ပေႃးထိုင်မႃးလိူၼ်ဢေႊပရိူဝ်ႊလ် ဝၼ်းတီႈ 1 ၼႆႉ တေၸတ်းႁဵတ်းပၢင်လိူၵ်ႈတင်ႈသွမ်ႈ။ ၾၢႆႇလူင်ပွင်ၸိုင်ႈၵေႃႈ တိတ်းပႃႉသဵၼ်ႈမၢႆၵူၼ်းတွတ်ႈၶႅပ်းၵၢင်ၸႂ် မိူဝ်ႈဝၼ်းတီႈ 1 လိူၼ်ၼႆႉ၊ ၵူၺ်းၵႃႈ ႁၢၼ်ႉတေႃႇယၢမ်းလဵဝ် ၵူၼ်းဢၼ်သူၼ်ၸႂ်သေၵႂႃႇတူၺ်း ယင်းတိုၵ်ႉမီးဢေႇယူႇ ။

ၾၢႆႇၶွမ်ႊမသျိၼ်ႊၵၢၼ်လိူၵ်ႈတင်ႈၵေႃႈ ပိုၼ်ၽၢဝ်ႇဝႆႉဝႃႈ- ပၢင်လိူၵ်ႈတင်ႈသွမ်ႈဢၼ်တေၸတ်းႁဵတ်းၼႆႉ တေမီးႁူဝ်ၵူၼ်း 6.1% ၵူၺ်း။ ၵွပ်ႈၼၼ်လႄႈ ပေႃးဝႃႈသဵၼ်ႈမၢႆၸိုဝ်ႈသဵင်ၽႂ်ဢမ်ႇပႃးၼႆၵေႃႈ ႁႂ်ႈၵႂႃႇယိုၼ်ႈယွၼ်း ဢဝ်လိၵ်ႈဝႅပ်ႊၾွမ်ႊ 3 သေယိုၼ်ႈယွၼ်း၊ ဢၼ်မႃးယိုၼ်ႈယွၼ်းသႂ်ႇၸိုဝ်ႈမီး 2.7% ၊ ဢၼ်ဢမ်ႇထုၵ်ႇပႃး သဵၼ်ႈမၢႆၸိုဝ်ႈသဵင်သေ သမ်ႉပႃးဝႆႉၼၼ်ႉ မႃးယိုၼ်ႈယွၼ်း ဝႅပ်ႊၾွမ်ႊ 4 သေသၢၼ်ၶတ်းမီး 0.5% ၊ ဢၼ်ၸိုဝ်ႈသဵင်ၽိတ်းသေ ၵႂႃႇယိုၼ်ႈယွၼ်းဝႅပ်ႊၾွမ်ႊ (4-ဂ) မီး 1.6% -ၼႆယဝ်ႉ။


ၵွပ်ႈၼႆ ၼင်ႇႁိုဝ်သဵၼ်ႈမၢႆၸိုဝ်ႈသဵင်ၵူၼ်းတွတ်ႈၶႅပ်း ပေႃးတေထုၵ်ႇမႅၼ်ႈၸိုဝ်ႈၸႂ်ႈၼၼ်ႉ ၵူၼ်းႁိူၼ်းတႃႇၼႃႈႁိူၼ်း ၼိုင်ႈလင်ၼႆႉ တီႈဢေႇသုတ်းမၼ်း ႁႂ်ႈၵႂႃႇတူၺ်းပၼ်သဵၼ်ႈမၢႆၵူၼ်းမီးသုၼ်ႇတွတ်ႈၶႅပ်းၵၢင်ၸႂ်၊ ပေႃးၸိုဝ်ႈသဵင်ဢမ်ႇပႃး ထုၵ်ႇလႆႈၵႂႃႇတုၵ်းယွၼ်း၊ ပေႃးၸိုဝ်ႈသဵင်ၽိတ်း ဢမ်ႇထုၵ်ႇမႅၼ်ႈၼႆၵေႃႈ တေလႆႈၵႂႃႇယွၼ်းမႄးၶိုၼ်း ၶဝ်တုၵ်းယွၼ်းဝႆႉၸိူင်ႉၼႆ။


