ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) တေပႆႇပဵၼ်ၸတ်းႁဵတ်း ပၢင်ၵုမ်လူင်ၶွပ်ႈၶူပ်ႇတဵမ်  ၼႂ်းလိူၼ်မၢတ်ႉၶျ် ၸွမ်းၼင်ႇဢၼ်တမ်းၽႅၼ်ၵၼ်မႃးၵူႈပီ ယွၼ်ႉႁိုၵ်ႉတၢင်း ၶၢဝ်းႁၢင်ႈႁႅၼ်း ပၢင်လိူၵ်ႈတင်ႈသွမ်ႈ ၼႂ်းႁူဝ်လိူၼ်ဢေႊပရိူဝ်ႊ 2017။

ဝၼ်းတီႈ 12/03/2017 ယူႇတီႈၶွမ်ႊမတီႊ ၵေႃႁူမ်ႈသၢင်ႈၸိုင်ႈတႆး SSJAC ဢွၵ်ႇလိၵ်ႈသေ သူင်ႇထိုင် ၸုမ်းႁူဝ်ပဝ်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး၊ ၸုမ်းၽူႈၼမ်းၼႂ်းလႄႈ လုၵ်ႈၸုမ်း ၵေႃပွင် ၵၢၼ်ၽွမ်ႉႁူမ်ႈၸိုင်ႈတႆး တင်းသဵင်ႈဝႃႈယွၼ်ႉၵၢၼ်ငၢၼ်း ၵူႈလွင်ႈလွင်ႈ ငဝ်းလၢႆးၵူႈဢၼ် ဢၼ် သေ ဢမ်ႇပႆႇတူဝ်ႈတၼ်းလီ တႃႇတေၸတ်းႁဵတ်းပၢင်ၵုမ်လူင်ၶွပ်ႈၶူပ်ႇၼိုင်ႈပီ ၼႂ်းလိူၼ်မၢတ်ႉၶျ် ၸိူင်ႉၼင်ႇ ဢၼ်ယၢမ်ႈၸတ်းမႃး ၵူႈပီ ဝႃႈၼႆ။


ယိင်းႁၢၼ်ၾႃႉ ၽူႈၶၢၼ်ပၢၵ်ႇ ၸုမ်းၵပ်းသၢၼ်လွင်ႈၼၢင်းယိင်းတႆး/ ၸုမ်းတူင်ႇဝူင်းၵူၼ်းတႆး (Shan CBOs) လၢတ်ႈဝႃႈ “ ၵွပ်ႈဝႃႈ ၽူႈၼမ်းၸုမ်း CSSU ယၢမ်းလဵဝ်ၼႆႉ သမ်ႉပဵၼ် ၸုမ်းႁူဝ်ပဝ်ႈ SSJAC၊ ၼႂ်း SSJAC ၼၼ်ႉသမ်ႉ မီး SNLD၊ SSPP လႄႈ ၸုမ်းသႅင်ၵႅဝ်ႉ။ ၵွပ်ႈပိူဝ်ႈၸိူင်ႉၼႆ SNLD သမ်ႉ ပၢင်လိူၵ်ႈတင်ႈသွမ်ႈၵေႃႈသမ်ႉၸမ် ယွၼ်ႉၼၼ် လူဝ်ႇႁၢင်ႈႁႅၼ်းၼႂ်းပၢင်လိူၵ်ႈ တင်ႈသွမ်ႈၵေႃႈ ပိူင်ၼိုင်ႈလႄႈပႆႇတူဝ်ႈတၼ်း၊ ယူႇတီႈပၢင်ၵုမ်လူင် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ၶွပ်ႈၶူပ်ႇၼိုင်ႈ ပီၼႆႉ တေပႆႇၸၢင်ႈပဵၼ်လႆႈ။ လႅပ်ႈတေပဵၼ်ဝၢႆးလင်ပၢင်လိူၵ်ႈတင်ႈသွမ်ႈၵူၺ်း” ဝႃႈၼႆ။


