ၵူၼ်းသွင်ၵေႃႉ ၶီႇလူတ်ႉၶိူင်ႈ မႃးပွႆႇမၢၵ်ႇၼႂ်းႁိူၼ်းၽူႈၵွၼ်းပွၵ်ႉ 9 ၸႄႈဝဵင်းၵျွၵ်ႉမႄး မၢၵ်ႇတႅၵ်ႇ ၼႂ်းႁိူၼ်း ၵူၺ်းၵႃႈ လွင်ႈလူႉတၢႆမၢတ်ႇၸဵပ်း ဢမ်ႇမီး ။

ဝၼ်းတီႈ 04/02/2017 ယၢမ်းၵၢင်ၶမ်ႈ 20:30 မူင်း ၵူၼ်းသွင်ၵေႃႉ ဢမ်ႇႁူႉၸိုဝ်ႈ ဢမ်ႇႁူႉၸုမ်း ၶီႈလူတ်ႉၶိူင်ႈသေ ဝိုတ်ႉပွႆႇမၢၵ်ႇၶဝ်ႈႁိူၼ်း မၢၵ်ႇတႅၵ်ႇၼႂ်းႁိူၼ်း ၽူႈၵွၼ်းပွၵ်ႉ 9 ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၵူၺ်းၵႃႈ ဢမ်ႇမီး လွင်ႈမၢတ်ႇၸဵပ်းလူႉတၢႆ ဝႃႈၼႆ ။


ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၸႄႈဝဵင်းၵျွၵ်ႉမႄး ၶဵတ်ႇလိူၵ်ႈတင်ႈ မၢႆ (2) လၢတ်ႈဝႃႈ “ ၸႂ်ႈယဝ်ႉၶႃႈ ပဵၼ်ႁိူၼ်းၽူႈၵွၼ်း ပွၵ်ႉ 9 ဢူးၵျေႃႇဢွင်ႇ။ မၢၵ်ႇဢၼ်ၶဝ်မႃး ဝိုတ်ႉသႂ်ႇၼၼ်ႉ  ပဵၼ်မၢၵ်ႇသႅၼ်းလဵၵ်ႉ၊ ပဵၼ်သႅၼ်း ႁဵတ်းဢဝ်ႁင်းၵူၺ်း၊ သင်ပဵၼ်မၢၵ်ႇယႂ်ႇတႄႉ လႅပ်ႈတေ တုမ်ႉတိူဝ်ႉ ပႃးၵူၼ်းႁိူၼ်းလူးၵွၼ်ႇ၊  ဢၼ်ၼႆႉတႄႉ ၶူဝ်းႁိူၼ်း ၽႃႁိူၼ်း ၵွႆဢိတ်းဢီႈ။ ၵူၼ်းတႄႉ  ဢမ်ႇပဵၼ် သင်” ဝႃႈၼႆ ။


ၸုမ်းဢၼ်မႃးပွႆႇမၢၵ်ႇၼၼ်ႉ ပဵၼ်ၸုမ်းလႂ် ယွၼ်ႉသင်လႄႈ မႃးထိုမ်ႈသႂ်ႇၼႂ်းႁိူၼ်း ၽူႈၵွၼ်းပွၵ်ႉၼႆႉ ဢမ်ႇပႆႇႁူႉလွင်ႈတၢင်းလီလီ။ ယွၼ်ႉဝႃႈ တၢင်းပွတ်းတွၼ်ႈၼႆႉ ၸုမ်းယိပ်းၵွင်ႈၵၢင်ႇတူင်ႉ ၼိုင်ၵႂႃႇမႃးၼမ် ဝႃႈၼႆ ။


ၾၢႆႇၸဝ်ႈၼႃႈတီႈပလိၵ်ႈ ၼႂ်းၸႄႈဝဵင်းၵျွၵ်ႉမႄးၵေႃႈဝႃႈ တေသိုပ်ႇၵူတ်ႇထတ်းၵႂႃႇ- ဝႃႈၼႆ ။


တၢင်းၸႄႈတွၼ်ႈၵျွၵ်ႉမႄး ၼႂ်းၸိုင်ႈတႆး ပွတ်းႁွင်ႇၼႆႉ ၸုမ်းယိပ်းၵွင်ႈၵၢင်ႇ ဢၼ်ၵႂႃႇမႃးတူင်ႉၼိုင် မီးတပ်ႉသိုၵ်းလူင်ပွင်ၸိုင်ႈမၢၼ်ႈ၊ တပ်ႉသိုၵ်းတဢၢင်း TNLA၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSAလႄႈ ၶွင်ႇသီႇ ဢဝ်ၶိုၼ်းၸိုင်ႈတႆး/ တပ်ႉ သိုၵ်းၸိုင်ႈတႆး RCSS/SSA ၸဵမ်ၸိူဝ်း ၼႆႉ ဝႃႈၼႆ ။