ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ တဵမ် 70 ပီ ၵိုၼ်းၶိုၵ်ႉယႂ်ႇလူင်။ ၼွၵ်ႈသေၵူၼ်းမိူင်းတႆးလၢႆလၢႆ ၸႄႈဝဵင်းယင်းလႆႈ ၽိတ်ႈမွၵ်ႇ ပႃးလုမ်းၽွင်းတၢင် ၼွၵ်ႈမိူင်းၶဝ်ႈႁူမ်ႈ ႁိမ်း 40 မိူင်း ။

ဝၼ်းတီႈ 07/02/2017 ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇတဵမ် 70 ပီ၊ ယူႇတီႈငဝ်ႈငုၼ်းၶွင်ႇ သီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင် ပွႆးၶိုၵ်ႉယႂ်ႇ တီႈငဝ်ႈငုၼ်း လွႆတႆးလႅင်း။ ၼင်ႇႁိုဝ် တေၸၢင်ႈဢွၵ်ႇၶၢဝ်ႇ ပိုၼ်ၽႄႈပၼ်ၵူၼ်းမိူင်း ပေႃးလႆႈႁူႉၸွမ်းၼၼ်ႉ ပႃးထႅင်ႈ ၽူႈလူင်ႉလႅၼ်ႇလႄႈ သိုဝ်ႇၶၢဝ်ႇၼွၵ်ႈမိူင်း/ ၼႂ်းမိူင်းမွၵ်ႈ 20 ၸုမ်း ဝႃႈၼႆ ။


ၸဝ်ႈယွတ်ႈမိူင်း ၽူႈၸတ်းၵၢၼ်ႁွင်ႈၵၢၼ်ၾၢႆႇတိတ်းတေႃႇၼွၵ်ႈမိူင်း RCSS/SSA လၢတ်ႈဝႃႈ “ ယူႇတီႈငဝ်ႈငုၼ်းလွႆတႆးလႅင်း လႆႈၽိတ်ႈမွၵ်ႇထိုင် လုမ်းၽွင်းတၢင်ၼွၵ်ႈမိူင်း ဢၼ်ပၵ်းလုမ်းဝႆႉတီႈ တႃႈၵုင်ႈ ၵမ်ႉပႃႈၼမ် လႄႈ ပၵ်းၼွၵ်ႈမိူင်းၽွင်ႈ တင်းမူတ်း မီး 40 မိူင်း။ တေႃႈလဵဝ် ၶႅၵ်ႇၼွၵ်ႈ မိူင်း ဢၼ်မႃးႁွတ်ႈထိုင် တီႈလွႆတႆးလႅင်းသမ်ႉ မိူၼ် မိူင်းဢမေႇရိၵၢၼ်ႇ၊ မိူင်းၼေႃႊဝေႊ၊ မိူင်းသဝိတ်ႉ သလႅၼ်ႊ၊ မိူင်းၼိဝ်ႊသီ လႅၼ်ႊ လႄႈ မိူင်းEU ၸဵမ်ၸိူဝ်းၼႆႉ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ၸဝ်ႈၼႃႈတီႈလုမ်းၽွင်းတၢင်ၼွၵ်ႈမိူင်း ဢၼ်တေလုၵ်ႉတႃႈၵုင်ႈမႃးၼၼ်ႉသမ်ႉ ၵမ်ႈၽွင်ႈ ၶႂ်ႈမႃး၊ ၵမ်ႈၽွင်ႈဢမ်ႇၶႂ်ႈမႃး။ ၸိူဝ်းႁၼ်ထိုင် လွင်ႈငမ်းယဵၼ်ဝႃႈ ၸုမ်း RCSS/SSA ၼႆႉ ပဵၼ်ၸုမ်းလူင်းလၢႆးမိုဝ်းၵိုတ်း တိုၵ်းပတ်းပိုၼ်ႉတူဝ်ႈမိူင်း  NAC ယဝ်ႉ လႄႈ ထုၵ်ႇလီပၼ်ႁႅင်း၊ ၼင်ႇႁိုဝ် လွင်ႈငမ်းယဵၼ်ပေႃး တေယိုၼ်းယၢဝ်း ။


