ၼႂ်းၸိုင်ႈတႆးပွတ်းႁွင်ႇ တၢင်းပွတ်း မိူင်းယႆ သီပေႃႉ ၸိူဝ်းၼႆႉ သင်ၶၸဝ်ႈ လႄႈ ၶူးသွၼ်လိၵ်ႈ သၢၼ်မိုဝ်းၵၼ် တႄႇပၢင်သွၼ် ႁူင်းႁဵၼ်းထမ်မ လႄႈ ၵၢၼ်ႁဵၼ်းၵၢၼ်သွၼ်လိၵ်ႈတႆး ၶၢဝ်းမႆႈ၊ ၽွင်းၶၢဝ်းႁပ်းဢိုတ်းႁူင်းႁဵၼ်းလူင်ပွင်ၸိုင်ႈ။


မိူဝ်ႈဝၼ်းတီႈ  17/3/2017  ယၢမ်း 9 မူင်း ၵၢင်ၼႂ်ၼၼ်ႉ သင်ၶၸဝ်ႈ ၊ ၽူႈယႂ်ႇၵူၼ်းလူင်၊ ၶူးသွၼ် လႄႈ ၵူၼ်းဝၢၼ်ႈၵူၼ်းသူၼ် ၶဝ်ႁူမ်ႈသေ တႄႇပိုတ်ႇပၢင်သွၼ်လိၵ်ႈတႆး  ၶၢဝ်းမႆႈ လႄႈ ပၢင်သွၼ်ႁူင်းႁဵၼ်းထမ်မ ၊ တီႈဝၢၼ်ႈပႃႇၵၢင်း ဢိူင်ႇပႃႇၵၢင်း ၸႄႈဝဵင်းမိူင်းယႆ။

လွင်ႈလႆႈၸတ်းႁဵတ်းပၢင်သွၼ်ၼၼ်ႉ ၽူႈယႂ်ႇၵူၼ်းလူင် ဢၼ်ၸွႆႈၶပ်းၶိုင်ပၼ်ၼၼ်ႉလၢတ်ႈဝႃႈ - “ပေႃႈမႄႈလုၵ်ႈဢွၼ်ၶဝ် တၵ်းလႆႈမီးလွင်ႈ ပွင်ႇၸႂ်၊ မီးၸႂ် ၶႂ်ႈသူင်ႇလုၵ်းလၢင်း ၸဝ်ႈၵဝ်ႇ ၵႂုႇႁူင်းႁဵၼ်း၊ ႁႂ်ႈပဵၼ်ၵူၼ်းႁူႉၵူၼ်းႁၼ် ပဵၼ်ၼေႃႇတႅၼ်းၶိူဝ်း  တႃႇၸိူဝ်ႉၸၢတ်ႈဝၢၼ်ႈမိူင်း ၶၢဝ်းယၢဝ်းမိူဝ်းၼႃႈ၊ ၸိူဝ်းဢမ်ႇႁူႉလိၵ်ႈတႆးၼၼ်ႉ    ႁႂ်ႈသမ်ႉပေႃးမေႃႁူႉ၊ ဢမ်ႇႁူႉထမ်မ ၼၼ်ႉ ႁႂ်ႈပေႃးႁူႉသေ မေႃဢဝ်ၸႂ်ႉၼႂ်းၸူဝ်ႈပၢၼ်” - ဝႃႈၼႆ။


ပၢင်သွၼ်တီႈဝၢၼ်ႈပႃႇၵၢင်းၼႆႉ မီးလုၵ်ႈႁဵၼ်း 170 ပၢႆ။ မေႃသွၼ်မီး 4 ၵေႃႉ ၊ သင်ၶၸဝ်ႈ ဢၼ်မႃးၸွႆႈသွၼ်မီး 5 တူၼ်၊ ယိူင်းဢၢၼ်းတႄႇသွၼ်ၵႂႃႇ တေႃႇပေႃးထိုင်လိူၼ်ႁူၵ်းမႂ်ႇ၊ ၶၢဝ်း တၢင်း 2 လိူၼ်။


မေႃသွၼ် ယိင်းၼုမ်ႇမူၺ် လၢတ်ႈဝႃႈ - “ ပၢင်သွၼ်လိၵ်ႈလၢႆးတႆး ႁူင်းႁဵၼ်းထမ်မ ၵမ်းၼႆႉ ပဵၼ်ပွၵ်ႈၵမ်း 3 ။ ႁဝ်းၶႃႈၵေႃႈ တေၶတ်းၸႂ်ပၼ်ပၢင်သွၼ်ၵႂႃႇ၊ ပေႃးယဝ်ႉ တေမီးပၢင်ပွႆး လူင်းပၢင်သွၼ်၊ ယွင်ႈယေႃးလုၵ်ႈႁဵၼ်းၵတ်ႉၶႅၼ်ႇ ၸဵမ်ၸိူဝ်းၼႆႉဢေႃႈ” - ဝႃႈၼႆ။


ၼႂ်းဢိူင်ႇပႃႇၵၢင်း မီး 4 ဝၢၼ်ႈ - မိူၼ်ႈၼင်ႇ ဝၢၼ်ႈပႃႇၵၢင်း၊ ၼႃးလၢၼ်ႇ၊ လွႆယွႆး လႄႈ ဝၢၼ်ႈ ၼမ်ႉႁူးၾႃႉလင် - လုၵ်ႈႁဵၼ်းၵေႃႈ ပဵၼ်လုၵ်ႈလၢင်း ၵူၼ်းဝၢၼ်ႈၸိူဝ်းၼႆႉ။

ၸိူင်ႉၼင်ႇၼႂ်းၸႄႈဝဵင်းမိူင်းယႆ ၸတ်းႁဵတ်းပၢင်သွၼ်လိၵ်ႈတႆးၶၢဝ်းမႆႈ၊ ပၢင်သွၼ်ႁူင်းႁဵၼ်း ထမ်မ ၼၼ်ႉ တၢင်းပွတ်းသီႇပေႃႉ ဢိူင်ႇၼွင်ၵေႃႈ ၵေႃႈမီးပၢင်သွၼ်။ တၢင်ႇဝၢၼ်ႈ တၢင်ႇဝဵင်းၵေႃႈ လႆႈႁူႉဝႃႈမီးပၢင်သွၼ်ၶၢဝ်းမႆႈ ၸိူင်ႉၼႆၼင်ႇၵဝ်ႇ။


ပၢင်သွၼ်လိၵ်ႈတႆး ၼႆႉ ၸတ်းႁဵတ်းၶၢဝ်းႁူင်းႁဵၼ်းလူင်ပွင်ၸိုင်ႈဢိုတ်း၊ ၼႂ်းၶၢဝ်းမႆႈၼႆႉမႃး ပၢၼ်သိုပ်ႇပၢၼ်။ ပၢင်သွၼ်ႁူင်းႁဵၼ်းထမ်မ  တႄႉ ယူႇတီႈ မုၵ်ႉၸုမ်းသင်ၶၸိုင်ႈတႆး ပဵၼ်ၵဝ်ႉၵၼ်းသေ တႄႇၸတ်းသွၼ်မႃး ၼႂ်းၶၢဝ်းတၢင်း 3-4 ပီ မႃးၼႆ။