မိူဝ်ႈလဵဝ် ပႃႇတီႇၵၢၼ်မိူင်းဢၼ်တိုၵ်းသူၼ်းႁႂ်ႈၵႂႃႇတူၺ်းသဵၼ်ႈၸိုဝ်ႈၼႆႉ မီးငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD) ဢၼ်လဵဝ်ၵူၺ်း။ တႄႇၵေႃႈတႄႇလူင်းႁႃသဵင်ယဝ်ႉ- ၽူႈၼမ်းၼႂ်း 2 ပႃႇတီႇႁူဝ်သိူဝ် (SNLD) ၸၢႆးၵျေႃႇၺုၼ်ႉ လၢတ်ႈ။


မၼ်းၸၢႆးလၢတ်ႈဝႃႈ- တၢင်းပွတ်းမိူင်းသူႈၵေႃႈ ၵူၼ်းမႃးတူၺ်းသဵၼ်ႈမၢႆၸိုဝ်ႈသဵင် ၵူၼ်းမီးသုၼ်ႇတွတ်ႈၶႅပ်း ၵၢင်ၸႂ်ၼႆႉ ဢမ်ႇပေႃးမီး။ ဢမ်ႇပေႃးႁၢင်ႈႁၢႆႉဝႃႈၼႆသေတႃႉၵေႃႈ ၵူၼ်းၼႂ်းပိုၼ်ႉတီႈၵမ်ႈၼမ်ၼႆႉ ဢမ်ႇႁူႉလိၵ်ႈမၢၼ်ႈ၊ ၸိုဝ်ႈသဵင်ၶဝ်သမ်ႉတႅမ်ႈဝႆႉပဵၼ်လိၵ်ႈမၢၼ်ႈ၊ ၵွပ်ႈၼၼ်လႄႈ ႁဝ်းၶႃႈၵေႃႈတိုၵ်းသူၼ်းႁႂ်ႈၶဝ်မႃး တူၺ်းသဵၼ်ႈၸိုဝ်ႈယဝ်ႉ။ လွင်ႈၼႆႉမၼ်းပဵၼ်ၾၢင်ႁၢင်ႈ တႃႇတေၸတ်းသၢင်ႈႁင်းၶေႃၸဝ်ႈၵဝ်ႇ၊ ၵွပ်ႈၼၼ် ၵိုင်ႇလီၵႂႃႇတူၺ်းသဵၼ်ႈၸိုဝ်ႈတူဝ်ၵဝ်ႇယူႇ။ ဢၼ်တိတ်းဝႆႉသဵၼ်ႈမၢႆၸိုဝ်ႈသဵင်ၼႆႉ တင်ႈတႄႇဝၼ်းတီႈ 1 ထိုင်ဝၼ်းတီႈ 14 ၾႅပ်ႊၿိဝ်ႊရီႊၼႆႉၵူၺ်း၊ ၵွပ်ႈၼၼ် ႁႂ်ႈၵႂႃႇတူၺ်းဝႆးဝႆး- ဝႃႈၼႆ။


ၼႂ်းၸိုင်ႈမိူင်းႁူမ်ႈတုမ်မၢၼ်ႈၼႆႉ ပၢင်လိူၵ်ႈတင်ႈသွမ်ႈၼႆႉၸတ်းႁဵတ်းမီးယူႇလၢႆတီႈဝႃႈၼႆသေတႃႉၵေႃႈ ၼႂ်းမိူင်းတႆးတင်းမူတ်းမီး 8 တီႈ၊ ၼႂ်း 8 တီႈၼၼ်ႉ ပႃႇတီႇႁူဝ်သိူဝ်တေၶဝ်ႈၶႅင်ႇ 7 တီႈ။ ၼႂ်းၼၼ်ႉ ပႃႇတီႇသိူဝ်ၽိူၵ်ႇ (SNDP) ၵေႃႈတေၶဝ်ႈၶႅင်ႇၼင်ႇၵဝ်ႇ။