ၼႂ်းႁူဝ်ပီ 2017 ၼႆႉယူႇတီႈ ၸုမ်းလုၵ်ႈႁဵၼ်းတႆး မိူင်းဝၼ်းတူၵ်းဢိတ်ႇဢွၵ်ႇပပ်ႉယုၵ်ႉယွင်ႈၽူႈဢွၼ်ႁူဝ်တႆး ဢၼ်မီးၸိုဝ်ႈဝႃႈ “ႁူဝ်ပဝ်ႈလူင်ၸွမ်သိုၵ်းယွတ်ႈသိုၵ်း- ပၢႆးဝူၼ်ႉ လၵ်းၼမ်း လႄႈၵၢၼ်ထူပ်းမိုဝ်း” ၼႆယဝ်ႉ။


ၵဵဝ်ႇၵပ်းလွင်ႈၼႆႉ မုၼ်ၸၢင်းၸဝ်ႈမႁႃႇသႅင်ၽႃႉဢၼ်ပဵၼ်မူႇၸုမ်းၶိုင်ပွင်ႁဵတ်းဢွၵ်ႇ လၢတ်ႈဝႃႈ- ယိူင်းဢၢၼ်းဢၼ်ႁဵတ်းဢွၵ်ႇပပ်ႉဢၼ်ၼႆႉတႄႉ တွၼ်ႈတႃႇတၢင်ႇၼႄပိုၼ်း ၸွမ်သိုၵ်းယွတ်ႈသိုၵ်းႁႂ်ႈၵူၼ်းတႆးႁဝ်းလႆႈႁူႉလွင်ႈ ၵၢၼ်ႁဵတ်းသၢင်ႈၼႃႈၵၢၼ်မၼ်းၸဝ်ႈ၊ ယုၵ်ႉယွင်ႈၽူႈဢွၼ်ႁူဝ်တႆး လႄႈႁူႉပိုၼ်းၵၢၼ်တေႃႇသူႈ ဢၼ်ပူၼ်ႉမႃး ယၢမ်းလဵဝ်လႄႈ ၽႅၼ်ၵၢၼ်မိူဝ်းၼႃႈ ၸဵမ်ၸိူဝ်းၼႆႉ ၼႆယဝ်ႉ။


ပပ်ႉဢၼ်ၼႆႉၸႂ်ႉၶၢဝ်းယၢမ်းတႅမ်ႈ 6 လိူၼ်ပၢႆတႃႇႁၢင်ႈႁႅၼ်းႁဵတ်းဢွၵ်ႇ။ တႃႇပီၼႆႉ ဢိတ်ႇဢွၵ်ႇပိုၼ်ၽႄႈ 5000 ပပ်ႉ တၢင်းၼႃပပ်ႉမီး 200 ၼႃႈ။


ၶေႃႈမုၼ်း ၼႂ်းပပ်ႉမီးပႃး မိူၼ်ၼင်ႇ ၶၢဝ်းတၢင်းႁၢပ်ႇၵၢၼ်ၸိူဝ်ႉၸၢတ်ႈၸွမ်သိုၵ်းယွတ်ႈသိုၵ်း၊ ပိုၼ်းလွင်ၽွမ်ႉႁူမ်ႈမိူဝ်ႈပၢၼ်ၸဝ်ႈၵွၼ်းၸိူင်း၊ MTA ၶုၼ်သႃႇဝၢင်းၶိူင်ႈ ယွၼ်ႉတႆးႁဝ်းၵေႃႈပႃး၊ ပိုၼ်းတင်ႈလွႆတႆးလႅင်း၊ ၵၢၼ်တူင်ႉၼိုင်သိုၵ်းၼႂ်းမိူင်း၊ ၵၢၼ်ၽဵဝ်ႈမူၺ်ႇယႃႈမဝ်းၵမ်၊ ယွၼ့်သင်တႆးၼပ်ႉယမ် ၸဝ်ႈၼရေးသူၼ်၊ ၵၢၼ်မိူင်းယၢမ်းလဵဝ်လႄႈ မိူဝ်းၼႃႈ၊ ၵၢၼ်ၵႂႃႇလဵပ်ႈႁဵၼ်းၼွၵ်ႈမိူင်း ၶွင်ႇသီႇဢဝ်ၶိုၼ်းၸိုင်ႈတႆး၊ ၵၢၼ်လူင်းလၢႆးမိုဝ်းၵိုတ်းယိုဝ်း ၸိုင်ႈမိူင်း၊ ၵၢၼ်ႁူပ်ႉထူပ်းၽွင်းတၢင်UN လႄႈလွၼ်ႉမွၼ်းလိုၵ်ႉ ၶေႃႈၵႂၢမ်းၶိုၵ်ႉ ၸွမ်သိုၵ်းယွတ်ႈသိုၵ်း ၼႆၸဵမ်ၸိူဝ်းၼႆႉ။