ပႃႇတီႇႁူဝ်သိူဝ် SNLD ပိုတ်ႇလုမ်း ၵိင်ႇၽႄငဝ်ႈငုၼ်းတီႈၵဵင်းတုင် ၸိုင်ႈတႆး ပွတ်းဢွၵ်ႇၶူင်း မီးၽူႈၶဝ်ႈႁူမ်ႈ 500 ပၢႆ ။

ဝၼ်းတီႈ 31/01/2017 ယၢမ်းၵၢင်ၼႂ် 09:00 မူင်း ပႃႇတီႇႁူဝ်သိူဝ် ပိုတ်ႇလုမ်းၵိင်ႇၽႄငဝ်ႈငုၼ်း တီႈဝၢၼ်ႈၽႃႉၵမ် ပွၵ်ႉ 5 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။


လုင်းၸၢႆးထုၼ်း ႁူဝ်ပဝ်ႈပႃႇတီႇႁူဝ်သိူဝ်(SNLD) ၸႄႈဝဵင်းၵဵင်းတုင် လၢတ်ႈဝႃႈ “ ဢၼ်လႆႈပိုတ်ႇ လုမ်းၼႆႉ မၼ်းပဵၼ်လုမ်းၵိင်ႇၽႄငဝ်ႈငုၼ်းဢၼ်လုၵ်ႉတီႈငဝ်ႈငုၼ်းမႃးပိုတ်ႇထႅင်ႈ  တၢင်းပွတ်း ဢွၵ်ႇၶူင်း။ ၵူၺ်းၵႃႈ လုမ်းပႃႇတီႇၸႄႈဝဵင်းတႄႉဝႆႉၶိုၼ်းမိူၼ်ၵဝ်ႇၸႄႈဝဵင်းၽႂ်ၸႄႈဝဵင်းမၼ်းၶိုၼ်း။ ယူႇတီႈပႃႇတီႇ ႁူဝ်သိူဝ်ႁဝ်းၶႃႈ လႆႈၸႂ်ၵၼ်သေ လိူၵ်ႈၸၢႆးၸိင်ႇၼႃႉ ပဵၼ်ႁူဝ်ပဝ်ႈၵိင်ႇၽႄငဝ်ႈငုၼ်း တီႈၵဵင်းတုင်”  ဝႃႈၼႆ ။


ၼႂ်းဝၼ်းပိုတ်ႇလုမ်းၵိင်ႇၽႄငဝ်ႈငုၼ်းတီႈၵဵင်းတုင်ၼႆႉ ၽူႈယႂ်ႇၵူၼ်းလူင် ၶဝ်ႈႁူမ်ႈပိုတ်ႇပၢင် မွၵ်ႇလၢတ်ႈၶေႃႈၵႂၢမ်း မိူၼ် လုင်းၸၢႆးၼုတ်း ၽူႈၼမ်းၼႂ်းပႃႇတီႇႁူဝ်သိူဝ်၊ ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ၊ ၸၢႆးတၢၼ်းမွင်ႇ ၽူႈၶဝ်ႈၶွမ်ႊမတီႊ ငဝ်ႈငုၼ်း၊ လုင်းၸၢႆးလူင် ၼေႃႇၽူႈတႅၼ်း ဢၼ်တေၶဝ်ႈလိူၵ်ႈတင်ႈသွမ်ႈ ၼႂ်းၵဵင်းတုင် ၸဵမ်ၸိူဝ်းၼႆႉ ဝႃႈၼႆ ။


ၸၢႆးၼုတ်း ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ဝႃႈ-  ၶႂ်ႈႁႂ်ႈပီႈၼွင်ႉတႆး တူင်ႉၼိုင်ၵၢၼ်မိူင်းၼမ်ၼမ်၊ ဢဝ် CSSU ပဵၼ်တူဝ်ယၢင်ႇသေ ဢမ်ႇလူဝ်ႇ ၸႅၵ်ႇပႃႇတီႇ/ ၸုမ်း ၽႂ်မၼ်း ။


ပၢင်ပိုတ်ႇလုမ်းၵိင်ႇၽႄလုမ်းငဝ်ႈငုၼ်းပႃႇတီႇ SNLD တီႈၵဵင်းတုင်ၼႆႉ မီးပႃႇတီႇၼူၵ်ႉယုင်း၊ ပႃႇတီႇသၢင်ႇသီႈ၊ ပႃႇတီႇသိူဝ်ၽိူၵ်ႇ၊ ပႃႇတီႇၵွင်ၸႆး၊ ပႃႇတီႇဢႃးၶႃႇ၊ ပႃႇတီႇလႃးႁူႇ ၸိူဝ်းၼႆႉ မႃးၶဝ်ႈႁူမ်ႈၸွမ်း။