ဢွၼ်ၼႃႈၽွင်းၶၢဝ်းသွၼ်းၼမ်ႉသၢင်းၵျၢၼ်ႇလိူၼ်ႁႃႈ၊ ဢၼ်ပဵၼ်ၶၢဝ်းမႆႈၶၢဝ်းႁွင်၊ လိူၼ်ၼႃႈၶၢဝ်းတၢင်း ႁိမ်းလိူၼ်ၼႆႉ လူင်ပွင်ၸိုင်ႈထႆး ပၼ်တိုဝ်ႉတၢင်းလီ တီႈႁႅင်းၵၢၼ်ယၢၼ်မိူင်း ၸိူဝ်းၶဝ်ႈႁဵတ်းၵၢၼ်ၼႂ်းမိူင်းထႆး ပွၵ်ႈၶိုၼ်းႁိူၼ်း လူၺ်ႈဢမ်ႇလႆႈသဵင်ႈၵႃႈဝတ်းဝႂ်သင်။

ၵဵဝ်ႇၵပ်းလွင်ႈၼႆႉ တင်ႈတႄႇၽွင်းႁူဝ်လိူၼ်ဢေႊပရိူဝ်ႊ (5-30/2017) တေႃႇထိုင်ႁၢင်လိူၼ်ဢေႊပရိူဝ်ႊ၊ ယူႇတီႈၸုမ်းလူင်ပွင်ၸိုင်ႈထႆး ပိုၼ်ၽၢဝ်ႇဢၼုၺၢတ်ႈပၼ် ႁႅင်းၵၢၼ်ယၢၼ်မိူင်း 3 ၸိုင်ႈမိူင်း ၸိူဝ်းၶဝ်ႈႁဵတ်းၵၢၼ် ယူႇသဝ်းၼႂ်းမိူင်းထႆး မိူၼ်ၼင်ႇၵူၼ်းမိူင်းမၢၼ်ႈ၊ မိူင်းလၢဝ်းတင်း ၵမ်ႇပူးၶျႃးၸိူဝ်းၼႆႉ လႆႈပွၵ်ႈၶိုၼ်းယဵမ်ႈသူႇၸႂ်း ဝၢၼ်ႈၵဝ်ႇမိူင်းလင်ႁိူၼ်းယေး ပေႃႈမႄႈပီႈၼွင်ႉၽႂ်မၼ်း လူၺ်ႈဢမ်ႇလႆႈသဵင်ႈၵႃႈသဵင်ႈႁူဝ်သင်။ ပီႈၼွင်ႉႁႅင်းၵၢၼ်ၸိူဝ်းၼႆႉ ပဵၼ်ၵူၼ်းၸိူဝ်းယိပ်းဝႆႉဝႂ်သီၶွင်ႇ (ပိုၼ်ႉတီႈသုင်)၊ ဝႂ်ပၢတ်ႊသပွတ်ႊ ပႃးၸဵမ်ဝႂ်ႁူဝ်သုၼ် (ဝႂ်သိပ်းပီ) ၸိူဝ်းၼႆႉ။


ၸၢႆးသႅင်မိူင်း ၽူႈၵွၼ်းႁွင်ႈၵၢၼ်ႁူင်းပွႆႇသဵင် (Radio) မႅပ်ႊ လၢတ်ႈဝႃႈ- "လွင်ႈၼႆႉ တၢင်းႁၼ်ထိုင်ၶႃႈႁဝ်းတႄႉဝႃႈ ပဵၼ်လွင်ႈလီ၊ ၵွပ်ႈပိူဝ်ႈဝႃႈပၼ်တိုဝ်ႉတၢင်း တႃႇပီႈၼွင်ႉႁႅင်းၵၢၼ်ႁဝ်းၶႃႈ လႆႈပွၵ်ႈမိူဝ်း ၼႃႈလိူၼ်ႁႃႈတေႃႇပေႃးထိုင် လိူၼ်ႁႃႈပေႃးသုတ်းသဵင်ႈ။ ပီႈၼွင်ႉႁႅင်းၵၢၼ်ယၢၼ်မိူင်းႁဝ်းၶႃႈ လႆႈပွၵ်ႈမိူဝ်းႁိူၼ်း၊ ပွၵ်ႈမိူဝ်းလမ်ႁူဝ်ၵၼ်ႇတေႃး ၵူၼ်းထဝ်ႈ၊ လႆႈႁဵတ်းၵၢၼ်လွင်ႈလူႇလွင်ႈတၢၼ်း၊ လႆႈပွၵ်ႈမိူဝ်းယဵမ်ႈႁႃပေႃႈမႄႈ လူၺ်ႈဢမ်ႇလႆႈသဵင်ႈၵႃႈ ၸႂ်ႉၸၢႆႇသင်ၸိူဝ်းၼႆႉ လႆႈဝႃႈပၼ်တိုဝ်ႉတၢင်း တႃႇပီႈၼွင်ႉႁႅင်းၵၢၼ်ႁဝ်းၶႃႈၵမ်းသိုဝ်ႈ။ ၸွမ်းလႅၼ်လိၼ် မိူၼ်ၼင်ႇမႄႈသၢႆၸိူဝ်းၼႆႉၵေႃႈ တေမီးၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်းၸိူဝ်းၼႆႉ ပႂ်ႉပွင်ၵၢၼ်ပၼ်လွင်ႈငၢႆႈလူမ်ယူႇ"- ဝႃႈၼႆ။


