ပႃႇတီႇသိူဝ်ၽိူၵ်ႇ (SNDP) လူင်းႁူပ်ႉထူပ်းၵူၼ်းမိူင်းလႄႈ ႁႃသဵင်တွၼ်ႈတႃႇ ပၢင်လိူၵ်ႈတင်ႈသွမ်ႈ ၼႂ်းၸႄႈဝဵင်းၵေးသီး၊ သပ်းလႅင်းလၢတ်ႈၼႄ ၶေႃႈယိူင်းဢၢၼ်းပႃႇတီႇ၊ လၢႆးတွတ်ႈၶႅပ်းၵၢ င်ၸႂ်။ ဢွၼ်ၼႃႈၼႆႉၵေႃႈ လူင်းသူၼ်းတုမ်ႁႃသဵင် ၼႂ်းၸႄႈဝဵင်းမိူင်းသူႈ။


မိူဝ်ႈဝၼ်းတီႈ 16/03/2017 တင်ႈတႄႇၶၢဝ်းယၢမ်း 10 မူင်းၵၢင်ၼႂ်တေႃႇထိုင်ဝၢႆးဝၼ်းတၢမ်းၶမ်ႈ တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) လူင်းႁူပ်ႉထူပ်းၵူၼ်းမိူင်း ၼႂ်းဢိူင်ႇဝၢၼ်ႈၸၢမ် ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ သူၼ်းတုမ်ႁႃသဵင် ပိူဝ်ႈတႃႇပေႉၵၢၼ်လိူၵ်ႈတင်ႈသွမ်ႈ ဢၼ်တေၸတ်းႁဵတ်းၽွင်းႁူဝ်လိူၼ် ဢေႊပရိူဝ်ႊၼႆႉ-ၼႆယဝ်ႉ။

"ပၢင်ႁူပ်ႉထူပ်းၵူၼ်းမိူင်းၼႆႉ သပ်းလႅင်းၼႄ ၶေႃႈယိူင်းဢၢၼ်းပႃႇတီႇ၊ ၽွင်းတႅၼ်းလႄႈပၢင်လိူၵ်ႈတင်ႈ၊ လၢႆးတွတ်ႈၶႅပ်းၵၢင်ၸႂ် ၸိူဝ်းၼႆႉ။ လိူဝ်သေၼၼ်ႉ ပဵၼ်တွၼ်ႈတွင်ႈထၢမ်/တွပ်ႇ။ ၼႂ်းတွၼ်ႈတွင်ႈထၢမ်/တွပ်ႇၼၼ်ႉ ဢၼ်ၵၢင်ၸႂ်ၵူၼ်းမိူင်းၶႂ်ႈလႆႈၶႂ်ႈပဵၼ်ၼၼ်ႉမီး 1.ၶႂ်ႈႁႂ်ႈပႃႇတီႇတႆးပဵၼ်ဢၼ်လဵဝ်ၵၼ်။ 2.လွင်ႈၶႅပ်းမၢႆၾၢင် (မၢတ်ႈပူင်ႇတိၼ်ႇ)။ 3.လွင်ႈသဵၼ်ႈတႃႈသၢႆတၢင်း၊ လွင်ႈတိတ်းတေႃႇၵပ်းသိုပ်ႇၸိူဝ်းၼႆႉ ၶႂ်ႈႁႂ်ႈလီ"- ၸၢႆးသၢမ်မိူင်းထီး ၽူႈၶဝ်ႈၸုမ်းမူႇၸေႊ လၢတ်ႈ။


ပႃႇတီႇသိူဝ်ၽိူၵ်ႇ ပႃႇတီႇသိူဝ်ၽိူၵ်ႇ လူင်းသူၼ်းတုမ်ႁႃသဵင်ၼႂ်းၸႄႈဝဵင်းၵေးသီးၼႆႉ ဢွၼ်ၼႃႈၼႆႉမိူဝ်ႈဝၼ်းတီႈ 15/03/2017 လူင်းႁူပ်ႉထူပ်းသူၼ်းတုမ်ၵူၼ်းမိူင်း ၼႂ်းဢိူင်ႇၶွၵ်ႈၸၢင်ႉ။ ဝၼ်းတီႈ 14/03/2017 ႁူပ်ႉထူပ်းၵူၼ်းမိူင်းတီႈပွၵ်ႉလူင်ပူႉ ပွၵ်ႉဝၢၼ်ႈၵၢင်။ ဝၼ်းတီႈ 13/03/2017 ႁူပ်ႉထူပ်းၵူၼ်းမိူင်း တီႈပွၵ်ႉဝၢၼ်ႈပၢင်ႇ ဢိူင်ႇမိူင်းၵၢဝ် ၸိူဝ်းၼႆႉ။


