ၸုမ်းၵူၼ်းၼုမ်ႇတႆး TYO ၸတ်းပၢင်ၾိုၵ်းလပ်ႉၼမ်ႉၵတ်ႉၵူၼ်းၼုမ်ႇ ၼႂ်းထုင်ႉမိူင်းၸီး ၸႄႈဝဵင်း ၵူတ်ႉၶၢႆ မေႃသွၼ်19 ဝၢၼ်ႈၼႂ်း 7 ဢိူင်ႇၶဝ်ႈႁူမ်ႈႁဵၼ်းဢဝ်။

ဝၼ်းတီႈ 03-08/03/2017 ၸုမ်းၵူၼ်းၼုမ်ႇတႆး (TYO) Tai Youth Organization လႄႈ ၵေႃ လိၵ်ႈလၢႆးလႄႈၾိင်ႈငႄႈတႆး ၸတ်းႁဵတ်းပၢင်ၾိုၵ်းၽွၼ်ႉမေႃသွၼ်။ မီးၶူးပူင်သွၼ် 7ၵေႃႉ မေႃသွၼ် ဢၼ်မႃးၶိုၼ်ႈႁဵၼ်းဢဝ်46ၵေႃႉ။ ၸတ်းႁဵတ်းၵႂႃႇတီႈ ဢိူင်ႇမိူင်းၸီး ၸႄႈဝဵင်း ၵူတ်ႉၶၢႆ ၸႄႈတွၼ်ႈ မူႇၸေႊ ၸိုင်ႈတႆးပွတ်းႁွင်ႇ။


ပူင်သွၼ်ပၼ် လၢႆးပူင်သွၼ်လိၵ်ႈတႆး၊ ပၢႆးပိုၼ်း၊ ပၢႆးၾိင်ႈပဵၼ်၊ ပၢႆးၼပ်ႉ၊ ပၢႆးဢိင်းၵလဵတ်ႈ၊ ပၢႆးၽူႈ ဢွၼ်ႁူဝ်၊ ပၢႆးၾိင်ႈငႄႈပုတ်ႉထ၊ လၢႆးၶႅၼ်ႉတႆး ၸိူဝ်းၼႆႉ။


ၸၢႆးထုၼ်းလႃႉ ႁူဝ်ပဝ်ႈၸုမ်းၵူၼ်းၼုမ်ႇတႆး TYO လၢတ်ႈဝႃႈ - “ယိူင်းဢၢၼ်းတွၼ်ႈတႃႇပီႈၼွင်ႉတႆး ၸိူဝ်းယူႇဝၢၼ်ႈၼွၵ်ႈၼႃးပၢင်ႇ ယွၼ်ႉၵမ်ႈပႃႈၼမ် ဢမ်ႇၶဝ်ႈၸႂ်ပၢႆးပၺ်ၺႃ ယွၼ်ႉဢမ်ႇႁၼ်တီႈတိုဝ်း မၼ်း ဢွၼ်ၵၼ်ပၢႆႈၵႂႃႇမိူင်းၶႄႇ၊ မိူင်းထႆး တိၵ်းတိၵ်းလႄႈ ၸၢဝ်းၶိူဝ်းဢွၼ်ၵၼ်ၽိုတ်ႉၶဝ်ႈမႃး ၼႂ်းမိူင်း ႁဝ်း ပေႃးဢမ်ႇထၢတ်ႇဢမ်ႇဝၢႆးလႆႈ တႃႇႁႂ်ႈၵူၼ်းမိူင်းႁဝ်းတေပွင်ႇၸႂ်လႄႈသင် တိုဝ်ႉတၢင်းႁႂ်ႈပီႈၼွင်ႉ တႆးႁဝ်းလႆႈမႃးႁူပ်ႉထူပ်းမိုတ်ႈၵိုဝ်း မီးလွင်ႈၽွမ်ႉႁူမ်ႈၸမ်ၸႂ်ၵၼ်လႄႈသင် ၸင်ႇလႆႈၸတ်းႁဵတ်း ပၢင်သွၼ် ယုမ်ႇယမ်ဝႃႈ ၵူၼ်းၼုမ်ႇတႆးတေပဵၼ်ၼေႃႇတႅၼ်းၶိူဝ်း ၽူႈဢွၼ်ႁူဝ်ၵႂႃႇမိူဝ်းၼႃႈယူႇ” ဝႃႈၼႆ။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 02/03/2017 ၸုမ်းၵူၼ်းၼုမ်ႇတႆး TYO ၸႄႈဝဵင်းသီႇသႅင်ႇ ႁူပ်ႉထူပ်းၵူၼ်းမိူင်း လၢႆဝၢၼ်ႈမိူၼ်ၼင်ႇ ဝၢၼ်ႈၼွင်မွၼ်၊ ဝၢၼ်ႈယဵၼ်ႇ၊ သၢႆလႄး၊ ၵုင်းသုတ်း၊ တၢမ်ၽၢၵ်ႇ ၼႂ်းထုင်ႉပူင်း ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း။ ဢုပ်ႇဢူဝ်း လႅၵ်ႈလၢႆႈ တွင်ႈထၢမ် လွင်ႈၵၢၼ်ယူႇၵၢၼ်ၵိၼ်၊ ၵၢၼ်ၽုၵ်ႇသွမ်ႈ၊ ၵၢၼ်ႁႃလွၵ်းၵၢတ်ႇ၊ ၵၢၼ်လိူၵ်ႈၸႂ်ႉၸိူဝ်ႉ ၽၼ်းၸိူဝ်းၼႆႉ။