သိုၵ်းမၢၼ်ႈႁႅၼ်းသိုၵ်းလေႃႇတိုၵ်း သိုၵ်းတႆး RCSS/SSA ၾၢႆႇႁွင်ႇ ထတ်ႈၸႅတ်ႈၽြႃးၵၢင်ႉမေႃႇ (သီႇပေႃႉ) 7 လၵ်း၊ သိုၵ်းသွင်ၾၢႆႇသိုပ်ႇၶဵင်ႈၶႅင်တေႃႇ ၵၼ်တေႃႇထိုင်ဝၼ်းမိူဝ်ႈၼႆႉသေတႃႉ ပွႆးလိူၼ်သီႇမေႃႇၵိူဝ် (ထၢတ်ႈၽြႃးၵၢင်ႉမေႃႇ/ ၽြႃးမေႃႇၵျူဝ်ႇ) ၵိုၼ်းၶွၼ်ႈလိူဝ်ၵူႈပီ။

ပွႆးၽြႃးၽီပၢင်း ထၢတ်ႈၵၢင်ႉမေႃႇ ဝဵင်းသီႇပေႃႉ တႄႇပိုတ်ႇပၢင် မိူဝ်ႈ ဝၼ်းတီႈ 7/3/2017 ၼၼ်ႉ ၵူၼ်းမႃး ပွႆး မီးမွၵ်ႈ 4000 ။  ပၢင်ပွႆး တေမီးထိုင် လိူၼ်သီႇလွင်ႈ 1 ၶမ်ႈ (ဝၼ်းတီႈ 13/3/2017) ၶၢဝ်းတၢင်း 7 ဝၼ်း။


ႁူဝ်ပဝ်ႈၾၢႆႇပူၵ်းပွင်လုမ်းလႃး ထၢတ်ႈၵၢင်ႉမေႃႇ လုင်းသၢင်ႇၸၢႆး လၢတ်ႈၼႄ ဝႃႈ - “ပၢင်တိုၵ်း ပဵၼ် ၾၢႆႇႁွင်ႇ ၼႆႉမွၵ်ႈ 7 လၵ်းၵူၺ်းၶႃႈ။ ၵူၺ်းၵႃႈ ဢမ်ႇတုမ်ႉယွၼ်ႈသင် တင်းပၢင်ပွႆးၽြႃးႁဝ်းၶႃႈ။ ပဵၼ်ပွႆး ထၢတ်ႈ ၸႅတ်ႈ ၶႃႈလူး။ ၵူၼ်းယင်းမႃး ၵိုၼ်းလိူဝ် ၵူႈပီၵွၼ်ႇဢေႃႈ” - ၼင်ႇၼႆ။


ဝၼ်းတီႈ 7/3/2017 ယၢမ်း ဝၢႆးဝၼ်း 2 မူင်းပၢႆ ၼၼ်ႉသိုၵ်းမၢၼ်ႈ ပွႆႇမၢၵ်ႇလူင်သႂ်ႇတပ်ႉသိုၵ်းၸိုင်ႈတႆး RCSS/SSA ဢၼ်ပၵ်းသဝ်းယူႇ ႁိမ်းလွႆ မုင်ႈၸု ၼႂ်းဢိူင်ႇဢုမ်မု ၾၢႆႇႁွင်ႇဝဵင်းသီႇပေႃႉ။ သွင်ၾၢႆႇ လႆႈပဵၼ်ပၢင်တိုၵ်းၵၼ်တေႃႇႁူဝ်ၶမ်ႈ။ ယိုဝ်းၵၼ် ၶၢဝ်းတၢင်း 4 ၸူဝ်ႈမူင်းပၢႆ။