ၼွၵ်ႈသေၼၼ်ႉ မိူဝ်ႈဝၼ်းတီႈ 10/03/2017 ၵေႃႈ လူင်းႁူပ်ႉထူပ်းသူၼ်းတုမ်ၵူၼ်းမိူင်း တႃႇပေႉၵၢၼ်လိူၵ်ႈတင်ႈသွမ်ႈ တီႈဝၢၼ်ႈၼႃးပေ ဢိူင်ႇၼမ်ႉတွင် ၼႂ်းၸႄႈဝဵင်းမိူင်းသူႈ၊ တွင်ႈထၢမ်သဵင်ႁူဝ်ၸႂ်ၵူၼ်းမိူင်း ၸိူဝ်းၼႆႉ။


ပႃႇတီႇသိူဝ်ၽိူၵ်ႇၼႆႉ ၽူႈတေၶဝ်ႈၶႅင်ႇသၽႃးၵူၼ်းမိူင်း ပဵၼ်ၼၢင်းၶမ်းယဵၼ်ႇဢွင်ႇ၊ ၸႄႈမိူင်းမၢႆ 1 ပဵၼ်ၸၢႆးပႃႉထုၼ်း၊ မၢႆ2 ၼၢင်းၸၢမ်ဢူး။ လိူဝ်သေၼၼ်ႉ ၼႂ်းၸႄႈဝဵင်းၵေးသီး ၽူႈတႅၼ်းသၽႃးၵူၼ်းမိူင်း ပဵၼ်ၼၢင်းတိၼ်ႇဢူး၊ ၸႄႈမိူင်းမၢႆ 1 ၼၢင်းၼူၺ်းၼူၺ်း၊ မၢႆ2 ၼၢင်းမွၼ်းဢွင်ႇ။ တီႈဝဵင်းၵဵင်းတုင် ၽူႈတႅၼ်းသၽႃးၶဵတ်ႇလိူၵ်ႈတင်ႈမၢႆ 2 ပဵၼ်ၻွၵ်ႊတိူဝ်ႊၸၢႆးယွတ်ႈႁွင်။


ၵၢၼ်လူင်းသူၼ်းတုမ် ၶွင်ပႃႇတီႇသိူဝ်ၽိူၵ်ႇ (SNDP) ၼႆႉ လုၵ်ႈၸုမ်းပႃႇတီႇသိူဝ်ၽိူၵ်ႇလၢႆလၢႆၸႄႈဝဵင်း မိူၼ်ၼင်ႇမူႇၸေႊ၊ ၵူတ်ႉၶၢႆ၊ ၵျွၵ်ႉမႄး၊ သီႇပေႃႉ/ၼမ်ႉလၼ်ႈ၊ တူၼ်ႈတီး၊ မိူင်းပၼ်ႇ၊ မိူင်းသၢတ်ႇ၊ မိူင်းၽျၢၵ်ႈ၊ တႃႈၶီႈလဵၵ်းၸိူဝ်းၼႆႉ ႁူမ်ႈၵၼ်လူင်းသူၼ်းတုမ်။


ပၢင်လိူၵ်ႈတင်ႈသွမ်ႈပွၵ်ႈၼႆႉ ပႃႇတီႇသိူဝ်ၽိူၵ်ႇ တေလႆႈၶႅင်ႇၵၼ်တင်းပႃႇတီႇႁူဝ်သိူဝ်ၵူၺ်းဢမ်ႇၵႃး ယင်းတေလႆႈၶႅင်ႇပႃး ပႃႇတီႇယႂ်ႇလူင် မိူၼ်ၼင်ႇပႃႇတီႇၼူၵ်ႉယုင်း၊ ပႃႇတီႇသၢင်ႇသီႈ ၸိူဝ်းၼႆႉထႅင်ႈၵွၼ်ႇ။