သိုပ်ႇလၢတ်ႈထႅင်ႈဝႃႈ “ ႁဝ်းၶႃႈ လုၵ်ႈၸုမ်း CSSU ၵေႃႈ ႁၼ်လီၵမ်ႉထႅမ်သေ ဢမ်ႇၵႃး၊ တူဝ်ႈတၼ်း တႃႇတေၸွႆႈထႅမ် ၵၢၼ်လွင်ႈၽွမ်ႉႁူမ်ႈတႆးယူႇ” ဝႃႈၼႆ။
လွင်ႈပၢင်ၵုမ်လူင် ႁူဝ်ႁုပ်ႈပီ၊ ပၢင်ၶၢႆႉလၢႆႈမွပ်ႈယိုၼ်ႈတၼ်းႁဵင်း ႁူဝ်ပဝ်ႈလူင် ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး CSSU   ၼႆႉ တႅပ်းတတ်းၸတ်းႁဵတ်းၼႂ်းလိူၼ်မၢတ်ႊၶျ်ၵူႈပီ။ တႃႇၸတ်းပၢင်ၵုမ်လူင် ၼႂ်းပီ 2017  ယူႇတီႈၵေႃ ႁူမ်ႈသၢင်ႈၸိုင်ႈတႆး SSJAC သေ တေပွင်ႇလႅင်းမွၵ်ႇထိုင်ထႅင်ႈၵမ်းၼိုင်ႈ ဝႃႈတေ ၸတ်းႁဵတ်းမိူဝ်ႈလႂ်၊ တီႈလႂ် ၸဵမ်ၶေႃႈမုလ်း ၸိူဝ်းၼႆႉ ဝႃႈၼႆ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) ၊ ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၊ ၵေႃႁူမ်ႈသၢင်ႈၸိုင်ႈတႆး SSJAC [ဢၼ်မီး SSPP/SSA ၊ ပႃႇတီႇႁူဝ်သိူဝ် SNLD ၊ တပ်ႉသိုၵ်းၵူၼ်းမိူင်း (ၸုမ်းပီႇတုၸိတ်ႉသႅင်ၵႅဝ်ႉ)၊] ၸုမ်းတူင်ႇဝူင်းၵူၼ်းတႆး CBOs ၼႂ်းမိူင်းၼွၵ်ႈမိူင်း ႁူမ်ႈၸႂ်ၵၼ်ၵေႃႇတင်ႈမႃး မိူဝ်ႈဝၼ်းတီႈ 17/10/2013 ။


မိူဝ်ႈလဵဝ် ပႃႇတီႇမႂ်ႇသုင်တီႇမူဝ်ႇၶရႅတ်ႉတိၵ်ႉမိူင်းတႆးပွတ်းဢွၵ်ႇ (ESSDDP) ႁိုဝ် ပႃႇတီႇၵွင်ၸႆး ၵေႃႈၶဝ်ႈပႃး ပဵၼ်လုၵ်ႈၸုမ်းဝႆႉလႄႈ တင်းမူတ်းမီးလုၵ်ႈၸုမ်း 10 ၸုမ်း။


ယိူင်းဢၢၼ်းလူင် ဢၼ်လႆႈၶွတ်ႇၽွတ်ႈ CSSU မႃးၼႆႉ ပိူဝ်ႈတႃႇၵႅတ်ႇၶႄႁႄႉၵင်ႈ သုၼ်ႇလႆႈၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း။ မီးယိူင်း ဢၢၼ်း လႄႈ လၵ်းၵၢၼ် သွင်ပိူင်- 1.ပိူဝ်ႈတႃႇ ၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း ၽွမ်ႉ ႁူမ်ႈၵၼ်ၵႄႈ လိတ်ႈ ၵမ်ၸႃတႃ (ၵၢမ်ႇၵျမ်ႇမႃႇ) ၸိုင်ႈတႆး။ 2.ပိူဝ်ႈတႃႇႁူမ်ႈၵၼ် ႁၢင်ႈႁႅၼ်း ယူင်ႉ ၶၢပ်ႈၵၢၼ်မိူင်း (Political frame-work) တႃႇဢုပ်ႇဢူဝ်း ၵၢၼ်မိူင်းၸိုင်ႈတႆးၼႂ်းဝၼ်းမိူဝ်းၼႃႈ။