ႁွင်ႈၵၢၼ်ၾၢႆႇၵူၼ်းႁဵတ်းၵၢၼ် ၵဵင်းမႆႇ ဢၼုၺၢတ်ႈပၼ် ႁႅင်းၵၢၼ်ယၢၼ်မိူင်း မၢၼ်ႈ၊လၢဝ်း၊ ၶႅမ်ႊၿေႃႊတီႊယိူဝ်ႊ ႁႂ်ႈၵႂႃႇယွၼ်းထႅမ် တီႈႁဵတ်းၵၢၼ် ဢၼ်တေၵႂႃႇႁဵတ်း တၢင်ႇၸႄႈတွၼ်ႈသေ ဢွၵ်ႇၵႂႃႇႁဵတ်းၵၢၼ်လႆႈ ၸူဝ်ႈၶၢဝ်း ဝႃႈၼႆ ။

ၵူၼ်းဢၼ်ဢွၵ်ႇႁဵတ်းၵၢၼ်လႆႈ တၢင်ႇၸႄႈတွၼ်ႈၼၼ်ႉ တၵ်းတေလႆႈ ပဵၼ်ၵူၼ်းႁဵတ်းၵၢၼ်ဢၼ် ႁပ်ႉထတ်း ဝႃႈ ၸဝ်ႈပဵၼ်ၵူၼ်းလုၵ်ႉမိူင်းလႂ်မႃး ပဵၼ်ၵူၼ်းဢၼ်ယိပ်းဝႂ် PassPort သေ ၶဝ်ႈႁဵတ်းၵၢၼ်မိူင်းထႆး ၸွမ်းၼင်ႇ လူင်ပွင်ၸိုင်ႈသွင်မိူင်း လူင်းလၢႆးမိုဝ်း MOU လႆႈၸႂ်ၵၼ်ၶပ်းၶိုင်ဝႆႉ ။


ၼၢင်းယဝ်ႊဝၽႃႊ ၽိၿုၼ်ႊၽူၼ်ႊ ႁွင်ႈၵၢၼ်ၾၢႆႇၵူၼ်းႁဵတ်းၵၢၼ် ၵဵင်းမႆႇ လၢတ်ႈတီႈ ၶျဵင်းမႂ်ႇ ၼိဝ်းသ် ဝႃႈ  - “ဢၼ်ႁဝ်းၶႃႈပိုတ်ႇ ပၼ်ဢၼုၺၢတ်ႈၼႆႉတႄႉ ယွၼ်ႉပိူဝ်ႈဝႃႈ လၢႆၼႃႈၵၢၼ် ထူပ်း တၢင်းယၢပ်ႇ မိူၼ်ၼင်ႇ ၼႃႈၵၢၼ်ၵေႃႇသၢင်ႈ၊ ၵၢၼ်တေႃႉသူင်ႇ လႄႈၵၢၼ်ဢၼ်ၵႆႉလႆႈဢွၵ်ႇတၢင်းၸိူဝ်းၼႆႉ။ ၼင်ႇႁိုဝ်တေမီးလွင်ႈ ငၢႆႈလူမ်ၸႂ် လွင်ႈၵႂႃႇမႃး ႁဵတ်းၵၢၼ် လွင်ႈၵႆႉဢွၵ်ႇပိုၼ်ႉ တီႈၸိူဝ်းၼႆႉလႄႈ ၸင်ႇပိုတ်ႇ ပၼ်ဢၼုၺၢတ်ႈ”ဝႃႈၼႆ ။


ၵူၼ်းမိူင်းတႆး ဢၼ်မႃးႁဵတ်းၵၢၼ်မိူင်းထႆးၼပ်ႉသႅၼ် ၽႅၼ်ၵၢၼ်ႁဵတ်းဝတ်းမႂ်ႇ ပၼ်ၵူၼ်းမႂ်ႇ ယင်းပႆႇမီး ၶေႃႈပိုၼ်ၽၢဝ်ႇသင် ၵူၼ်းၶဝ်ႈမႃးႁႃႁဵတ်းၵၢၼ် ၼႂ်းမိူင်းထႆးတႄႉ တိုၵ်ႉမီးယူႇၵူႈဝၼ်းၼႆ - ၸၢႆးၼွႆႉ ဝဵင်းမႄႈသၢႆလၢတ်ႈ ။


ၼၢင်းယဝ်ႊဝၽႃႊ  သိုပ်ႇလၢတ်ႈထႅင်ႈဝႃႈ - “ႁႅင်းၵၢၼ်ယၢၼ်မိူင်း ႁႂ်ႈႁဵတ်းၵၢၼ်ၸွမ်းပေႃႈလဵင်ႉ၊ မႄႈလဵင်ႉ ၸွမ်းၼင်ႇၸိုဝ်ႈ ဢၼ်တႅမ်ႈဝႆႉ ၼႂ်းဝတ်းၼၼ်ႉ ။ သင်ဢမ်ႇႁဵတ်းၸွမ်းၼင်ႇပၵ်းပိူင်မၢႆမီႈၸိုင် မီးတူတ်ႈတၢမ်ႇ မႂ်ငိုၼ်း 20,000 ၿၢတ်ႇ သင်မီးလွင်ႈၶွင်ႈၶမ် ၶႂ်ႈထၢမ်လၢႆးႁူဝ်ယွႆႈၼႆၸိုင် ၵပ်းသိုပ်ႇတွင်ႈထၢမ် လႆႈတီႈမၢႆၾူၼ်း
0-5311-2911-4  ၵူႈဝၼ်းႁဵတ်းၵၢၼ်လူင်ပွင်ၸိုင်ႈ ” ။


ႁွင်ႈၵၢၼ်ၾၢႆႇၵူၼ်းႁဵတ်းၵၢၼ်မိူင်းထႆး ပိုၼ်ၽၢဝ်ႇသဵၼ်ႈမၢႆႁႅင်းၵၢၼ်ယၢၼ်မိူင်း ႁူဝ်ႁုပ်ႈၼႂ်းပီ 2016 ၼၼ်ႉဝႃႈ- ႁႅင်းၵၢၼ်ဢၼ်ထတ်ထွင်ၵူၼ်းၵိုၵ်းမိူင်း (ၽိသုတ်ႇသၼ်ႊၶျၢတ်ႊ) ယဝ်ႉၼၼ်ႉ မီး 897 828 ၵေႃႉ၊ ဢၼ်ၶဝ်ႈမိူင်းလူၺ်ႈပိူင် MOU မီး 392,749 ဢၼ်ဢမ်မီးၼႂ်းသဵၼ်ႈမၢႆၵေႃႈယင်းတေမီးထႅင်ႈဝႃႈၼႆ ။