“ၶဝ်မႃးၶိုၼ်ႈယိုဝ်း လႄႈ လႆႈပဵၼ်ပၢင်တိုၵ်းၵၼ်။ ၾၢႆႇၶဝ် မၢတ်ႇၸဵပ်းၼမ်လႄႈ ထွႆၵႂႃႇၶိုၼ်း။ ဢမ်ႇသိုပ်ႇ ပဵၼ်ပၢင်တိုၵ်းထႅင်ႈသေတႃႉ သွင်ၾၢႆႇ ယင်းတိုၵ်ႉၶဵင်ႈၶႅင်ၵၼ်ဝႆႉယူႇဢေႃႈ၊ ၸိူင်ႉႁိုဝ်ၵေႃႈယဝ်ႉ ႁဝ်းၶႃႈ တႄႉ တေဢဝ်လၢႆးဢုပ်ႇဢူဝ်းသေ ၵႄႈလိတ်ႈၵႂႃႇၵူၺ်း” - ၼႆ ၽူႈၶၢၼ်ပၢၵ်ႇ ၶွင်ႊသီႊဢဝ်ၶိုၼ်း ၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၸဝ်ႈသိုၵ်းၸၢႆးငိုၼ်း လၢတ်ႈၼႄ ၼင်ႇၼႆ။


ပွႆးၽြႃးၵၢင်ႉမေႃႇပီၼႆႉ မီးပႃး ပၢင်ၸူၵ်းဝႂ် ၽူႈၵၢမ်ႇလီ - ၽူႈၵၢမ်ႇလီတီႈသုတ်း တေလႆႈ လူတ်ႉ ၵႃး ဝႅၼ်ႊ AD-VAN Nissan (ၵႃးၵျပၼ်ႊ) ၊ ထူဝ်ႊပီႊၵျိၼ်းၵျိပ်ႉ 2 လမ်း၊ လူတ်ႉၶိူင်ႈ 2 လမ်း၊ လူတ်ႉၶိူင်ႈ 3 လေႃႉ ၼိုင်ႈလမ်း၊ လူတ်ႉထႆ ၊ ၽတ်ႉလူမ်း၊ တူႈယဵၼ် ၸဵမ်းၸိူဝ်းၼႆႉ ။


ၽြႃးၵၢင်ႉမေႃႇၼႆႉ မီးၵိုၵ်းမိူင်းတႆး မႃး ၸဵမ်လႂ်။ ထိုင်ပၢၼ် မိူင်းမၢဝ်းလူင် ၸိူဝ်ႉၸၢတ်ႈတႆး ႁူမ်ႈသၢင်ႈ ဢူၺ်းလီ ၵၼ် တင်း ႁေႃၶမ်းမၢၼ်ႈ ပူးၵမ်ႇ (ပၵၢၼ်ႇ) ။ ၸဝ်ႈၼၢင်းမွၼ်းလႃႈ ၵေႃႉပဵၼ် လုၵ်ႈသၢဝ် ၸဝ်ႈႁေႃၶမ်း မိူင်းမၢဝ်း ၵႂႃႇပဵၼ် ၼၢင်းၶၢင်းႁူဝ် မိူင်းပူးၵမ်ႇသေ ၺႃးၸိူင်ႉၼၢင်း (ၼၢင်းမၢၼ်ႈ) ၶဝ်ႈ ႁဵတ်းႁၢႆႉသႂ်ႇ။ မၼ်းၼၢင်းၸင်ႇ ငိူင်ႉပၢႆႈ ပွၵ်ႈၶိုၼ်း မိူင်းမၢဝ်းလူင် သေ မႃးလုသဵင်ႈသုတ်းမုၼ် တီႈ ႁိမ်းသီႇပေႃႉ။  ပိူဝ်ႈတႃႇပဵၼ်တီႈ မၢႆတွင်းသေ ၶႆႇသႅင်ၾၼ်းၶမ်း မိူင်းမၢဝ်းလူင် ၸင်ႇၵေႃႇတင်ႈ ထၢတ်ႈ (ၵွင်းမူး) ဝႆႉႁိမ်း ၽြႃးထၢတ်ႈ ၵၢင်ႉမေႃ ၊ ၶုမ်ၵုတ်း(ပႃႇႁဵဝ်ႈသၢင်းၶႅင်း) မၼ်းၼၢင်းၵေႃႈ မီးယူႇ ႁိမ်းၼၼ်ႉ ။