ၸုမ်းပိတ်ႉမၢၵ်ႇၼင်ဝၢၼ်ႈႁႆး ၵႂႃႇပိတ်ႉမၢၵ်ႇၼင် တၢင်းပွတ်းတွၼ်ႈလႅၼ်လိၼ်ၶႅၼ်ႈမိူင်းၶႄႇ ဝဵင်းၸႄႈၵဝ်ႇ ၼႃႈမိူင်းပွတ်းႁွင်ႇ လႆႈသူး/ရၢင်းဝလ်းထီႉၼိုင်ႈ ။

ပူၼ်ႉမႃးမိူဝ်ႈဝၼ်းထီႉ 30/01/2017 ၼၼ်ႉ ယူႇတီႈၵေႃပွင်ၵၢၼ် ပွင်ပဵၼ်ပၢင်ပွႆးပိတ်ႉမၢၵ်ႇၼင် တီႈယိၼ်ႇၵျိုၼ်း ၸႄႈၵဝ်ႇ လႆႈၸတ်းႁဵတ်းၵႂႃႇပုၼ်ႈတႃႇႁပ်ႉတွၼ်ႈ ပီမႂ်ႇၶႄႇၼႆလႄႈ ၽိတ်ႈမွၵ်ႇၸုမ်း ပိတ်ႉမၢၵ်ႇၼင်လၢႆလၢႆၸုမ်း ၵႂႃႇၶဝ်ႈႁူမ်ႈၶေႉၶႅင်ႇပိတ်ႉမၢၵ်ႇၼင်။ ၼႂ်းၼၼ်ႉ ပႃးၸုမ်းပိတ်ႉမၢၵ်ႇၼင်ႇ FC ဝၢၼ်ႈႁႆးၸုမ်းၼိုင်ႈသေ လႆႈၶႅင်ႇပေႉၵႂႃႇသူးထီႉၼိုင်ႈ ။


ၵဵဝ်ႇၵပ်းလူၺ်ႈလွင်ႈၼႆႉ ၸဝ်ႈသႅင်ႁၢၼ် ၽူႈဢွၼ်ႁူဝ်ၸုမ်းလၢတ်ႈဝႃႈ - လွင်ႈဢၼ်ႁဝ်းၶႃႈ လႆႈမႃးပိတ်ႉမၢၵ်ႇၼင် ပွတ်းတွၼ်ႈၼႃႈမိူင်းတၢင်းႁွင်ႇ ႁဝ်းၶႃႈၼႆႉ လႆႈဝႃႈပဵၼ်ဢၼ်ၸူမ်းသိူဝ်း ဢမ်ႇသုတ်းဢမ်ႇသဵင်ႈယဝ်ႉ။ ၵၢၼ်ပိတ်ႉ မၢၵ်ႇၼင်ပွတ်းၼႆႉ ပဵၼ်ပွၵ်ႈဢွၼ်တၢင်းသုတ်းသေတႃႉၵေႃႈ တွၼ်ႈတႃႇႁဝ်းၶႃႈတႄႉမီးၽွၼ်းလီတႄႉတႄႉ။ မိူၼ်ၼင်ႇႁဝ်းၶႃႈ လႆႈႁူႉဝႃႈ မိူင်းပိူၼ်ႈ-ပိူၼ်ႈႁဵတ်းၸိူင်ႉႁိုဝ်။ ထႅင်ႈလွင်ႈၼိုင်ႈ ပဵၼ်တီႈမၢႆတွင်းႁဝ်းၶႃႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 70 ပီတဵမ်၊ ႁဝ်းၶႃႈၸုမ်းတႆးၼင်ႇၵၼ် လႆႈမႃးႁူႉၸၵ်းမိုတ်ႈၵိုဝ်းၵၼ်သေ ဢမ်ႇၵႃး ၸုမ်း FC ဝၢၼ်ႈႁႆးႁဝ်းၶႃႈၵေႃႈ လႆႈသူးထီႉၼိုင်ႈၵႂႃႇၼႆ ပဵၼ်တီႈမၢႆတွင်းႁဝ်းၶႃႈတႄႉတႄႉ- ဝႃႈၼႆ ။


