ၶွမ်ႊမသျိၼ်ႊပႂ်ႉပႃးလၵ်းမၢႆလႄႈ ထတ်းသၢင်ၼႃႈၵၢၼ် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး (SSPP/SSA) ဢွၵ်ႇၶေႃႈပိုၼ်ၽၢဝ်ႇ ထိုင်ၵူႈတပ်ႉ/ ၵူႈႁွင်ႈၵၢၼ် ဢိၵ်ႇ ပေႃႈမႄႈၵူၼ်းမိူင်း ၼႂ်းပိုၼ်ႉတီႈၼႃႈလိၼ် ပႃႇတီႇမႂ်ႇသုင်ၸိုင်ႈတႆးၵုမ်းၵမ်၊ ႁႂ်ႈဢွၼ်ၵၼ်ပႂ်ႉပႃးထိူၼ်ႇၶိူဝ်းၽိူဝ်မႆႉ၊ တေဢမ်ႇလႆႈလၢမ်းၶႂၢၵ်ႈႁဵတ်းႁႆႈလိုမ်း ၸုတ်ႇၽဝ်ပႃႇ၊ တေဢမ်ႇလႆႈလိုပ်ႈတီႉ ႁၢင်ႈၵၢင်ဢဝ်တူဝ်သတ်း ၼႂ်းၼမ်ႉဢိၵ်ႇၼိူဝ်လွႆ။

လိၵ်ႈပိုၼ်ၽၢဝ်ႇၼႆႉ ဢွၵ်ႇမိူဝ်ႈဝၼ်းတီႈ 15/03/2017 ။ ၼႂ်းလိၵ်ႈၼၼ်ႉ ပႃးဝႆႉဝႃႈ ၵူႈဝၢၼ်ႈ/ၸုမ်း/ဢိူင်ႇ/ၸႄႈဝဵင်း တေလႆႈၶွတ်ႇၽွတ်ႈမီးဝႆႉ ၸုမ်းပႂ်ႉပႃးထိူၼ်ႇၶိူဝ်းၽိူဝ်မႆႉ ၵူႈၸၼ်ႉၸၼ်ႉ၊ တေလႆႈတတ်းမၵ်းပိုၼ်ႉတီႈ ဢမ်ႇတႅပ်းၾၼ်းလိူဝ်ႈမႆႉ၊ ပိုၼ်ႉတီႈဢမ်ႇလႆႈႁဵတ်းႁႆႈလိုမ်း။ ပိုၼ်ႉတီႈၸိူဝ်းတေလႆႈၽုၵ်ႇသွမ်ႈတူၼ်ႈမႆႉ ၸိူဝ်းၼႆႉလႄႈ တေလႆႈတမ်းၽႅၼ်ၽုၵ်ႇသွမ်ႈတူၼ်ႈမႆႉလႄႈ ပႂ်ႉပႃးထိူၼ်ႇၶိူဝ်းၵႂႃႇ ၸိူဝ်းၼႆႉ။


တေလႆႈတတ်းမၵ်းပႃး ပိုၼ်ႉတီႈတူဝ်သတ်းၼိူဝ်လွႆယူႇ မိူၼ်ၼင်ႇ ပိုၼ်ႉတီႈဢမ်ႇလႆႈႁၢင်ႈၵၢင်ပိုတ်းယိုဝ်းတူဝ်သတ်း ၼိူဝ်လွႆ။ တိုၼ်းတေဢမ်ႇလႆႈၸုတ်ႇၽဝ်ပႃႇထိူၼ်ႇ။  ပိုၼ်ႉတီႈၸိူဝ်းဢၼ်မီးသုၼ်ႇလႆႈႁဵတ်းႁႆႈ/ႁႆႈလိုမ်း/သူၼ်၊ မီးၵၢၼ်ၸုတ်ႇၽဝ်ၼၼ်ႉၵေႃႈ ၼင်ႇႁိုဝ်ၾႆးတေဢမ်ႇလၢမ်းမႆႈထိူၼ်ႇပႃႇလႆႈၼၼ်ႉ တေလႆႈၵႅတ်ႇၶႄလႅၼ်ၶႅၼ်ႈ လီငၢမ်း ၸင်ႇလႆႈၸုတ်ႇၽဝ်။


လိူဝ်သေၼၼ်ႉ တေဢမ်ႇလႆႈဢဝ်ယႃႈမိူဝ်ႇဢွႆႇတူဝ်သတ်းၼႂ်းၼမ်ႉ လႄႈ ၼိူဝ်လွႆ။ တေဢမ်ႇလႆႈဢဝ် ပႅတ်ႊထရီႊ၊ ဢဝ်ၸၢၵ်ႈၾႆး၊ ဢဝ်ၾႆးၾႃႉၸိူဝ်းၼႆႉ သျွတ်ႊတီႉဢဝ်တူဝ်သတ်းၼႂ်းၼမ်ႉ ၼိူဝ်လွႆ- ၼႆယဝ်ႉ။


ၶေႃႈပူင်ပိုၼ်ၽၢဝ်ႇၼႆႉ ၸဵမ်ၵူၼ်းသိုၵ်းလႄႈၵူၼ်းမိူင်းၵူႈၵေႃႉ တေလႆႈႁဵတ်းၸွမ်း။ ၼင်ႇႁိုဝ်ၵူႈၵေႃႉ တေဢမ်ႇပူၼ်ႉပႅၼ်ၼၼ်ႉ ၽူႈၵွၼ်းတပ်ႉ ၽူႈၵွၼ်းႁွင်ႈၵၢၼ် တေလႆႈဢွၼ်ၵၼ်ပၼ်ပိုၼ်ႉႁူႉၵႂႃႇ၊ သင်ဝႃႈမီးၵေႃႉ ဢၼ်ပူၼ်ႉပႅၼ်ၸိုင် တေလႆႈဢွၼ်ၵၼ်ထတ်းသၢင်မူၼ်ႉမႄးလႄႈ ဢဝ်လိူင်ႈပၼ်တူတ်ႈတၢမ်ႇတၢင်းၽိတ်းၵႂႃႇ ၼင်ႇၵိုင်ႇၼမ်ႉၵိုင်ႇတူဝ်- ၼႆယဝ်ႉ။