ထႅင်ႈၾၢႆႇၼိုင်ႈၸုမ်းၼိုင်ႈသမ်ႉ ႁၼ်ထိုင်ဝႃႈ ပေႃးၶဝ်ႈႁူမ်ႈပွႆးတီႈလွႆတႆးလႅင်း ၵူဝ်ဢမ်ႇထုၵ်ႇၸႂ်မၢၼ်ႈ၊ သင်ၸိူဝ်ႉဝႃႈ ပၢင်ပွႆးပဵၼ်ၼႂ်းဝဵင်း- ၼႂ်းမိူင်းတႆးသေတီႈတီႈ မိူၼ်ၼင်ႇ တူၼ်ႈတီး၊ လႃႈသဵဝ်ႈ ၸိူဝ်းၼႆႉတႄႉ တေၸၢင်ႈၵႂႃႇလႆႈယူႇ။ ပၢင်ပွႆးၼႆႉသမ်ႉ ၸတ်းႁဵတ်းတီႈလွႆတႆးလႅင်းလႄႈ ဢမ်ႇ ၸႂ်ႈၼႃႈတီႈမၢၼ်ႈၵုမ်းၵမ်။ ၵွပ်ႈၼၼ် ဢမ်ႇပေႃးၶႂ်ႈၵႂႃႇလွႆတႆးလႅင်း- ဝႃႈၼႆ ။


သိုဝ်ႇၶၢဝ်ႇၼွၵ်ႈမိူင်း မွၵ်ႈ 20 ၸုမ်း ဢၼ်တေၶဝ်ႈႁူမ်ႈပွႆးဝၼ်းၸိူဝ်ႉၸၢတ်ႈၸိုင်ႈတႆး 70 ပီ တီႈလွႆတႆးလႅင်းၼႆႉတႄႉ မိူၼ်ၼင်ႇ ၸုမ်းၶၢဝ်ႇ ထႆး၊ ၶႄႇ၊ ၾရင်ႇသဵတ်ႇလႄႈ တႆး ၸဵမ်ၸိူဝ်းၼႆႉ။ လိူဝ်ၼၼ်ႉ မီးပီႈၼွင်ႉတီႈၸမ်/တီႈၵႆ ပီႈၼွင်ႉၼႂ်းမိူင်းတႆး လႃႈသဵဝ်ႈ၊ ထုင်ႉမၢဝ်း၊ ၵျွၵ်ႉမႄး၊ လၢႆးၶႃႈ၊ မိူင်းၵိုင်လႄႈ ပီႈၼွင်ႉတႆး ၼႂ်းမိူင်းၶၢင် တႆးလႅင်၊ တႆးၶမ်းတီႈ ႁူမ်ႈထႅင်ႈလၢႆလၢႆတီႈ ၼပ်ႉမိုၼ်ႇ ။


ၼွၵ်ႈလိူဝ်ၼၼ်ႉ ပီႈၼွင်ႉတႆး ၸိူဝ်းယူႇၼႂ်းမိူင်းထႆး မိူၼ်ၼင်ႇ ၸႄႈတွၼ်ႈၵဵင်းမႆႇ၊ ၵဵင်းႁၢႆး၊ မႄႈႁွင်ႈ သွၼ်၊ ၵုင်းထဵပ်ႈ၊ ၶျူၼ်းပူးလီး၊ ပထုမ်းထႃးၼီး၊ ရယွင်းလႄႈ ဢိၵ်ႇထႅင်ႈလၢႆလၢႆၸႄႈတွၼ်ႈၵေႃႈ ၵႂႃႇၶဝ်ႈႁူမ်ႈ ။


ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇတဵမ် 70 ပီၼႆႉ ၼႂ်းမိူင်းတႆးလၢႆလၢႆတီႈၵေႃႈၸတ်းႁဵတ်း ပၢင် ယႂ်ႇလူင် မိူၼ်ၼင်ႇ ဝဵင်းတူၼ်ႈတီးၵေႃႈ ယူႇတီႈၽွင်းလူင်မိူင်းတႆး တေဢွၼ်ႁူဝ်ၸတ်းႁဵတ်း၊ ဝဵင်းပၢင်လူင်၊ သီႇပေႃႉ၊ မူႇၸႄႈ၊ ပၢင်လွင်း၊ မိူင်းၽျၢၵ်ႈ ဢိၵ်ႇ လၢႆလၢႆၸႄႈဝဵင်း ။