ဝၼ်းမႄႈၼမ်ႉၵူႈၸိုင်ႈမိူင်းဝၼ်းတီႈ 14 လိူၼ်မၢတ်ႊၶျ်ၼႆႉ ၸုမ်းၵႅတ်ႇၶႄႁႄႉၵင်ႈမႄႈၼမ်ႉၶူင်း ၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း၊ ၸတ်းႁဵတ်းပၢင်တူင်ႉၼိုင် ပိူဝ်ႈတႃႇၵႅတ်ႇၶႄႁႄႉၵင်ႈမႄႈၼမ်ႉၶူင်း ႁိမ်းၾင်ႇမႄႈၼမ်ႉၶူင်း။

ၼင်ႇႁိုဝ်ၼမ်ႉၶူင်းပေႃးတေလႆႈလႆလူင်းလွတ်ႈလႅဝ်းၼၼ်ႉ ၸုမ်းၽူႈႁၵ်ႉၼမ်ႉၶူင်း ၸတ်းႁဵတ်းပၢင်တူင်ႉၼိုင် တိုၵ်းသူၼ်းႁႂ်ႈႁၵ်ႉသႃပႂ်ႉပႃးမႄႈၼမ်

ႁၢင်ႈဢၼ်ယူႇၼိူဝ်ၶူဝ်သေထၢႆႇလူင်း ႁၼ်ႁၢင်ႈမႄႈၼမ်ႉပၢင် ၵုၼ်ႁဵင်

ၽူႈပွင်ၵၢၼ်ၸုမ်းၵုၼ်ႁဵင်ၽွင်ႊၻေႊသျိၼ်ႊ ၼၢင်းဝႃႇၼူႉလၢတ်ႈသပ်းလႅင်းၼႄဝႃႈ- ပေႃးသၢင်ႈၾၢႆလူင်ႁဵတ်းဢွၵ်ႇ ၾႆးၾႃႉႁႅင်းၼမ်ႉၼႆႉ မၼ်းတေတုမ်ႉတိူဝ်ႉၵူၼ်းမိူင်းတႆးႁဝ်းႁၢဝ်ႈႁႅင်း၊ ၵွပ်ႈၼၼ်ႁဝ်းၶႃႈသၢၼ်ၶတ်း။ ႁဝ်းၶႃႈမီးယိူင်းဢၢၼ်းပိူဝ်ႈတႃႇလႆႈသဵင်ၵၢင်ၸႂ်ၵူၼ်းၸၢဝ်းၶိူဝ်း၊ ၸုမ်းၽူႈႁၵ်ႉမႄႈၼမ်ႉၸိူဝ်းၼႆႉသေ ၸင်ႇလႆႈၸတ်းႁဵတ်းပၢင်တူင်ႉၼိုင်ၼႄၵၢင်ၸႂ်ၸိူင်ႉၼႆ- ဝႃႈၼႆ။


"ယူႇတီႈၵူၼ်းၼႂ်းပိုၼ်ႉတီႈသေ ၶႂ်ႈႁႂ်ႈဝႆႉၵႃႈၶၼ်ၼမ်ႉၶူင်း၊ ၶေႃႈမုလ်းလွင်ႈတူင်ႇဝူင်းၵူၼ်း၊ လွင်ႈတုမ်ႉတိူဝ်ႉလွင်ႈသိင်ႇဝႅတ်ႉလွမ်ႉၸိူဝ်းၼႆႉ ႁဝ်းၶႃႈၶႂ်ႈႁူႉတႄႉတႄႉ" ၸုမ်းႁၵ်ႉမႄႈၼမ်ႉၶူင်း ၸၢႆးတဵင်းၸေႃႇလၢတ်ႈ။


ပၢင်တူင်ႉၼိုင်တိုၵ်းသူၼ်းၵႅတ်ႇၶႄႁႄႉၵင်ႈမႄႈၼမ်ႉပွၵ်ႈၼႆႉ မီးၵူၼ်းၼႂ်းပိုၼ်ႉတီႈၶဝ်ႈႁူမ်ႈ 300 ၵေႃႉပၢႆ- လႆႈႁူႉၼင်ႇၼႆ။


ၾၢႆႇၼိုင်ႈတၢင်းၼိုင်ႈ ၸုမ်းတူင်ႉၼိုင်ပႂ်ႉပႃးမႄႈၼမ်ႉမိူင်းမၢၼ်ႈၵေႃႈ တႃႇမၢႆတွင်းဝၼ်းမႄႈၼမ်ႉၵူႈၸိုင်ႈမိူင်းၼႆသေ ဝၼ်းတီႈ 14/03/2017 ဢၼ်ပဵၼ်ဝၼ်းမႄႈၼမ်ႉၵူႈၸိုင်ႈမိူင်းၼႆႉ ပွတ်းႁူဝ်ၶမ်ႈ လႆႈၸတ်းႁဵတ်းပၢင်ပွႆးမူၼ်ႈသိူဝ်း ႁွင်ႉၵႂၢမ်းတိုၵ်းသူၼ်း ၵႅတ်ႇၶႄပႂ်ႉပႃးမႄႈၼမ်ႉၶူင်း တီႈဝဵင်းမေႃႇလမႅင်ႇၸႄႈမိူင်းမွၼ်း- ၼႆယဝ်ႉ။