ၸွမ်းၼင်ႇသိုဝ်ႇထႆးဢွၵ်ႇၵႂႃႇၼၼ်ႉ ၸဝ်ႈသိုၵ်းလူင်ဢၽိသိတ်ႇ ၶျႆးၼုဝတ်း ၵႅမ်ၽူႈၶၢၼ်ပၢၵ်ႇ ၵိုၵ်းလုမ်းၸွမ်ၽွင်းလူင်မိူင်းထႆး ပိုတ်ႇလၢတ်ႈဝႃႈ- ၸုမ်းလူင်ပွင်ၸိုင်ႈ ႁၼ်လီလႆႈၸႂ်ၵၼ်ဝႃႈ ၼႂ်းၽွင်းၶၢဝ်း သွၼ်းၼမ်ႉသၢင်းၵျၢၼ်ႇ တင်ႈတႄႇဝၼ်းတီႈ 5 ထိုင်ဝၼ်းတီႈ 30 လိူၼ်ဢေႊပရိူဝ်ႊ ၼႆႉ ပၼ်ႁႅင်းၵၢၼ်ယၢၼ်မိူင်း ၵူၼ်းမိူင်းလၢဝ်း မိူင်းမၢၼ်ႈလႄႈ မိူင်းၵမ်ႇပူးၶျႃး ဢွၵ်ႇၶၢဝ်းတၢင်းပွၵ်ႈမိူဝ်းဝၢၼ်ႈၵဝ်ႇ မိူင်းလင်လႄႈ ပွၵ်ႈမႃးၶိုၼ်းၼႂ်းမိူင်းထႆးလႆႈ လူၺ်ႈဢမ်ႇလႆႈသဵင်ႈငိုၼ်းတွင်းသင်။


ၵဵဝ်ႇၵပ်းလွင်ႈၼႆႉ မွပ်ႈမၢႆပၼ်ႁႂ်ႈႁွင်ႈၵၢၼ်လူင်ၾၢႆႇၼႂ်းမိူင်း ၶိုင်ပွင်ပၼ်ယႃႇႁႂ်ႈလႆႈသဵင်ႈငိုၼ်းတွင်း ၽွင်းဢွၵ်ႇၶၢဝ်းတၢင်း ဢွၵ်ႇၼွၵ်ႈမိူင်းထႆး၊ ႁႂ်ႈႁွင်ႈၵၢၼ်လူင်ၾၢႆႇႁႅင်းငၢၼ်းဢွၵ်ႇပၼ်လိၵ်ႈႁပ်ႉႁွင်း ပိူဝ်ႈတႃႇပဵၼ်လၵ်းထၢၼ်ဢဝ်ၼႄၸဝ်ႈၼႃႈတီႈ။ ႁွင်ႈၵၢၼ်လူင်ၾၢႆႇႁူမ်ႇလူမ်ႈၵေႃႈ ႁႂ်ႈၸႅင်ႈပၼ်ၶေႃႈမုလ်း ၽူႈႁၢပ်ႇၵၢၼ်ၸၼ်ႉတႂ်ႈၵူႈတီႈ ႁႂ်ႈတူၺ်းလူလွမ်ပၼ်။ ႁွင်ႈၵၢၼ်လူင်ပၢႆးယူႇလီသမ်ႉ ႁႂ်ႈတူၺ်းလူလွမ်ပၼ်လွင်ႈပၢႆးယူႇလီ လွင်ႈတၢင်းပဵၼ်ၶႆႈၼၢဝ် ၽွင်းႁႅင်းၵၢၼ်ယၢၼ်မိူင်းၶဝ် ဢွၵ်ႇၶၢဝ်းတၢင်း ပွၵ်ႈမိူဝ်းလႄႈပွၵ်ႈမႃး- ၼႆယဝ်ႉ။


လိူဝ်သေၼၼ်ႉ ယူႇတီႈၸွမ်ၽွင်းလူင်မိူင်းထႆးၵေႃႈ ပူင်သင်ႇႁႂ်ႈၵူႈႁွင်ႈၵၢၼ်ပၵ်းတႃပႂ်ႉတူၺ်းၸွမ်းလွင်ႈ ဢၼ်ၸၢင်ႈမီးလွင်ႈပႂ်ႉဢဝ်ၼမ်ႉတွၼ်းၽွၼ်းလီ ငုမ်းပႃမိူဝ်ႈၼမ်ႉၶုၼ်ႇ ၼိူဝ်ႁႅင်းၵၢၼ်ယၢၼ်မိူင်းၶဝ် ၽွင်းဢွၵ်ႇၶၢဝ်းတၢင်းပွၵ်ႈမိူဝ်းပွၵ်ႈမႃးၼႆႉယူႇ- သိုဝ်ႇၶၢဝ်ႇထႆး ၽူႈၸတ်းၵၢၼ်ဢွၼ်ႊလၢႆႊဢွၵ်ႇၶၢဝ်ႇ မိူဝ်ႈဝၼ်းတီႈ 14/03/2017 ၵႂႃႇၼင်ႇၼႆ။