ၶၢဝ်ႇထႆးရတ်ႉႁၢႆးငၢၼ်းဝႃႈ ၸဝ်ႈၼႃႈတီႈပလိၵ်ႈထႆး တီႉၺွပ်းၵူၼ်းတႆး3ၵေႃႉပေႃႈမႄႈလုၵ်ႈ ၵိၼ် ၸၢင်ႈသူင်ႇယႃႈမႃႉသႅၼ်မဵတ်ႉသေ တေႃႉၶဝ်ႈမိူင်းထႆးလႄႈၺႃးတီႉ တီႈဝဵင်းၵဵင်းႁၢႆး မိူင်းထႆး ပွတ်းႁွင်ႇ ။

ဝၼ်းတီႈ30/01/2017 ၸဝ်ႈၼႃႈတီႈ ပလိၵ်ႈထႆး ၸႄႈတွၼ်ႈၵဵင်းႁၢႆး ပႂ်ႉၵူတ်ႇထတ်း ယႃႈမဝ်းၵမ် ၸွမ်းသဵၼ်ႈတၢင်း တီႉလႆႈၶဝ်3ၵေႃႉပေႃႈမႄႈလုၵ်ႈ ၵိုၵ်းယႃႈမဝ်းၵမ်50မတ်ႉ ပဵၼ်ယႃႈမႃႉ 100,000 မဵတ်ႉ ။ ၽွင်းလုၵ်ႉလႅၼ်လိၼ် တႆး-ထႆး ပွတ်းၵဵင်းႁၢႆးဢၢင်ႈၵႂႃႇသူင်ႇ တီႈမိူင်းၽဵတ်ႊသပုၼ်ႊ - ဝႃႈၼႆ ။


ၸၢႆးၼႆး ပိုတ်ႇလၢတ်ႈတီႈပလိၵ်ႈထႆးဝႃႈ -“လႆႈၵႂႃႇဢဝ်ယႃႈမဝ်းၵမ်တီႈ ၼႂ်းဝဵင်းၵဵင်းႁၢႆး တေဢၢၼ်း ဢဝ်ၵႂႃႇသူင်ႇ တီႈမိူင်းၽဵတ်ႊသပုၼ်ႊ ၵိၼ်ၸၢင်ႈတေႃႉ ဝႃႈတေလႆႈငိုၼ်းထႆး 250,000 ဝၢတ်ႇ ”။


ၶၢဝ်ႇထႆးရတ်ႉႁၢႆးငၢၼ်းဝႃႈ- ၵူၼ်းၵိၼ်ၸၢင်ႈတေႃႉယႃႈ ၸၢႆးၼႆး ၽူမ်းသႅၼ် ဢႃယု 21ပီ ၵေႃႉပဵၼ် မေးၼၢင်းမၼ်းၸၢႆး ၼၢင်းသုသၿႃး ၽူမ်ႊသႅၼ်ဢႃယု20 ပီဢၼ်ပႃးလုၵ်ႈယိင်းဢွၼ်ႇမွၵ်ႈ3 ၶူပ်ႇၼၼ်ႉ - ဝႃႈပဵၼ်တႆး။ ၵူၺ်းၵႃႈပဵၼ်တႆးယူႇမိူင်းလႂ်၊ လၵ်းထၢၼ်လွင်ႈဝႃႈၶဝ်သၢမ်ၵေႃႉပေႃႈမႄႈ လုၵ်ႈ ပဵၼ်တႆးၼႆၼၼ်ႉၵေႃႈဢမ်ႇၼႄသင်ဝႆႉ ။