႂႃႇၶဝ်ႈႁူမ်ႈ၊ ၸတ်းႁဵတ်းတင်ႈတႄႇဝၼ်းတီႈ07ထိုင် 10/03/2017  ၼႆယဝ်ႉ။