ၸိုင်ႈတႆး ပွတ်းၸၢၼ်း တီႈဝဵင်းပၢင်လူင် ဢၼ်ပဵၼ်တီႈလူင်းလၢႆးမိုဝ်းလိၵ်ႈႁူမ်ႈ မၢႆပၢင်လူင်သေ ၵိူတ်ႇဢွၵ်ႇမႃးဝၼ်းမိူင်းႁူမ်ႈတုမ်ၼၼ်ႉ ၸတ်းႁဵတ်းပၢင်ပွႆးၶုၵ်းထူပ်း ဝၼ်းမိူင်းႁူမ်ႈတုမ် ၶွပ်ႈတဵမ် 70 ပီ မီၵူၼ်းမိူင်းၶဝ်ႈႁူမ်ႈ 2000 ပၢႆ။

ဝၼ်းတီႈ 12/02/2017 ယၢမ်းၵၢင်ၼႂ် ပၢင်ပွႆးဝၼ်းမိူင်းႁူမ်ႈတုမ် ၶွပ်ႈတဵမ် 70 ပီၼႆႉ ၸတ်းႁဵတ်းတီႈ ၼႂ်းဝၢင်းသဝ်ႁိၼ် ၸႄႈဝဵင်းပၢင်လူင် ၸႄႈတွၼ်ႈလွႆလႅမ်။ တီႈပၢင်ၵႅဝ်ႈၼၼ်ႉ မီးၼၢင်းဢွင်ႇသၢၼ်း သုၵျီႇ တီႈၵိူဝ်းၵုမ်မိူင်းႁူမ်ႈတုမ်မိူင်းမၢၼ်ႈ မွၵ်ႇလၢတ်ႈၶေႃႈၵႂၢမ်း တိုၵ်းသူၼ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA သေ ၶဝ်ႈဢုပ်ႇ ၵၢၼ်မိူင်း ဝႃႈၼႆ။


ၼၢင်းဢွင်ႇသၢၼ်းသုၵျီႇ  တီႈၵိူဝ်းၵုမ်မိူင်းႁူမ်တုမ် မိူင်းမၢၼ်ႈ မွၵ်ႇလၢတ်ႈၶေႃႈၵႂၢမ်းဝႃႈ “ ၸၢဝ်းၶိူဝ်း ဢၼ်ပႆႇလူင်းလၢႆးမိုဝ်း NCA ၼၼ်ႉ ႁႂ်ႈယုမ်ႇယမ်တူဝ်ၸဝ်ႈၵဝ်ႇသေ ႁႂ်ႈဢွၼ် ၵၼ်ၶဝ်ႈ ႁူမ်ႈပၢင် ၵုမ်လူင် ပၢင်လူင် ႁူဝ်ပၢၵ်ႇပီ 21 ဢၼ်တေထိုင်မႃးၼၼ်ႉ တိုၵ်းသူၼ်းႁႂ်ႈ လူင်းလၢႆးမိုဝ်း” ဝႃႈၼႆ။


ၼႂ်းဝၼ်းမိူင်းႁူမ်ႈတုမ်ၼၼ်ႉ လိူဝ်သေပၢင်ၵႅဝ်ႈယဝ်ႉ မီးပႃးထႅင်ႈ ပၢင်ဢုပ်ႇၵုမ်လွင်ႈငမ်းယဵၼ်၊ ၼၢင်းဢွင်ႇသၢၼ်းသုၵျီႇလႄႈတူဝ်တႅၼ်းၸၢဝ်းၶိူဝ်း ပႃးမၢၼ်ႈဢုပ်ႇၵုမ်ၵၼ် ၼႂ်းႁူဝ်ၶေႃႈ ပၢင်ဢုပ်ႇ ဢူဝ်းလွင်ႈငမ်းယဵၼ် Peace Talk ဝႃႈၼႆ။


ဝၼ်းမိူင်းႁူမ်ႈတုမ် ၶွပ်ႈတဵမ် 70 ပီၼႆႉ မီးၸုမ်းလူင်ပွင်ၸိုင်ႈမိူင်းတႆး၊ လုၵ်ႈ လၢၼ်ၸဝ်ႈၽူႈလူင်း လၢႆးမိုဝ်းလိၵ်ႈႁူမ်ႈမၢႆပၢင်လူင် 1947၊ ၽူႈ ၼမ်းၸၢဝ်းၶိူဝ်း၊ ၽူႈတၢင်တူဝ်ပႃႇတီႇၵၢၼ်မိူင်း၊ ၽူႈတၢင်တူဝ် ၸုမ်းတူင်ႇ ဝူင်းၵူၼ်း၊ ၸဝ်ႈၼႃႈ တီႈၵူႈ ႁွင်ႈၵၢၼ်၊ ၵူၼ်းမိူင်းဢိၵ်ႇ လုၵ်ႈႁဵၼ်းမႃး ၶဝ်ႈႁူမ်ႈ တင်းၼမ် ဝႃႈၼႆ။


မိူဝ်ႈဝၼ်းတီႈ 12/02/1947 ယူႇတီႈၽူႈတၢင်တူဝ်ၸဝ်ႈၾႃႉမိူင်းတႆး၊ ၽူႈတၢင်တူဝ်ၵူၼ်းမိူင်းတႆး၊ ၽူႈတၢင်တူဝ်မိူင်းၶၢင်၊ ၽူႈတၢင်တူဝ်မိူင်းၶျၢင်းလႄႈ ၸွမ်သိုၵ်း ဢွင်ႇသၢၼ်း ႁူမ်ႈၵၼ်လူင်းလၢႆးမိုဝ်း လိၵ်ႈႁူမ်ႈမၢႆပၢင်လူင်သေ ၸင်ႇၵိူတ်ႇဢွၵ်ႇမႃးဝၼ်းမိူင်းႁူမ်ႈတုမ်။