ၸုမ်းဢၼ်ၶဝ်ႈၶႅင်ႇပိတ်ႉမၢၵ်ႇၼင်ၼႆႉ မီး 12 ၸုမ်း။ ၶေႉၶႅင်ႇၵၼ်တင်ႈတႄႇ ဝၼ်းထီႉ 30/01/2017 တေႃႇဝၼ်းထီႉ 07/02/2017 ။


ၸဝ်ႈသႅင်ႁၼ် သိုပ်ႇလၢတ်ႈထႅင်ႈဝႃႈ - ယိူင်းဢၢၼ်းႁဝ်းၶႃႈ ဢၼ်လႆႈမႃးပိတ်ႉမၢၵ်ႇၼင်ပွတ်းတွၼ်ႈၼႆႉတႄႉ ပိူင်လူင်မၼ်း ၼင်ႇႁိုဝ်ၵူၼ်းၼုမ်ႇႁဝ်းၶႃႈ ဢၼ်မီးၼႂ်းမိူင်းၶႄႇလႄႈသင်၊ ၸွမ်းလႅၼ်လိၼ်ၸိူဝ်းၼႆႉလႄႈသင် ၼင်ႇႁိုဝ်ပေႃးတေလႆႈမိုတ်ႈၵိုဝ်းၵၼ်၊ ၵွင်ႉသၢၼ်ၵၼ်၊ ၶဝ်ႈဢွၵ်ႇၵၼ်မႃးၸိူဝ်းၼႆ။ ၵၢၼ်လဵၼ်ႈႁႅင်း ၵၢၼ်ပိတ်ႉမၢၵ်ႇၼင်ၵေႃႈ  ၼင်ႇႁိုဝ်သမ်ႉပေႃးတေၶိုပ်ႈၼႃႈၵႂႃႇ ႁႂ်ႈမီးၽွၼ်းလီၼႆ ႁဝ်းၶႃႈမီးယိူင်းဢၢၼ်းၼင်ႇၼႆ ။


ၼႂ်းပၢင်ပိတ်ႉမၢၵ်ႇၼင်ၼၼ်ႉ မီးငိုၼ်းသူးတွၼ်ႈၼမ်ႉၸ်ႂ ၸုမ်းလႆႈထီႉလ်ႂထီႉၼၼ်ႉ မိူၼ်ၼင်ႇ ထီႉၼိုင်ႈ-လႆႈငိုၼ်းၶႄႇသွင်မိုၼ်ႇယႅၼ်ႉ ဝူဝ်းၼိုင်ႈတူဝ် ၊ ထီႉသွင် - ပႅတ်ႇႁဵင်ယႅၼ်ႉ ၊ ထီႉသၢမ် - သီႇႁဵင်ယႅၼ်ႉ ၊ ထီႉသီႇ- သွင်ႁဵင်ယႅၼ်ႉ။ ၼႂ်းၼၼ်ႉ ၸုမ်း FC ဝၢၼ်ႈႁႆးလႆႈထီႉၼိုင်ႈ၊ ၸုမ်းၶၢင် လႆႈထီႉသွင် ၊ မၢဝ်ႇတႆးမိူင်းလႃႈ လႆႈထီႉသၢမ်၊ ပီႈၼွင်ႉမိူင်းမႅၼ်း လႆႈထီႇသီႇသေတွၼ်ႈသူးၼမ်ႉၸ်ႂ ၸိူဝ်းလႆႈသူးထီႉလ်ႂထီႉၼၼ်ႉ မိူဝ်ႈၶမ်ႈဝၼ်းၸိူဝ်ႉၸၢတ်ႈ ၸိုင်ႈတႆး ၾႅပ်ႊၿိဝ်ႊရီႊ7 ဝၼ်းၼၼ်ႉ - ဝႃႈၼႆ ။