ၵူၼ်းမိူင်းပၢႆႈၽေးသိုၵ်း ၸိူဝ်းပၢႆႈမႃးယူႇ သီႇပေႃႉၼၼ်ႉ ဢွၼ်ၵၼ်ပွၵ်ႈၶိုၼ်း တၢင်းၸႄႈ ဝဵင်းမၢၼ်ႈတူင်ႈ 26 မေႃႈၶဝ်ႈ ၵူၼ်းႁိမ်း 90 ၵေႃႉ ။

ဝၼ်းတီႈ 29/01/2017 ယၢမ်းၵၢင်ဝၼ်း 11:30 မူင်း ၵူၼ်းပၢႆႈၽေးသိုၵ်း ၸိူဝ်းယူႇ သဝ်းဝႆႉတီႈ ၼႂ်းဝၢၼ်ႈၵွင်းၼွင်သိၵ်ႉၵျႃး ဢိူင်ႇတႃႈတေႈ ၸႄႈဝဵင်းသီႇပေႃႉၼၼ်ႉ  ဢွၼ်ၵၼ်ပွၵ်ႈၶိုၼ်း 26 မုင်ႉႁေႃ/ႁိူၼ်း၊ ၵူၼ်း 86 ၵေႃႉ။ တိုၵ်ႉၵိုတ်းဝႆႉယူႇ 21 ႁိူၼ်း ႁူဝ်ၵူၼ်း 80 ၵေႃႉ ။


ၸၢႆးဝိၼ်းဢွင်ႇ ၾၢႆႇၸွႆႈထႅမ်ၵူၼ်းပၢႆႈၽေး လၢတ်ႈဝႃႈ “ တေႃႈလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃး ယူႇသဝ်း ၼႂ်းဢိူင်ႈတႃႈတေႈၼႆႉ ပွၵ်ႈမိူဝ်းၶိုၼ်းၵမ်ႈၽွင်ႈယဝ်ႉ။ ၵူၺ်းၵႃႈ ဢမ်ႇပႆႇပွၵ်ႈၶိုၼ်းမိူဝ်းမူတ်း။ ၵူၼ်းပၢႆႈၽေးၸိူဝ်းပွၵ်ႈမိူဝ်းၵမ်ႈၽွင်ႈၼၼ်ႉ ၶဝ်မႆႈၸႂ် တိူၵ်ႇႁႆႈလွၵ်းၼႃးလႄႈ ႁိူၼ်းယေး ယွၼ်ႉဝႃႈ မၢင်ၵေႃႈ မီးတိူၵ်ႇႁႆႈတိူၵ်ႇၼႃးၼမ် မႆႈၸႂ်ၵူဝ်ပိူၼ်ႈဢဝ်လၢႆလႄႈ ဢွၼ်ၵၼ်ပွၵ်ႈၶိုၼ်း။ မၢင်ၵေႃႉ ၸိူဝ်းဢၼ် ဢမ်ႇပွၵ်ႈၶိုၼ်းၼၼ်ႉ ႁိူၼ်းယေးၶဝ် ၺႃးၽဝ်ပႅတ်ႈ၊ ၶူဝ်းၶွင်ႁိူၼ်းယေးၶဝ် ထုၵ်ႇပိူၼ်ႈ ဢဝ်ၵိၼ် ယႃႉလူႉလႅဝ် ၸဵမ်ၸိူဝ်းၼႆႉ ယွၼ်ႉၼၼ် ၸိူဝ်းၶဝ်ဢမ်ႇၶႂ်ႈပွၵ်ႈၵေႃႈမီး” ဝႃႈၼႆ ။


ယၢမ်းလဵဝ် တၢင်းပွတ်းမၢၼ်ႈတူင်ႈ ဢမ်ႇမီးပၢင်တိုၵ်းယႂ်ႇယႂ်ႇလူင်လူင်သေတႃႉ သိုၵ်းလွႆ- သိုၵ်းမၢၼ်ႈ၊ သိုၵ်းလွႆ- သိုၵ်းတႆး တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇလႄႈ တိုၵ်ႉလႆႈၵူဝ်ႁႄ တင်းၵူဝ် တင်းပွၵ်ႈယဝ်ႉ ဝႃႈၼႆ ။


ၵူၼ်းမိူင်းပၢႆႈၽေးသိုၵ်း 150 ပၢႆၼႆႉ ဢွၼ်ၵၼ်ပၢႆႈဢွၵ်ႇမႃး မိူဝ်ႈႁူဝ်လိူၼ်ၻီႊသႅမ်ႊၿိူဝ်ႊ ပီ 2016 ဢွၼ်ၵၼ်ပၢႆႈမႃးယူႇၼႂ်းဝၢၼ်ႈၵွင်းၼွင်သိၵ်ႉၵျႃး ၼႂ်းဢိူင်ႇတႃႈတေႈ မိူၼ် ဝၢၼ်ႈၵုင်းမူင်ႈ ဢိူင်ႇၼမ်ႉႁႆး ၸႄႈဝဵင်းမၢၼ်ႈတူင်ႈ တင်းမူတ်း လင်ႁိူၼ်း 2 လင် ႁူဝ်ၵူၼ်း 7 ၵေႃႉ၊ ဝၢၼ်ႈမေႃႇၼိူဝ် လင်ႁိူၼ်း 3 လင် ႁူဝ်ၵူၼ်း 15 ၵေႃႉ၊ ဝၢၼ်ႈၵွင်းမူး လင်ႁိူၼ်း 7 လင်၊ 21 ၵေႃႉ၊ ဝၢၼ်ႈၵုင်းၺွင်ႇ လင်ႁိူၼ်း 30 လင်၊ 100 ၵေႃႉ၊ ဝၢၼ်ႈမႂ်ႇ လင်ႁိူၼ်း 3 လင်၊ 10 ၵေႃႉ၊ လင်ႁိူၼ်း တင်းမူတ်း 45 လင်၊ ႁူဝ်ၵူၼ်းတင်းမူတ်း 153 ၵေႃႉ ၼႆယဝ်ႉ ။