ၽူႈၵွၼ်းတိူင်းသိုၵ်းၶူဝ်လမ် ၸွမ်ႁၢၼ် တၢၼ်းလၢႆႇ မွၵ်ႇႁွင်ႉ ၽူႈမီးပုၼ်ႈၽွၼ်း တပ်ႉသိုၵ်းၸိုင်ႈတႆး SSPP/SSA  ႁူပ်ႉထူပ်းဢုပ်ႇဢူဝ်းၵၼ် ၼႂ်းလုမ်းတိူင်းသိုၵ်း ၶူဝ်လမ်သေ တၢင်ႇတၢင်းၽိတ်း လၢႆလၢႆလွင်ႈ။

သွင်ၾၢႆႇႁူပ်ႉထူပ်းဢုပ်ႇဢူဝ်းၵၼ် ဝၼ်တီႈ 13/3/2017 ယၢမ်း ၵၢင်ဝၼ်းတဵင်ႈ တေႃႇထိုင် ဝၢႆးဝၼ်းမွၵ်ႈ ၼိုင်ႈမူင်း။ တီႈပၢင်ႁူပ်ႉထူပ်းၼၼ်ႉ ၽူႈၵွၼ်းတိူင်း ဝၼ်းဢွၵ်ႇၵၢင် ၸွမ်ႁၢၼ် တၢၼ်းလၢႆ ၸီႉၼႄးဝႃႈ -ဢၼ်မိူင်းၼွင် ၵေးသီး ဢမ်ႇၶိုၼ်ႈယႂ်ႇၼႆႉပဵၼ် ၵွပ်ႈ SSPP/SSA လႄႈ RCSS/SSA ၊ လိူဝ်ၼၼ်ႉ ၵေႃႈ ၼႄးဝႃႈ တပ်ႉသိုၵ်းၸိုင်ႈတႆးဝႆႉၸႂ်ၵႅပ်ႈ၊ ဢဝ်ၵူၼ်းမိူင်း တူၵ်းတႅမ်ႇ ၊ ၵူၼ်းၼုမ်ႇ တိတ်းယႃႈ ၊ ၵူၼ်းတၢင်ႇၶိူဝ်းၽိုတ်ႉၶဝ်ႈယူႇၼႂ်းတႆး ၼမ်လိူဝ်တႆး မႃး ၸဵမ်ၸိူဝ်းၼႆႉ- ဝႃႈၼႆ။


“ပဵၼ်ၵူၼ်းလူင်သေ ဢမ်ႇလၢတ်ႈၵႂၢမ်းၵူၼ်းလူင်၊ ဢမ်ႇလၢတ်ႈၵႂၢမ်းၽွင်းတၢင်၊ လၢတ်ႈၶေႃႈၵႂၢမ်းဢၼ်လႂ်ၵေႃႈ လူလၢႆၵၼ်ၵူႈၶေႃႈ၊ ၼႄးႁဝ်းဢမ်ႇၸွမ်း ၶေႃႈ တူၵ်းလူင်း ပီ 2012 ၊ ၼႄးႁဝ်းၶႂၢၵ်ႈပိုၼ်ႉတီႈ ပၵ်းတပ်ႉ၊ ၼႄးႁဝ်းၸႂ်ၵႅပ်ႈ ။  ဢၼ် ႁႅၼ်းသိုၵ်းမႃးလေႃႇတိုၵ်းၵူႈၸၢဝ်းၶိူဝ်းသမ်ႉ ပဵၼ်သိုၵ်းမၢၼ်ႈ လွၼ်ႉလွၼ်ႉ။  မိူၼ်ၼင်ႇ ၼႄးႁဝ်းၶႂၢၵ်ႈပိုၼ်ႉတီႈ၊ ပၵ်းတပ်ႉမႂ်ႇ ၸိူဝ်းၼႆႉ။ တီႈ တႄႉ ၼႂ်းၶေႃႈ လႆႈၸႂ်မိူဝ်ႈ ပီ 2012 ၼၼ်ႉ ၽႂ်တေလႆႈယူႇတီႈလႂ် ဢမ်ႇတူၵ်းလူင်း သင်ၵၼ်ဝႆႉ ” - ၼႆ ၽူႈမီးပုၼ်ႈၽွၼ်း ငဝ်ႈငုၼ်းဝၢၼ်ႈႁႆး ၸဝ်ႈၼိုင်ႈလၢတ်ႈ။


ၽူႈၵွၼ်းတိူင်း ယင်းတူၵ်ႇတၵ်ႉဝႃႈ တပ်ႉသိုၵ်းၸိုင်ႈတႆး ဢမ်ႇႁဵတ်းၸွမ်းပိူင် သိုၵ်း  6 ၶေႃႈ ဢၼ်တပ်ႉမတေႃႇမၢၼ်ႈတမ်းပၼ်၊  ပိူင်ပိုင်းလၵ်းမိူင်း (2008) ၼႆႉ မီး လွင်ႈၽဵင်ႇပဵင်း တႃႇၵူႈၸၢဝ်းၶိူဝ်းလႄႈ သိုၵ်းတပ်ႉမတေႃႇမၢၼ်ႈ တေၵႅတ်ႇၵင်ႈၵႂႃႇ  ၸဵမ်ၸိူဝ်းၼႆႉ။


ပၢင်ႁူပ်ႉထူပ်းၵၼ်ၼၼ်ႉ ၾၢႆႇတပ်ႉသိုၵ်းၸိုင်ႈတႆး ပဵၼ် ၸဝ်ႈသိုၵ်း ၶိူဝ်းမၢဝ်း ဢွၼ်ႁူဝ် ၊ ၾၢႆႇသိုၵ်းမၢၼ်ႈ သမ်ႉ ၽူႈၵွၼ်းတိူင်းသိုၵ်း ၸွမ်ႁၢၼ် တၢၼ်းလၢႆႇ၊ လိူဝ်ၼၼ်ႉ ယင်းပႃးၸဝ်ႈသိုၵ်းလူင် (ၵႃႇၼႄႇ) သၢၼ်းၺုၼ်ႉၸေႃႇ၊ ၵျီႇဝၼ်း ထိၼ်ႇလိၼ်းၵျေႃႇ ၶဝ်ၸိူဝ်းၼႆႉ ႁပ်ႉႁူပ်ႉၸွမ်း။


တပ်ႉသိုၵ်းၸိုင်ႈတႆး SSPP/SSA ၼႆႉ ပႆႇတူဝ်ႈတၼ်း တႃႇလူင်းလၢႆးမိုဝ်း ၵိုတ်း တိုၵ်း တူဝ်ႈမိူင်းသေတႃႉ လူင်းလၢႆးမိုဝ်းၵေႃႇသၢင်ႈလွင်ႈငမ်းယဵၼ် ၸၼ်ႉၸႄႈမိူင်း၊ ၸၼ်ႉမိူင်းႁူမ်ႈတုမ် ဝႆႉ မိူဝ်ႈႁူဝ်ပီ 2012 ။ RCSS/SSA သမ်ႉ လူင်းလၢႆးမိုဝ်း လိၵ်ႈႁူမ်ႈမၢႆ ၵိုတ်းတိုၵ်းတူဝ်ႈမိူင်း NCA ဝႆႉမိူဝ်ႈႁၢင်ပီ 2015 ။